19/04/2026
វិធីសាស្ត្រសង្គ្រោះភ្នែក និងថែរក្សាភ្នែកពីការសម្លឹងអេក្រង់
(ផ្អែកលើការស្រាវជ្រាវវេជ្ជសាស្ត្រ)
ការសម្លឹងមើលអេក្រង់កុំព្យូទ័រ ឬទូរស័ព្ទជាបន្តបន្ទាប់រាប់ម៉ោង បណ្ដាលឱ្យមានអាការៈចុករោយ ស្រវាំង ស្ងួត និងឈឺក្បាល ដែលក្នុងពាក្យបច្ចេកទេសពេទ្យហៅថា Computer Vision Syndrome (CVS) ឬ Digital Eye Strain
ដើម្បីដោះស្រាយបញ្ហានេះ ស្ថាប័នសុខភាពភ្នែកធំៗលើពិភពលោកបានណែនាំឱ្យអនុវត្តរូបមន្ត "២០-២០-២០" ដែលមានសេចក្ដីលម្អិតដូចខាងក្រោម...
យន្តការនៃច្បាប់ ២០-២០-២០ ⏱️
១. សម្រាកភ្នែករៀងរាល់ ២០ នាទីម្ដង
ការអនុវត្ត - ពេលកំពុងប្រើប្រាស់អេក្រង់ អ្នកត្រូវផ្អាកការងាររៀងរាល់ ២០ នាទីម្ដង
តាមបែបវិទ្យាសាស្ត្រ - តាមធម្មតា មនុស្សយើងព្រិចភ្នែកប្រហែល ១៥ ទៅ ២០ ដង ក្នុងមួយនាទី ប៉ុន្តែការសិក្សាបានបង្ហាញថា ពេលយើងផ្ដោតលើអេក្រង់ អត្រានៃការព្រិចភ្នែកធ្លាក់ចុះមកនៅត្រឹម ៥ ទៅ ៧ ដង ប៉ុណ្ណោះ។ ការសម្រាករៀងរាល់ ២០ នាទី គឺជាការរំលឹកខួរក្បាលឱ្យចាប់ផ្ដើមព្រិចភ្នែកឡើងវិញ ដើម្បីផលិតទឹកភ្នែកមកផ្សើមគ្រាប់ភ្នែក។
២. សម្លឹងមើលទៅទីឆ្ងាយចម្ងាយ ២០ ហ្វីត (ប្រហែល ៦ ម៉ែត្រ)
ការអនុវត្ត - បង្វែរក្រសែភ្នែកពីអេក្រង់ ទៅមើលវត្ថុនៅឆ្ងាយចម្ងាយយ៉ាងហោចណាស់ ៦ ម៉ែត្រ (ដូចជាមើលចេញក្រៅបង្អួច មើលដើមឈើ...)។
តាមបែបវិទ្យាសាស្ត្រ - ការសម្លឹងមើលវត្ថុជិតៗ (ដូចជាអេក្រង់) តម្រូវឱ្យសាច់ដុំក្នុងភ្នែកឈ្មោះថា Ciliary muscle កន្ត្រាក់ និងប្រឹងខ្លាំងជាប់រហូត ដើម្បីកែតម្រូវកែវភ្នែក។ ការសម្លឹងទៅវត្ថុនៅឆ្ងាយចម្ងាយ ២០ ហ្វីតឡើងទៅ គឺជាស្ថានភាពដែលសាច់ដុំនេះបាន "លែង" និងមិនត្រូវការការប្រឹងប្រែង។
៣. សម្លឹងមើលឱ្យជាប់រយៈពេល ២០ វិនាទី
ការអនុវត្ត - រក្សាការសម្លឹងទៅទីឆ្ងាយនោះឱ្យបានយ៉ាងតិច ២០ វិនាទី មុននឹងត្រឡប់មកមើលអេក្រង់វិញ។
តាមបែបវិទ្យាសាស្ត្រ - ២០ វិនាទី គឺជារយៈពេលអប្បបរមាដែលសាច់ដុំភ្នែក ត្រូវការដើម្បីសម្រាក និងត្រឡប់ទៅរកសភាពដើមវិញទាំងស្រុង។
🔸ក្រៅពីច្បាប់ ២០-២០-២០ អ្នកគួរអនុវត្តបន្ថែមនូវចំណុចខាងក្រោម
កែសម្រួលទីតាំងអេក្រង់ - អេក្រង់កុំព្យូទ័រគួរនៅឆ្ងាយពីភ្នែកចម្ងាយប្រហែលមួយប្រវែងដៃ (២៥ ទី ២៥ អ៊ីញ) និងទាបជាងកម្រិតភ្នែកបន្តិច (១០ ទៅ ១៥ ដឺក្រេ)។
ពន្លឺក្នុងបន្ទប់ - ជៀសវាងការប្រើកុំព្យូទ័រក្នុងបន្ទប់ងងឹត ឬមានពន្លឺចាំងផ្លាតលើអេក្រង់។
ប្រើទឹកភ្នែកសិប្បនិម្មិត សម្រាប់អ្នកដែលប្រើប្រាស់កែវភ្នែក ឬមានបញ្ហាស្ងួតភ្នែកស្រាប់ គួរប្រើទឹកបន្តក់ភ្នែកដើម្បីជួយរក្សាសំណើម។
_____សុវត្ថន៍-Sovathn
ឯកសារយោង :
- American Optometric Association. (n.d.). Computer vision syndrome.
- Anshel, J. (2005). Visual ergonomics handbook. CRC Press.
- Mukamal, R. (2021, February 26). Computers, digital devices and eye strain. American Academy of Ophthalmology.
- Rosenfield, M. (2011). Computer vision syndrome: A review of ocular causes and potential treatments. Ophthalmic and Physiological Optics, 31(5), 502–515.
#សុវត្ថន៍_Sovathn #ភ្នែក #ភ្នែកភ្លឺ #ភ្នែកងងឹត #ព្យាបាលភ្នែក #រក្សាភ្នែក #ភ្នែកខូច #សម្លឹងអេក្រង់ #សម្រាកភ្នែក #សម្លឹងមើល #វិធីសាស្ត្រសង្គ្រោះភ្នែក #ភ្នែកខ្វាក់
