Siem Reap Provincial Referral Hospital-មន្ទីរពេទ្យបង្អែកខេត្តសៀមរាប

22/09/2026

បច្ចេកវិទ្យាវះកាត់ឆ្អឹងខ្នងទំនើប វះកាត់ស្នាមតូច ចាប់ដែកដោយចុះស្បែក (Percutaneous Screw Fixation) ជួយឲ្យអ្នកជំងឺឆាប់ជាសះស្បើយ!

ជាទូទៅ ការវះកាត់ឆ្អឹងខ្នងពីមុនតម្រូវឲ្យមានការវះមុខរបួសធំ ដែលធ្វើឲ្យបាត់បង់ឈាមច្រើន និងត្រូវការយូរក្នុងការស្តារសុខភាព។

ប៉ុន្តែបច្ចុប្បន្ន តាមរយៈបច្ចេកវិទ្យាវះកាត់ Percutaneous Screw Fixation៖
- ស្នាមវះតូចខ្លាំង៖ គ្រូពេទ្យធ្វើការចោះបន្តិចតាមស្បែកដើម្បីចាប់ខ្ចៅពង្រឹងឆ្អឹងខ្នង។
- ប៉ះពាល់សាច់ដុំតិចតួច៖ កាត់បន្ថយការឈឺចាប់ក្រោយវះកាត់ និងមិនបង្កការខូចខាតសាច់ដុំជុំវិញ។
- បាត់បង់ឈាមតិច៖ សុវត្ថិភាពខ្ពស់ និងកាត់បន្ថយហានិភ័យផ្សេងៗ។
- ឆាប់ជាសះស្បើយ៖ អ្នកជំងឺអាចក្រោកដើរ និងត្រឡប់ទៅផ្ទះវិញបានលឿន។

រូបភាពនៅក្នុងបន្ទប់វះកាត់ ផ្នែកប្រព័ន្ធប្រសាទ នៃមន្ទីរពេទ្យបង្អែកខេត្តសៀមរាប បង្ហាញពីសកម្មភាពប្រកបដោយប្រុងប្រយ័ត្ន និងជំនាញច្បាស់លាស់របស់ក្រុមគ្រូពេទ្យយើងខ្ញុំ ក្នុងការប្រើប្រាស់ឧបករណ៍បច្ចេកវិទ្យាទំនើបដើម្បការពារ និងព្យាបាលឆ្អឹងខ្នងជូនអ្នកជំងឺ។

17/09/2026

ថ្ងៃព្រហស្បតិ៍ ៦កើត ខែភទ្របទ ឆ្នាំមមី អដ្ឋស័ក ព.ស.២៥៧០
សៀមរាប ថ្ងៃទី១៧ ខែកញ្ញា ឆ្នាំ២០២៦
⭐អបអរសាទរទិវាពិភពលោកសុវត្ថិភាពអ្នកជំងឺ ឆ្នាំ២០២៦⭐
មន្ទីរពេទ្យបង្អែកខេត្តសៀមរាប ប្តេជ្ញាគោរពប្រតិបត្តិតាមចំនុចគន្លឹះទាំង៤ ស្របតាមប្រសាសន៍ដ៏ខ្ពង់ខ្ពស់របស់ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល។
1-កសាងវប្បធ៌មសុវត្ថិភាពអ្នកជំងឺ។
2- លើកកំពស់ការយល់ដឹងរបស់ថ្នាក់ដឹកនាំចំពោះសុវត្ថិភាពអ្នកជំងឺ ពិសេសNCD patients។
3- ជំរុញការចូលរួមរបស់អ្នកជំងឺពីសុវត្ថិភាព។
4- បន្តការប្រុងប្រយ័ត្នជាប្រចាំពិសេសអ្នកជំងឺNCD Chronic។

15/09/2026

13/09/2026

🏥មន្ទីរពេទ្យបង្អែកខេត្តសៀមរាប ចូលរួមអបអរសាទរ «ទិវាពិភពលោកសុវត្ថិភាពអ្នកជំងឺ ឆ្នាំ២០២៦» ក្រោមប្រធានបទ «សុវត្ថិភាពនៃការថែទាំសម្រាប់អ្នកជំងឺមិនឆ្លង (NCDs)»

ដើម្បីចូលរួមលើកកម្ពស់ការយល់ដឹងជាសាធារណៈ និងបង្ហាញពីការប្តេជ្ញាចិត្តខ្ពស់លើសុវត្ថិភាពអ្នកជំងឺ មន្ទីរពេទ្យបានរៀបចំបំភ្លឺភ្លើងពណ៌ទឹកក្រូច ទៅលើអគារមន្ទីរពេទ្យ បង្ហោះប៉ាឡុង និងពន្លឺLED ចាប់ពីថ្ងៃទី១០ ដល់ថ្ងៃទី១៧ ខែកញ្ញា ឆ្នាំ២០២៦ ស្របតាមការណែនាំរបស់ក្រសួងសុខាភិបាល និងអង្គការសុខភាពពិភពលោក (WHO)។
🧡រូបភាពអំពូលភ្លើងពណ៌ទឹកក្រូចនេះ បង្ហាញអំពីនិមិត្តរូប នៃកិច្ចខិតខំប្រឹងប្រែងរួមគ្នាក្នុងការធានាសុវត្ថិភាពជូនអ្នកជំងឺ និងជាសាមគ្គីភាពក្នុងការលើកកម្ពស់គុណភាព នៃការថែទាំសុខភាពជាសកល។

