24/05/2026
ਵਰਲਡ ਸਕਿਜੋਫ੍ਰੀਨੀਆ ਡੇ — “ਪਾਗਲ ਨਹੀਂ, ਬਿਮਾਰ ਹੈ”
ਸਕਿਜੋਫ੍ਰੀਨੀਆ ਕੋਈ “ਕਮਜ਼ੋਰ ਦਿਮਾਗ” ਜਾਂ “ਪਾਗਲਪਨ” ਨਹੀਂ।
ਇਹ ਦਿਮਾਗ ਦੀ ਇਕ ਗੰਭੀਰ ਬਿਮਾਰੀ ਹੈ, ਜਿਵੇਂ ਸ਼ੂਗਰ ਸਰੀਰ ਦੀ ਬਿਮਾਰੀ ਹੁੰਦੀ ਹੈ।
ਸਾਡੇ ਪਿੰਡਾਂ ਤੇ ਸ਼ਹਿਰਾਂ ਵਿੱਚ ਅੱਜ ਵੀ ਲੋਕ ਕਹਿੰਦੇ ਨੇ —
“ਇਸ ਤੇ ਚੜ੍ਹਾਈ ਆ ਗਈ”
“ਇਹ ਨਾਟਕ ਕਰਦਾ ਹੈ”
“ਇਸ ਨੂੰ ਜ਼ੰਜੀਰ ਨਾਲ ਬੰਨ੍ਹ ਦਿਓ”
“ਵਿਆਹ ਕਰ ਦਿਓ ਠੀਕ ਹੋ ਜਾਵੇਗਾ”
ਪਰ ਸੱਚ ਇਹ ਹੈ ਕਿ ਸਕਿਜੋਫ੍ਰੀਨੀਆ ਵਾਲਾ ਇਨਸਾਨ ਸਭ ਤੋਂ ਪਹਿਲਾਂ ਆਪਣੇ ਆਪ ਨਾਲ ਲੜ ਰਿਹਾ ਹੁੰਦਾ ਹੈ।
ਉਸਨੂੰ ਅਵਾਜ਼ਾਂ ਆ ਸਕਦੀਆਂ ਨੇ।
ਲੱਗ ਸਕਦਾ ਹੈ ਲੋਕ ਉਸਦੇ ਖਿਲਾਫ ਨੇ।
ਉਹ ਚੁੱਪ ਹੋ ਸਕਦਾ ਹੈ, ਡਰਿਆ ਹੋਇਆ, ਗੁੱਸੇ ਵਿੱਚ ਜਾਂ ਇਕੱਲਾ।
ਪਰ ਇਸਦਾ ਮਤਲਬ ਇਹ ਨਹੀਂ ਕਿ ਉਹ “ਖਤਰਨਾਕ” ਹੈ।
ਸਭ ਤੋਂ ਵੱਡੀ ਤਕਲੀਫ਼ ਬਿਮਾਰੀ ਨਹੀਂ…
ਲੋਕਾਂ ਦੀ ਸੋਚ ਹੁੰਦੀ ਹੈ।
ਜਦ ਪਰਿਵਾਰ ਸ਼ਰਮ ਕਰਦਾ ਹੈ,
ਜਦ ਗੁਆਂਢੀ ਮਜ਼ਾਕ ਬਣਾਉਂਦੇ ਨੇ,
ਜਦ ਦੋਸਤ ਦੂਰ ਹੋ ਜਾਂਦੇ ਨੇ,
ਉਦੋਂ ਮਰੀਜ਼ ਹੋਰ ਟੁੱਟਦਾ ਹੈ।
ਯਾਦ ਰੱਖੋ —
ਦਵਾਈਆਂ, ਸਹਾਰਾ ਅਤੇ ਇੱਜ਼ਤ ਮਿਲੇ ਤਾਂ ਸਕਿਜੋਫ੍ਰੀਨੀਆ ਵਾਲਾ ਇਨਸਾਨ ਵੀ ਪੜ੍ਹ ਸਕਦਾ ਹੈ, ਕੰਮ ਕਰ ਸਕਦਾ ਹੈ, ਵਿਆਹ ਕਰ ਸਕਦਾ ਹੈ ਅਤੇ ਆਮ ਜ਼ਿੰਦਗੀ ਜੀ ਸਕਦਾ ਹੈ।
ਮਾਨਸਿਕ ਬਿਮਾਰੀ ਛੁਪਾਉਣ ਵਾਲੀ ਚੀਜ਼ ਨਹੀਂ, ਇਲਾਜ ਕਰਵਾਉਣ ਵਾਲੀ ਚੀਜ਼ ਹੈ।
ਇਸ ਵਰਲਡ ਸਕਿਜੋਫ੍ਰੀਨੀਆ ਡੇ ਤੇ —
ਮਜ਼ਾਕ ਨਹੀਂ, ਸਮਝ ਦਿਓ।
ਡਰ ਨਹੀਂ, ਸਹਾਰਾ ਦਿਓ।
ਠੱਪਾ ਨਹੀਂ, ਇੱਜ਼ਤ ਦਿਓ।
