មន្ទីរពេទ្យព្រះអង្គឌួង - Preah Ang Duong Hospital

12/08/2026

នាព្រឹកថ្ងៃពុធ ១៤រោច ខែទុតិយាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១២ ខែសីហា ឆ្នាំ២០២៦ លោកសាស្ត្រាចារ្យរង ​លូ លីឃាង នាយកមន្ទីរពេទ្យព្រះអង្គឌួង បានអញ្ជើញបើកវគ្គបណ្តុះបណ្តាល ស្តីពីការសង្គ្រោះបឋមនៃការគាំងបេះដូង និងការគ្រប់គ្រងផ្លូវដង្ហើម ជូនដល់ប្រធានមណ្ឌលសុខភាព នៃមន្ទីរសុខាភិបាលនៃរដ្ឋបាលខេត្តតាកែវ ពីក្រុមគ្រូពេទ្យនៃមន្ទីរពេទ្យព្រះអង្គឌួង។ វគ្គបណ្តុះបណ្តាលនេះ មានការអញ្ជើញចូលរួមស្វាមគន៍ពីលោកឱសថការី ផាន់ វ៉ាន់ ប្រធានមន្ទីរសុខាភិបាលនៃរដ្ឋបាលខេត្តតាកែវ៕

11/08/2026

នាព្រឹកថ្ងៃអង្គារ ១៣រោច ខែទុតិយាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១១ ខែសីហា ឆ្នាំ២០២៦ លោកសាស្ត្រាចារ្យរង ​លូ លីឃាង នាយកមន្ទីរពេទ្យព្រះអង្គឌួង បានអញ្ជើញបើកវគ្គបណ្តុះបណ្តាល ស្តីពីការសង្គ្រោះបឋមនៃការគាំងបេះដូង និងការគ្រប់គ្រងផ្លូវដង្ហើម ជូនដល់ប្រធានមណ្ឌលសុខភាព នៃមន្ទីរសុខាភិបាលនៃរដ្ឋបាលខេត្តកំពត និងប្រធានមណ្ឌលសុខភាព នៃមន្ទីរសុខាភិបាលនៃរដ្ឋបាលខេត្តកែប ពីក្រុមគ្រូពេទ្យនៃមន្ទីរពេទ្យព្រះអង្គឌួង។ វគ្គបណ្តុះបណ្តាលនេះ មានការអញ្ជើញចូលរួមស្វាមគន៍ពីលោកជំទាវ យូ សុគន្ធ ប្រធានមន្ទីរសុខាភិបាលនៃរដ្ឋបាលខេត្តកំពត៕

08/08/2026

27/07/2026

ជំងឺតាអកជាអ្វី?
• ជាជំងឺស្បែកដែលជួបញឹកញាប់បង្កឱ្យស្បែកស្ងួត រមាស់តិចឬខ្លាំង ស្បែកក្រហម កន្ទួលពងទឹក ការហៀរទឹករងៃនឹងក្រម៉ ការអេះរលាត់ស្បែកងាយរងនូវការចម្លងមេរោគបាក់តេរី កើតមានទាំងកុមារ និងមនុស្សពេញវ័យ។

របៀបបង្ករោគ៖
• អាចបណ្តាលមកពីកត្តាលក្ខខណ្ណកំណត់នៃហ្សែនស្បែកស្ងួតពីកំណើត អាកាសធាតុ លំអងធូលី អាឡែកហ្ស៊ីជាមួយសាប៊ូ ឬសារធាតុផ្សេងៗទៀត។

កន្លែងកើតញឹកញាប់៖
• ទារក៖ ពេញខ្លួនទាំងមូល
• កុមារ៖ ក្រោយជង្គង់ គន្លាក់ដៃ គន្លាក់ជើង
• មនុស្សពេញវ័យ៖ មុខ ក ដៃ កែងដៃ និងគន្លាក់ច្បត់ដៃ ជើង

ការព្យាបាល៖
• ត្រូវមកទទួលការព្យាបាលជាមួយគ្រូពេទ្យជំនាញរោគសើស្បែកដើម្បីធ្វើរោគវិនិច្ឆ័យត្រឹមត្រូវ និងប្រសិទ្ធភាពក្នុងការព្យាបាល។

ពេលណាគួរទៅជួបពេទ្យ៖
• រមាស់ខ្លាំង
• ស្បែកមានការឆ្លងមេរោគ (មានខ្ទុះ ក្តៅខ្លួន ឈឺចាប់)
• រោគសញ្ញាមិនបានធូរស្បើយ។

20/07/2026

រលាកប្រអប់ឆ្អឹងច្រមុះរ៉ាំរ៉ៃ
(Chronic Rhinosinusitis)

តើអ្វីទៅជាជំងឺរលាកច្រមុះ និងរលាកប្រអប់ឆ្អឹងច្រមុះរ៉ាំរ៉ៃ (Chronic Rhinosinusitis)?
ជំងឺរលាកច្រមុះ និងប្រអប់ឆ្អឹងច្រមុះ (Sinus) ដែលមានរយៈពេល លើសពី ១២ សប្តាហ៍

រោគសញ្ញា៖
• តឹងច្រមុះ ឬណែនច្រមុះ
• ឈឺក្បាល ឬធ្ងន់ក្នុងផ្ទៃមុខ
• ថយចុះការដឹងក្លិន ឬបាត់ក្លិន
• ហៀរសំបោរមកខាងមុខ ឬធ្លាក់ក្នុងបំពង់ក (Post-nasal drip)
ប្រសិនបើរោគសញ្ញាទាំងនេះមានរយៈពេលលើសពី ១២ សប្តាហ៍ អ្នកគួរតែទៅពិគ្រោះយោបល់ជាមួយគ្រូពេទ្យ

