FEB Félag eldri borgara í Reykjavík og nágrenni

05/08/2026

Gönguhrólfar FEB slá aldrei slöku við. Í morgun þe 5. ágúst gengu þau að og uppá Búrfellsgjá - algjörir snillingar hér à ferð

05/08/2026

Hreyfidagatal sem hægt er að nota ár eftir àr

Hreyfidagatalið „Æfing dagsins“ er þróað af sjúkraþjálfurunum Hildi Aðalbjörgu Ingadóttur og Svandísi Björk Guðmundsdóttur fyrir hönd Félags sjúkraþjálfara í öldrunarþjónustu og nýtur stuðnings Landssambands eldri borgara, Félags sjúkraþjálfara og Farsællar öldrunar – þekkingarmiðstöðvar.

Hugmyndin að verkefninu kviknaði út frá þörf sem höfundar hafa orðið varir við í starfi sínu með eldra fólki. Sá hópur sem hreyfir sig minnst og er jafnframt viðkvæmastur fyrir færniskerðingu, byltum og heilsufarslegum hnignun á oft erfiðast með að hefja hreyfingu.

Markmiðið var að skapa leið sem byggir á þeirri hugmynd að lítil hreyfing á hverjum degi getur haft veruleg jákvæð áhrif til lengri tíma.

Með hreyfidagatalinu er leitast við að lækka þröskuldinn inn í hreyfingu með því að bjóða upp á eina einfalda æfingu á dag, sem er byggð á faglegri þekkingu og vísindalegum grunni sjúkraþjálfunar. Þannig fá notendur örugga og raunhæfa leið til að auka hreyfingu smám saman og á eigin forsendum.

Um er að ræða A5 gormabók sem er sett upp eins og dagatal, þar sem hver dagur inniheldur eina æfingu með skýrum leiðbeiningum og myndum. Boðið er upp á auðveldari og erfiðari útfærslur til að mæta mismunandi getu notenda. Dagatalið er margnota og hægt að nota ár eftir ár án þess að þörf sé á sérstökum búnaði.

Skipulag æfinga tekur mið af mikilvægustu forvarnarþáttum í öldrunarþjónustu, með áherslu á styrk og jafnvægi sem lykilþætti í að draga úr byltuhættu og viðhalda færni. Auk þess eru æfingar sem styðja við liðleika, samhæfingu, slökun og andlega heilsu.

Vikunni er skipt eftirfarandi:
• Mánudagur - styrkur
• Þriðjudagur – jafnvægi
• Miðvikudagur - styrkur
• Fimmtudagur - liðleiki/úthald/fræðsla/heilaleikfimi
• Föstudagur - styrkur
• Laugardagur - jafnvægi
• Sunnudagur - teygjur/slökun/nudd/raddþjálfun

Við óskum höfundum innilega til hamingju með vandað og flott verkefni!

Hægt er að kaupa eintök af Hreyfidagatalinu á vef LEB og sækja á opnunartíma skrifstofu, virka daga milli kl 9:00 og 12:00.

Hvert eintak kostar 9.900 kr.

Sjá hlekk í athugasemdum.

18/07/2026

https://www.visir.is/g/20262910970d/-thetta-er-bara-toppurinn-a-is-jakanum-

Formaður Félags eldri borgara í Reykjavík segir mál sjötugs manns sem missti aleiguna til fjárkúgara einungis vera toppinn á ísjakanum. Nýr veruleiki blasi við eldri borgurum á Íslandi og ljóst sé að mikil þörf sé á sérstökum Umboðsmanni eldri borgara sem komi þeim til aðst...

17/07/2026

Fimmtudaginn 16. júlí fóru FEB-ferðir Fjallabaksleið nyrðri í Landmannalaugar, Jökuldali, Eldgjá, Hólaskjól, niður Skaftártungu og um Vík. Að lokum var snæddur kvöldmatur á Hótel Dyrhólaey áður en keyrt var heim eftir langan ferðadag. Veðrið lék við farþega og því voru allir sáttir og glaðir. Nú tökum við okkur smá sumarfrí, en ekki örvænta, næsta FEB-ferð er um miðjan ágúst.

