Dr. Venu Thonnakkal

16/08/2026

ഡോ.വേണു തോന്നയ്ക്കൽ
അർബ്ബുദം32
ടാർഗെറ്റഡ് തെറാപ്പി
ക്യാൻസർ കോശങ്ങൾ വളരുന്നതും വിഭജിക്കുന്നതും വ്യാപിക്കുന്നതും നിയന്ത്രിക്കുന്ന പ്രോട്ടീനുകളെ ലക്ഷ്യം വച്ചുള്ള ഒരു തരം ക്യാൻസർ ചികിത്സയാണ് ടാർഗെറ്റഡ് തെറാപ്പി (targeted therapy). പ്രിസിഷൻ മെഡിസിന്റെ (precision medicine) അടിത്തറയാണിത്. ഡിഎൻഎ മാറ്റങ്ങളെയും ക്യാൻസറിനെ നയിക്കുന്ന പ്രോട്ടീനുകളെയും പഠിച്ചാണ് ഈ ചികിത്സ രൂപകൽപന ചെയ്യുന്നത്.

15/08/2026

ഡോ. വേണു തോന്നയ്ക്കൽ
അർബ്ബുദം31
നിയന്ത്രണം

കീമോതെറാപ്പി മൂലം എല്ലായ്പോഴും പൂർണ്ണമായ രോഗശമനം ഉണ്ടാവുമെന്നും എല്ലാത്തരം ക്യാൻസറുകളും ഏതു ഘട്ടത്തിലും ചികിത്സിച്ച് ഭേദമാക്കാം എന്നും കരുതരുത്. അത്തരം സന്ദർഭങ്ങളിൽ അർബ്ബുദം രോഗിയെ ആക്രമിച്ച് രോഗിക്ക് വലിയ ബുദ്ധിമുട്ട് ഉണ്ടാക്കാതെ രോഗത്തെ നിയന്ത്രിക്കുകയാണ് അഭികാമ്യം. അങ്ങനെ കീമോ, അർബ്ബുദ കോശങ്ങളുടെ ദ്രുത ഗതിയിലുള്ള വ്യാപനം തടഞ്ഞും അർബ്ബുദ കോശങ്ങളെ ചുരുക്കിയും രോഗ ലക്ഷണങ്ങൾ കുറച്ചും രോഗിക്ക് സുഖം തോന്നാനും മെച്ചപ്പെട്ട ആയുർദൈർഘ്യം ലഭ്യമാക്കാനും സഹായിക്കുന്നു.

