15/08/2026
大家睇A-Level放榜，好多焦點都落喺邊個地區、邊類學校表現較好，所以我就唔寫嘞。另一樣我關注係Gender Gap（性別差距）變化，一來我之前教電腦男女比例本身係重災區，二來依家教女校，所以對男女學習分別都係我比較有興趣睇既。
根據The Guardian，考A*同A嘅比例上，男生近年逐漸反超前女，而且差距喺今年拉開到整整一個百分點。（新聞連結在留言）
數據顯示今年Maths同Further Maths等數理科目整體表現提升，直接拉高咗男學生拎取A/A*嘅比例。加上男學生本身喺數理同經濟科既報考基數較大，科目表現自然直接反映喺整體比例上。
另一個有趣（但一啲都唔出奇既）既現象，係睇返過去十幾年嘅統計，傳統筆試（Summative Examination）同疫情期間嘅「教師評估」（TAGs/CAGs）有相反既結果：喺2020–21年用教師評估嗰陣，女生嘅A/A*比例一度爆升仲領先男生；但當公開試回歸，男生嘅表現就好過女生。
我估呢個現象背後可能反映咗唔同評估工具同非認知特質（Non-cognitive traits）嘅互相影響。例如喺評估模式同持續性方面，教師評估係依賴平時作業同課堂表現，女生喺自律性、持續性作業管理同組織能力上通常都比男生穩定；而傳統筆試係一試定生死，男生短期衝刺或者會有更高嘅承受同爆發力。另外，喺心理壓力同自信心，男生喺面對標準化筆試時可能普遍擁有較高嘅自信，而女生因為通常有更高既考試焦慮，喺咁高壓既筆試表現好多時都有影響。敝校就有好多女生明明好叻但考試會panic attack要去厠所嘔或者要去冷靜，我哋有人手提供好多支援但我估唔夠資源既女生就會因為咁無咗啲考試時間。
不過，另一樣值得留意既係，雖然男生同女生喺A*同A嘅「百分比」差距擴大。但因為考A-Level嘅女生人數多啲，實際上攞到A*同A既女仔『絕對人數』依然係高啲。
所以，如果淨係睇人頭，攞A*同A嘅女生人數依然多過男仔。
所以，每次見到Gender Gap討論，都提醒老師要諗下評估制度嘅本質。數據可以幫我哋睇見趨勢，但教育嘅核心，始終係點樣透過多元嘅評估方式，讓每一個學生都可以喺適合佢哋嘅賽道上發揮所長。
#英國生活
#英國老師
#英國中學