14/07/2026

Sumarlokanir hjá FEB 2026
Skrifstofa Félags eldri borgara í Reykjavík og nágrenni lokar vegna sumarleyfa dagana 20. júlí til og með 7. ágúst.

– Fyrsti tíminn eftir frí í leikfiminni „Sterk og liðug“ verður þriðjudaginn 11. ágúst.
– Fyrsti tíminn eftir frí í Zumba Gold 1 (fyrir byrjendur) verður þriðjudaginn 11. ágúst.
– Fyrsti tíminn eftir frí í Zumba Gold 2 (fyrir lengra komna) verður þriðjudaginn 11. ágúst.
– Fyrsta FEB-ferðin eftir sumarfrí er gönguferð um Jökulgil að Grænahrygg og Uppgönguhrygg, sem er á áætlun annan hvorn daginn 14. eða 15. ágúst (ef veður leyfir).

Annað félagsstarf byrjar seinna í haust og koma upplýsingar um það smám saman inn á heimasíðu FEB, ef þær upplýsingar er ekki núþegar þar að finna. Bendum sérstaklega á Viðburðardagatalið í þeim efnum.

Hafið þið það sem allra best og njótið sumarsins.
Bestu kveðjur,
starfsfólk FEB

14/07/2026

LEB sendi bréf í dag á heilbrigðisráðherra og gaf út ályktun um áætluð komugjöld vegna sjúkraþjálfunnar:

Landssamband eldri borgara mótmælir því harðlega að sett verði á komugjald í sjúkraþjálfun, eins og heilbrigðisráðherra hefur boðað frá 1. september næstkomandi.

Gjaldið, að upphæð 1.000 kr. gerir stórum hópi eldri borgara erfiðara að sækja þessa nauðsynlegu þjónustu. Sumir í þessum hópi þurfa á þjónustunni að halda í fleiri en eitt skipti mánaðarlega. Fjölmargir munu ekki ráða við þessa gjaldtöku. Enn eru um 20% eldra fólks á Íslandi með tekjur undir lágmarks taxta á almennum vinnumarkaði.

Við þurfum á því að halda þegar fjöldi eldra fólks í samfélaginu fer hækkandi að horfa til framtíðar og í lausnum sem þjóna samfélaginu til langs tíma. Það virðist vera stefna núverandi ríkisstjórnar að sverfa að eldra fólki í stað þess að leitast við að byggja upp kerfi sem styrkir eldra fólk til sjálfstæðis og betri heilsu.

Landssamband eldri borgara skorar á heilbrigðisráðherra að endurskoða þá ákvörðun að setja á ofangreint komugjald.

Björn Snæbjörnsson, formaður LEB.

Sigurður Ágúst Sigurðsson, varaformaður LEB.

12/07/2026

Það blés hraustlega síðasta daginn í ferð FEB-ferða norður á Strandir dagana 10. til 12. júlí - í annars mjög góðri ferð. Farþegar voru ánægðir, glaðir, sáttir og fróðari við heimkomu. Þökkum innilega leiðsögumönnunum Kára Jónassyni og Lýði Sörlasyni fyrir skemmtilegar og eftirminnilegar frásagnir og bílstjóranum Jóni Ragnari fyrir einkar öruggan akstur. Hlökkum til næstu ferðar með ykkur öllum!

12/07/2026

Þann 8. júlí fór góður hópur félagsmanna í dagsferð à Njáluslóðir með FEB-ferðum og hinum eina sanna Guðna Àgústssyni. Vel heppnuð ferð það 😉

07/07/2026

FEB-aðventuferðir til Munchen og Edinborgar
Mikið hefur verið spurt um aðventuferðirnar okkar fyrir næstu jól og nú getum við með ánægju upplýst að þær erum komnar í sölu. FEB-ferðir í samvinnu við ferðaskrifstofuna Betri ferðir bjóða upp á eina aðventuferð til Munchen og aðra til Edinborgar.
Skelltu þér með okkur, það getur borgað sig að bóka sig sem fyrst.

