Björgunarfélag Vestmannaeyja

02/09/2026

Við tökum undir með lögreglunni!!
Gerum sjóklárt, festum tunnur, setjum grillin inn eða festum og pökkum trampólíninu.

Veðurviðvörun 🚨💨
Lögreglan í Vestmannaeyjum vill benda á að í kvöld og fram til morguns er búist við talsverðu hvassviðri og snörpum vindhviðum! Við hvetjum bæjarbúa að sýna aðgát og ganga frá lausum munum eins og t.d. trampolínum og garðhúsgögnum.

Með því að tryggja lausamuni getum við dregið úr hættu á tjóni og slysum.

31/08/2026

Nú fer nýliðastarfið að byrja aftur hvetjum öll áhugasöm að mæta

31/08/2026

31/08/2026

Það er ekki á hverjum dagi sem við förum í útkall að Reynisfjöru í rennisléttum sjó, en það var nú tilfellið sl laugardag, um var að ræða strandaglópa öfugumeginn við hellinn, verkefni leystist vel með samvinnu nokkra sveita af suðurlandinu. En úr þvi að við vorum nú komnir alla leið stóðumst við ekki mátið og sigldum gegnum Dyrhólaey og náðum meðfylgjandi myndbandi af því.

23/08/2026

Þrjú útköll á skömmum tíma.

Undanfarið hefur Björgunarfélagið fengið óvenju mörg útköll á fastalandið – félagið hefur verið kallað út þrisvar sinnum á stuttum tíma til að taka þátt í útköllum þar.

Núna er fimm manna hópur frá félaginu á Sólheimajökli vegna slasaðs manns þar.

Á föstudaginn var félagið kallað út vegna slasaðs manns á Fimmvörðuhálsi. Þrír björgunarsveitarmenn lögðu land undir fót og fóru langleiðina á vettvang þegar afturköllun barst.

Og fyrir það var félagið einnig með fólk klárt eftir slys norðan við Pétursey, þar sem óvissa ríkti um hvort þyrla Landhelgisgæslunnar kæmist að og gæti athafnað sig á vettvangi. Á endanum reyndist ekki þörf á aðkomu hópsins, en málið sýnir vel hversu fljótt björgunarsveitarfólk þarf að vera tilbúið þegar óvissa er um framgang mála.

Þrjú útköll á jafn skömmum tíma er óvenju mikið og undirstrikar hversu mikilvægt starf björgunarsveita er, ekki bara í heimabyggð heldur um land allt. Sjálfboðaliðar félagsins standa vaktina hvenær sem á þarf að halda, hvort sem það er að degi eða nóttu, og eru reiðubúnir að leggja land undir fót með stuttum fyrirvara.

Björgunarfélagið er í góðri stöðu til að bregðast hratt við þegar kallið kemur af fastalandinu. Frá því að útkall berst og þar til hópur er kominn upp í Landeyjar líða jafnan um 30–40 mínútur, og í þeim verkefnum sem hér um ræðir nutum við jafnframt liðsinnis nágranna okkar, Björgunarsveitin Dagrenning Hvolsvelli og Flugbjörgunarsveitin Hellu.

Við þökkum öllu því góða fólki sem sinnir þessum verkefnum af alúð og fagmennsku, og sendum þeim sem slösuðust okkar bestu óskir um góðan bata.

28/07/2026

Síðustu daga hefur verið nóg um að snúast hjá okkur í Björgunarfélaginu. Við byrjuðum á öflugri þyrluæfingu með félögum okkar hjá Landhelgisgæslunni miðvikudaginn 15. júlí. Helgin fór svo í undirbúning fyrir flugeldasýningu fyrir þjóðhátíð ásamt því að við vorum boðuð í leit við Kirkjubæjarklaustur, en þegar við vorum að halda úr húsi kom afboðun því maðurinn var fundinn heill á húfi.

Á mánudag var svo fyrirhuguð önnur þyrluæfing en hún var afboðuð rétt fyrir æfingu vegna annarra verkefna þyrlunnar. Við nýttum tímann og fórum á góða sjóæfingu með mannskapinn sem var þegar mættur. Rétt rúmlega kl. 22 um kvöldið vorum við svo boðuð út vegna vélarvana harðbotna báts með 8 um borð. Þór var mannaður og lagt af stað einungis um 3 mínútum eftir boðun. Sem betur fer var gott veður og fór því allt vel. Okkur langar að ítreka mikilvægi þess að í harðbotna slöngubátum séu allir í vestum eða göllum.

Á þriðjudeginum um kl. 18 vorum við boðuð út á hæsta forgangi þar sem trilla hafði farið upp í Bjarnarey. Á rétt um 11 mínútum vorum við komin að bátnum en þá var Lóðsinn kominn að, þar sem hann var á siglingu á leið inn til Eyja. Lóðsinn tók trilluna í tog og gekk heimferðin vel.

Á miðvikudeginum fórum við með hóp lögreglumanna frá lögreglunni í Vestmannaeyjum út í Bjarnarey og sóttum þau svo aftur á fimmtudeginum.

Á föstudeginum fengum við svo spennandi beiðni um að sækja golfsett sem hafði yfirgefið eiganda sinn og fallið fram af hamrinum — verkefnið gekk mjög vel og var góð æfing.

Öll kvöld vikunnar hafa svo, ásamt þessu öllu, farið í flugeldavinnu fyrir flugeldasýninguna á laugardagskvöldinu á Þjóðhátíðinni.

