Dr. Sevda Qafarova - Endokrinoloq

09/08/2026

MASCHSEEFEST 2026

Bu, sadəcə bir festival deyil. Bu Hannoverin bir ənənəsi ,yay axşamlarının ayrılmaz hissəsidir.
Hər il Maschsee musiqi, işıqlar, insanlar və saysız-hesabsız gözəl anlarla canlanır.
Bu axşam isə 2026-cı ilin Maschseefestinin son gecəsidir. Gözəl bir axşam, xoş söhbət və bu xüsusi ab-hava ilə festivalı yola salırıq.

Gələn il yenidən görüşərik.

01/08/2026

Hannover vibes

29/07/2026

Bu gün ömrümün 42-ci ilinə qədəm qoyuram.
Yaşadığım hər an, keçdiyim hər yol üçün Tanrıya sonsuz şükür edirəm. İnanıram ki, həyatımda yaşadığım hər şey — yaxşısı da, pisi də — məni bugünkü günə hazırlayıb. Hər yaşanmış hadisə mənə bir dərs, bir təcrübə qazandırıb.
Keçən il ürəyimdə tutduğum arzuların gerçəkləşdiyini görmək mənim üçün ən böyük xoşbəxtliklərdən biri oldu. Şükürlər olsun! Amma insanın arzuları heç vaxt bitmir. Bu il də yeni ümidlərim, yeni diləklərim var. Ümid edirəm ki, gələn il ad günümdə yenə eyni minnətdarlıqla yazacam: “Şükür ki, keçən ilki diləyim də həyata keçdi.”
Nə yaxşı ki, mən varam. Nə yaxşı ki, həyatımda ailəm, dostlarım və sevdiklərim var. Hər birinizə həyatımda olduğunuz, günlərimi gözəlləşdirdiyiniz və bu yolu mənimlə birlikdə addımladığınız üçün ürəkdən təşəkkür edirəm.
Yeni yaşımın sağlamlıq, sevinc, rahatlıq və gerçəkləşən arzularla dolu olması diləyi ilə…

18/07/2026

Xorvatiyadakı məşhur Biokovo Skywalka getmişdik. Amma bizim üçün günün ən yaddaqalan hissəsi Skywalk deyil, ondan sonra başladığımız zirvə yolu oldu. Maşınla Biokovo dağının ən yüksək nöqtəsi – Sveti Jure (1762 m) zirvəsinə qalxdıq.

Ora aparan yol bəlkə də zirvənin özü qədər həyəcanverici idi. Cəmi bir avtomobilin rahat keçə biləcəyi qədər dar asfalt yol, ard-arda düzülən kəskin döngələr, bir tərəfdə sıldırım qayalar, digər tərəfdə isə yüzlərlə metr dərinliyə enən uçurum… Qarşıdan maşın gələndə bəzən geri hərəkət edib yolun bir az genişləndiyi hissəyə qədər gözləmək lazım gəlirdi. Hər döngədən sonra qarşına tamam başqa bir mənzərə çıxır, yüksəldikcə Adriatik sahili kiçilir, dənizin mavisi isə üfüqlə birləşirdi.

Dağa qalxdıqca təbiət də göz önündə dəyişirdi. Aşağı hissələrdə sıx şam meşələri, yüksəyə qalxdıqca yerini dağ şəraitinə uyğun ağaclar və kolluqlara buraxır, zirvəyə yaxın isə yaşıllıq azalaraq boz əhəngdaşı qayalarına və sərt dağ landşaftına çevrilirdi.

Yolun ən maraqlı anlarından biri isə qarşımıza çıxan və tam sərbəst dolaşan vəhşi atlar oldu. Fərqli bir təcrübə idi🙂.

Zirvədən baxanda Makarska Rivierası, Brela, Baška Voda, Tučepi, Podgora və Adriatik dənizində səpələnmiş adalar ayaqlarımızın altında uzanırdı. Bəzi yerlər şəkillərdə gözəl görünür, bəzilərinin gözəlliyini isə yalnız orada olanda hiss edirsən. Bura da belə yerlərdəndir məncə.

15/07/2026

Tətilin son 2 günü…
Bir az da dəniz, bir az da günəş, bir az da xatirələr. Sonra yenidən gündəlik həyata dönüş.

13/07/2026

Dünənki gəzinti planımızı paylaşım. Spontan qərar verdik ki, sahildən bir az uzaqlaşıb Dalmaçiyanın daxili bölgələrini də kəşf edək. Bu marşrut bizi möhtəşəm Cetina dərəsinə, Imotskidəki heyrətamiz Mavi Gölə, yerli şərabçılıq təsərrüfatına və günün sonunda tarixi Trogirə apardı. Bir günün içində həm təbiət, həm tarix, həm də yerli ləzzətlərlə dolu unudulmaz bir səyahət oldu. Buraları gəzsəniz peşman olmazsınız😀

10/07/2026

Xorvatiya 1991-ci ildə ( təzəlikcə🙂) müstəqilliyini elan edib. Bu gün isə Adriatik sahili, yüzlərlə adası və kristal kimi təmiz dənizi ilə Avropanın ən çox seçilən istirahət ölkələrindən biridir.
Bu şəkilləri Brelada çəkmişik. Makarska Rivyerasının ən gözəl qəsəbələrindən biri hesab olunur.
Mənim gördüyüm qədərilə burada Antalyadakı kimi all inclusive, böyük ərazisi və attraksionları olan nəhəng otellər yoxdur. Daha çox kiçik ailə otelləri, apartamentlər və tətil evləri var.
Amma bunun əvəzində möhtəşəm mənzərələr, şəffaf Adriatik dənizi, şam ağaclarının ətri və gün boyu eşidilən yay cırcıramalarının səsi bu yerlərə tamam başqa bir ruh qatır.
Fürsətiniz olsa gəlib buraları görün🙂

07/07/2026

Anı yaşamağı hələ indi-indi öyrənirəm. Gələcəyin qorxusu ilə yaşamaq, problemləri tək həll etməyə çalışmaq, hamını düşünmək… Niyə bunların hamısını çiyinlərimizdə daşıyaq ki
Bəzən sadəcə dayanmaq, nəfəs almaq, ətrafına baxmaq kifayətdir. Həyat həmişə nəyi isə çatdırmaq, həll etmək yarışından ibarət deyil. Bəzən ən gözəl anlar heç nəyi həll etməyə çalışmadığın, sadəcə yaşadığın anlardır.
Çünki bu gün bir də geri qayıtmayacaq. Və mən bunu gec də olsa, öyrənməyə başlamışam.☺️

30/05/2026

Canlarım gəlib 😍😍.
2 il əvvəl heç ağlıma da gəlməzdi ki, təkrar ailə quracam, üstəlik alman vətəndaşı ilə və yenidən Almaniyaya köçəcəm. Hələ bu da azmış kimi həyat yoldaşımın dostu da bacımla ailə quracaq, o da ölkə dəyişəcək vəəəə bizə qonaq gələcəklər😀😀. Hayat işte😀

23/05/2026