05/06/2026
കൗമാരപ്രായം ശരീരത്തിലെ മാറ്റങ്ങളുടെ കാലം മാത്രമല്ല, വികാരങ്ങളുടെയും മാനസിക വളർച്ചയുടെയും അതീവ സങ്കീർണ്ണമായ ഘട്ടമാണ്. ഈ പ്രായത്തിൽ കുട്ടികൾക്ക് അനുഭവപ്പെടുന്ന വികാരങ്ങൾ പലപ്പോഴും അവർക്കുതന്നെ വ്യക്തമായി മനസ്സിലാകാതെ വരാം. അതുകൊണ്ടുതന്നെ ചിലപ്പോൾ അവർ പെട്ടെന്ന് ദേഷ്യപ്പെടുകയും, മിണ്ടാതിരിക്കുകയും, അകന്നു നിൽക്കുകയും, അതിയായ സന്തോഷത്തിലേക്കോ ദുഃഖത്തിലേക്കോ മാറുകയും ചെയ്യുന്നത് സാധാരണമാണ്.
കൗമാരക്കാരുടെ മസ്തിഷ്കം ഇപ്പോഴും വളർച്ചയിലാണുള്ളത്. പ്രത്യേകിച്ച് വികാരനിയന്ത്രണം, തീരുമാനമെടുക്കൽ, ക്ഷമ, സ്വയം നിയന്ത്രണം എന്നിവ കൈകാര്യം ചെയ്യുന്ന ഭാഗങ്ങൾ പൂർണ്ണമായി വികസിച്ചിട്ടില്ല. അതോടൊപ്പം ഹോർമോണുകളിൽ വരുന്ന മാറ്റങ്ങൾ, പഠന സമ്മർദ്ദം, സുഹൃത് ബന്ധങ്ങൾ, ശരീരത്തെക്കുറിച്ചുള്ള ആശങ്കകൾ, സോഷ്യൽ മീഡിയയിലെ താരതമ്യങ്ങൾ, കുടുംബത്തിൻ്റെ പ്രതീക്ഷകൾ തുടങ്ങിയവ ഇവരുടെ മനസ്സിനെ ശക്തമായി സ്വാധീനിക്കുന്നു.
പലപ്പോഴും “ഇവൻ വാശിക്കാരൻ”, “അവൾ അനുസരണമില്ലാത്ത കുട്ടിയാണ്” എന്നിങ്ങനെ വിശേഷിപ്പിക്കപ്പെടുന്ന പല കൗമാരക്കാരും യഥാർത്ഥത്തിൽ വികാരപരമായി overwhelmed ആയിരിക്കാം.
കൗമാരക്കാരിൽ സാധാരണ കണ്ടുവരുന്നതിതൊക്കെയാണ്
സ്വയം വിലകുറച്ച് കാണൽ
മറ്റുള്ളവരുമായി നിരന്തരം താരതമ്യം ചെയ്യൽ
പഠന സമ്മർദ്ദം
ഒറ്റപ്പെടൽ
മനസ് തുറന്ന് സംസാരിക്കാൻ ബുദ്ധിമുട്ട്.
അമിത ചിന്ത (Overthinking)
ഭാവിയെക്കുറിച്ചുള്ള ആശങ്ക.
കൂട്ടുകാർ അംഗീകരിക്കണമെന്ന ആവശ്യം,
ശരീരഭാവത്തെക്കുറിച്ചുള്ള അസ്വസ്ഥത
പെട്ടെന്നുള്ള mood swings എന്നിവയാണ്.
കൗമാരക്കാർ ഏറ്റവും കൂടുതൽ ആഗ്രഹിക്കുന്നതെന്തെന്നോ, ഇതൊക്കെയാണ് -
1. കേൾക്കുന്ന ഒരാൾ
ഉപദേശം പറയുന്നതിന് മുൻപ് അവരെ കേൾക്കാൻ തയ്യാറാകുന്ന ഒരാൾ. പലപ്പോഴും അവർക്ക് പരിഹാരം വേണ്ടതല്ല; മനസ്സിലാക്കപ്പെടാനാണ് ആഗ്രഹം.
2. Emotional Safety
ഭയപ്പെടുത്തി നിയന്ത്രിക്കുന്നിടത്ത് കുട്ടികൾ മനസ്സ് തുറക്കില്ല. വിമർശനത്തേക്കാൾ സ്വീകരണമാണ് അവരെ കൂടുതൽ സുരക്ഷിതരാക്കുന്നത്.
3. താരതമ്യം ചെയ്യാതിരിക്കുക
“അവനെ നോക്ക്”, “അവളെ പോലെ ആകൂ” എന്ന വാക്കുകൾ ആത്മവിശ്വാസം തകർക്കാൻ ഇടയാക്കാം.
4. സ്നേഹത്തോടെ ഉള്ള അതിരുകൾ
അമിത നിയന്ത്രണവും അമിത സ്വാതന്ത്ര്യവും ഒരുപോലെ ദോഷകരമാണ്. സ്നേഹത്തോടെയുള്ള boundaries ആണ് കുട്ടികൾക്ക് ആവശ്യം.
5. മാനസികാരോഗ്യ ബോധവൽക്കരണം
ഉറക്കമില്ലായ്മ, പെട്ടെന്നുള്ള കോപം, മിണ്ടാതിരിക്കുക, എല്ലാത്തിൽ നിന്നുമുള്ള പിന്മാറ്റം തുടങ്ങിയവ ചിലപ്പോൾ മാനസിക സമ്മർദ്ദത്തിന്റെ ലക്ഷണങ്ങളായിരിക്കാം.
മാതാപിതാക്കളും അധ്യാപകരും ശ്രദ്ധിക്കേണ്ടത്
കുട്ടികളുടെ വികാരങ്ങളെ ചെറുതാക്കി കാണാതിരിക്കുക
സ്ഥിരമായ വിമർശനം ഒഴിവാക്കുക
സംസാരിക്കാൻ സുരക്ഷിതമായ അന്തരീക്ഷം സൃഷ്ടിക്കുക
ചെറിയ ശ്രമങ്ങൾ പോലും അഭിനന്ദിക്കുക
ഗുണമേന്മയുള്ള സമയം ചെലവഴിക്കുക
കുട്ടിയുടെ സോഷ്യൽ മീഡിയ ഉപയോഗത്തെ മനസ്സിലാക്കി സമീപിക്കുക
കൗമാരക്കാരെ മനസ്സിലാക്കുക എന്നത് അവരെ നിയന്ത്രിക്കുക എന്നതല്ല; അവരുമായി connect എന്നതാണ്. ഓരോ ദേഷ്യത്തിന്റെയും നിശബ്ദതയുടെയും പിന്നിൽ പറയപ്പെടാത്ത ഒരു emotion ഉണ്ടാകാം.
“എന്നെ ആരെങ്കിലും മനസ്സിലാക്കുന്നുണ്ടോ?” എന്നതാണ് പല കൗമാരമനസ്സുകളുടെയും നിശബ്ദമായ ചോദ്യം.
അവരെ കേൾക്കാം…
അവരെ മനസ്സിലാക്കാം…
കാരണം വികാരപരമായി സുരക്ഷിതരായ കുട്ടികളാണ് ആത്മവിശ്വാസമുള്ള മുതിർന്നവരായി വളരുന്നത്.
for online session contact
AROHA Wellness
089212 60124
