04/11/2021
3 ნოემბერს 21.00 ასოციაციის პრეზიდენტის, პროფესორ დიმიტრი ნადირაშვილის ინიციატივით გაიხსნა "გეშტალტთერაპიული კლუბი", სადაც ონლაინ - ZOOM-ის პლატფორმაზე ასოციაციის მასშტაბით შეიკრიბა საქართველოს გეშტალტთერაპევტთა საზოგადოება.
შეხვედრაზე, პროფესორმა დიმიტრი ნადირაშვილმა გააკეთა მოხსენება, თანამედროვე გეშტალტთერაპიისთვის საეტაპო მნიშვნელობის მქონე, ჯანი ფრანჩესეტის ნაშრომზე "ტკივილი და სილამაზე: ფსიქოპათოლოგიიდან კონტაქტის ესთეტიკამდე“, რომელიც ავტორმა 2011 წელს, პალერმოში (სიცილია) იტალიის გეშტალტთერაპევტთა კონფერენციაზე წარადგინა. მასში ფენომენოლოგიურ ჭრილშია განხილული და აღწერილი გეშტალტთერაპიის განვითარების ახალი გზები, კერძოდ მკურნალობაში ტკივილის და სილამაზის ახალი ღირებულებითი მნიშვნელობა: ტკივილის დისტილაციით, მისი სილამაზედ გარდაქმნის პროცესი.
დიმიტრი ნადირაშვილმა ქართული და მსოფლიო კულტურის ფონზე წარმოაჩინა ტკივილისა და სილამაზის ფენომენოლოგიის მნიშვნელობა და გეშტალტთერაპიაში მისი პრაქტიკული გამოყენების შესაძლებლობები.
პროფესიული თემის წარმომადგენელმა დამსწრე საზოგადოებამ დიდი ინტერესით და სიამოვნებით მოისმინა მოხსენება. დასასრულს გაიმართა თემაში გამოკვეთილი საკითხების ანალიზი და ინდივიდუალურად ღირებულ ასპექტებზე მსჯელობა.
საზოგადოებამ მხარი დაუჭირა პრეზიდენტის ინიციატივას კლუბის შეხვედრები შედგეს თვეში ერთხელ, სადაც წინასწარ დაგეგმილი პროგრამის მიხედვით, განხორციელდება თანამედროვე გეშტალტთერაპიული ლიტერატურის, სტატიების განხილვა და ანალიზი, რაც სპეციალისტების და სტუდენტების კვალიფიკაციის ამაღლებას შეუწყობს ხელს. პრეზიდენტის შეთავაზებით, ასოციაციის წევრები მას ელექტრონული ფოსტით - [email protected] გაუგზავნიან თავიანთ მოხსენებაში განსახილველი წიგნის/სტატიის/სამეცნიერო ნაშრომის სათაურს, რის საფუძველზეც შეიქმნება „გეშტალტთერაპიული კლუბის“ მოხსენებათა სია და გეგმა.
https://www.facebook.com/gagt.ge/posts/748123253255785
