06/08/2026
Wasaaradda Caafimaadka iyo Daryeelka Bulshada ee Dowladda Jubaland ayaa maanta magaalada Kismaayo ku qabatay munaasabad ballaaran oo lagu xusayay Toddobaadka Naas-nuujinta Adduunka (World Breastfeeding Week), oo sannad kasta caalamka laga xuso 1-da ilaa 7-da Agoosto. Munaasabaddan ayaa ujeeddadeedu ahayd kor u qaadista wacyigelinta bulshada ee ku saabsan muhiimadda naas-nuujinta iyo dhiirrigelinta hooyooyinka si ay carruurtooda u siiyaan naas-nuujin buuxda.
Munaasabadda waxaa ka qeyb galay Agaasimaha Guud ee Wasaaradda Caafimaadka iyo Daryeelka Bulshada Dowladda Jubaland, Mudane Maxamed Xuseen Maxamed, Guddoomiyaha Guddiga Arrimaha Bulshada ee Golaha Wakiillada Jubaland, Xildhibaan Shire, Agaasimayaasha Waaxyaha Wasaaradda, shaqaalaha Wasaaradda, wakiillo ka socday hay’adaha caalamiga ah ee bahwadaagta la ah Wasaaradda, culimaa’udiin, ururrada bulshada rayidka ah, iyo marti sharaf kale.
Mas’uuliyiintii iyo martidii ka hadashay munaasabadda ayaa adkeeyay in naas-nuujintu ay tahay tiirka ugu muhiimsan ee caafimaadka iyo korriinka ilmaha. Waxay tilmaameen in caanaha naaska hooyadu ay yihiin nafaqada ugu dhammaystiran ee uu ilmuhu heli karo, maadaama ay xoojiyaan difaaca jirka, yareeyaan halista cudurrada, isla markaana door weyn ka qaataan korriinka maskaxda iyo jirka ilmaha.
Agaasimaha Guud ee Wasaaradda Caafimaadka iyo Daryeelka Bulshada Dowladda Jubaland, Mudane Maxamed Xuseen Maxamed, oo khudbad ka jeediyay munaasabadda, ayaa sheegay in heerka naas-nuujinta buuxda ee carruurta Soomaaliyeed uu weli ka hooseeyo heerkii loo baahnaa. Wuxuu xusay in arrintaasi ay saameyn taban ku yeelan karto caafimaadka, korriinka iyo horumarka carruurta. Agaasimuhu wuxuu carrabka ku adkeeyay in ololaha sanadkan uu diiradda saarayo kor u qaadista wacyiga bulshada iyo dhiirrigelinta hooyooyinka si ay carruurtooda ugu naas-nuujiyaan si buuxda lixda bilood ee ugu horreeya noloshooda.
Wasaaradda Caafimaadka iyo Daryeelka Bulshada Dowladda Jubaland waxay ugu baaqday dhammaan qoysaska, bulshada, culimada, bahwadaagta caafimaadka iyo hay’adaha kala duwan inay si wadajir ah uga qeyb qaataan taageeridda iyo dhiirrigelinta naas-nuujinta, maadaama ay tahay maalgashi muhiim u ah caafimaadka iyo mustaqbalka carruurta.
Toddobaadka Naas-nuujinta Adduunka waa olole caalami ah oo sannad kasta la qabto si kor loogu qaado wacyigelinta ku saabsan faa’iidooyinka naas-nuujinta. Farriinta ugu weyn ee ololahani waa in ilmuhu helo naas-nuujin buuxda lixda bilood ee ugu horreeya noloshiisa, iyadoo la sii wado naas-nuujinta isla markaana lagu darayo cuntooyin nafaqo leh ilaa uu ilmuhu ka gaarayo ugu yaraan laba sano, si loo xaqiijiyo korriin caafimaad qaba iyo mustaqbal wanaagsan.
-------
𝐃𝐇𝐀𝐌𝐌𝐀𝐀𝐃
Mohamet Jama Harett
Mohamed Suldan
