Bibin Stephen

30/09/2024

22/09/2024

സ്വാനുകമ്പ (Self-compassion) എന്നത് മാനസിക ആരോഗ്യത്തിന് അനിവാര്യമായ ഒരു ഘടകമാണ്. ജീവിതത്തിൽ വ്യത്യസ്തമായ വെല്ലുവിളികൾ നേരിടുമ്പോൾ, പരാജയങ്ങളെ അഭിമുഖീകരിക്കേണ്ടി വരുമ്പോൾ, തളർന്നു പോകുമ്പോൾ സ്വയം എങ്ങനെ പരിചരിക്കണം എന്ന് തിരിച്ചറിയേണ്ടത് അത്യന്തം പ്രധാനമാണ്. ഇവിടെ എന്നെക്കൊണ്ട് കഴിയില്ല, ഞാൻ പരാജിതനാണ്, ഇനി എനിക്ക് ആകില്ല എന്ന് സ്വയം കുറ്റപ്പെടുത്താതെ, തെറ്റുകൾ എല്ലാർക്കും പറ്റുന്നതാണ് - അതിൽ നിന്ന് പുതിയ പാഠങ്ങൾ പഠിക്കാൻ കഴിഞ്ഞു, എനിക്ക് നന്നായി ഇനി കാര്യങ്ങൾ കൈകാര്യം ചെയ്യാൻ കഴിയും എന്ന് സ്വയം അശ്വസിപ്പിക്കുന്നത് സ്വാനുകമ്പക്ക് (self - compassion) ഉദാഹരണം ആണ്.

നമ്മുടെ ചിന്തകളെയും വികാരങ്ങളെയും നിരീക്ഷിക്കുകയും അവയെ അംഗീകരിക്കുകയും ചെയ്യണം. ഏതെങ്കിലും ഒരു ആശങ്കയിൽ ഉൾപ്പെടുമ്പോൾ, എനിക്ക് സംശയങ്ങൾ തോന്നുന്നതും വിഷമം വരുന്നതും സ്വാഭാവികമാണ് എന്ന ചിന്ത സ്വാനുകമ്പയിലേക്ക് വഴിതെളിക്കുന്നു.
സ്വാനുകമ്പയെപ്പറ്റി ചുരുക്കി പറയുകയാണെങ്കിൽ, മറ്റൊരാളോട് അനുകമ്പ തോന്നുന്നത് പോലെ, സ്വയം ദയ തോന്നുക, സ്വയം താലോലിക്കുക, സ്വയം ആശ്വസിപ്പിക്കുക, സ്വയം സ്നേഹിക്കുക, സ്വയം അഭിനന്ദിക്കുക ഇവയെല്ലാം സ്വാനുകമ്പയുടെ വ്യത്യസ്ത ഭാവങ്ങളാണ്.

ഉദാഹരണത്തിന് ലക്ഷ്യങ്ങൾ നേടിയെടുക്കുമ്പോഴും ചെറിയ കാര്യങ്ങൾ പൂർത്തിയാക്കുമ്പോൾ പോലും സ്വയം അഭിനന്ദിച്ചുകൊണ്ട്, തനിക്ക് പറ്റുന്നത് പോലെ ചെറിയ സമ്മാനങ്ങൾ അവനവന് തന്നെ നൽകിക്കൊണ്ട്, സ്വയം നന്ദി പറഞ്ഞുകൊണ്ട് ഒരു കുറിപ്പ് എഴുതി കൊണ്ടോ സ്വാനുകമ്പ സ്ഥിരതയോടെ വളർത്തിയെടുക്കാം.
സെൽഫ് കമ്പാഷണേറ്റ് ആയ ഒരു വ്യക്തിക്ക് സ്നേഹത്തിന്റെയും കരുണയുടെയും സാന്നിധ്യത്തിൽ പ്രശ്നങ്ങളെ പരിഹരിക്കാനുള്ള പുതിയ വഴികൾ കണ്ടെത്താൻ സമാധാനപൂർവ്വം സാധിക്കുന്നു.

