Reykjalundur endurhæfing ehf

01/07/2026

Framkvæmdir við sundlaug og húsnæði Reykjalundar

Nokkrar mikilvægar endurbætur standa nú yfir á Reykjalundi. Unnið er að umfangsmiklum viðgerðum á sundlaugunum, en 26 ár eru síðan þær voru teknar í notkun. Skipt er um dúk sem hjúpar laugarnar að innanverðu og gert við sprungur í forðatanki sundlauganna. Lokar og lagnir, sem leka í lagnakjallara undir sundlaugunum, verða endurnýjaðar og skipt verður um síusand í hreinsibúnaði lauganna. Nýjar flísar verða lagðar við sundlaugarbarmana og lýsing ofan við laugarnar endurnýjuð. Framkvæmdirnar eru liður í viðhaldi og endurnýjun aðstöðunnar. Áætlað er að verkinu ljúki í fyrstu viku ágústmánaðar.

Jafnframt eru hafnar framkvæmdir við endurbætur og stækkun á setustofu á þriðju hæð, B-gangi Reykjalundar. Skipt verður um framhlið (gluggafront) frá þriðju hæð og niður á jarðhæð. Markmið framkvæmdanna er að bæta aðstöðu og ásýnd húsnæðisins. Áætlað er að verkinu ljúki í nóvember.

Við þökkum fyrir auðsýndan skilning á meðan framkvæmdum stendur og hlökkum til að taka í notkun endurnýjaða aðstöðu.

Nokkar myndir frá framkvæmdunum.

26/06/2026

Vinnuskóli Mosfellsbæjar leggur sitt af mörkum á Reykjalundi.

Ungmenni úr Vinnuskóla Mosfellsbæjar hafa undanfarna daga unnið að því að fegra og snyrta umhverfi Reykjalundar. Þrátt fyrir rysjótt veður og blautan dag hafa þau sýnt einstakan dugnað, vinnugleði og jákvætt viðhorf.

Það er okkur á Reykjalundi mikil ánægja að hafa þetta kraftmikla unga fólk í kringum okkur. Nærvera þeirra og góði andinn sem þau færa með sér veita bæði gleði og líf í daglegt starf.

Reykjalundur er afar þakklátur Mosfellsbæ fyrir þetta mikilvæga framlag. Fallegt og vel hirt umhverfi skiptir miklu máli fyrir starfsfólk, skjólstæðinga og gesti, en svæðið er einnig vinsælt útivistarsvæði fyrir Mosfellinga. Í kringum Reykjalund liggja fjölmargar skemmtilegar gönguleiðir sem njóta mikilla vinsælda allt árið um kring.

Við kunnum vel að meta það góða samstarf sem Reykjalundur á við Mosfellsbæ og erum þakklát fyrir þann stuðning sem bæjarfélagið sýnir starfsemi okkar og nærumhverfi.

Við sendum Mosfellsbæ og starfsfólki Vinnuskóla Mosfellsbæjar bestu þakkir fyrir vel unnin störf.

Myndir af kátum krökkum frá Vinnuskóla Mosfellsbæjar.

25/06/2026

Gjöf til Reykjalundar í þakklætisskyni

Pétur Ottesen færði Reykjalundi nýtt sjúkrarúm að gjöf. Með gjöfinni fylgdi eftirfarandi kveðja frá Pétri:

„Ég heiti Pétur Ottesen og fékk blóðþurrðar slag í júli 2024, naut endurhæfingar á Reykjalundi frá september 2025 til áramóta. Þar lærði ég að nýta mér þau verkfæri sem að mér voru rétt og er enn á góðum batavegi

Við andlát móður minnar, Fanneyjar Eddu Pétursdóttir skapaðist tækifæri til að gefa til baka til Reykjalundar með því að afhenda ykkur sjúkrarúm móður minnar með þakklæti fyrir tímann hjá ykkur

Það er mér bæði ánægja og þakklæti að geta lagt mitt af mörkum og ég vona að rúmið muni nýtast öðrum vel á þeirra vegferð til bata, rétt eins og ég fékk sjálfur svo mikilvæga aðstoð á minni vegferð.“

Kær kveðja,
Pétur Ottesen

Reykjalundur þakkar Pétri innilega fyrir veglega gjöf og óskar honum áframhaldandi góðs bata.

Á myndinni er Pétur Ottesen og dóttir hans við afhendingu sjúkrarúms til Reykjalundar.

24/06/2026

Vegleg gjöf til Heilsuþjálfunar Reykjalundar

Heilsuþjálfun Reykjalundar hefur fengið veglega gjöf frá Önnu Maríu Einarsdóttur sem færði starfseminni tvær frisbígolfkörfur og átta diska.

Gjöfin hefur þegar komið að góðum notum og þátttakendur tekið henni fagnandi. Frisbígolf er skemmtileg og aðgengileg hreyfing sem sameinar útiveru, hreyfingu og félagslega samveru.

Við færum Önnu Maríu innilegar þakkir fyrir stuðninginn og höfðinglega gjöf sem mun nýtast vel í starfsemi Heilsuþjálfunar.