14/08/2026

14/08/2026

ഡോ. വേണു തോന്നയ്ക്കൽ
അർബ്ബുദം30
കീമോതെറാപ്പി ഡോസ്

മിക്ക കീമോതെറാപ്പി ഔഷധങ്ങളും സുരക്ഷയ്ക്കും ഫലപ്രാപ്തിക്കും വളരെ ഇടുങ്ങിയ ശ്രേണിയുള്ള (range) ശക്തമായ ജൈവരാസ സംയുക്തങ്ങളാണ്. വളരെ കുറച്ച് മരുന്ന് കഴിക്കുന്നത് ക്യാൻസർ ചികിത്സയിൽ മെച്ചപ്പെട്ട ഫലം നൽകുന്നില്ല. എന്നാൽ അമിതമായി നൽകുന്നത് മൂലം ജീവൻ അപകടപ്പെടാനും ഇടയുണ്ട്. അതിനാൽ കീമോകൾ വളരെ ശ്രദ്ധയോടെ കണക്കാക്കിയാണ് നൽകുന്നത്.
പ്രായമായവർ, പോഷകാംശം കുറഞ്ഞ ഭക്ഷണം കഴിക്കുന്നവർ, പൊണ്ണത്തടിയുള്ളവർ,
ഇതര രോഗങ്ങൾക്ക് ഔഷധ സേവ നടത്തുന്നവർ
തുടങ്ങി വിവിധ ഘടകങ്ങളെ ആശ്രയിച്ചാണ് കീമോ മരുന്നുകളുടെ ഡോസ് ക്രമീകരിക്കുന്നത്.
രോഗിയ്ക്ക് നൽകുന്ന റേഡിയേഷൻ തെറാപ്പി, രോഗിയുടെ രക്ത കോശങ്ങളുടെ എണ്ണത്തിലെ കുറവ്, കരൾ രോഗങ്ങൾ, വൃക്ക രോഗങ്ങൾ, ഇതര ആരോഗ്യ പ്രശ്നങ്ങൾ തുടങ്ങിയവ അനുസരിച്ച് കീമോതെറാപ്പിയുടെ ഷെഡ്യൂൾ (chemotherapy schedule) നിർണ്ണയിക്കുന്നു.
സൈക്കിളുകൾ (cycles) എന്ന് വിളിക്കപ്പെടുന്ന കൃത്യമായ ഇടവേളകളിൽ കീമോതെറാപ്പി സാധാരണയായി നൽകുന്നു. ഒരു സൈക്കിൾ ഒന്നോ അതിലധികമോ ദിവസങ്ങളിൽ ഒന്നോ അതിലധികമോ മരുന്നുകളുടെ ഡോസ് ആയിരിയ്ക്കാം. തുടർന്ന് ചികിത്സ കൂടാതെ നിരവധി ദിവസങ്ങളോ ആഴ്ചയോ ഇരിക്കുന്നു. ഇത് മരുന്നിൻ്റെ പാർശ്വഫലങ്ങളിൽ നിന്ന് വീണ്ടെടുക്കാൻ സാധാരണ കോശങ്ങൾക്ക് സമയം നൽകുന്നു.
ചിലപ്പോൾ, ഡോസുകൾ തുടർച്ചയായി നിശ്ചിത ദിവസങ്ങളിൽ നൽകാം. തുടർന്ന് വിശ്രമ കാലയളവ്. നിശ്ചിത ദിവസങ്ങളിൽ തുടർച്ചയായി നൽകുമ്പോൾ ചില മരുന്നുകൾ മികച്ച രീതിയിൽ പ്രവർത്തിക്കുന്നു.
ഓരോ മരുന്നും അതിൻ്റെ കാൻസർ വിരുദ്ധ പ്രവർത്തനങ്ങൾ പരമാവധി പ്രയോജനപ്പെടുത്തുകയും പാർശ്വഫലങ്ങൾ കുറയ്ക്കുകയും ചെയ്യുന്ന ഷെഡ്യൂളിലാണ് നൽകുന്നത്. ഒന്നിൽ കൂടുതൽ മരുന്നുകൾ ഉപയോഗിക്കുകയാണെങ്കിൽ, ഓരോ മരുന്നും എത്ര തവണ കൃത്യമായി നൽകണമെന്ന് ചികിത്സാ പദ്ധതിയിൽ പറയുന്നതാണ്.