Munchen aðventuferð, dagana 24. til 28. nóv. – dagsferð til Salzburg innifalin
FEB-ferðir í samvinnu við ferðaskrifstofuna Betri ferðir bjóða upp á fjögurra nátta aðventuferð til Munchen í lok nóvember, en enginn ætti að láta slíka ferð fram hjá sér fara. Höfuðborg Bæjaralands með glæsilegum byggingum frá tímum voldugra konunga. Á þessum tíma er borgin í jólafötunum og jólamarkaðir og skreytingar út um alla borg. Í fróðlegri ökuferð skoðum við markverðustu byggingar og kennileiti sem og Ólympíuleikvanginn frá 1972 o.fl. Gönguferð um upphaf Hitlers, sjáum hvar bjórkjallarinn stóð, kynnumst fyrsta banatilræði við hann o.fl. Borðum á hinu fræga Hofbräu Haus frá 1589. Förum dagsferð til Salzburg á slóðir Mozart og kvikmyndarinnar Sound of Music. Ógleymanleg ferð.
Fararstjóri: Lilja Hilmarsdóttir hjá Betri ferðum.
Verð: 228.000 á mann í tvíbýli en 283.000 í einbýli.
Bókanir fara fram í gegnum bókunarsíðuna klik.is eða https://klik.is/event/buyingflow/148

Edinborg – aðventuferð, dagana 29. nóv. til 3. des. – hálendisferð innifalin
FEB-ferðir í samvinnu við ferðaskrifstofuna Betri ferðir bjóða upp á fjögurra nátta aðventuferð til Edinborgar um mánaðarmótin nóv. – des. Að mati Karls konungs Bretlands er Edinborg fallegasta borg landsins og er það ekki ofsögum sagt. Borgin er alls staðar skreytt dásamlegum jólaljósum og hafa Bretar kappkostað síðari ár að gera vel við borgir sínar á aðventunni og hefur Edinborg ekki farið varhluta af því. Gist á góðu hóteli í miðborginni og í boði er ökuferð um borgina og þar kynnumst við sögu hennar og viðburðum og eru það átakamiklar lýsingar. Við förum í gönguferð um frægustu götu Edinborgar Royal Mile og fáum leiðsögn um hús, menn og málefni. Kastalinn stendur við annan enda götunnar og hin tilkomumikla höll Holyrood Palace við hinn endann. Frægasti íbúi hennar var sjálf María Stúart. Borðum saman á yndislegum stað prýddum jólaljósum og anda liðinnar tiðar. Þá verður farið í hálendisferð m.a. til Trossachs þjóðgarðsins og Loch Lomond, þar sem ríkir einstök náttúrufegurð. Fáum okkur sameiginlega léttan hádegisverð og síðan verður ekið til hins þekkta Stirling kastala.
Fararstjóri: Lilja Hilmarsdóttir hjá Betri ferðum.
Verð: 238.000 á mann í tvíbýli en 307.000 í einbýli.
Bókanir fara fram í gegnum bókunarsíðuna klik.is eða https://klik.is/event/buyingflow/147

06/07/2026

Athugið - það eru örfá sæti laus í FEB-ferð á Njáluslóðir núna miðvikudaginn 8. júlí. Um dagsferð er að ræða sem hentar öllum😊

Í þessari dagsferð leiðir Guðni Ágústsson okkur á slóðir Hallgerðar Langbrókar og Njálsbrennu. Lagt er af stað frá Stangarhyl 4 kl. 9:00 en fyrsti viðkomustaður er Selfoss þar sem gengið verður um nýja miðbæinn. Næst er stoppað í Laugardælakirkju austan við Selfoss og þar verður sagt frá Bobby Fischer. Þaðan verður haldið að Odda á Rangárvöllum, áður en komið er í Hótel Fljótshlíð í Smáratúni, þar sem snædd verður kjötsúpa. Í framhaldinu er ekið að Hlíðarenda og svo yfir í Gunnarshólma þar sem Gunnar sneri aftur. Þá liggur leiðin suður að Bergþórshvoli og þaðan á Hvolsvöll í kaffi og pönnsur áður en haldið verður til Reykjavíkur.
Fararstjóri: Guðni Ágústsson.
Verð: 19.500 kr. (3.000 kr. bætast við ef þátttakandi er utanfélagsmaður)

Bókaðu strax til að missa ekki af ferðinni.