Dr. Ahmed Aqeel Shakir د. احمد عقيل شاكر

Dr. Ahmed Aqeel Shakir د. احمد عقيل شاكر طبيب مقيم، ذو اهتمام خاص في مجال التعليم و صانع محتوى ت?

03/11/2021

السلام عليكم اصدقائي 😃

تمر علينا بالعراق كل يوم مواقف و احداث بالوسط الصحي يحتاج وعي الناس يزداد عليها

- جانب منها يخص قضايا الصحة العامة
- و جانب اخر يخص طبيعة عمل الاطباء و الكوادر الصحية بوسط هذا النظام الصحي

دا اشوف قلة ما اكو صنّاع محتوى عراقيين من الوسط الطبي ديسلطون ضوء على هيج جوانب
قررت اسوي هالبيج، و انشر بيها من يصيرلي مجال
ما اعرف اذا حكدر اتابع الصفحة و التزم بيها و استمر.. لكن عسى و لعل تكون ذو تأثير على كوادرنا انه يبدون هيج مبادرات و على مجتمعنا انه يشوف الدور الحقيقي لكوادرنا بهذا النظام الصحي.
تحياتي الكم

03/11/2021

ذكريات بداية جائحة كورونا.. من مدينة الطب
البوست هذا كتبتة سابقاً من بدت الجائحة تشتد، و عدت نشرة الآن مع تصاعد الاخبار حول السلالة الجديدة، الله يحفظ الجميع و يقيكم شرها. ......

مواقف واجهتني في آخر خفارتين
المكان: طوارئ مدينة الطب


الموقف الأول:
مما لا يخفى عليكم هي الاعداد المخيفة المتزايدة هذه الايام للمصابين.
بطبيعة الحال، الاوكسجين في المستشفى لا يكفي لتغطية كافة المصابين.
شنو اللي ديصير حاليا؟ وصلت مرحلة كل مريضين اخليهم على قنينة اوكسجين وحدة!
دتتصورون الموقف؟ هذا الاوكسجين هو حياتة لهذا الشخص و نفسة اللي يعيشة، و من دونة يموت، اخلي مريضين على كل قنينة، كل شوية واحد منهم ياخذ كم نفس و ينطي للمريض الآخر، لحد ما يتخربط و يرجع يتنفس شوية علي، و يعوفة مرة لخ!


الموقف الثاني:
مريضة متوسطة العمر وياها ابنها و بنتها اعمارهم نهاية العشرينات، اجتي للطوارئ كالمعتاد تعاني من صخونة و نحول شديد و كحة و انخفاض شديد في نسبة الاوكسجين في الدم، المفراس الحلزوني للصدر يبين انتشار الفايروس في كل اجزاء الرئة تقريباً، كل شيء يدل على انتشار الفايروس لمرحلة متقدمة جداً في جسدها.
توفيت المريضة بعد ١٠ ساعات من دخولها للطوارئ.
اتجهت لمكان جلوس الطبيب في الطوارئ لكتابة ملاحظات الوفاة و الساعة و التأريخ، رجعت لتسليم الكارت للأهل، شنو اللي شفتة؟
الابن مكابل والدتة المتوفية على سريريها و يسويلها اجرائات الانعاش الرئوي، و يضغط على صدرها و يحاول يحييها، و البنت تبوس بيها و حاضنتها ممصدكة باللي دتشوفة عينها.
موقف مخيف! متعرف تنتقد الاهل لان مملتزمين بأجرائات سلامتهم و معرضين نفسهم لهيج خطورة بشكل مباشر لو تنقهر عليهم و عالحالة الهستيرية اللي هم بيها!

الموقف الثالث:
موقف متكرر.. نستقبل احد مرضى الفشل الكلوي المزمن المشتبه باصابته بالفايروس، هذا المريض يحتاج عناية طبية معينة لكن تقديم هذه العناية الطبية فد تكون على حساب بقية المرضى ان كان المشتبه به مصاب فعلا، قرارات يحسب لها الف حساب قبل اتخاذها!
كما متعارف عليه بأن اغلب هؤلاء المرضى يحتاجون لغسل الكلى على الاقل مرتان اسبوعياً لأزالة السموم من الجسد و استعادة حيوته.
شنو موقف الطبيب هنا؟ حيدز على عمل مسحة اكيد، زين و اثناء انتظار المسحة؟ اذا قرر الطبيب ادخال المريض المشتبه به لردهة الغسل الكلوي و كان مصاب بالفايروس فعلاً فسيكون سبب لنقل العدوى لبقية المرضى و المعروفين بضعف مناعتهم، و اذا منعه من الدخول لردهة الغسل فسيموت المريض من مضاعفات الفشل الكلوي! حيرة ما بعدها حيرة!
قرارات مصيرية تضع مرضى كورونا في خصوصية تامة عند التعامل معهم. توفير الخصوصية التامة لجميع متطلبات المرضى المصابين و عزلهم اصبح من المستحيل مع تزايد عدد الاصابات الهائل، و هالشي محزن جداً.