12/08/2026

ഡോ.വേണു തോന്നയ്ക്കൽ
അർബ്ബുദം29
കീമോതെറാപ്പി ചികിത്സ ആസൂത്രണം

ക്യാൻസർ ചികിത്സയിൽ കീമോതെറാപ്പിക്ക് രോഗ ശമനം, രോഗ നിയന്ത്രണം, പാലിയേഷൻ എന്നിങ്ങനെ മൂന്ന് പ്രധാന ലക്ഷ്യങ്ങളുണ്ട്. രോഗ ശമനം സാധ്യമെങ്കിൽ കാൻസർ നശിപ്പിക്കപ്പെടുന്നു. കൂടൊഴിഞ്ഞു പോയ അർബ്ബുദം പിന്നെ മടങ്ങി വരുന്നില്ല.
ക്യാൻസർ രോഗിയ്ക്ക് ഏത് മരുന്നാണ് അല്ലെങ്കിൽ ഏതേതെല്ലാം മരുന്നുകളുടെ സംയോജനം (combination) ആണ് നൽകേണ്ടതെന്ന് തീരുമാനിക്കണം. ക്യാൻസറിൻ്റെ വിഭാഗവും ഉപവിഭാഗവും, അത് ശരീരത്തിൽ എവിടെയാണ്, എത്രത്തോളം വലുതാണ്, ക്യാൻസറിൻ്റെ ഘട്ടം, ക്യാൻസർ ശരീരത്തിൻ്റെ മറ്റ് ഭാഗങ്ങളിലേക്ക് വ്യാപിക്കുകയാണെങ്കിൽ (metastasis) അത് സാധാരണ ശാരീരിക പ്രവർത്തനങ്ങളെയും മൊത്തത്തിലുള്ള ആരോഗ്യത്തെയും എപ്രകാരം ബാധിക്കുന്നു, രോഗിയുടെ പ്രായം, ആരോഗ്യനില, ഹൃദയം, കരൾ, വൃക്ക തുടങ്ങിയ ആന്തരിക അവയവങ്ങളെ ബാധിക്കുന്ന ഏതെങ്കിലും ഗുരുതരമായ ആരോഗ്യ പ്രശ്നങ്ങൾ ഉണ്ടോ, ഉണ്ടെങ്കിൽ എടുക്കുന്ന ചികിത്സ, ബയോമാർക്കറുകൾ (biomarkers), സ്കാനുകൾ, ബയോപ്സി (biopsy) ഉൾപ്പെടെയുള്ള പരിശോധനകൾ എന്നീ ഘടകങ്ങളെ ആശ്രയിച്ച് മരുന്നുകൾ എങ്ങനെ, എത്ര തവണ, എത്ര സമയം നൽകണം എന്ന് തീരുമാനിക്കുന്നു. വിദഗ്ധ ഡോക്ടർമാരുടെ ഒരു ടീമാണ് രോഗനിർണയവും ഒപ്പം ചികിത്സയും നിശ്ചയിക്കുന്നത്.
ഒരു കീമോ ഔഷധം കൊണ്ട് ക്യാൻസർ ചികിത്സിക്കാം. പലപ്പോഴും പല ഔഷധങ്ങളും സംയോജിപ്പിച്ചാണ് നൽകുന്നത്. അവ ഒരു നിശ്ചിത ക്രമത്തിലോ കോമ്പിനേഷനുകളിലോ നൽകാം. അതിനെ കോംബിനേഷൻ കീമോതെറാപ്പി (combination chemotherapy) എന്ന് വിളിക്കുന്നു.
