؛؛ د. سەروەر چوچانی Dr.Sarwar Chuchani

08/07/2026

بەشداریمان لە کۆنفرانسی نێودەوڵەتیی جومگە و ڕۆماتیزم لە شاری لەندەن

لەم کۆنفرانسەدا پسپۆڕانی ئێسک، جومگە و ڕۆماتیزم دواهەمین زانیاری، توێژینەوە و ئەزموونەکانی خۆیان خستەڕوو.

26/05/2026

سڵاو و جەژنتان پیرۆز بێت، بەهیوای تەندروستیی هەموو لایەک

بەڕێزان ئاگادارتان دەکەینەوە لە 1.6.2026 بەدواوە، کلینیکەکەمان دەگوازینەوە بۆ تەلاری پزیشکیی خانی، لە سەرەتای شەقامی تووی مەلیک، نزیک فولکەی کاوە

بۆ زانیاریی زیاتر، ژمارە تەلەفۆنەکانی کلینەکەکەمان:
07701999560
07502030050

06/02/2026

کۆنفرانسی سەرتاسەریی پزیشکانی کوردستان

بە خۆشحاڵییەوە لە شاری هەولێری خۆشەویست بەشدابووم لە کۆنفرانسی تەندروستیی میزۆپۆتامیا، کە پزیشکانی کوردی لە سەرتاسەری جیهانەوە کۆکردەوە.

پزیشکانی کوردزمانی باشوور، ڕۆژهەڵات، باکوور، ڕۆژئاوا، تاراوگە و تەنانەت پزیشکانی دانیشتووی وڵاتانی سۆڤیەتی جاران کۆبوونەوە و ئاڵوگۆڕی ئەزموون، توێژینەوە و بەرهەماکانی خۆیان کرد.

ئەوەی جێگەی خۆشحاڵیی تایبەتم بوو پزیشکانی کوردی کازاخستان بەشداربوون و وتیان سێ سەد هەزار کوردی دانیشتووی ئەو وڵاتە دڵیان لاتانە و بە دڵگەرمییەوە زمان، کولتوور و نەریتی کوردەوارییان پاراستووە و پزیشکی زیرەک و پسپۆڕی زۆری کوردزمان لەو وڵاتە هەن

05/12/2025

لە شاری بەغداد بەشدارین لە کۆنفرانسی سەرتاسەریی پزیشکانی
ئێسک، جومگە و رۆماتیزم لەسەر ئاستی عێراق

لەم کۆنفرانسەدا پزیشکانی کوردستان، عێراق و جیهان تاووتوێی نوێترین داهێنان و پێشکەوتنەکان دەکەن لەبواری دەستنیشان و چارەسەری نەخۆشییەکانی ئێسک، جومگە و رۆماتیزم

12/09/2025

لە شاری موسڵ بەشداریمان کرد لە وۆرکشۆپێکی نێوەدەوڵەتیی زانستیی تیۆری-پراکتیکی لەبارەی نوێترین پێشکەوتنەکان لە بواری دەستنیشان و چارەسەری ئازار

01/06/2025

شاری گلاسگۆ... بەشداریمان لە کۆنفرانسی زانستیی کۆمەڵەی پزیشکانی رۆماتیزمی سکۆتلەندا

بە خۆشحاڵییەوە و پاش بانگهێشتکرانم لەلایەن کۆمەڵەکەوە، سەردانی زانکۆی کالیدۆنیای شاری گلاسگۆم کرد لە سکۆتلەندا بە مەبەستی بەشداری لە کۆنفرانسی زانستیی کۆمەڵەکە.

لە کۆنفرانسەکەدا بابەت و توێژینەوەی نوێ و سەرنجڕاکێش خرانەڕوو لەبارەی دەستنیشان و چارەسەری نەخۆشییەکانی ئێسک، جومگە و رۆماتیزم.

09/05/2025

بەشداریمان لە چوارەمین کۆنفرانسی نێودەوڵەتیی پزیشکانی جومگە و رۆماتیزم لە هەرێمی کوردستان.

لەم کۆنفرانسەدا بە بەشداریی پزیشکانی کوردستان، عێراق و جیهان نوێترین رێنماییە زانستییەکان، توێژینەوە پزیشکییەکان و ئەزموونە کردارییەکان خرانە بەر باس و گفتوگۆی پسپۆڕان.

03/03/2025

رۆماتیزم و نەخۆشییەكانی ئێسك و جومگە، سەدان نەخۆشی و گرفتی تەندروستین، دەكرێت بەگوێرەی پەیوەندییان بە رۆژووەوە نەخۆشەكان پۆلێن بكەین بەمجۆرە:

1.بەڕۆژووبوونی بێ مەرج؛ نەخۆشییەکانی پەیوەست بە ماندووبون و زەبر و داخوران:

ئەمانە زیاتر گرفتی شوێنێکی دیاری کراوی جەستەن، واتە سنووردارن بەو شوێنەی زۆرترین زەبر و ماندووبوون و لێکەوتەکانی ژیانی رۆژانەی بەرکەوتووە، نەک ئەوەی رۆماتیزمەی گشتی و درێژخایەن بن، لە نموونەی ئەمانە سووان (سەوەفان)ی جومگە، ئینزیلاقی دیسک و بڕبڕەی پشت و مل، گرفتی پچڕان و زەبر بەرکەوتنی ژێ و بەستەر و ماسولکە و هاوشێوەکانیان، ئەم گرووپە ئەگەر هەر ئەمە کێشەکەیان بێت، بێ گرفت دەتوانن بەڕۆژوو بن، واتە بەڕۆژووبوونە بێ مەرج.

