10/09/2026
ღირსება და ავტონომია: ახალი პერსპექტივა ნეიროგანვითარების დარღვევების მქონე ბავშვებისა და მათი ოჯახებისთვის
როგორ დავიცვათ ბავშვისა და ოჯახის ღირსება და ავტონომია მაშინ, როცა ცხოვრება ნეიროგანვითარების დარღვევასთან ერთად მიმდინარეობს?
ამ საკითხზე ქეთი არჯევანიძესთან ერთად ვისაუბრეთ კონფერენციის ფარგლებში
🔹 რას ნიშნავს ავტონომიის პატივისცემა პრაქტიკაში?
🔹 როგორ ავაშენოთ თანამშრომლობითი, ღირსების დამცველი მიდგომა ოჯახებთან?
🔹 რა როლი აქვს სპეციალისტს ამ პროცესში?
შემოგვიერთდით და გაიზიარეთ ახალი პერსპექტივები! 🌿
ნეიროგანვითარებითი დარღვევების მქონე ბავშვები და მოზარდები ხშირად ერთდროულად სარგებლობენ სამედიცინო, ფსიქოლოგიური, ქცევითი, საგანმანათლებლო და სოციალური სერვისებით. მნიშვნელოვანია ყურადღება მიექცეს, რამდენად იცავს მომსახურება მათ ღირსებას, ითვალისწინებს მათ ინდივიდუალურ საჭიროებებს, მოსაზრებებსა და არჩევანს და ხელს უწყობს საკუთარ ცხოვრებაზე კონტროლის გაძლიერებას.
სწორედ ამ თემატიკას მიმოიხილავს ქეთი არჯევანიძე ბავშვთა ნეიროგანვითარების კონფერენციაზე.
ქეთი არის ფილოსოფიის დოქტორანტი ეთიკისა და ბიოეთიკის მიმართულებით; მისი სადოქტორო კვლევა ადამიანის მორალის ბიოგაძლიერების ეთიკას ეხება. იგი არის განათლებისა და განვითარების აკადემიის აღმასრულებელი დირექტორი და საქართველოს დაუნის სინდრომის ასოციაციის განათლებისა და განვითარების პროგრამების ხელმძღვანელი. მისი აკადემიური და პრაქტიკული საქმიანობა აერთიანებს თვითადვოკატირების, ღირსების, ავტონომიისა და ინფორმირებული არჩევანის საკითხებს.
მოხსენება განიხილავს თვითადვოკატირების ძირითად პრინციპებს, ავტონომიას, თვითგამორკვევას, ინფორმირებულ მონაწილეობასა და მხარდაჭერით გადაწყვეტილების მიღებას, და მათ მნიშვნელობას ბავშვებსა და მოზარდებთან მუშაობის პრაქტიკაში.
მომსახურების მიღების პროცესში გადაწყვეტილებებს უმეტესად ზრდასრულები იღებენ: განსაზღვრავენ, რა არის ბავშვისა თუ მოზარდისთვის სასარგებლო, რომელ მიზნებზე უნდა იმუშაოს, როგორ უნდა მოიქცეს და რას უნდა მიაღწიოს. თუმცა სერვისის ეფექტიანობასთან ერთად მნიშვნელოვანია შეფასდეს, რამდენად რჩება ბავშვი ან მოზარდი საკუთარი ცხოვრების აქტიურ მონაწილედ და რა გავლენა აქვს ამ სერვისებს მისი დამოუკიდებელი ცხოვრების ხარისხზე.
მოხსენება თვითადვოკატირების ძირითად პრინციპებს დაუკავშირებს ბავშვებსა და მოზარდებთან მუშაობის ყოველდღიურ პრაქტიკას: ღირსების დაცვას, მათი მოსაზრებებისა და გამოცდილების მოსმენას, თვითგამორკვევის მხარდაჭერას, ინფორმაციის მათთვის გასაგები და ხელმისაწვდომი ფორმით მიწოდებას, თანხმობისა და უარის მნიშვნელობას, მხარდაჭერით გადაწყვეტილების მიღებასა და დამოუკიდებელი ცხოვრებისათვის თანდათანობით მომზადებას.
განვიხილავთ განსხვავებას დაცვასა და ზედმეტ კონტროლს, ასევე მხარდაჭერასა და ჩანაცვლებულ გადაწყვეტილებას შორის.
მონაწილეებს შევთავაზებთ პრაქტიკულ კითხვებს, რომელთა დახმარებითაც შესაძლებელი იქნება შეფასდეს, რამდენად აძლიერებს კონკრეტული სერვისი ბავშვისა და მოზარდის ავტონომიას, თავისუფალ არჩევანს, გადაწყვეტილებებში მონაწილეობასა და საკუთარი "მეს" გამოხატვის შესაძლებლობას.
-------------------------
2026 წლის 21-22 ნოემბერს ქუთაისი უმასპინძლებს ბავშვთა ნეიროგანვითარებითი დარღვევებისადმი მიძღვნილ მულტიდისციპლინურ კონფერენციას, რომელიც გააერთიანებს სხვადასხვა პროფესიის სპეციალისტებს, მკვლევარებს, სტუდენტებსა და რეზიდენტებს.
კონფერენციაზე სარეგისტრაციო ბმული: https://docs.google.com/forms/d/e/1FAIpQLScB-FHO3LZviSPe7Ht9Qi2s4ecOOK0ZQhHWgQNpIuRmYJ1g-w/viewform