ഒരു കീമോ മരുന്നിനേക്കാൾ മെച്ചം കോംബിനേഷൻ കീമോതെറാപ്പിയാണ്. വ്യത്യസ്ഥ തരത്തിൽ പ്രവർത്തിക്കുന്ന മരുന്നുകൾ ഉപയോഗിക്കുക, അതുവഴി ഔഷധ പ്രതിരോധ ശേഷിയുള്ള ക്യാൻസർ കോശങ്ങൾ വികസിയ്ക്കാനുള്ള സാധ്യത കുറയ്ക്കുക, എന്നതാണ് കോംമ്പിനേഷൻ കീമോതെറാപ്പിയുടെ യുക്തി. വ്യത്യസ്ത ഫലങ്ങളുള്ള മരുന്നുകൾ സംയോജിപ്പിക്കുമ്പോൾ, ഓരോ മരുന്നും അസഹനീയമായ പാർശ്വഫലങ്ങൾ ഇല്ലാതെ അതിന്റെ ഒപ്റ്റിമൽ അളവിൽ ഉപയോഗിക്കാൻ കഴിയും. വ്യത്യസ്ത രീതികളിൽ പ്രവർത്തിക്കുന്ന വ്യത്യസ്ത മരുന്നുകൾ കൂടുതൽ ക്യാൻസർ കോശങ്ങളെ നശിപ്പിക്കാൻ ഒരുമിച്ച് പ്രവർത്തിക്കും. ഏതെങ്കിലും ഒരു മരുന്നിനെ അർബ്ബുദത്തിന് പ്രതിരോധിക്കാനുള്ള സാധ്യത കുറയ്ക്കാനും ഇത് പര്യാപ്തമാണ്.
കീമോതെറാപ്പി കൊണ്ട് കോശങ്ങളെ നശിപ്പിക്കാനും അതു പോലെ വലിപ്പം കുറച്ച് ചുരുക്കാനും കഴിയുന്നു. ശസ്ത്രക്രിയ അല്ലെങ്കിൽ റേഡിയേഷൻ തെറാപ്പിക്ക് ശേഷം ശരീരത്തിലെ ശേഷിക്കുന്ന ക്യാൻസർ കോശങ്ങളെ നശിപ്പിക്കാൻ കീമോ സഹായിക്കുന്നു. ഈ രീതിയിൽ പ്രയോഗിക്കുന്ന കീമോയെ അഡ്ജുവൻ്റ് തെറാപ്പി (adjuvant therapy) എന്ന് വിളിക്കുന്നു.
ചിലപ്പോൾ കീമോ മാത്രമാണ് രോഗിയ്ക്ക് ആവശ്യമുള്ള ചികിത്സ. എന്നാൽ പലപ്പോഴും, ശസ്ത്രക്രിയയോ റേഡിയേഷൻ തെറാപ്പിയോ അല്ലെങ്കിൽ രണ്ടും ഉപയോഗിക്കുന്നു. ടാർഗെറ്റഡ് തെറാപ്പി (targeted therapy), ഹോർമോൺ തെറാപ്പി (hormone therapy), ഇമ്മ്യൂണോതെറാപ്പി (immunotherapy) തുടങ്ങിയവയോടൊപ്പവും കീമോതെറാപ്പി ചിലപ്പോൾ പ്രയോഗിക്കാറുണ്ട്.
അർബ്ബുദം തിരികെ വരികയോ പൂർണ്ണമായും ഇല്ലാതാവുകയോ ചെയ്തില്ലെങ്കിൽ മറ്റ് ചികിത്സകൾക്കൊപ്പം
ഏതേത് കീമോതെറാപ്പി മരുന്നുകൾ ഉപയോഗിക്കണമെന്ന് നിർണ്ണയിക്കുന്നു.

