طبيب الاطفال د.مرتضى النبهان / الديوانية - حي العروبة

14/09/2026

الطفل اللي يتعود بالبيت يشارك ويجرب راح يدخل المدرسة وهو جريء بالمشاركة

الأب من ياخذ الطفل وياه ببعض الأمور اليومية
مثل تصليح شغلة بالبيت أو التسوق ويعطيه مهمة بسيطة تناسب عمره ويخليه يساعد بشغلة صغيرة

فغالباً هالتجارب تعلمه المسؤولية وتخليه يتعود يقرر ويحاول حتى لو ممكن يخطئ

وهذا يفيده بالمدرسة، فيصير يشارك بالصف ويبادر بالأنشطة وما يخاف يجرب شي جديد

13/09/2026

12/09/2026

بعد 3 أشهر من الولادة، بديتي تلاحظين شعَرچ يطيح؟
لا تخافين، غالبا هذا شي طبيعي بعد الولادة

بالحمل، الهرمونات تخلي الشعر يبقى ثابت وما يطيح مثل قبل بس بعد الولادة تتغير الهرمونات فيبدي الشعر اللي كان متأخر بالتساقط يطيح دفعة وحدة

وغالبًا يكون مؤقت وبعد فترة يبدي الشعر الجديد يطلع

لا توقفين غسل شعرچ أو تمشيطه. وإذا التساقط قوي أو مستمر راجعي طبيب وافحصي الحديد وفيتامين D

10/09/2026

تحسين نفسچ سريعة العصبية وما عندچ حيل تركزين

فلا تلومين نفسچ لان بس محتاجه تنامين وترتاحين

الأم من تسهر بالليل وتكعد أكثر من مرة، وبالنهار تكمل شغل البيت وتهتم بالأطفال، طبيعي تتعب ويصير تركيزها أقل وأعصابها أضيق

ومن ينام الطفل، مو كل مرة لازم تستغلين الوقت بالترتيب والغسيل.

إذا تكدرين نامي وياه 20–30 دقيقة أو حتى خليها استراحة هادئة
هالوقت إلج مو ضياع، جسمچ وعقلچ يحتاجوه للراحة

07/09/2026

طفلكم يبدي يشتكي من بطنه كلما يتأخر الأكل

مرات بقاء الطفل ساعات طويلة بدون أكل أو تأخير الوجبات يسبب له انزعاج بالمعدة أو يزيد الحموضة والحرقة عنده

فألي لازم تسونه تقدمون اله وجبات خفيفة ومنتظمة
ولا تخلونه يبقى فترة طويلة ومعدته فارغة.

وابتعدوا عن الأكلات الدسمة والحارة والمشروبات الغازية إذا تلاحظون أنها تزيد الأعراض

إذا استمر المغص أو الحرقة، أو صار وياها تقيؤ وفقدان شهية او نزول بالوزن راجعوا الطبيب حتى نعرف السبب ونحدد العلاج المناسب

05/09/2026

الطفل ياكل حجار وطين ؟

أكل التراب بشكل متكرر يعرّض الطفل للديدان والجراثيم، وممكن يكون مرتبط بنقص الحديد.

ونقص الحديد يخلي الطفل ياكل التراب أكثر، والتراب ممكن يعرّضه لمشاكل تزيد النقص

ولهذا من الأفضل فحص صورة الدم ومخزون الحديد حتى نعرف إذا الطفل عنده نقص فعلًا

إذا هالعادة مستمرة، الأفضل ينفحص الطفل عند طبيب أطفال بأسرع وقت ممكن

02/09/2026

نصيحة مهمة ، خلوا تجهيزات المدرسة الطفل هو الي يختيارها ، مو كلها من اختياركم

اخذوا الطفل وياكم من تشترون الدفاتر، القرطاسية وحافظة الأكل، وخلوه يختار الألوان والأشكال اللي يحبها

هاي المشاركة تخليه يتحمس للمدرسة ويحس أن هاي أغراضه هو

ومع الوقت يتعلم يكون مسؤول عنها ويحافظ عليها أكثر

01/09/2026

المدرسة ما بقالها شيء والى الان ما يعرفون الريوك شنو

إذا الطفل متعود ينام للظهر ويترك الريوك بالعطلة
فلا تنتظرون أول يوم دوام حتى تغيرون روتينه

من هسه عودوه على وقت صباحي ثابت لوجبة ريوك قبل ما يطلع حتى يتجنب الدوخة والخمول ويبدأ يومه بنشاط

30/08/2026

من العطلة للمدرسة مو بس وقت النوم يحتاج يتغيّر

إذا الطفل متعود يبقى ساعات طويلة على الموبايل لو الآيباد

فضروري من هسه تبدون بتقليل الشاشة بالتدريج
وعوضوها بنشاطات مثل اللعب والحركة

حتى يرجع يتعود على التركيز والنشاط بعيداً عن الشاشة

28/08/2026

قبل لا يبدأ الدوام تأكدوا اذا جسم طفلكم ما ناقصه شي

الفيتامينات والمعادن مثل فيتامين D وC ومجموعة B والحديد، إلها دور مهم بنمو جسم الطفل ونشاطه

وكذلك تركيزه وعمل جهازه المناعي
لذلك بهالفترة ركزوا على الأكل المتنوع
مثل الخضروات، الفواكه، البيض، اللحوم والبقوليات

وإذا الطفل أكله ضعيف أو عنده خمول وشحوب أو ضعف بالتركيز لا تنطونه الفيتامينات من نفسكم
خلي طبيب الأطفال يحدد إذا أكو نقص فعلًا ويحتاج علاج