កត្តាមួយចំនួនដែលឱ្យមានការរលាកច្រមុះ និងប្រអប់ឆ្អឹងច្រមុះ៖
• មានជំងឺអាឡែហ្ស៊ី
• ឬសដូងច្រមុះ (Nasal polyps)
• វៀចឆ្អឹងច្រមុះ
• ការឆ្លងមេរោគផ្លូវដង្ហើមផ្នែកខាងលើញឹកញាប់
• ការជក់បារី ឬការប៉ះពាល់នឹងការបំពុលបរិយាកាសកខ្វក់
• ប្រព័ន្ធការពាររាងកាយខ្សោយ

វិធីបង្ការ៖
• ជៀសវាងសារធាតុបង្កអាឡែហ្ស៊ី និងព្យាបាលជាមួយគ្រូពេទ្យឯកទេស
• រក្សាអនាម័យច្រមុះ (ដូចជាការលាងច្រមុះដោយទឹកសេរ៉ូមប្រៃ)
• ជៀសវាងការជក់បារី
អ្នកជំងឺត្រូវមករកគ្រូពេទ្យឯកទេស ត្រចៀក ច្រមុះ បំពង់ក (ENT SPECIALIST) ប្រសិនមានអាការៈខាងលើ៕

18/07/2026

នាថ្ងៃសៅរ៍ ៤កើត ខែទុតិយាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៨ ខែកក្កដា ឆ្នាំ២០២៦ មន្ទីរពេទ្យព្រះអង្គឌួងបានរៀបចំកម្មវិធីពិនិត្យសុខភាពភ្នែក វះកាត់ និងផ្តល់វ៉ែនតាដោយឥតគិតថ្លៃ ជូនប្រជាពលរដ្ឋខេត្តកំពង់ឆ្នាំង នៅមន្ទីរពេទ្យខេត្តកំពង់ឆ្នាំង ដោយមានកិច្ចសហការរៀបចំកម្មវិធីដោយមន្ទីរសុខាភិបាលនៃរដ្ឋបាលខេត្តកំពង់ឆ្នាំង និងគាំទ្រមូលនិធិដោយមូលនិធិហ្វ្រេដហូឡូ (The Fred Hollow Foundation) និង Bloomberg (ប៊្លូមប៊ឺក)។ កម្មវិធីនេះមានការចូលរួមបើកកម្មវិធីដោយលោកសាស្ត្រាចារ្យរង លូ លីឃាង នាយកមន្ទីរពេទ្យព្រះអង្គឌួង រួមដំណើរដោយ លោក នង ម៉ានិត នាយករង លោកស្រីសាស្ត្រាចារ្យជំនួយ ជុកម៉ុល កុសុម៉ា នាយិការង និងវត្តមានចូលរួមពីលោក ម៉ឹង វុធី អភិបាលរងនៃគណ:អភិបាលខេត្តកំពង់ឆ្នាំង ឯកឧត្តមវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាល នៃរដ្ឋបាលខេត្តកំពង់ឆ្នាំង និងលោក បាក់ តូក្យូ នាយកប្រចាំប្រទេសនៃមូនិធិហ្រេ្វដហូឡូកម្ពុជា។ ឆ្លៀតក្នុងឧ៌កាសនោះ លោកនាយកមន្ទីរពេទ្យព្រះអង្គឌួងបានប្រគល់អំណោយនូវម៉ាស៊ីនអេកូ (Echography) ចំនួន ០១គ្រឿង ជូនដល់មន្ទីរពេទ្យខេត្តកំពង់ឆ្នាំងផងដែរ៕

13/07/2026

ការថែទាំកូននៅផ្ទះនៅពេលមានអាការរាក

06/07/2026

ជំងឺខ្ទាស់ម្រាមដៃ (Trigger finger)

និយមន័យ៖
• ជាជំងឺដែលប៉ះពាល់លើសរសៃពួរបត់លា(Flexor tendons) របស់ម្រាមដៃធ្វើឱ្យពេលខ្លះម្រាមដៃជាប់មិនអាចលាបាន។

រោគសញ្ញា៖
• ការឈឺចាប់នៅផ្នែកខាងក្រោមនៃម្រាមដៃ ឬមេដៃ
• មានអារម្មណ៍ជាប់ខ្ទាស់ម្រាមដៃ ពេលបត់លា
• មានដុំពកតូច១(Lump)នៅខាងក្រោមនៃម្រាមដៃខាងបាតដៃ។

មូលហេតុ និងកត្តាប្រឈម៖
• ជំងឺរលាកសន្លាក់រ៉ាំរ៉ៃ (Rheumatoid Arthritis)
• ការងារដែលប្រើប្រាស់ម្រាមដៃដដែលៗច្រើនដង
• ភាគច្រើនកើតលើស្ត្រី និងមនុស្សចាស់។

ការធ្វើរោគវិនិច្ឆ័យ៖
• ការធ្វើតេស្ត និងពិនិត្យដោយគ្រូពេទ្យ
• ការពិនិត្យអេកូសាស្ត្រ

ការព្យាបាល៖
• ការកែប្រែសកម្មភាពប្រចាំថ្ងៃ ឬនៅកន្លែងធ្វើការ
• ការពាក់រណបម្រាមដៃ
• ការព្យាបាលដោយចលនា
• ការចាក់ថ្នាំ (Corticosteroid Injection)
• ការវះកាត់ចោះបន្ធូរ

សម្គាល់៖ សូមពិនិត្យជាមួយគ្រូពេទ្យជំនាញដើម្បីបញ្ជាក់រោគវិនិច្ឆ័យ។