11/08/2026

ഡോ. വേണു തോന്നയ്ക്കൽ
അർബുദം28
കീമോതെറാപ്പി

ഒരു സ്റ്റാൻഡേർഡ് ചികിത്സാരീതിയിൽ ഒന്നോ അതിലധികമോ അർബ്ബുദ വിരുദ്ധ മരുന്നുകൾ ഉപയോഗിക്കുന്ന ഒരു തരം ക്യാൻസർ ചികിത്സയാണ് കീമോതെറാപ്പി (chemotherapy). സാധാരണയായി "കീമോ" എന്ന് പറയുന്നു.
കീമോതെറാപ്പി എന്ന ശബ്ദം പോലും പലരിലും അസ്വാസ്ഥ്യ ജനകമാണ്. അതിനു കാരണം കീമോ എന്ന പദം ക്യാൻസർ ഭീകരതയുമായി ചേർത്തു വായിക്കുന്നതിനാലാണ്. ക്യാൻസർ ചികിത്സയ്ക്ക് മാത്രമല്ല മറ്റു ചില രോഗങ്ങളുടെ ചികിത്സയിലും കീമോതെറാപ്പി ഉപയോഗിക്കുന്നു. പൊതുവേ ക്യാൻസർ ചികിത്സയിലാണ് ഇക്കാലത്ത് കീമോതെറാപ്പി ഉപയോഗിച്ച് കേൾക്കുന്നത്.
കീമോതെറാപ്പി എടുക്കുന്നവർ പലരും ചികിത്സയെ ഭയക്കുന്നവരാണ്. ചില ഔഷധങ്ങൾ വേദനാജനകമാവാം. ചികിത്സ എടുക്കുന്ന രോഗിക്ക് വേദന, മുടി കൊഴിച്ചിൽ, മറ്റു ചില ശാരീരിക ബുദ്ധിമുട്ടുകൾ എന്നിവ ഉണ്ടാവാം. ചികിത്സയ്ക്ക് ശേഷം നഷ്ടപ്പെട്ട മുടി മടങ്ങി വരികയും ശാരീരിക ബുദ്ധിമുട്ടുകൾ മാറുകയും ചെയ്യുന്നു. ചിലരിൽ ശാരീരിക ബുദ്ധിമുട്ടുകളുടെ തുടർച്ചയെന്നോണം മാനസിക അസ്വാസ്ഥ്യങ്ങളും പ്രകടമാവാറുണ്ട്. വൈകാതെ അതും മാറുന്നതാണ്.
കീമോതെറാപ്പിയിൽ അതിശക്തമായ ഔഷധ തൻമാത്രകളാണ് ഉപയോഗിക്കുന്നത്. ഞരമ്പുകളിലൂടെയുള്ള ഇഞ്ചക്ഷനുകൾ, ഗുളിക, ക്യാപ്സൂളുകൾ, എന്നിവയിലൂടെയാണ് കീമോതെറാപ്പി നൽകുന്നത്. അനധികൃതമായി അതിവേഗം വളരുന്ന അർബ്ബുദ കോശങ്ങളെ കീമോ മൂലം കൊല്ലുന്നു. പലതരം കീമൊതെറാപ്പി ഔഷധങ്ങൾ ലഭ്യമാണ്. കീമോതെറാപ്പി കൊണ്ട് പ്രാഥമിക ക്യാൻസറും ദ്വിതീയ ക്യാൻസറും (metastasis) ഉൾപ്പെടെ വിവിധ തരം ക്യാൻസറുകൾ ചികിത്സിയ്ക്കാനാവുന്നു.
ക്യാൻസറുകളുടെ ഒന്നു മുതൽ നാലു വരെയുള്ള വിവിധ സ്റ്റേജുകളിലും കീമോതെറാപ്പി നൽകാവുന്നതാണ്. ക്യാൻസറിന്റെ സ്ഥാനം, ഘട്ടം, രോഗ സ്വഭാവം, രോഗിയുടെ ആരോഗ്യാവസ്ഥ, എന്നിവയെ അടിസ്ഥാനമാക്കിയാണ് കീമോതെറാപ്പി നിശ്ചയിക്കുകയും നൽകുകയും ചെയ്യുന്നത്.
ക്യാൻസർ കോശങ്ങൾക്കുള്ളിലെ ജീനുകളെ തകരാറിലാക്കുകയാണ് ഔഷധം ചെയ്യുന്നത്. തന്മൂലം കോശങ്ങളുടെ വിഭജന ശേഷി ഇല്ലാതാവുകയും കോശങ്ങളുടെ ദ്രുതഗതിയിലെ വളർച്ചയ്ക്ക് തടയിടുകയും ചെയ്യുന്നു.
മുടി കൊഴിച്ചിൽ, അസ്ഥികൾക്കുള്ളിലെ മജ്ജയിലുണ്ടാവുന്ന തകരാറുകൾ, ചർമ്മം, ദഹന വ്യവസ്ഥ എന്നിവിടങ്ങളിൽ സാരമായ പാർശ്വ ഫലങ്ങൾ, ആദിയായ ആരോഗ്യ പ്രശ്നങ്ങൾ കീമോതെറാപ്പിമായി ബന്ധപ്പെട്ട് ഉണ്ടാകുന്നു.
അർബ്ബുദ ചികിത്സയ്ക്ക് പരമ്പരാഗതമായി ഉപയോഗിച്ചിരുന്നത് സ്റ്റാൻഡേർഡ് കീമോ മാത്രമായിരുന്നു. അതിപ്പോഴും പല അർബ്ബുദങ്ങൾക്കുമുള്ള ഏറ്റവും നല്ല ഉപാധിയാണ്. ക്യാൻസർ ചികിത്സിയ്ക്ക് ധാരാളം വ്യത്യസ്ത തരം ഔഷധ തന്മാത്രകൾ ഇന്ന് ലഭ്യമാണ്. സകല ഔഷധ മാത്രകളും വ്യത്യസ്ത രീതിയിൽ പ്രവർത്തിച്ച് മികച്ച ഫലം തരുന്നുണ്ട്. ടാർഗെറ്റഡ് തെറാപ്പി (targeted therapy), ഹോർമോൺ തെറാപ്പി (hormone therapy), ഇമ്മ്യൂണോതെറാപ്പി (immunotherapy), എന്നിവയുൾപ്പെടെ വ്യത്യസ്ത രീതികളിൽ വിവിധ തരം ക്യാൻസറുകളെ ചികിത്സിക്കുന്നു.
കീമോ ഒരു വ്യവസ്ഥാപിത ചികിത്സയായി കണക്കാക്കപ്പെടുന്നു, ഇവിടെ ഔഷധ മാത്രകൾ ശരീരത്തിലുടനീളം സഞ്ചരിക്കുന്നതിനാൽ പ്രാഥമിക ട്യൂമർ മാത്രമല്ല പ്രാഥമിക ടൂമറിൽ നിന്നും അകലെയുള്ള ശരീര ഭാഗങ്ങളിലേക്ക് വ്യാപിച്ച ദ്വിതീയ ട്യൂമർ കോശങ്ങളെയും നശിപ്പിക്കാൻ കഴിയും.

