11/07/2026
Félag íslenskra hjúkrunarfræðinga lagði árið 2024 áherslu á að eiga opið samtal við félagsfólk sitt um dánaraðstoð. Mikilvægur liður í þeirri vinnu var hjúkrunarþing félagsins sem fór fram í október það ár undir yfirskriftinni „Hjúkrun við lok lífs“.
Yfir 200 hjúkrunarfræðingar tóku þátt í þinginu, ýmist á staðnum eða í streymi, þar á meðal fulltrúar nær allra fagdeilda félagsins. Upptökur af erindum voru jafnframt aðgengilegar í þrjá mánuði eftir þingið og á þeim tíma gafst hjúkrunarfræðingum áfram kostur á að koma sjónarmiðum sínum á framfæri. Fjölmargir nýttu sér það tækifæri.
Dagskrá þingsins var fjölbreytt og lögð var rík áhersla á að fá fram ólík sjónarmið og rök varðandi dánaraðstoð. Auk fræðsluerinda fóru fram umræður og vinnustofur þar sem þátttakendur ræddu málefnið og sjónarmið þeirra voru skráð.
Í kjölfarið voru öll sjónarmið og umræður tekin saman og greind. Úrvinnslan leiddi fram fimm meginþemu sem hafa síðan verið mikilvægur grunnur að afstöðu Félags íslenskra hjúkrunarfræðinga til dánaraðstoðar.
Félag íslenskra hjúkrunarfræðinga áréttar að gæta þurfi varfærni við túlkun niðurstaðna stakra megindlegra kannana um jafn flókið og viðkvæmt málefni og dánaraðstoð. Félagið hvetur alla sem hafa áhuga á málefninu til að kynna sér niðurstöður Hjúkrunarþings Félags íslenskra hjúkrunarfræðinga 2024, þar sem fram koma þau sjónarmið og sú vinna sem liggur til grundvallar afstöðu félagsins til dánaraðstoðar. Hlekk á niðurstöðurnar má finna í athugasemdum.
Undanfarið hefur umræða um dánaraðstoð á Íslandi verið áberandi. Málefnið snertir grundvallarspurningar um sjálfræði einstaklingsins, hlutverk heilbrigðisstarfsfólks og hvernig samfélagið vill standa að umönnun fólks við lífslok.