Í gær var svo fjallabjörgunarhópur Björgunarfélagsins ræstur út ásamt undanförum af Suðurlandinu vegna slyss rétt norðan við Pétursey. Um tíma leit út fyrir að þyrlan næði ekki að hífa manninn upp og kom þá upp sú hugmynd að hún myndi sækja félaga frá okkur og ferja upp að slysstað til viðbótar við þær bjargir sem þegar voru komnar á staðinn. Þyrlunni tókst svo að hífa manninn upp og flytja hann til skoðunar og aðhlynningar á bráðamóttöku Landspítalans.

15/07/2026

Kæru Vestmannaeyjingar.

Æfing stendur nú yfir á vegum Björgunarfélags Vestmannaeyja í samstarfi við Landhelgisgæslu Íslands. Að æfingunni koma þyrla Landhelgisgæslunnar og björgunarbáturinn Þór.

Markmið æfingarinnar er að þjálfa samhæfingu áhafna við björgunaraðgerðir á sjó, meðal annars hífingar milli báts og þyrlu. Æfingar sem þessar eru mikilvægur liður í að tryggja viðbragðsgetu og öryggi sjófarenda við Vestmannaeyjar.

Íbúar og gestir kunna að verða varir við þyrluflug og bátsferðir í nágrenni Eyjanna á meðan á æfingunni stendur. Engin hætta er á ferðum og er um skipulagða æfingu að ræða.

Björgunarfélag Vestmannaeyja

06/07/2026

Við tökum undir viðvörun og hvatningu lögreglu til bæjarbúa, hugum að öllu lauslegu, veðurspá næturinnar og morgunsins er ekki spennandi.

⚠️Veður viðvörun⚠️

Lögreglan í Vestmannaeyjum vill benda á að í nótt/fyrramálið! Er búist við miklu hvassviðri og snörpum vindhviðum! Við hvetjum bæjarbúa að sýna aðgát og ganga frá lausum munum eins og t.d. trampolínum og garðhúsgögnum.

Með því að tryggja lausamuni getum við dregið úr hættu á tjóni og slysum.

Verum öll á varðbergi og förum varlega.🌬️

01/07/2026

Til hamingju með aldarafmælið, Landhelgisgæsla Íslands – 100 ár í dag! 🇮🇸⚓

Þann 1. júlí 1926 tók íslenska ríkið formlega við rekstri björgunarskipsins Þórs af Björgunarfélagi Vestmannaeyja, og sá dagur markar stofnun Landhelgisgæslu Íslands. Í dag eru því liðin 100 ár – og það er engin tilviljun að sagan hefjist einmitt hér í Eyjum.

Það voru stórhuga Vestmannaeyingar sem stofnuðu Björgunarfélag Vestmannaeyja árið 1918, eftir ítrekuð slys og mannskaða í vélbátaútgerðinni, og söfnuðu fé til að eignast björgunarskip. Haustið 1919 keypti félagið danska skipið „Thor", sem var íslenskað og hlaut nafnið Þór. Skipið kom til Vestmannaeyja 26. mars 1920 og varð fyrsta varðskip þjóðarinnar – sinnti bæði björgun Eyjabáta og eftirliti með veiðum erlendra togara, og árið 1924 var sett á það fallbyssa.

Frumkvæði og fórnfýsi Eyjamanna lagði með öðrum orðum beinan grunn að stofnun Landhelgisgæslunnar, og þessi tengsl hafa haldist sterk alla tíð síðan – Vestmannaeyjar voru meðal annars fyrsti viðkomustaður björgunarþyrlunnar TF-LÍF árið 1995 og núverandi varðskips Þórs árið 2011.

Við í Björgunarfélagi Vestmannaeyja sendum starfsfólki Landhelgisgæslunnar, fyrr og nú, okkar hlýjustu kveðjur og innilegustu þakkir fyrir ómetanlegt starf í þágu sjófarenda
og landsmanna allra í heila öld.
Þökkum frábært samstarf í eina öld

Til hamingju með daginn öll.

Björgunarfélag Vestmannaeyja. Landhelgisgæsla Íslands/Icelandic Coast Guard

19/05/2026

Í dag tók Björgunarfélag Vestmannaeyja, ásamt fleirum, við styrk frá Oddfellowstúkunum í Vestmannaeyjum, Herjólfur og Vilborg, sem afhentu styrk úr Styrktar og líknarsjóði Oddfellowa.

Svona stuðningur skiptir okkur gríðarlega miklu máli og hjálpar okkur að halda úti öflugu björgunarstarfi hér í Eyjum. Starfið okkar byggir á sjálfboðaliðum og því er ómetanlegt að finna þann meðbyr og velvilja sem samfélagið sýnir okkur.

Það sem við fengum afhent var;
* Intercom fyrir björgunarbátinn Þór
* Tvær titanium split börur
* Tvö Corpuls AED stuðtæki
* Létt grjónadýna
* Tvö grjónaspelkusett ásamt dælu
* BRS belgir
* Björgunargalli
* Starlink

Allt þetta er þegar komið í notkun hjá okkur.

Það er ykkur að þakka að okkar viðbragð er orðið enn betra.

Fyrir hönd félagsins vil ég færa ykkur innilegar þakkir fyrir stuðninginn.

Takk kærlega fyrir okkur.

https://tigull.is/styrkveitingar-oddfellow-i-vestmannaeyjum-rumlega-20-000-000-kr/