11/08/2026

ഡോ. വേണു തോന്നയ്ക്കൽ
അർബ്ബുദം27
റേഡിയേഷൻ തരട്ടേ

ഓങ്കോളജിസ്റ്റ് (onchologist), മെഡിക്കൽ ഫിസിസിസ്റ്റ് (medical physicist), മെഡിക്കൽ ഡോസിമെട്രിസ്റ്റ് (medical dosimetrist) എന്നിവർ ഉൾപ്പെട്ട പരിശീലനം സിദ്ധിച്ച ഹെൽത് ടീമാണ് റേഡിയേഷൻ ആസൂത്രണം ചെയ്യുകയും കണക്കാക്കുകയും ചെയ്യുന്നത്. ക്യാൻസർ രോഗ വിദഗ്ദ്ധനാണ് ഓങ്കോളജിസ്റ്റ്. ഭൗതികശാസ്ത്രത്തിന്റെ വൈദ്യശാസ്ത്രപരമായ പ്രയോഗങ്ങളിൽ പ്രത്യേക പരിശീലനം നേടിയ ആരോഗ്യപരിപാലന വിദഗ്ധരാണ് മെഡിക്കൽ ഡോസിമെട്രിസ്റ്റ്. രോഗനിർണയത്തിലും ചികിത്സയിലും എക്സ്-റേകൾ, അൾട്രാസൗണ്ട്, , ഇൻഫ്രാറെഡ്-അൾട്രാവയലറ്റ് പ്രകാശം, ലേസർ എന്നിവ ഉപയോഗിക്കുന്നതിൽ ഇവരുടെ സേവനം ആവശ്യമാണ്. റേഡിയേഷൻ തെറാപ്പിക്ക് (റേഡിയോതെറാപ്പി) വിധേയരാവുന്ന ക്യാൻസർ രോഗികൾക്കുള്ള റേഡിയേഷൻ ഡോസും ചികിത്സാ പദ്ധതിയും ആസൂത്രണം ചെയ്യുകയും കണക്കാക്കുകയും ചെയ്യുന്ന വിദഗ്ദ്ധനാണ് മെഡിക്കൽ ഡോസിമെട്രിസ്റ്റ്.
റേഡിയേഷൻ തെറാപ്പി ആരംഭിക്കുന്നതിന് മുമ്പ് റേഡിയേഷൻ ഓങ്കോളജിസ്റ്റ് രോഗിയെ പഠിക്കുന്നു. ഇതൊരു പ്ലാനിംഗ് സെഷനാണ്. അതിലേക്ക് രോഗിയെ പരിശോധിക്കുകയും മെഡിക്കൽ ചരിത്രവും പരിശോധന ഫലങ്ങളും അവലോകനം ചെയ്യുകയും ചികിത്സിയ്ക്കേണ്ട കൃത്യമായ പ്രദേശം വ്യക്തമാക്കുകയും ചെയ്യുന്നു. ഈ പ്ലാനിംഗ് സെഷനെ (planning session) സിമുലേഷൻ (simulation) എന്നോ ചുരുക്കത്തിൽ സിം (sim) എന്നോ വിളിക്കുന്നു.
സിമുലേഷൻ വളരെ പ്രധാനമാണ്. ശരീരത്തിൽ എവിടെയാണ് ചികിത്സ നടക്കേണ്ടതെന്ന് കൃത്യമായി ആസൂത്രണം ചെയ്യാൻ ഇതുപയോഗിക്കുന്നു. അർബ്ബുദ മുഴകളിലേക്ക് റേഡിയേഷൻ നേരിട്ട് എത്തിക്കാൻ മാത്രമല്ല ട്യൂമറിന് സമീപമുള്ള ആരോഗ്യമുള്ള ടിഷ്യൂകളെ കഴിയുന്നത്ര ചെറുതായി ബാധിക്കാൻ ഇടയാക്കുകയും ചെയ്യുന്നു.
റേഡിയേഷൻ ബീമുകൾ വളരെ കൃത്യമായി ലക്ഷ്യമിടുന്നു. റേഡിയേഷൻ ചികിത്സ കൃത്യമായി ലഭിക്കുന്നതിലേയ്ക്ക് ശരീര ഭാഗത്തിൻ്റെ ഒരു പ്രത്യേക കാസ്റ്റ് ഉണ്ടാക്കുന്നു. ചില പ്രത്യേക തരം മഷി ഉപയോഗിച്ച് ചികിത്സാ മേഖലയെ പുള്ളികൾ ഇട്ട് അടയാളപ്പെടുത്തിയേയ്ക്കാം. റേഡിയേഷൻ ചികിത്സ എടുക്കുന്ന ചിലരുടെയെങ്കിലും ചർമ്മത്തിൽ കാണുന്ന പുള്ളികളോ വരകളോ ഇതാണ്.
സിമുലേഷൻ, മറ്റ് ടെസ്റ്റുകൾ, ക്യാൻസർ തരം, എന്നിവയെ അടിസ്ഥാനമാക്കി, റേഡിയേഷൻ ഓങ്കോളജിസ്റ്റ് തൻ്റെ ഹെൽത് ടീമിലെ അംഗങ്ങളുമായി ചേർന്ന് എത്രത്തോളം റേഡിയേഷൻ ആവശ്യമാണ്, അത് എപ്രകാരം നൽകണം, എത്ര ചികിത്സകൾ നടത്തണം എന്ന് തീരുമാനിക്കുന്നു.
മിക്ക കേസുകളിലും ട്യൂമർ നശിപ്പിക്കാൻ ആവശ്യമായ റേഡിയേഷൻ്റെ ആകെ ഡോസ് ഒറ്റയടിക്ക് നൽകാൻ കഴിയില്ല. ഒരു തവണ വലിയ ഡോസ് നൽകുന്നത് അടുത്തുള്ള സാധാരണ ടിഷ്യൂകൾക്ക് കൂടുതൽ നാശമുണ്ടാക്കും. ദിവസങ്ങളോ ആഴ്ചകളോ ആയി ഒരേ ഡോസ് നൽകുന്നതിനേക്കാൾ കൂടുതൽ പാർശ്വ ഫലങ്ങൾ ഇത് ഉണ്ടാക്കും. അതിനാൽ തെറാപ്പിയുടെ ആകെ ഡോസ് ചെറിയ ഡോസുകളാക്കി നിശ്ചിത ദിവസങ്ങളിലായി നൽകുന്നു.

