عزه يحيى زعبي معالجة نفسية פסיכותרפיסטית

11/09/2026

لو كنت معالجة نفسية بالثمانينات…
يمكن كان شكل الغرفة مختلف، والدفتر ورقي، وما في جلسات زوم 😄

لكن حاجة الإنسان لمكان آمن، يُسمَع فيه من غير حكم، ما إلها زمن.

برأيكم: شو أكثر فكرة تغيّرت عن العلاج النفسي من الثمانينات لليوم؟

11/09/2026

ألو… معكم عزه من سنة 2026.
وعندي رسالة صغيرة لازم توصل لسنة 1985:

بنتِك مش قليلة أدب لأنها بتحط حدود،
وابنك مش ضعيف لأنه ببكي،
والمرأة مش لازم تتحمّل كل شيء عشان تحافظ عبيتها،
وطلب المساعدة النفسية مش عيب.

في أشياء حلوة كثير تركتوها إلنا…
بس في أفكار، كان لازم تضلّ بزمانها.
️ الخط مفتوح بين 2026 و1985…
شو الرسالة اللي بتحبوا تبعثوها لسنة 1985؟

شو أول فكرة أو جملة قديمة بتحبّوا نغيّرها؟
اكتبولي، ويمكن تكون رسالتكم الحلقة الجاية.

10/09/2026

صور زمان كانت دافئة وحلوة…
بس خلف كثير منها كانت في مشاعر مسكوت عنها، ونساء تعلّمن إن التحمُّل واجب مهما كان الثمن.

اليوم منعرف إن مش كل تحمُّل بطولة، ومش كل سكوت حفاظ على البيت.
أحيانًا البطولة الحقيقية إنك تحكي، تحطي حدود، وتطلبي المساعدة.

لو صور زمان بتحكي… شو كانت رح تقول؟

02/09/2026

اكتشافك إنك بعلاقة مؤذية ممكن يكون خطوة صعبة ومربكة، بس تذكّري: إنتِ مش مضطرة تواجهي الموضوع لحالك، ومش لازم تاخدي قرار سريع يعرّضك لخطر أكبر.

ابدئي بالأمان:
احكي مع شخص بتثقي فيه، فكّري بخطة آمنة، واطلبي دعم من مختص أو جهة موثوقة. وإذا في خطر مباشر عليكِ أو على أولادك، اطلبي المساعدة فورًا.

العنف مش خلاف عادي، والخوف المستمر مش جزء طبيعي من أي علاقة.

إنتِ مش السبب، وطلب المساعدة مش مبالغة.

إذا كنتِ بخطر مباشر، تواصلي مع خدمات الطوارئ أو الجهات المختصة في بلدك.

28/08/2026

أحيانًا المشكلة مش بخلاف عابر… المشكلة لما العلاقة نفسها تصير مصدر خوف، ضغط، شك بالنفس، وعزلة.

إذا صرتِ تحسبي كل كلمة، تخافي من ردّة الفعل، تنهان كرامتك، أو تنسحبي شوي شوي من الناس ومن نفسك… هاي إشارات ما لازم نتجاهلها.

العلاقة الصحية ممكن يكون فيها زعل واختلاف، بس لازم يضل فيها أمان، احترام، ومساحة تكوني فيها على طبيعتك.

🤍 وإذا في تهديد، تخويف أو عنف… الأولوية مش لإصلاح العلاقة، الأولوية للأمان وطلب دعم من شخص موثوق أو مختص.

26/08/2026

مش كل علاقة مؤذية بتبدأ بضربة.

أحيانًا بتبدأ بسيطرة، غيرة مبالغ فيها، مراقبة، إهانة، تهديد، عزل عن الأهل والصحاب… ومع الوقت بتصير البنت تشك بحالها وتبرر اللي بصير معها.

العلاقة الصحية فيها اختلاف، لكن ما فيها خوف.
فيها مساحة، مش مراقبة.
فيها احترام، مش إذلال.
وفيها أمان، مش تهديد.

إذا إنتِ طول الوقت خايفة من ردّة فعله، أو حاسة إنك لازم تنتبهي لكل كلمة وحركة حتى ما “يعصب”… هاي إشارة لازم تتوقفي عندها بجدية.

والأهم: إذا في تهديد أو عنف، ما تواجهي الموقف لحالك. استعيني بشخص موثوق وبمساعدة مهنية وآمنة.

الحب الحقيقي ما بخليك تخافي على حالك.

توعية_نفسية العنف_النفسي العنف_الأسري حدود_صحية احترام_الذات

20/08/2026

19/08/2026

مع اقتراب المدرسة، أحيانًا من كثر ما بدنا نجهّز أولادنا… منضغط عليهم من غير ما ننتبه.

منخوّفهم بالمدرسة، منقارنهم بغيرهم، منغيّر الروتين فجأة، أو منتوقع منهم يكونوا متحمسين غصب.

بس الطفل بحاجة لشيء أهم من الحماس:
بحاجة يحس إنه مفهوم، مسنود، وإن مشاعره مقبولة.

الرجعة للمدرسة مرحلة انتقال…
وكل طفل إله سرعته بالتأقلم.

🤍 خلّوا البداية أهدأ، والتوقعات أرحم، والحوار أكثر.

17/08/2026

الرجعة للمدرسة بتكون أسهل لما نجهّز أولادنا بالتدريج… مش بالضغط.

من النوم، لتخفيف الشاشات، للحوار عن مخاوفهم وتوقعاتهم، ولمشاركتهم بالتحضير…
كل خطوة صغيرة بتعطي الطفل إحساس أكبر بالأمان والسيطرة.

وبأول أسبوع، خففوا التركيز على العلامات والإنجاز…
وخلو الأولوية للتأقلم، الروتين، والشعور بالراحة داخل المدرسة.

🤍 الطفل اللي بحس بالأمان، بقدر يتعلم ويتأقلم بشكل أفضل.

15/08/2026

الرجعة للمدرسة مش بس كتب، شنطة، وملابس جديدة…

هي كمان انتقال نفسي من الراحة والمرونة للروتين، الالتزام، والانفصال عن البيت لساعات طويلة.

عشان هيك، حاولوا تكون البداية تدريجية وهادئة:
اسمعوا أولادكم، اسألوهم شو محمّسهم وشو مقلقهم، وخففوا التوقعات بأول الأيام.

مش مطلوب من الطفل يدخل السنة الجديدة “جاهز 100٪” من أول يوم.

الأهم إنه يحس إنه مش لحاله…
وإن البيت مكان آمن يرجعله، يحكي، يرتاح، ويعيد ترتيب نفسه.

🤍 أحيانًا أجمل بداية مدرسية بنعطيها لأولادنا… هي شعورهم إنهم قادرين، حتى لو احتاجوا وقت.