01/05/2026
*महाराष्ट्र दिनानिमित्त नॅशनल असोसिएशन फॉर द ब्लाइंडच्या विविध विभागांकडून उत्साहात ध्वजारोहण संपन्न!*
सोलापूर : महाराष्ट्राच्या अभिमानदिनाचे औचित्य साधत नॅशनल असोसिएशन फॉर द ब्लाइंड (नॅब) जिल्हा शाखा, सोलापूर संचलित विविध विभागांच्या वतीने १ मे रोजी उत्साहात ध्वजारोहण सोहळा पार पडला. देशभक्तीच्या स्फूर्तीदायी वातावरणात संपन्न झालेल्या या कार्यक्रमाने उपस्थितांच्या मनात अभिमानाची भावना जागवली.
या सोहळ्यास नॅब संस्थेचे उपाध्यक्ष श्री.अंकुश कदम हे प्रमुख पाहुणे म्हणून उपस्थित होते. तसेच संस्थेचे जनरल सेक्रेटरी श्री. शशीभूषण यलगुलवार व सहसचिव तथा चंद्रभागाबाई यलगुलवार प्रशाला व ज्युनिअर कॉलेजच्या प्राचार्या सौ.सीमा श्रीगोंदेकर-यलगुलवार,प्राथमिक शाळेचे मुख्याध्यापक श्री.संतोष माशाळे, ममता मूकबधिर विद्यालयाच्या अधीक्षक संगीता गायकवाड,राजीव गांधी मेमोरियल स्कूल फॉर द ब्लाइंड चे अधिक्षक सौरभ शिंगाडे, प्रशालेचे पर्यवेक्षक डॉ.बंडोपंत पाटील यांची व्यासपीठावर प्रमुख उपस्थिती होती.
प्रमुख पाहुण्यांच्या हस्ते ध्वजारोहण करण्यात आले. यानंतर बोलताना श्री.अंकुश कदम यांनी उपस्थित विद्यार्थी, शिक्षक व कर्मचाऱ्यांना महाराष्ट्र दिनाच्या शुभेच्छा देत नव्या शैक्षणिक प्रवासाला सुरुवात करणाऱ्या विद्यार्थ्यांचे अभिनंदन केले. त्यांच्या मार्गदर्शनपर शब्दांनी विद्यार्थ्यांना नवचैतन्य मिळाले.
कार्यक्रमाचे सूत्रसंचालन श्री. कासिम मुजावर यांनी प्रभावीपणे केले. तर चंद्रभागाबाई यलगुलवार प्राथमिक शाळेचे मुख्याध्यापक श्री.संतोष माशाळे यांनी उपस्थितांचे आभार मानले.
उत्साह, अभिमान आणि प्रेरणादायी वातावरणात संपन्न झालेल्या या सोहळ्याने महाराष्ट्र दिनाचे महत्त्व अधोरेखित करत देशप्रेमाची भावना अधिक दृढ केली.