2. بەڕۆژووبوون بە مەرجی کۆنترۆڵبوونی نەخۆشییەکەیان؛ رۆماتیزمە درێژخایەنەکان:

وەکوو رۆماتیزمەی جومگە (ئاڕ ئەی)، گورگەسوورە (لووپەس)، رۆماتیزمەی حەوز و فەقەرات (ئەی ئێس) و هاوپۆلەکانیان، ئەمانە ئەگەر نەخۆشییەکەیان لە ماوەی چەند مانگی پێشوودا (باشترە شەش مانگ) کۆنترۆڵ بووبێت و سستیی گورچیلەیان نەبێت، دەتوانن بەڕۆژوو بن و لەسەر دەرمانەکانیان بەردەوام بن، واتە ئەمەیان بەڕۆژوبوونە بە مەرج.

3. بەڕۆژووبوون بە مەرجی رێکخستی خواردن؛ دەردەپاشا (دائولمولوک) و هاوپۆلەکانی: ئەو نەخۆشییانەی بەهۆی کلسی یورەیت و کلسەکانی دیکە دروستدەبن، مشتومڕ هەیە لەبارەیان، بە گشتی دەتوانن بەڕۆژووببن، بەمەرجێک نەخۆشییەکەیان لە چەند مانگی پێشوودا کۆنترۆڵ بووبێت و لە رۆژانی نزیک رەمەزان نۆرەی هەوکردنی توندی جومگەیان نەبووبێت و گورچیلەیان سست نەبێت، شەوانە ئاو و شلەمەنی و سەوزە و ریشاڵی خۆراکی بە بڕی باش لە بەربانگ و شەوان و پارشێواندا وەربگرن و نەهێڵن تووشی وشکبوونەوەی زۆر ببن، کەمتریش گۆشت و شیرینی دەستکرد بخۆن، واتە ئەمانەش بەڕۆژووبوونە بە مەرجی زیاتر.

4. بەڕۆژووبوون پاش راوێژ بە پزیشکی گورچیلە؛ ئەوانەی رۆماتیزمیان هەیە و گورچیلەیان سستە: ئەمانە دەبێت جگە لە پزیشکی رۆماتیزم، راوێژ بە پزیشکی نەخۆشییەکانی گورچیلە (نیفرۆلۆجیست) بکەن، چونکە بەپێی قۆناغی سستییەکە و جۆرەکەی دەگۆڕێت، واتە نابێت بێ رێگەپێدانی پزیشکی نیفرۆلۆجیست بەڕۆژوو بن.

هەندێک رێنمایی گشتی بۆ رۆژووی تووشبووانی رۆماتیزم:

1. مەهێڵن وشک ببنەوە:

نەخۆشانی رۆماتیزم بڕی زۆری دەرمانیان هەیە و زۆریان دەبێ بەردەوام لەسەر دەرمان بن، ئەوەش بارگرانییەکی زۆر لەسەر گورچیلە دروستدەکات. بۆیە دەبێ زیاتر لە خەڵکی ئاسایی سووربن لەسەر دوورکەوتنەوە لە وشکبوونەوە، ئەویش بە زۆر خواردنەوەی ئاو و شلەمەنییە بێ کالۆرییەکانی دیکە، سەوزەکانی وەک خەیار و بیبەر و ئەوانی دی، خواردەمەنییە ئاودارەکانی وەکوو شوتی.

2. ژەمی ستیرۆیدەکان (پریدنیزۆڵۆن، کۆرتیزۆن و هاوپۆلەکانیان) بخەنە پارشێو، دەرمانەکانی دیکە بخەنە دوای بەربانگ.

3. هەموویان پابەند بن بە خواردنی تەندروستانە، دووربن لە خواردنی پڕ کالۆریی وەکوو شیرینییە دەستکردەکان، تووشبووانی دەردەشا نابێت هاوشێوەی کەسانی ئاسایی گۆشتخواردن و شیرینی خواردن بکەنە نەریتی رۆژانە، بەڵکو دەبێت زیاتر بەرهەمی رووەکی و شیرەمەنی بخۆن

4. خەوی باش و دەروونی ئارام گرنگن، زۆر بە تایبەت بۆ ئەوانەی فایبرۆمایەڵجیایان هەیە لەگەڵ رۆماتیزمەکەیان، یان فایبرۆمایەڵجیای سەربەخۆیان هەیە.

5. پزیشکەکەی خۆت ئاگاداریی زیاتری هەیە لەبارەی وردەکاریی حاڵەتەکەی تۆ، بەڵام ئەم رێنماییانەی من گشتین، ئەگەر ئەو رێنماییەکی کردیت جیاواز بوو لەم رێنماییانە، بۆچوونەکەی بە گرنگییەوە وەربگرە و کەمتەرخەم مەبە لە جێبەجێکردنی هۆشدارییەکان.

د. سەروەر سالار چوچانی

پزیشکی پسپۆڕی جومگە و رۆماتیزم

25/12/2024