10/08/2026

ഡോ. വേണു തോന്നയ്ക്കൽ
അർബ്ബുദം26
ഇൻട്രാ ഓപ്പറേറ്റീവ് റേഡിയേഷൻ തെറാപ്പി

ശസ്ത്രക്രിയയ്ക്കിടെ ട്യൂമറിൽ നേരിട്ട് നൽകുന്ന ബാഹ്യ വികിരണമാണ് ഇൻട്രാ ഓപ്പറേറ്റീവ് റേഡിയേഷൻ തെറാപ്പി (intraoperative radiation therapy) അഥവ ഐഒആർടി (IORT). മുഴുവനായും നീക്കം ചെയ്യാൻ കഴിയാത്ത അർബ്ബുദ മുഴകൾക്കായി ഇതുപയോഗിക്കാം. അഥവ ഉയർന്ന അപകട സാധ്യതയുള്ളപ്പോഴും ഇതുപയോഗിക്കുന്നു.

08/08/2026

ഡോ. വേണു തോന്നയ്ക്കൽ
അർബ്ബുദം25
ഇമേജ് ഗൈഡഡ് റേഡിയേഷൻ തെറാപ്പി

മുകളിലുള്ള പല റേഡിയേഷൻ ചികിത്സകളും ഇമേജ് ഗൈഡഡ് റേഡിയേഷൻ തെറാപ്പി (Image guided radiation therapy) അഥവ ഐജിആടി (IGRT) ഉപയോഗിച്ച് നൽകാം. ഓരോ ചികിത്സാ സെഷനും മുമ്പായി ഇമേജിംഗ് സ്കാനുകൾ എടുക്കുന്നു. ചികിത്സ ആസൂത്രണം ചെയ്യാൻ ഈ ചിത്രങ്ങൾ ഉപയോഗിക്കുന്നു. തന്മൂലം നൽകേണ്ട റേഡിയേഷൻ ബീമുകളുടെ ദിശ ക്രമീകരിക്കാനാവുന്നു, റേഡിയേഷൻ അർബ്ബുദ മുഴകളിൽ കൃത്യമായി കേന്ദ്രീകരിച്ചിട്ടുണ്ടെന്നും സാധാരണ ആരോഗ്യമുള്ള ടിഷ്യൂകളിലേയ്ക്കുള്ള വികിരണങ്ങളുടെ എക്സ്പോഷർ (exposure) പരിമിതമാണെന്നും ഉറപ്പാക്കാനുമാവുന്നു.
റേഡിയേഷൻ തെറാപ്പി നൽകുന്നതിന് ഒരു ലീനിയർ ആക്സിലറേറ്റർ അല്ലെങ്കിൽ കണിക ആക്സിലറേറ്റർ ആയ സൈക്ലോട്രോൺ, സിൻക്രോട്രോൺ എന്നിവ ഉപയോഗിക്കുന്നു. ചികിത്സയ്ക്ക് മുമ്പോ ചികിത്സയ്ക്കിടയിലോ ട്യൂമർ സ്കാൻ ചെയ്യുന്നതിനുള്ള ഇമേജിംഗ് സാങ്കേതിക വിദ്യയും ഈ മെഷീനുകളിൽ ഉണ്ടായിരിക്കും. ചികിത്സകനും റേഡിയേഷൻ തെറാപ്പിസ്റ്റുകളും ഈ സ്കാനുകളെ സിമുലേഷൻ റഫറൻസ് ഇമേജുകളുമായി (simulation referance image) താരതമ്യം ചെയ്ത് ക്രമീകരണങ്ങൾ വരുത്തുന്നു.
ഇത് ഒരു തരം റേഡിയേഷൻ തെറാപ്പിയാണ്. ഇതിൽ ക്യാൻസറിനെ നശിപ്പിക്കാൻ ശക്തമായ ഊർജ്ജ രശ്മികൾ ഉപയോഗിക്കുന്നു. എക്സ്-റേകളിൽ നിന്നോ പ്രോട്ടോണുകളിൽ നിന്നോ മറ്റ് സ്രോതസ്സുകളിൽ നിന്നോ ഊർജ്ജം ലഭിക്കുന്നു.
റേഡിയേഷൻ നൽകുമ്പോൾ എംആർഐ (MRI) ചിത്രങ്ങളും എടുക്കാം. തന്മൂലം റേഡിയേഷന്റെ പാതയിൽ നിന്ന് ട്യൂമർ വ്യതിചലിച്ചോ എന്നറിയാൻ സഹായിക്കുന്നു. കൂടാതെ ട്യൂമറിന് ചുറ്റുമുള്ള ആരോഗ്യമുള്ള ടിഷ്യൂകളിലേക്കും അവയവങ്ങളിലേക്കും റേഡിയേഷൻ്റെ അളവ് കഴിയുന്നത്ര കുറയ്ക്കാനും ഇത് സഹായിക്കും.