18/06/2026

Áhrif kulda við göngu utandyra á blóðþrýsting, hjartslátt og mæði hjá einstaklingum með kransæðasjúkdóm: Forkönnunarrannsókn

Útiganga er ein einfaldasta og árangursríkasta þjálfunaraðferðin í hjartaendurhæfingu og er stunduð allan ársins hring á Reykjalundi. Að vetri til fylgir útigöngu þó kuldaáreiti sem getur haft áhrif á hjarta- og æðakerfið, sérstaklega hjá einstaklingum með kransæðasjúkdóm. Hingað til hafa rannsóknir á áhrifum kulda á þennan hóp verið takmarkaðar.

Í þessari forkönnunarrannsókn var leitast við að varpa ljósi á áhrif kulda við raunverulega gönguþjálfun utandyra að vetrarlagi, með samanburði við sambærilega áreynslu innandyra. Markmiðið var að meta svörun líkamans, meðal annars hvað varðar blóðþrýsting, hjartslátt, mæði og möguleg óþægindi, hjá einstaklingum með stöðugan kransæðasjúkdóm í hjartaendurhæfingu á Reykjalundi.

Grein eftir Telmu Sigþrúði Guðbjarnadóttur 6. árs læknanemi 2024-25 kom út í tímaritinu Læknaneminn sem fjallar um þessa rannsókn. Hún vann þessa rannsókn hér á Reykjalundi ásamt Karli Kristjánssyni lækni, Ingu S Þráinsdóttur lækni og Mörtu Guðjónsdóttir lífeðlisfræðing.

Útiganga er ein einfaldasta og árangursríkasta þjálfunaraðferðin í hjartaendurhæfingu og er stunduð allan ársins hring á Reykjalundi. Að vetri til fylgir útigöngu þó kuldaáreiti sem getur haft áhrif á hjarta- og æðakerfið, sérstaklega hjá einstaklingum með kransæðasjúkd....

10/06/2026

Takk Helga Björg Steinþórdóttir fyrir að þitt framlag.

Hleypur fyrir Reykjalundur endurhæfing

09/06/2026

03/06/2026

Róbotar sjá um sumarsláttinn á Reykjalundi.

Á Reykjalundi eru rúmlega 3,5 hektarar túna sem þarf að slá á hverju sumri. Til verksins notum við 5 slátturóbota. Hér er nýjasti róbotinn sem slær allar brekkur sem eru með allt að 40° halla. Róbotarnir vinna allan sólarhringinn 7 daga vikunnar. Fyrsti sláttur á vorin er í kringum 20.maí og endum síðasta slátt kringum 15.október.

Heildarafkastageta þeirra 5 róbota sem slá túnin á Reykjalundi er u.þ.b 5 hektarar á sólarhring við bestu aðstæður.

28/05/2026

Meistaranemar í klínískri sálfræði.

Á Reykjalundi er lögð rík áhersla á þverfaglegt samstarf sem stuðlar að bættri þjónustu og aukinni þekkingu á endurhæfingu. Reglulega vinna háskólanemendur að meistareverkefnum sínum í samstarfi við starfsfólk Reykjalundar, þar sem gögn og sérþekking Reykjalundar nýtast við skrif á rigerðum.

Tveir meistaranemar í klínískri sálfræði vörðu nýverið meistararitgerðir sínar við Háskólann í Reykjavík, en verkefnin eru byggð á gögnum frá Reykjalundi:
• Anna Linnéa Stierna vann úr gögnum frá EO sviðinu undir handleiðslu Jórunnar Eddu Óskarsdóttur. Heiti ritgerðar er Childhood Adversity and Obesity Treatment Outcomes: An Examination of the Association Between Adverse Childhood Experiences and Response to Obesity Treatment.
• Kristín Margrét Norðfjörð vann úr gögnum frá hjartasviði undir handleiðslu Ingu Hrefnu Jónsdóttur. Heiti ritgerðar er The Effects of Interdisciplinary Rehabilitation on Mental Health and Health-Related Outcomes in Individuals with Long-COVID.

Meistaraverkefni sem þessi styrkja enn frekar þekkingargrunn Reykjalundar og undirstrika mikilvægi samstarfs við nemendur og fræðasamfélagið. Óskar Reykjalundur Önnu Linnéa og Krístínu Margréti til hamingju með áfangann og velfarnaðar.

22/05/2026

Hlýhugur og stuðningur Hollvina skiptir miklu máli.

Hollvinir Reykjalundar færa Miðgarði sjö ný sjónvörp að gjöf.

Hollvinir Reykjalundar færðu nýverið Miðgarði, sólahringsdeild Reykjalundar, sjö ný Samsung 43” sjónvörp að gjöf. Sjónvörpin eru frá fyrirtækinu IceCom og verða sett upp í herbergjum deildarinnar. Með gjöfinni verða komin sjónvörp í öll herbergi Miðgarðs, sem mun auka þægindi og bæta aðstöðu sjúklinga til afþreyingar og upplýsinga á meðan á dvölinni stendur.

Reykjalundur er afar þakklátur fyrir þessa rausnarlegu gjöf og þann hlýhug og stuðning sem Hollvinir sýna starfsemi staðarins með þessum mikilvæga framlagi.

Hollvinir afhenda Reykjalundi gjöfina, á myndinni frá vinstir: Erna Arnardóttir stjórnarmaður, Kolbrún G. Þorsteinsdóttir stjórnarmaður, Júlíus Þór Jónsson formaður, Örn Kjærnested stjórnarmaður, Erna Bjargey Jóhannsdóttir sviðsstjóri hjúkrunar, Bárður Tryggvason stjórnarmaður.