27/08/2026
ផ្ញើរជូនបងប្អូនដែលកើតមហារីកទាំងអស់ បងប្អូនមិនឯងការទេ ពួកយើងលើកទឹកចិត្ត គាំទ្រ ចាំជួយពីខាងក្រោយ។ ដោយក្តីស្រលញ់និងគោរពពីក្រុមការងារឌីអរថបគ្លីនិក
#មន្ទីរសំរាកព្យាបាលឌីអរថប
ខ្ញុំដឹងថាកើតជំងឺមហារីកសុដន់ តាំងពីខែ ២ ប្រភេទសាច់កាចខ្លាំង (Triple-negative breast cancer) ដំណាក់ការទី ៣ C ។ មុនទទួលការវះកាត់ ខ្ញុំចាក់ថ្នាំគីមី ១២ ដង និង ថ្នាំព្យាបាលប្រព័ន្ធភាពសុាំ ៥ដង (ដោយការព្យួរ)។ ខែមុន ខ្ញុំទទួលការវះកាត់បានជោគជ័យ របួសចាប់ផ្តើមជា តែដំណើរការនៃការព្យាបាលជំងឺមហារីកប្រភេទកាចខ្លាំង នៅវែងឆ្ងាយទៀត។ ខ្ញុំត្រូវទទួលការព្យាបាលដោយបាញ់កាំរស្មីចំនួន 15 ដង (៥ដង ក្នុង ១ សប្ដាហ៍; ៣ សប្ដាហ៍ជាប់គ្នា) ថែមទាំងត្រូវទទួលការព្យាបាលដោយប្រព័ន្ធភាពសុាំ (immunotherapy) ចំនួន ៩ដងទៀត គម្លាត ៣ អាទិត្យម្តង និងត្រូវលេបថ្នាំគីមី ៦ ខែទៀត (oral chemotherapy)។
ក្នុងនាមជាអ្នកចិត្តសាស្ត្រ ខ្ញុំឱ្យអាទិភាពការថែទាំផ្លូវចិត្តខ្លាំង ចាប់តាំងពីខ្ញុំដឹងថាកើតជំងឺនេះ ខ្ញុំតែងតែជួបអ្នកជំនាញព្យាបាលផ្លូវចិត្តតាមបែបចិត្តសាស្ត្រនៅពេលខ្ញុំត្រូវការ អ្នកស្គាល់ខ្ញុំតែងតែនិយាយថា ខ្ញុំរឹងម៉ាំ តែខ្ញុំគិតថា ខ្ញុំមានភាពធន់ផ្លូវចិត្តច្រើនជាង ព្រោះខ្ញុំចេះសម្រួលអារម្មណ៍និងរកជំនួយផ្លូវចិត្តពេលខ្ញុំទន់ជ្រាយ ខ្ញុំមិនមែនរឹងម៉ាំគ្រប់ពេលទេ។ ខ្ញុំគិតថា ខ្ញុំបានធ្វើវាល្អបំផុតហើយ តែការព្យាបាលផ្លូវចិត្ត មិនដូចការព្យាបាលផ្លូវកាយ។
ម្សិលមិញខ្ញុំចូលរួមអនឡាញក្នុងក្រុមអ្នកជំងឺមហារីកសុដន់ពីអង្គការខាងក្រោមនេះ ឥទ្ធិពលរបស់ក្រុមដែលមានមនុស្សកើតដូចគ្នា ឆ្លងកាត់ដំណើរការព្យាបាលដូចគ្នា គ្រាន់តែចាប់ផ្តើមណែនាំខ្លួន ទឹកភ្នែកហូរដោយមិនដឹងខ្លួន ខ្ញុំក៏នឹកស្មានមិនដល់។ ខ្ញុំដឹងគុណដែលខ្ញុំបានចូលរួមក្រុមនេះ 🙏 ក្រៅពីទទួលការគាំទ្រផ្លូវចិត្ត ខ្ញុំទទួលបានពត៌មានជាច្រើន ជាពិសេសអត្ថបទមួយនេះនិយាយពីទុក្ខសោក (Grief)។
