22/07/2026
有DSE狀元話，掙扎咗幾日決定讀醫，係因為有friend陪。
咁今日想同大家談談勸退行醫之王：在醫院當值on call。
我離開了政府已經10多年，不過call list嘅安排，永遠可以係每個醫生訓練期間心目中的痛。
Call list， 即係當值表。一般都係由部門主管或者比較高級嘅醫生負責編排，近年好似話開始用AI協助編配，不過因為以前係用人腦，通常都要搞10日八日，所以有任何嘅call 或者No call 嘅request ，通常喺出表之前大概10日就截止登記，然後喺月尾仲有兩三日嘅時候call list 會正式出場。 例如八月暑假你有好多地方想玩，不過7月15日都未有人約你喎，咁你都唔知邊日有嘢做啊，咁就唯有等7月28號收到成個月嘅八月行程先至可以等人約/或者嘗試安排活動了。一般出咗call list，大家就唔好諗住請假，因為出咗Call list 才請假係會搞亂成個部門嘅運作，基本上唔係有必要性, 都冇人會做啲咁乞人憎嘅事。
以前我工作嘅部門，每個月有一個要求call ，同埋一個要求no call 嘅機會。婦產科人手唔係咁寬鬆，每個同層嘅人士有限，一般嘅結構都係實習醫生第一個被call，然後first call ，2nd call，最後會係consultant call . 咁多年做嘢，大家總會遇到三日一call的日子，不過一般平均係四日一call , 去到五日一call這件事，即係同一個Level醫生要有多達六個先至OK運作到，所以我幾乎係未試過的。
要動用No call這個要求好容易理解，當日一定係唔想留喺醫院，一定要有啲嘢放工去做啦。咁點解要request call 咁戇居呢？咁就係另一種嘅時間管理方法，原因係，隔日call這件事基本上不會出現，例如你走去要求星期六當值，你大致上可以確保之前嘅星期四星期五同埋跟住嘅星期日同星期一都唔需要當值的。當然你咁戇居想星期六當值，呢啲日子一定係成個部門得四個人返工，然後會做到星期日朝早大概巡埋啲房，搞晒啲嘢之後可能11:00am才離開返屋企，跟住因為成晚冇乜點瞓又要補一補，嗰個星期日都係廢咗嘅。
無論係實習醫生定係做到高級醫生，大部份嘅醫院專科都會4-5 日一次當值，去到相當高級，然後下邊嘅人，都非常熟練同埋信得過呢，高級嘅醫生先至夠膽offsite call , 即係離開醫院，但係有事就即刻俾人call返去，嗰種on call .
嗰時有一張request 表貼咗喺辦公室，得閒我就返去揣摩吓其他人嘅放假行程，然後提早畫低啲符號，等人哋又參考吓你嘅活動，其中包括每年頭以抽籤方式，去決定全年選長假嘅優先年假。
由於同一個Level嘅員工係唔能夠同時間放假的，我哋會喺年頭抽籤決定，邊個可以優先選大假，運仔好嘅，就可以全年任揀，例如復活假聖誕新年嗰啲公眾假期連假咁。我哋嘅世界唔存在請一日大假，再加四日公眾假期嗰種‘打工仔自製長假’，如果你想連續放三日公眾假期，首先你要有運氣選中這個時段，然後就必須用三日大假黐上去，所以每年雜誌或者網上流傳嘅請假攻略，對我嚟講，全部都係冇用嘅，我仲好憎有人將呢啲資料傳送俾我。
因為呢啲call list嘅編排，我哋係冇辦法學一啲定期嘅興趣班，否則每個月就最少有一堂都係蝕咗，或連貫唔到嘅。另外就係一個月八日週末，每個人必有一個星期六或者一個星期日oncall , 如果你唔係請長假，所有公眾假期一定會有一日有份開工，嚴重影響社交生活嘅編配，我都仲未講，其實每次call完都死死下返屋企瞓覺，又唔會約人出街啦！吖！我仲未計放咗工之後，可能要讀書去準備考專業試呢？所以on call 呢件事，係嚴重影響家庭同埋社交生活嘅一種工作安排。
如果DSE狀元話佢去讀醫，因為有friend陪，咁我話想話俾佢聽，讀書可能有friend陪，但係on call就一定冇啦。當值嘅日子，就算有朋友一齊撞啱當值，其實都係各有病人要照顧，根本唔會有人得閒過嚟幫你手，同你嘻嘻哈哈咁照顧你嘅病人（而家啲市民甚至覺得係越權冇醫德）遇上俾你低一個Level嘅醫生，例如因為全部去考專科試齊齊放假，咁就會出現一個中級專科醫生做second call，但係下便冇first call返工，再對下就係實習醫生嘅俗稱‘穿窿call’這種‘地獄call’，，嗰種辛苦法，完全係無法同大家講清講楚，所以大家去醫院探病時見到當值嘅醫生木無表情咁喺度奔跑，亦冇辦法停低同家屬傾偈，其實真係唔難理解。
如果M O同上司下屬嘅關係稍好，所有病人亦超穩定，急症室唔係不停送緊病人上嚟嘅話，我哋係有機會坐低一齊食個晚飯嘅。但係有啲人天生就係‘地獄黑仔強’，每逢當值就會出現死人冧樓，唔好話食飯，有啲直頭誇張到連想換一件內衣都冇時間呀！
就係咁樣，被call list 控制嘅人生, 普遍都要持續10年八載，直到你離開政府醫院先有機會消失。有啲科目例如急症科好似每星期只係返44個鐘唔需要oncall , 但係醫生自己又未必頂得順要見盡人間慘劇，悲歡離合。家庭專科訓練嘅醫生稍好，傳統係第三年工作開始，就做一啲唔使當值嘅職位。由於好多醫生都討厭oncall , 家庭專科最初時曾經唔受歡迎嘅，但係因為討厭當值嘅人越嚟越多，好似話後尾就因為咁樣好受歡迎了！
咁出咗call list 之後到底可唔可以請假呢？如果唔係病到入咗醫院，大家普遍都唔會咁做，所以唔存在其他行業經常有嘅嘅‘射波’。咁老細係咪一定會跟你嘅指示編排call 同 no call ? 有時老細係搞錯，又或者因為各種嘅部門運作原因，唔能夠配合到你要求嘅日子，搞到自己都好唔開心。咁大局已定之後仲有冇機會同人交換？就睇你同level call 水平嘅朋友有幾多交情， 人哋鍾唔鍾意你啦！
我哋流行一種講法，同人交換咗個call就一定會出事，所以如無必要，大家都係瞌埋眼聽老細指示，唔鍾意編排，都只有跟返佢嘅安排去當值就算了！
做政府醫生，因為搶唔到假，唔可以同屋企去旅行啦，上唔到興趣班啦，又或者學校突然間有啲活動走出嚟，因為自己調唔到call , 睇唔到個細路上台攞獎等等，肯定有發生過。醫生人工係穩定，喺政府絕對係做又36，唔做又36， 但係所有嘢，都係等價交換嘅！
狀元們！大家預備好犧牲你嘅
社交同家庭生活末呀！
