10/07/2026
以下內容獲得病患和家人同意下發佈:
上星期一位新的老友記嚟睇病，一位50幾歲已退休嘅女兒和工人姐姐扶住老友記入嚟診室仲攞住一本筆記詳詳細細的講述父親的病情和生活細節的所有數據，詳細到可以做一個ppt。報告完畢後女兒話要去買XX保健品要工人姐姐睇實個老友記。女兒一走咗我就開始同老友記傾吓病情，點知講吾夠十句老友記突然眼紅同我講：「醫師呀，真係好攰。」原來佢個女又買咗隻新嘅智能手錶俾佢，話可以睇心跳、血氧、仲有跌倒警報，連瞓覺反幾多次身都check到。個女仲要朝朝晚晚打嚟問：「阿爸你食咗藥未呀？有冇頭暈？今日出咗街未？」老友記苦住臉話：「我依家連落樓下公園行個圈，都要預先『報告』，搞到我好似坐監咁。」
我一路聽，一路幫佢把脈，脈象係平穩嘅，但嗰種鬱結嘅氣，指頭都feel到。其實呢排睇症，好多老友記都係咁。打開電視，全部係保健品廣告，嚇你骨質疏鬆好得人驚，血壓一高就爆血管；行入藥房，Sales又推介乜嘢「救命神器」；上網睇多兩嘢，演算法就狂推養生焦慮嘅內容。總之就係將自然衰老，講到好似隨時會死人咁，嚇到班老友記騰騰震。
但係，當我哋用曬啲儀器去mon住佢哋血壓、心跳、行幾多步嗰陣，有冇人問過佢哋心入面想點？佢哋想要嘅，可能唔係多幾部監測儀器，而係禮拜六日班孫仔女返嚟嗰陣，圍埋一齊食餐飯、吹下水；佢哋需要嘅，或者唔係再低啲嘅膽固醇數字，而係可以自己話事——今日想食碗雲吞麵就食，想落街同街坊傾偈就落街。當生活所有嘢都變成數據，每一次出街都被人當做「高風險行為」，佢哋仲點會覺得自己係一個有尊嚴嘅人？
呢種無形嘅束縛，好多時仲難頂過身體嘅病痛。我見過不少Case，平時被管到貼一貼，到真係有大病嚟嗰陣，佢哋眼裡面完全冇求生嘅意志，反而有種「終於解脫」嘅平靜。身體嘅嘢，中醫仲有藥可以醫；但個心死咗，真係神仙都難救。中醫向來講究「形神合一」，你淨係醫個身體，唔理個心，到頭來心都死咗有個軀體有乜用？
我拍拍老友記個膊頭，同佢講：「聽日好天，你照去公園行，同屋企人好好傾吓，話佢哋知，與其乜都驚，不如信你可以照顧好自己。」我行醫咁多年，越來越覺得，困住老人家嘅，好多時唔係病，而係呢個咁鍾意販賣恐懼嘅社會。醫病重要，但醫返好呢個社會對「老」嘅誤解，似乎更加迫切。
#老友記應該被尊重
#佢地吾想坐活監牢
#醫心比醫體有時更重要
#請比佢地安享晚年
#請比佢地開開心心活下去