"ទោះជាការព្យាបាលដំណើរការល្អ ឬមុខរបួសជាតាមការរំពឺងទុក ភាពធូរស្រាលមិនបានលុបបំបាត់ការបារម្ភឬធ្វើឱ្យអ្នកមានអារម្មណ៏ដូចមុន.... ការរស់នៅជាមួយមហារីកឬការរស់នៅបន្តក្រោយកើតមហារីក គឺជាការរៀនស្គាល់វា (ទុក្ខសោក) នៅពេលវាកើតឡើង និងដាក់ឈ្មោះអោយវា។... ទុក្ខសោកជាការឆ្លុះបញ្ចាំងពីក្តីស្រលាញ់។ វាបង្ហាញយើងពីអ្វីដែលមានតម្លៃនិងសំខាន់សម្រាប់យើង ហើយការយល់ដឹងបែបនេះ អាចធ្វើឱ្យយើងងាយស្រួលបន្តិចក្នុងការទទួលយក"
ការចែករំលែករបស់ខ្ញុំនេះ គ្រាន់តែចង់ប្រាប់ថា
១. ការថែទាំផ្លូវចិត្តពិតជាសំខាន់ណាស់ ជាពិសេសការរកជំនួយពីអ្នកចិត្តសាស្ត្រ ព្រោះអ្នកជាមនុស្ស អ្នកមិនអាចរឺងម៉ាំរហូតនោះទេ។
២. ទោះជាអ្នកមានអារម្មណ៏ថា អត់អី (អ្នកនៅអាចធ្វើការកើត បំពេញមុខងារប្រចាំថ្ងៃ) ឬមានភាពធន់ផ្លូវចិត្ត វាមិនមានន័យថា វាអត់អីទេ ជាពិសេស អារម្មណ៍ដែលផ្សាភ្ជាប់ជាមួយស្ថានភាពឬការលំបាកដែលអ្នកកំពុងជួបប្រទះ ព្រោះអ្នកមានបេះដូង អ្នកជាមនុស្ស មិនមែនមនុស្សយន្ត។ វាមិនអីទេ ដែលអ្នកទន់ជ្រាយ អ្នកយំ អ្នកមានអារម្មណ៍ឯកោ ទុក្ខសោក ខឹង ។ល។
៣. អ្នកដែលជួបការលំបាក មិនត្រូវការការអាណិតទេ តែពួកគាត់ត្រូវការការយល់ចិត្ត ជាពិសេស កន្លែងសុវត្ថិភាពដែលអាចអោយគាត់បញ្ចេញអារម្មណ៍ទុក្ខសោកឬអារម្មណ៍ដែលកប់ក្នុងចិត្ត កន្លែងសុវត្ថិភាពដែលគាត់អាចយំបាន កន្លែងសុវត្ថិភាពដែលគាត់អាចធ្វើជាខ្លួងឯងពេញលេញ កន្លែងដែលទទួលយកគាត់ជាគាត់ទោះបីជាក្នុងស្ថានភាពទន់ជ្រាយ ... (កន្លែងសុវត្ថិភាព សំដៅលើការបង្កើតបរិយាសដែលផ្តល់ការគាំទ្រដោយការស្តាប់និងយល់ចិត្ត ជាពិសេសមិនវិនិច្ឆ័យ បន្ទោស ឬផ្តល់ដំបូន្មាន)។
៤. សម្រាប់អ្នកជំងឺមហារីកសុដន់ដែលចេះភាសាអង់គ្លេស អាចចូលអានអត្ថបទឬចូលក្រុមនេះបាន តាមគេហទំព័រនេះ
https://www.breastcancer.org/community/virtual-meetups
៥. នៅពេលដែលខ្ញុំស្ងាត់ មិនបានផុសវីដេអូចែករំលែក ឬផុសក្នុងក្រុមគាំទ្រផ្លូវចិត្តអ្នកជំងឺមហារីក មានន័យថា ខ្ញុំកំពុងឱ្យអាទិភាពលើការថែទាំសុខភាពខ្លួនឯងទាំងផ្លូវចិត្តនិងផ្លូវកាយ។ ខ្ញុំត្រូវជួយខ្លួនឯងមុនខ្ញុំអាចជួយអ្នកដទៃ។
#ថែទាំខ្លួនឯង #ថែទាំចិត្ត #មហារីកសុដន់ #សុខភាពផ្លូវចិត្ត #លឹមប៊ួយហៀក #អ្នកចិត្តសាស្ត្រខ្មែរ