13/09/2024

സൈക്കോതെറാപ്പി (Psychotherapy) എന്നാൽ ഒരുതരം മാനസിക പരിചരണ ചികിത്സ രീതിയാണ്. ഒരു വ്യക്തിയുടെ വികാരപരമായ മാനസികമായ അതുപോലെ സ്വഭാവപരമായ പ്രശ്നങ്ങൾ മറികടക്കാനും വ്യത്യസ്ത മനോരോഗങ്ങൾക്ക് പരിഹാരം കണ്ടെത്താൻ സഹായിക്കുന്നതിനും സൈക്കോതെറാപ്പി വിനിയോഗിക്കുന്നു. സൈക്കോതെറാപ്പിയുടെ പ്രധാന ഉദ്ദേശ്യം വ്യക്തികൾക്ക് അവരുടെ ജീവിതത്തിലെ ബുദ്ധിമുട്ടുകളെ സുതാര്യമായി തിരിച്ചറിയാനും അവ അതിജീവിക്കാനും ഒരു വഴികാട്ടിയായി പ്രവർത്തിക്കുക എന്നതുമാണ്.

ജീവിതത്തിലെ സമ്മർദ്ദങ്ങൾ, ആശയക്കുഴപ്പം, വിഷാദം, ഭയം, നഷ്ടബോധം, തുടങ്ങിയ മാനസികാവസ്ഥകൾ പലപ്പോഴും വ്യക്തികളുടെ ആരോഗ്യത്തെയും സാമൂഹിക ബന്ധങ്ങളെയും ദോഷകരമായി ബാധിക്കുന്നു. മാറിവരുന്ന ചുറ്റുപാടുകൾ, തൊഴിലിൽ നിന്നുള്ള സമ്മർദ്ദം ബന്ധങ്ങളിലും സ്വകാര്യ ജീവിതത്തിലും സംഭവിക്കുന്ന ആശയവിനിമയെ പ്രശ്നങ്ങൾ എന്നിവ കാരണം ഓരോ വ്യക്തിയുടെയും മാനസികാരോഗ്യം പെട്ടെന്ന് തന്നെ തകരാറിലാകാൻ സാധ്യതയുണ്ട്. ഈ സാഹചര്യങ്ങളിൽ വ്യക്തികളെ സഹായിക്കാൻ സൈക്കോതെറാപ്പി ആവശ്യമായി വരുന്നു. ഒരു വ്യക്തിയെ കേൾക്കുന്നതിലൂടെ മാത്രമല്ല, ആ വ്യക്തിയെ അതിജീവനത്തിന് ഉചിതമായ രീതിയിലേക്ക് നയിക്കുന്നതിനും സൈക്കോതെറാപ്പി സഹായകമാണ്.

ചില പ്രധാന സൈക്കോതെറാപ്പികൾ

1. കോഗ്നിറ്റീവ് ബിഹേവിയറല്‍ തെറാപ്പി (CBT): നാം എങ്ങനെ ചിന്തിക്കുന്നു, എന്താണ് നമ്മെ സ്വാധീനിക്കുന്നത് എന്നതിന്റെ അടിസ്ഥാനത്തില്‍ പ്രവര്‍ത്തിക്കുന്നു. വ്യത്യസ്ത ചിന്താശേഷികളും അനുകൂലമായ സമീപനങ്ങളും മനസ്സില്‍ രൂപപ്പെടുത്താന്‍ CBT സഹായിക്കുന്നു.

2. സൈക്കോഡൈനാമിക് തെറാപ്പി: കുട്ടിക്കാലത്തെ അനുഭവങ്ങളും അവയെ സംബന്ധിച്ച അനുമാനങ്ങളും വ്യക്തിയുടെ ഭാവി ജീവിതത്തില്‍ എങ്ങനെ പ്രതിഫലിക്കുന്നു എന്ന് പരിശോധിക്കുന്ന രീതിയാണ് ഇത്.

3. ഹ്യൂമനിസ്റ്റിക് തെറാപ്പി: വ്യക്തിയുടെ സ്വതന്ത്രവും സ്വയംവികാസവും കേന്ദ്രീകരിച്ചുകൊണ്ട് വ്യക്തിയുടെ അനുഭവങ്ങളെക്കുറിച്ചുള്ള വ്യക്തിഗത ധാരണ വളര്‍ത്തുന്നതാണ് ഈ ചികിത്സ.