07/08/2026

ഡോ. വേണു തോന്നയ്ക്കൽ
അർബ്ബുദം24
സ്റ്റീരിയോടാക്റ്റിക് റേഡിയോ സർജറി

സ്റ്റീരിയോടാക്റ്റിക് റേഡിയോ സർജറി (stereotactic radio surgery) അഥവ എസ്ആർഎസ് (SRS) ശരിക്കും ഒരു ശസ്ത്രക്രിയ അല്ല, മറിച്ച് ഒരു ചെറിയ ട്യൂമർ പ്രദേശത്തേയ്ക്ക് കൃത്യമായി ഫോക്കസ് ചെയ്ത ഗാമാ റേഡിയേഷൻ ബീമുകൾ (gamma radiation beams) വലിയ അളവിൽ നൽകുന്ന ഒരു തരം റേഡിയേഷൻ ചികിത്സയാണ്.
പ്രധാനമായും മസ്തിഷ്കം, കഴുത്ത്, ശ്വാസകോശം, കരൾ, വൃക്ക, നട്ടെല്ല്, അഡ്രീനൽ, എന്നിവയിലെ അർബ്ബുദ മുഴകൾക്ക് ചികിത്സിക്കാൻ സ്റ്റീരിയോടാക്റ്റിക് റേഡിയോ സർജറി ഉപയോഗിക്കുന്നു.
സ്കാനുകളുടെ സഹായത്താൽ ട്യൂമറിൻ്റെ സ്ഥാനം കൃത്യമായി അറിയുകയും നിരവധി ചെറിയ ഗാമാ വികിരണങ്ങൾ വിവിധ കോണുകളിൽ നിന്ന് ട്യൂമറിന് നൽകുകയും ചെയ്യുന്നു. അതിനാൽ അത് അർബ്ബുദ മുഴകൾക്ക് അടുത്തുള്ള ആരോഗ്യമുള്ള ടിഷ്യൂകളെ കഴിയുന്നത്ര ചെറുതായി മാത്രമേ ബാധിക്കുകയുള്ളു. ഇതൊരു ശസ്ത്രക്രിയയല്ല എന്ന് മാത്രമല്ല ചികിത്സയിൽ മുറിവുകൾ (cutting or incission) ഉണ്ടാവുന്നുമില്ല.
സാധാരണയായി ഈ ചികിത്സ ഒറ്റ സെഷനിൽ (single session) നൽകുന്നു. എന്നാൽ ശ്വാസകോശം, കരൾ, വൃക്ക, നട്ടെല്ല്, അഡ്രീനൽ, ശരീരത്തിൻ്റെ മറ്റ് ഭാഗങ്ങൾ എന്നിവയിലെ മുഴകൾ, എന്നിവയ്ക്ക് 3-5 സെഷനുകളിൽ വളരെ ഉയർന്ന ഡോസ് സ്റ്റീരിയോടാക്റ്റിക് റേഡിയോ സർജറി ആവശ്യപ്പെടുന്നു. സ്റ്റീരിയോടാക്റ്റിക് റേഡിയോ സർജറി ചികിത്സയ്ക്ക് 30 മിനിറ്റ് മുതൽ ഏതാനും മണിക്കൂറുകൾ വരെ സമയമെടുത്തേക്കാം.
മിക്ക രോഗികൾക്കും സ്റ്റീരിയോടാക്റ്റിക് റേഡിയോ സർജറി ഉപയോഗിച്ച് ഒരു സെഷനിൽ മുഴുവൻ റേഡിയേഷൻ ഡോസും നൽകുമെങ്കിലും, ആവശ്യമെങ്കിൽ ഡോസ് പിന്നെയും ആവർത്തിക്കാം.