14/08/2013
' संपूर्ण आयुष्य एकत्र काढलं , तरी आमच्या हिच्या मनात नेमकं काय चालू आहे , ते समजणं म्हणजे फारच अवघड! ' असं तुम्हालाही वाटतं का ? प्रत्यक्षात तसं काही नसतं. मी सांगतो , त्या सोप्या गोष्टी लक्षात ठेवा म्हणजे झालं.
- पुरुषांच्या तुलनेत स्त्रियांचा इमोनशल कोशंट ( ईक्यू) म्हणजे भावनिक बुद्ध्यांक जरा जास्त असतो. स्त्रियांना त्यांच्या भावना समजून घेतलेल्या फार आवडतात. हां... समजून घेताना त्यांच्या भावनांवर नियंत्रण ठेवायला जाऊ नका. ते त्यांना जराही आवडत नाही. पुरुषानं संवेदनशील असलेलं त्यांना आवडतं ; पण म्हणून त्याचं रडणं त्यांना अजिबात खपत नाही.
- ती जे काही बोलते त्याच्याकडे लक्ष द्या. मान्य आहे , की कधीकधी टीव्हीवर सुरू असलेली एखादी घमासान चर्चा किंवा ऑस्ट्रेलिया- इंग्लंडची मॅच जास्त इंटरेस्टिंग असते... तरीही आपल्या बोलण्याकडे सक्रिय लक्ष दिलं जातंय हे पाहून त्या खूष होतात. सक्रिय म्हणजे बोलणं ऐकून नुसती मान हलवायची नाही , तर त्यावर योग्य प्रतिक्रिया द्यायची.
- कांदाभजी झालीय छान ; पण आईच्या हातची सर... हे वाक्य भजीच्या घासाबरोबरच गिळलेलं बरं. नाहीतर तुमच्या ताटात येणारा भजीचा पुढा घाणा करपलेला असेल , हे लक्षात ठेवा. आईच्या स्वयंपाकाचं , तिच्या झटपट काम करण्याच्या वृत्तीचं कौतुक घरात बायकोसमोर करताना जरा जपूनच.
- भांडणप्रसंगी तावातावानं सुरू असलेली तिची बडबड निष्प्रभ करून टाकण्यासाठीचं नामी हत्यार म्हणजे मौनव्रत. तिच्या रागीट बडबडण्यावर काहीच प्रतिक्रिया न देण्याचा कितीही मोह झाला , तरी तसं करू नका. त्यापेक्षा भांडा , रागवा , चिडा ; पण गप्प बसू नका. नाहीतर तिच्या मनातला राग तसाच धुसफुसत राहील.
- लाड केलेले त्यांना आवडतात. रोज रोज स्त्रीदाक्षिणात्य दाखवणं शक्य नसलं , तरी वेळप्रसंगी एखादा षटकार मारता येईल. उदा. बाहेर जाताना तिच्यासाठी गाडीचा दरवाजा उघडणं , खुर्ची सरकवणं , अमुक एक ड्रेस घाल असं सांगणं अशा साध्या गोष्टी करण्यानं ती तुमच्यावर परत फिदा होईल , हे नक्की.
- काही झालं , की गप्पांचा विषय तुमचं ऑफिस , तिथलं राजकारण , तुमचा वाढलेला पगार , नवी गाडी किंवा स्मार्टफोन यावर आणून नका. तिच्या विश्वातील गप्पा ऐकण्यात इंटरेस्ट दाखवा. त्यावर चर्चा करा. ' येताजाता मोलकरणींविषयी काय बोलत असतेस... ' असं म्हणू नका. कामवाल्या मावशी तिच्या दैनंदिन आयुष्यातला महत्त्वाचा भाग आहेत , हे लक्षात घ्या.
- जशी तुम्हाला तुमची ' स्पेस ' लागते तशी ती तिलाही हवी असते. शक्य तेव्हा तिलाही तिच्या मनाप्रमाणे एंजॉय करण्याची संधी मिळवून द्या.
- तुम्ही नुसतं तिच्यावर प्रेम करून चालत नाही , तर ते वेळोवेळी व्यक्त करणं फार महत्त्वाचं असतं. फुलं , डिनर डेट , एखादी भेटवस्तू तिला नक्की खूष करेल. एखादं छोटं का होईना ; पण सरप्राइज देता आलं , तर फारच छान.
- तिच्या माहेरच्या माणसांवर विनोद करण्याची कितीही खुमखुमी वाटत असली , तरी तिला वेळीच आवर घाला. तिचं मन दुखावेल इतके विनोद करू नका.
