10/09/2026
ابنك عم يبكي بأول يوم مدرسة؟......لا تستعجلوا توقفوا دموعه… فهموها أول شي .
لما طفل بالصف الأول يبكي ويقول: «ما بدي روح… بدي ماما»
فهذا مو دلع ولا ضعف ولا حتى دليل إنه ما رح يحب المدرسة هو عم يعيش انفصال جديد عن البيت والأشخاص اللي بيعطوه الأمان وعم يواجه مكان وعالم وروتين جديد.
لهيك لما نقله:
* «لا تبكي، ما في شي.»
* «خلص، إنت كبير!»
* «رح تنبسط كتير، ليش عم تبكي؟»
بهي الكلمات نحن من دون قصد عم نوصل له رسالة أن
«مشاعرك غلط… لا تحس فيها.»
بينما الطفل بهاللحظة محتاج يسمع كلمات متل :
«أنا شايف إنك زعلان… ومعك حق تكون زعلان.»
تقبّل مشاعر الطفل ما بيعني إننا نحققله اللي بدو ياه وما نبعته عالمدرسة .
هو ببساطة بيعني إننا نساعده يفهم:
أنا ممكن كون زعلان… وبنفس الوقت أقدر روح على المدرسة.
فالهدف بأول يوم مو إن الطفل ما يبكي.......الهدف أن يعرف أن حزنه مفهوم وأن الانفصال مؤقت وأن الأشخاص اللي بحبهم ويحبوه رح يرجعو.
دموعه مو فشل…...دموعه جزء من التكيف.
#معاً_لنفهم_نتعاطف_ونتغير
