ფსიქიკური ჯანმრთელობის და ნარკომანიის პრევენციის ცენტრი

01/09/2026

საქართველოს ჯანდაცვის სამინისტრო ულოცავს ექიმს, მეცნიერს, პროფესორსა და საქართველოს ყოფილ ჯანდაცვის მინისტრს, გელა ლეჟავას, 90 წლის იუბილეს.

ბატონი გელა ლეჟავას მრავალწლიანი პროფესიული და სამეცნიერო მოღვაწეობა საქართველოს ჯანდაცვის სფეროს განვითარების მნიშვნელოვან ეტაპებს უკავშირდება. მის საქმიანობას განსაკუთრებული ადგილი ეკავა სამედიცინო მეცნიერებისა და ნარკოლოგიის მიმართულებების განვითარებაში, პროფესიული ცოდნის გაღრმავებასა და ახალგაზრდა თაობების მომზადებაში. იკავებდა საქართველოს ჯანდაცვის მინისტრის თანამდებობას 1978-1986 წლებში.

დღესაც, 90 წლის ასაკში, ბატონი გელა ლეჟავა აგრძელებს პროფესიულ საქმიანობას და ფსიქიკური ჯანმრთელობისა და ნარკომანიის პრევენციის ცენტრში მუშაობს, რითაც კვლავ აქტიურად ემსახურება სფეროს განვითარებასა და პროფესიული გამოცდილების გაზიარებას.

გელა ლეჟავა არის არაერთი სამეცნიერო ნაშრომისა და მონოგრაფიის ავტორი და თანაავტორი. მისი პროფესიული ღვაწლი აღინიშნა ღირსების ორდენით.

ვუსურვებთ ბატონ გელას ჯანმრთელობას, კეთილდღეობასა და ხანგრძლივ სიცოცხლეს.

26/05/2026

27/03/2026

ფსიქოტროპული მედიკამენტების რეფორმის ფარგლებში, მედიკამენტების ელექტრონული რეცეპტის გაცემის წესში ცვლილებები შევიდა. ახალი წესი 1-ლი აპრილიდან ამოქმედდება და მიზნად ისახავს ფსიქოტროპული მედიკამენტების მიმოქცევაზე კონტროლის გამკაცრებას, მათი არამიზნობრივი გამოყენებისა და არასათანადო მოხმარების პრევენციას.

ცვლილების თანახმად, რეცეპტით მედიკამენტის გაცემის მაქსიმალური რაოდენობა განისაზღვრა: სრულწლოვანი პაციენტისთვის – არაუმეტეს 14 დღის მარაგით, ხოლო არასრულწლოვანისთვის – არაუმეტეს 30 დღის მარაგით. ახალი რეცეპტის გამოწერა დასაშვებია იმ შემთხვევაში, თუ პაციენტს დარჩენილი აქვს არაუმეტეს 5 დღის მარაგი.

ამავე წესით, გამოწერილი ფსიქოტროპული მედიკამენტის სადღეღამისო დოზა არ უნდა აღემატებოდეს ამავე პრეპარატის ინსტრუქციით განსაზღვრულ მაქსიმალურ ზღვარს. კონკრეტული მედიკამენტის დანიშვნის აუცილებლობა კი ექიმის მიერ დასაბუთებული უნდა იყოს პაციენტის სამედიცინო ისტორიაში. დოზის ცვლილების საჭიროების შემთხვევაში, ექიმმა უნდა გაითვალისწინოს პაციენტთან არსებული დარჩენილი მედიკამენტის რაოდენობა. რეგულაცია ასევე განსაზღვრავს წესებს იმ შემთხვევებისთვის, როდესაც პრეპარატი დაკარგულია, დაზიანებულია ან განადგურებულია.

ცვლილებები უკავშირდება სამედიცინო და ფარმაცევტული საქმიანობის რეგულირების სააგენტოს მიერ გამოვლენილ დარღვევებს, როდესაც ფსიქოტროპული მედიკამენტები რიგ შემთხვევებში ინიშნებოდა სათანადო დასაბუთების, დიაგნოსტირებისა და კონსულტაციის გარეშე, მათ შორის – გადაჭარბებული დოზებითა და შესაბამისი ნებართვის არმქონე ექიმების მიერ.

საზოგადოებისთვის ცნობილია, რომ აღნიშნული დარღვევებისთვის, პროფესიული განვითარების საბჭომ 10 მედიკოსს პროფესიული პასუხისმგებლობა უკვე დააკისრა. საბჭოს წევრები შეთანხმდნენ, რომ რისკების შემცირების მიზნით აუცილებელი იყო კონტროლის მექანიზმების კიდევ უფრო დახვეწა და გამკაცრება.