4. ആര്‍ട്ട് തെറാപ്പി: ചിത്രകല, സംഗീതം, നാടകം തുടങ്ങിയവയുടെ സഹായത്തോടെ ഭാവങ്ങളെയും അനുഭവങ്ങളെയും പ്രകടിപ്പിക്കുവാനും ആശ്വാസം നേടുവാനും ഈ രീതി സഹായിക്കുന്നു.

സൈക്കോതെറാപ്പി ഒരു വ്യക്തിയുടെ ജീവിതത്തിലും അവരുടെ മാനസികാരോഗ്യ നിലയിലും ഉണ്ടാക്കുന്ന മാറ്റങ്ങൾ വളരെ ഗൗരവമേറിയതാണ്.

12/09/2024

കൗൺസിലിങ് വളരെ എളുപ്പത്തിൽ എല്ലാ പ്രശ്നങ്ങൾക്കും പരിഹാരം കണ്ടെത്താനുള്ള വഴിയാണെന്നു പലരും തെറ്റിധരിക്കാറുണ്ട്. എന്നാൽ കൗൺസിലിങ് എന്നത് ആഴമേറിയതും നീണ്ട ഒരു പ്രക്രിയയാണ്. ഇത് പ്രശ്‌നങ്ങൾക്ക് താൽക്കാലിക പരിഹാരങ്ങൾ നൽകുന്ന ഒരു കാര്യവുമല്ല.

കൗൺസിലർമാർ നേരിട്ട് പ്രശ്നങ്ങൾ പരിഹരിക്കുന്നവരല്ല; പകരം കൗൺസിലിങ്ങിലൂടെ വ്യക്തികളെ മികച്ച തീരുമാനങ്ങൾ എടുക്കാൻ പ്രാപ്തിയുള്ളവരാക്കുന്നു, അതോടൊപ്പം പ്രശ്നങ്ങളെ വ്യത്യസ്തമായ കാഴ്ച്ചപാടുകളിലൂടെ പരിഗണിക്കാനുള്ള കഴിവ് വളർത്തിയെടുക്കാൻ സഹായിക്കുന്നു. ഇത്തരത്തിൽ മനഃശാസ്ത്രപരമായ ഇടപെടലിലൂടെ വ്യക്തികളെ ബുദ്ധിമുട്ടുകളെ, ഓരോ ജീവിതാവസ്ഥകളെയും സ്വയം കൈകാര്യം ചെയ്യാൻ കഴിവുള്ളവരാക്കി മാറ്റും. അതിനാൽ തന്നെ ഭാവിയിൽ വരുന്ന ജീവിതത്തിലെ ഓരോ ഉയർച്ചത്താഴ്ചകളെ വിജയകരമായി തരണം ചെയ്യാൻ കൂടുതൽ കഴിവുള്ളവരാകുന്നു.

അതിതീവ്രമായ മാനസികാരോഗ്യ പ്രശ്നങ്ങൾക്കുള്ള പരിഹാരം കൗൺസിലിങ് മാത്രമല്ല. ഇത്തരത്തിലുള്ള പ്രശ്നങ്ങൾക്ക് കൗൺസിലിങ് സഹായകമായേക്കാമെങ്കിലും, ഇത് മാത്രം പര്യാപ്തമല്ല. അതിനാൽ, അതിതീവ്രമായ മാനസികാരോഗ്യ പ്രശ്നങ്ങൾ നേരിടുമ്പോൾ, കൗൺസിലിംഗ് മാത്രമല്ല, ബഹുവിധ ചികിത്സകൾ ഉൾക്കൊള്ളുന്ന ഒരു സമഗ്രമായ ചികിത്സരീതിയാണ് സ്വീകരിക്കേണ്ടത് എന്ന് മനസിലാക്കുക. തീവ്രമായ ഇത്തരത്തിലുള്ള അവസ്ഥകളിൽ ഒരു മനോരോഗവിദഗ്ദ്ധനെ (Psychiatrist) സമീപിക്കുക.

കൗൺസിലിങ് വ്യക്തികളെ ഭാവിയിൽ വരുന്ന വെല്ലുവിളികളെ സ്വയം അഭിമുഖീകരിക്കാൻ പ്രാപ്തമാക്കുന്നു. ഇതിലൂടെ അവരുടെ മാനസിക ക്ഷമതയും പ്രശ്നപരിഹാര ശേഷിയും വർദ്ധിപ്പിക്കപ്പെടുന്നു.