Gló Æfingastöð

23/06/2026

Í byrjun júní tóku fjórir starfsmenn Gló þátt í árlegri alþjóðlegri ráðstefnu sem haldin var á Írlandi á vegum European Academy of Childhood-onset Disability, EACD Galway 2026

Yfirskrift ráðstefnunnar var sótt í írskt máltæki: „Encourage the young and they will flourish“ eða: Hvetjum börnin áfram og þau munu blómstra 🌼

Á ráðstefnunni var heildræn sýn á fötlun, heilsu og þroska barna í forgrunni en dagskráin var skipulögð út frá F-orðunum í þroska barna: Færni, Fjölskylda, Form, Fjör, Félagar og Framtíð.

Við hlýddum á fjölmörg áhugaverð erindi og tókum þátt í málstofum þar sem rauði þráðurinn var skýr: inngilding, sjálfsákvörðun, virk þátttaka fjölskyldna í rannsóknum og þróun þjónustu, mikilvægi félagslegra tengsla og tækifæri barna til þátttöku.

Sérstök áhersla var lögð á 'agency' — eða áhrifamátt barna og ungmenna til að hafa rödd, val og raunveruleg áhrif á eigið líf. Það minnti okkur á mikilvægi þess að þjónusta sé ekki aðeins mótuð fyrir börn og fjölskyldur, heldur með þeim.

Þessi áhersla styður vel við það sem Gló stendur fyrir: að horfa á tækifæri í stað takmarkana til að efla þátttöku í daglegu lífi.

Ferðin var afar lærdómsrík og við erum þakklát fyrir þau ómetanlegu tengsl sem sköpuðust við fjölskyldur, fagfólk, rannsakendur og samstarfsaðila víðs vegar að úr heiminum. Samtölin, hugmyndirnar og samstarfið sem kviknaði í Galway munu án efa nýtast okkur áfram í þróun þjónustu sem styður þátttöku og inngildingu svo að öll börn og ungmenni fái að láta ljós sitt skína ✨

Við hlökkum til að fylgjast áfram með starfi EACD — og taka þátt í EACD 2027 í Aþenu á Grikklandi.

23/06/2026

Í dag færum við elskulegu Göggu okkar hinstu kveðju. Við minnumst hennar með hlýju og miklu þakklæti.

Guðný Margrét Þórisdóttir, Gagga – eða frú Margrét eins og við kölluðum hana stundum, var sjúkraþjálfari og starfaði alla sína starfsævi hjá félaginu. Hún var ráðin til Reykjadals við upphaf starfseminnar í Mosfellsdal árið 1963, þá nýkomin heim frá námi í Svíþjóð. Fljótlega færði hún sig yfir á Æfingastöðina sem þá var með aðsetur að Sjafnargötu 13. Þar starfaði Gagga óslitið í 50 ár, allt þar til hún lét af störfum árið 2013, þá 73 ára að aldri.

Gagga var alla tíð mikill gleðigjafi, einstaklega létt í lund með smitandi hlátur og glettinn húmor. Hún var hrókur alls fagnaðar á samkomum, spilaði á gítar og fékk fólk iðulega með sér í söng og glens. Góðvild og hlýja skein úr fasi Göggu og einkenndi öll hennar störf á Æfingastöðinni. Hún var umhyggjusöm, traust og góður vinur starfsmanna jafnt sem skjólstæðinga. Minning hennar lifir ekki hvað síst í starfsmannafélaginu okkar sem ber nafn hennar með stolti.

Fjölskyldu Göggu og ástvinum sendum við okkar innilegustu samúðarkveðjur.

Í dag kveðjum við Guðnýju Margréti Þórisdóttur (25.06.1940-15.06.2026) með þakklæti og hlýju í hjarta.

11/06/2026

Tækifæri í stað takmarkana 💛
Við erum afar þakklát fyrir fallega umfjöllun um starf Gló Æfingastöðvar í nýjasta tölublaði Hvata.

Í greininni er fjallað um hvernig við vinnum með börnum, ungmennum og fjölskyldum þeirra með það að markmiði að efla þátttöku, styrkja færni og skapa raunveruleg tækifæri í daglegu lífi. Þar er einnig fjallað um mikilvægt samstarf við skóla, leikskóla, íþróttafélög og aðra sem mynda samfélagið í kringum hvert barn.

Við hvetjum ykkur til að lesa greinina á hvatisport.is
💛🏃‍♀️🌟

Hjá Gló Æfingastöð á Háaleitisbraut fer fram fjölbreytt og mikilvægt starf með börnum, ungmennum og fjölskyldum þeirra. Þar sækja árlega um 1700 einstaklingar þjónustu sjúkra- og iðjuþjálfa, en stærstur hluti þeirra eru börn og ungmenni með fjölbreyttar þarfir, styrkleika...