მსგავსი დარღვევების პრევენცია რჩება ჯანდაცვის სამინისტროს პრიორიტეტად და ფსიქოტროპული მედიკამენტების დანიშვნისა და გაცემის პროცესზე ზედამხედველობა კიდევ უფრო გაძლიერდება.

#ჯანდაცვა2026

23/01/2026

ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მიხეილ სარჯველაძის ხელმძღვანელობით, პროფესიული განვითარების საბჭოს სხდომა გაიმართა, სადაც ფსიქოტროპული მედიკამენტების დანიშვნისთვის კონტროლის გამკაცრების აუცილებლობაზე იმსჯელეს.
ჯანდაცვის სამინისტრომ ფსიქოტროპული მედიკამენტების გაცემის პრაქტიკა შეისწავლა, სადაც მნიშვნელოვანი ნაკლოვანებები და რისკები გამოვლინდა. საბჭოს სხდომაზე აღინიშნა, რომ ექიმების მიერ, ფსიქოტროპული მედიკამენტების რეცეპტების გაცემა ხდებოდა დასაბუთების, დიაგნოსტირებისა და პაციენტთან კონსულტაციის გარეშე. ცალკეულ შემთხვევებში, ფსიქოტროპული მედიკამენტების რეცეპტს გასცემდა ექიმი, რომელსაც შესაბამისი ნებართვა არ ჰქონდა. ასევე, მედიკამენტი გაიცემოდა, დღიურ დოზასთან შედარებით, ორჯერ და სამჯერ დიდი დოზით.
საბჭოს წევრების განცხადებით, ფსიქოტროპული მედიკამენტების გაცემის მანკიერი პრაქტიკის აღმოფხვრის პროცესში, სახელმწიფოსთან ერთად, მნიშვნელოვანია ექიმების როლი და პასუხისმგებლობა.
ჯანდაცვის მინისტრის განმარტებით, შესწავლისა და ანალიზის შედეგად გამოვლენილი ფაქტები სცილდება სამართლებრივ ნორმებს, რასაც შესაბამისი რეაგირება მოჰყვება. იგეგმება ცვლილებები შესაბამის ნორმატიულ აქტებში, რათა მედიკამენტების არაკეთილსინდისიერად გაცემის რისკები მინიმუმამდე შემცირდეს და პაციენტების უსაფრთხოება მაქსიმალურად იყოს უზრუნველყოფილი. კონკრეტული საქმეები, შესწავლის მიზნით, საგამოძიებო უწყებებს გადაეცემა, საბჭო კი ექიმების პროფესიული პასუხისმგებლობის საკითხზე მსჯელობას გააგრძელებს.
პროფესიული განვითარების საბჭოს შემადგენლობაში შედიან: ჯანდაცვის სამინისტროსა და მისი დაქვემდებარებული უწყებების, სამედიცინო დაწესებულებებისა და დარგობრივი ასოციაციების წარმომადგენლები. ასევე - პარლამენტის ჯანმრთელობის დაცვისა და სოციალურ საკითხთა კომიტეტის წევრები. საბჭო გადაწყვეტილებას ხმათა უმრავლესობით იღებს.
#ჯანდაცვა2026

20/11/2025

ფსიქიკური ჯანმრთელობის და ნარკომანიის პრევენციის ცენტრი ფსიქოლოგიის ფაკულტეტის კურსდამთავრებულთათვის, სამაგისტრო და საბაკალავრო სწავლების სტუდენტებისთვის იწყებს კლინიკური ფსიქოლოგიის პრაქტიკულ კურსს, კლინიკური ფსიქოლოგის მარინე გოგოხიას ხელმძღვანელობით.

კურსი იწყება 2025 წლის პირველი დეკემბრიდან.

პრაქტიკული სწავლების კურსი ჩატარდება ფსიქიატრიული მიმართულების სტაციონარის ბაზაზე. კურსი მოიცავს 30 აკადემიურ (სამუშაო) საათს.

მსმენელებს საშუალება ექნებათ შეისწავლონ ბენეფიციართა (პაციენტთა) პათოფსიქოლოგიური დიაგნოსტირება, რომელიც დაფუძნებულია კვლევის, როგორც ტრადიციულ, ასევე უახლეს კლინიკურ-ფსიქოლოგიურ (ფსიქომეტრულ და ფსიქოპროექციულ) მეთოდებზე.

დაინტერესებული პირების კოორდინაციას უზრუნველყოფს ადამიანური რესურსების განყოფილების მთავარი სპეციალისტი ხათუნა ბაბუნაშვილი khatuna.babunashvili@mhpa
საკონტაქტო ტელეფონი 599896532 ; 595031381

სამუშაო საათები ორშაბათი-პარასკევი 09:30 – 16:00