الموقف الرابع
الساعة 7:55 صباحاً، ٥ دقائق قبل انتهاء خفارتي الليلية.
مريضة، والدة طبيب زميلنا (صدف ان كان هذا الطبيب خفر ويانة في نفس الخفارة) استقبلناها في الطوارئ تشكو من نحول و صخونة لمدة يومين فقط لا غير، نسبة الاوكسجين في الدم قليلة جدا!!
احد اخطر الاعراض السريرية لفايروس كورونا اللي دنلاحظها هذه الايام هو "نقص الاكسجة الصامت"، الرئة تبدي تدريجيا تتآكل و يتزامن هذا مع تكيف الجسم، فالمصاب لا يشكو من اي اعراض في المراحل المبكرة.
خليناها على اوكسجين بالسرعة الممكنة و سوينالهة مفراس، توفيت بعد ٢٠ دقيقة من دخول الطوارئ.
اثناء اجراء بروتوكولات الانعاش الرئوي وقف ابنها الطبيب جانباً و لم يستطع التدخل!
شكد ما اكتب ما اكدر اوصف كمية المشاعر في هذا الموقف! صعب جدا جدا..

الموقف الخامس:
استقبلنا نداء عن وصول احد مرضى سرطان الدم الى الطوارئ في غضون ١٠ دقائق. استغليت فرصة توفي احد المرضى قبل قليل لحجز قنينة الاوكسجين لمريض سرطان الدم القادم.
بهالأثناء استقبلنا حالة مستقرة نسبيا لمريض و زوجته مصابين بفايروس كورونا يكادون ان لا يشكون من اي اعراض، الزوج شاف قنينة الاوكسجين و طلب استعمالها، رفضت هالشي و وضحت انها محجوزة لمريض سرطان الدم القادم للطوارئ و كون حالته و حالة زوجته مستقرة و لا تتطلب اوكسجين.
دقيقة وحدة و اشوف احد معيني الطوارئ شايل قنينة الاوكسجين راكضاً لزوجة هذا المريض و بدأت هي بأستعمال القنينة بعد ما اعطى الزوج مبلغ مالي معين لهذا المعين.
تتسائلون شنو موقفي اني كطبيب؟ ببساطة خليت مريض سرطان الدم يتشارك قنينة اخرى مع مريض تعبان اخر.
ليش؟ لان اي تصرف أمني او مشاجرة افتعلها مع هذا المريض و زوجتهة حتنعكس نتائجها على الكادر الصحي و حتلهينا عن رعاية المرضى المتبقين في ضل هذا الزخم الكبير، و سيئاتها حتكون اكبر من ايجابياتها. اي نعم هذا اللي صار بدون اي مبالغة!

الموقف السادس:
موقف متكرر كل يوم نسمعة من مرافقي مرضانا.
دكتور ليش ما عدكم اوكسجين؟ ليش متنطونة اوكسجين؟ وين اودي ابوية، امي كل المستشفيات مقبطة؟ ليش متخلون الله بين عيونكم يا اطباء؟
دكتور هالعلاج ليش ما عدكميا بالطوارئ؟ دكتور وين انسانيتكم اجيبلك ابوية متخربط و تكلي ما عدكم سرير انعاش او تحويل لمستشفى العزل؟

بالرغم من كل التعب و كلشي دا اقدمة كطبيب، و هذا واجبي دا اسوي!
اكثر شغلة تحز بية تعرفون شنو؟ اكثر شعور مؤذي و محبط هو عندما المريض يحملني مسؤولية سيئات النظام الصحي، ميكول هذا طبيب يحاول يعالجني بأبسط المواد اللي متوفرة الة، يتصور انه الحل و الربط بأيدي و مدا اقدملة الرعاية اللي يستحقها.

اقرب الصورة اكثر؟
حرفياً الطبيب العراقي هو مقاتل جاي لساحة معركة بدون اسلحة و عتاد.

الله يوفق الجميع و يحفظ لكم اهاليكم و احبائكم.

د. احمد عقيل شاكر
طبيب مقيم دوري / مدينة الطب

03/11/2021

رمضان ٢٠٢١ 😃

"قبل يومين رجعت من خفارتي بعد منتصف الليل
و شفت الفديو من برنامج قط احمر حول الاطباء بفترة السحور من عمل احمد وحيد
حبيت اصور رد فعل حقيقي يمثل الواقع اللي عايشي اكثر من ٩٠٪ من الاطباء حول هالموضوع
تحياتي و محبتي الكم

و اهم شي تشوفون رسالة الفديو بالنهاية
https://youtu.be/-dvTYNm5mYQ

Address

Baghdad

Website

Alerts

Be the first to know and let us send you an email when Dr. Ahmed Aqeel Shakir د. احمد عقيل شاكر posts news and promotions. Your email address will not be used for any other purpose, and you can unsubscribe at any time.

Contact The Practice

Send a message to Dr. Ahmed Aqeel Shakir د. احمد عقيل شاكر:

Shortcuts

Share

Category