01/05/2026
കാൻസർ പ്രതിരോധ വാക്സിൻ
കരുതലായി നൽകി
കല്യാണ വാർഷികാഘോഷം
കല്യാണ വാർഷികാഘോഷത്തിന് കാൻസർ പ്രതിരോധ വാക്സിൻ സമ്മാനമായി രണ്ടു പേർക്ക് നൽകി കാൻസർ ചികിത്സാ രംഗത്തെ വിദഗ്ദരായ ഡോ. വി.പി ഗംഗാധരനും ഡോ. കെ. ചിത്രതാരയും. ഏപ്രിൽ 30 നായിരുന്നു വിവാഹ വാർഷികം. ദേശീയ കാൻസർ പ്രതിരോധ വാക്സിൻ പ്രചരണത്തിന് ഐക്യ ദാർഢ്യം പ്രഖ്യാപിച്ചാണ് HPV വാക്സിൻ സ്പോൺസർ ചെയ്തത്. മാത്രമല്ല ഇത്തരത്തിൽ HPV വാക്സിൻ സ്പോൺസർ ചെയ്യാൻ വിപി എസ് ലേക്ഷോർ ആശുപത്രിയിലെ ഡോക്ടർമാർ മുൻകൈ എടുത്ത് ഈ ഉദ്യമത്തിൽ പങ്കു ചേരുന്നുണ്ട്. 15 മുതൽ 20 വരെ പ്രായമുള്ള യുവതികൾക്കാണ് വാക്സിൻ നൽകുന്നത്.
ഇന്ത്യയിൽ ഗർഭാശയഗള അർബുദം (Cervical Cancer) തടയുന്നതിനായി എച്ച്പിവി (HPV - Human Papillomavirus) വാക്സിനേഷൻ വ്യാപകമാക്കാനുള്ള നടപടികൾ കേന്ദ്ര സർക്കാർ ആരംഭിച്ചിട്ടുണ്ട്. 14 വയസ്സ് പ്രായമുള്ള പെൺകുട്ടികൾക്ക് ഈ വാക്സിൻ സൗജന്യമായി നൽകുന്നതിനുള്ള രാജ്യവ്യാപകമായ കാമ്പെയ്നുകൾ നടപ്പിലാക്കുന്നുണ്ട്. സംസ്ഥാനത്തും സ്ക്കൂളുകളിൽ പ്ലസ് ടു വിദ്യാർത്ഥികൾക്ക് വാക്സിൻ സൗജന്യമായി നൽകാനുള്ള പദ്ധതിയുണ്ട്.
ലോകത്തിലെ മൊത്തം ഗർഭാശയഗള അർബുദ മരണങ്ങളിൽ 25% ഇന്ത്യയിലാണ് സംഭവിക്കുന്നത്, അതിനാൽ ഈ വാക്സിൻ വളരെ നിർണ്ണായകമാണ്.
9 മുതൽ 14 വയസ്സ് വരെ പ്രായമുള്ള കുട്ടികൾക്ക് 0, 6 മാസങ്ങളിൽ രണ്ട് ഡോസുകളാണ് സാധാരണയായി നിർദ്ദേശിക്കുന്നത്. ചില സാഹചര്യങ്ങളിൽ സിംഗിൾ ഡോസും ഫലപ്രദമാണെന്ന് WHO വ്യക്തമാക്കുന്നു.
