09/07/2026
गेल्या काही वर्षांत एक धोकादायक बदल स्पष्टपणे जाणवत आहे. त्वचेची समस्या झाल्यावर अनेक रुग्ण डॉक्टरांकडे येण्यापूर्वी उपचार शोधत नाहीत, तर इन्स्टाग्रामवर दिसलेली एखादी रील आंधळेपणाने फॉलो करतात. यूट्यूबवर किमान एखादा विषय शोधण्याचा प्रयत्न केला जातो. पण इन्स्टाग्रामवर अल्गोरिदम जे दाखवते, त्यालाच अनेकजण सत्य मानतात.
काही सेकंदांची आकर्षक रील, लाखो व्ह्यूज आणि इन्फ्लुएन्सरचा आत्मविश्वास पाहून अनेक जण विचार न करता ते उपाय स्वतःवर करून पाहतात. त्यामागे कोणताही वैज्ञानिक पुरावा आहे का, सल्ला देणारी व्यक्ती तज्ज्ञ आहे का, हे तपासले जात नाही.
आज इन्स्टाग्रामवर असे अनेक ट्रेंड्स व्हायरल होत आहेत.
"लिंबू लावा, त्वचा गोरी करा."
"टूथपेस्टने पिंपल्स एका रात्रीत गायब करा."
"डॉक्टरशिवाय स्टेरॉइड क्रीम वापरा आणि त्वरित ग्लो मिळवा."
"दहा प्रकारचे सिरम वापरा आणि काचेसारखी त्वचा मिळवा."
हे ऐकायला आकर्षक वाटते. पण वास्तव पूर्णपणे वेगळे आहे. अशा सल्ल्यामुळे अनेकांच्या त्वचेवर कायमचे डाग पडतात, त्वचा अतिसंवेदनशील होते, अॅलर्जी वाढते, स्टेरॉइडचे दुष्परिणाम दिसू लागतात आणि काही वेळा साधा आजारही उपचारासाठी खूप गुंतागुंतीचा बनतो.
डॉक्टर म्हणून सर्वात जास्त वेदना तेव्हा होतात, जेव्हा एखादा रुग्ण म्हणतो, "डॉक्टर, आधीच तुमच्याकडे आलो असतो तर ही वेळ आली नसती."
चुकीच्या आणि अपूर्ण माहितीमुळे समाजाने स्वतःच्या आरोग्याशी खेळू नये.
रील्स माहिती देऊ शकतात. पण निदान करू शकत नाहीत. व्हायरल व्हिडिओ उपचार ठरवू शकत नाहीत. प्रत्येकाची त्वचा वेगळी असते. त्यामुळे दुसऱ्याला उपयोगी पडलेला उपाय तुमच्यासाठी सुरक्षित असेलच असे नाही.
तुमची त्वचा हा तुमच्या शरीराचा सर्वात मोठा अवयव आहे. तिच्यावर कोणताही प्रयोग करण्यापूर्वी त्वचारोगतज्ज्ञांचा सल्ला अवश्य घ्या.
जर आमचे हे मत वाचून एक जरी व्यक्ती चुकीच्या सल्ल्यापासून दूर राहिली, तर आमचा हा प्रयत्न सार्थकी लागेल.
निरोगी समाजासाठी जनजागृतीचा हा प्रवास असाच सुरू राहील.
आज जागतिक त्वचा आरोग्य दिनानिमित्त त्वचेच्या आरोग्याबाबत आमचे मत प्रसिद्ध केल्याबद्दल दैनिक पुढारीचे मनःपूर्वक आभार. आरोग्यविषयक जनजागृतीसाठी वृत्तपत्रांनी घेतलेला पुढाकार समाजासाठी अत्यंत महत्त्वाचा आहे.
