15/02/2021
#პროსტატიტი
#გვესაუბრება #უროლოგი
#გიორგიადეიშვილი
❓ რა არის პროსტატა?
პროსტატა ანუ წინამდებარე ჯირკვალი ადამიანის ორგანიზმში კუნთოვან-ჯირკვალოვანი ორგანოა. მდებარეობს მცირე მენჯში შარდის ბუშტის და სწორი ნაწლავის მიმდებარედ. წინამდებარე ჯირკვალი გარს ერტყმის შარდსადენს, რომელსაც მისი პროსტატული ნაწილი ეწოდება, სწორედ ამ ზონაში ხდება პროსტატული სეკრეტის გამოყოფა და წარმოადგენს შარდის გატარების მნიშვნელოვან სეგმენტს.
❓ რა არის პროსტატიტი?
პროსტატიტი, ანუ წინამდებარე ჯირკვლის ანთება - ეს არის დაავადება რომელის მოიცავს სხვადასხვა სიმპტომებს და განპირობებულია ორგანოში არსებული ანთებითი და/ან ინფექციური პროცესებით.
გამომწვევის მიხედვით გვხვდება ბაქტერიული და არაბაქტერიული პროსტატიტი, რომელიც თავის მხრივ შეიძლება იყოს ინფექციური და არაინფექციური/ანთებითი.
მნიშვნელოვანია გამოვყოთ პროსტატიტი, რომელიც განვითარებულია არანამკურნალები სქესობრივი გზით გადამდები დაავადებებისგან.
არსებობს მწვავე და ქრონიკული პროსტატიტის ფორმები. მწვავედ მიიჩნევა დაავადება რომელიც მოულოდნელად და სწრაფად იწყება, ხოლო ქრონიკულად ითვლება ისეთი პროსტატიტი რომლის სიმპტომები 3 თვეზე მეტ ხანს გრძელდება და ახასიათებს დუნე მიმდინარეობა.
❓ რა სიმპტომები ახასიათებს პროსტატიტს?
შარდვის აქტის დარღვევა რაც გამოიხატება ხშირი, წყვეტილი, გაძნელებული და მტკივნეული შარდვით, უპირატესად მოშარდვის დასრულებისას, მოშარდვის უეცარი ძლიერი სურვილი, მოშარდვის შემდეგ დაუკმაყოფილებლობის შეგრძნება.
ტკივილი სხვადასხვა ლოკალიზაციის და ინტენსივობის: შორისის და საზარდულის მიდამოებში, სათესლე პარკის და ასოს საპროექციოდ, მუცლის ქვემო და გავის არეებში.
მწვავე პროსტატიტის დროს ეს სიმპტომები უფრო მძაფრად აღიქმება და აგრეთვე ხასიათდება სხეულის ტემპერატურის მომატებით, ციებ-ცხელებით და საერთო სისუსტით.
ზემოთ ჩამოთვლილი სიმპტომების არსებობა ინდივიდუალურია, დაავადება შესაძლებელია მიმდინარეობდეს როგორც ერთი ასევე მრავალი სიმპტომის თანხლებით.
❓ რა არის პროსტასტიტის დიაგნოსტიკისთვის აუცილებელი?
📍 უროლოგის კონსულტაცია!
📍 პროსტატის ულტრაბგერითი გამოკვლევა (ექოსკოპია)
📍 სპერმის ბაქტერიოსკოპიული და ბაქტერიოლოგიური ანალიზი
📍 შარდის საერთო და ბაქტერიოლოგიური ანალიზი
📍 შარდში და სპერმაში, დღეს არსებული ყველა პათოგენური სქესობრივი გზით გადამდები ინფექციების გამოვლენა პოლიმერაზა ჯაჭვური რეაქციით.
❓ რა არის პროსტატიტის მკურნალობის ოქროს სტანდარტი?
ანტიბაქტერიული თერაპია და/ან ანთების საწინააღმდეგო არასტეროიდული პრეპარატების გამოყენება წარმოადგენს პროსტატიტის მკურნალობის თანამედროვე სტანდარტს. პრეპარატების არჩევა და მათი მიღების ხანგრძლივობა დამოკიდებულია ლაბორატორიულ/ინსტრუმენტული კვლევების შედეგებსა და არსებული ანთებითი/ინფექციური პროცესის ხანგრძლივობაზე.
P.S.
მამაკაცებს ნებისმიერ ასაკში შეიძლება განუვითარდეთ პროსტატიტი. მიუხედავად საყოველთაოდ გავრცებული მოსაზრებისა დროული/ზუსტი დიაგნოსტირებისა და სწორი/თანამედროვე მკურნალობის შედეგად პროსტატიტი სრულად განკურნებადია.