គោលបំណងសំខាន់ៗនៃយុទ្ធនាការនេះមាន៖
👉. លើកកម្ពស់ការយល់ដឹង ៖ ពង្រឹងការយល់ដឹងអំពីបញ្ហាប្រឈម នៃសុវត្ថិភាពជំងឺឆ្លង និងជំងឺមិនឆ្លង (NCDs) តាមរយៈវិធីសាស្ត្រថែទាំសុខភាពបឋម។
👉. បង្កើនការចូលរួម ៖ ជំរុញឱ្យអ្នកជំងឺ ក្រុមគ្រួសារអ្នកជំងឺ និងសហគមន៍ ចូលរួមយ៉ាងសកម្មជាមួយគ្រូពេទ្យ និងថ្នាក់ដឹកនាំ ក្នុងការកាត់បន្ថយហានិភ័យ និងស្វែងរកដំណោះស្រាយសុវត្ថិភាព។
👉. ពង្រឹងគោលនយោបាយ និងយុទ្ធសាស្ត្រ ៖ ផ្សារភ្ជាប់គោលការណ៍សុវត្ថិភាពអ្នកជំងឺ ទៅក្នុងប្រព័ន្ធសុខាភិបាល ដើម្បីបង្កើនប្រសិទ្ធភាពនៃការថែទាំ។
👉. គាំទ្របុគ្គលិកសុខាភិបាល ៖ ពង្រឹងការអនុវត្តការវិនិច្ឆ័យជំងឺ ប្រកបដោយសុវត្ថិភាព ការប្រើប្រាស់ឱសថត្រឹមត្រូវ និងការថែទាំដោយយកចិត្តទុកដាក់។

មន្ទីរពេទ្យបង្អែកខេត្តសៀមរាបនៅតែបន្តប្តេជ្ញាចិត្តយ៉ាងមុតមាំ ក្នុងការបម្រើសេវាពិនិត្យ ព្យាបាល និងថែទាំសុខភាពជូនប្រជាពលរដ្ឋ ប្រកបដោយគុណភាព សុវត្ថិភាព ប្រសិទ្ធភាព និងសមធម៌។

«សុវត្ថិភាពអ្នកជំងឺ គឺជាចំនុចអាទិភាព និងជាការទទួលខុសត្រូវ ប្រកបដោយវិជ្ជាជីវៈសម្រាប់ក្រុមការងារបម្រើសេវាសុខាភិបាលក្នុងមន្ទីរពេទ្យបង្អែកខេត្តសៀមរាបយើងទាំងអស់គ្នា»។

10/09/2026

មន្ទីរពេទ្យបង្អែកខេត្តសៀមរាប ថ្ងៃព្រហស្បតិ៍ ទី១០ ខែកញ្ញាឆ្នាំ២០២៦ ដំណើរការកិច្ចប្រជុំរបស់គណៈកម្មការគ្រប់គ្រងមន្ទីរពេទ្យបង្អែកខេត្តសៀមរាបប្រចាំខែកញ្ញា ឆ្នាំ២០២៦ ដែលកិច្ចប្រជុំប្រចាំខែនីមួយៗពុំដែលខកខាន ដោយពិភាក្សាលើបញ្ហា/ការប្រឈម ចំណូលនិងចំណាយ ពិនិត្យលើផែនការអនុវតន៍បន្ត ការរំលឹកពីបទបញ្ជាផ្ទៃក្នុង បទបញ្ជាមាស, ក្រមសីលធម៌ ក្រមប្រតិបត្តិ, ចក្ខុវិស័យ បេសកកម្ម និងគុណតម្លៃ និងផ្តោតជាពិសេសលើកការអភិវឌ្ឍន៍ក្នុងការបម្រើសេវា សុវត្ថិភាពអ្នកជំងឺ ភាពជាអ្នកដឹកនាំ និងវានុវត្តន៍ រួមទាំងឌីជីថល។

10/09/2026

10/09/2026

🏥ដំណើរទស្សនកិច្ចរបស់លោកស្រីភារធារីស្ថានទូតសហរដ្ឋអាមេរិក អញ្ជើញមកកាន់មន្ទីរពេទ្យបង្អែកខេត្តសៀមរាប។

នារសៀលថ្ងៃអង្គារ ទី៨ ខែកញ្ញា ឆ្នាំ២០២៦ លោកវេជ្ជបណ្ឌិត អ៊ាប ប៊ុនលឿន អនុប្រធានមន្ទីរសុខាភិបាលទទួលបន្ទុករួម និងលោកស្រីឱសថការី លាក់ ឡាំលាវ ប្រធានមន្ទីរពេទ្យបង្អែកខេត្ត ជាមួយថ្នាក់ដឹកនាំអញ្ជើញមកពីក្រសួងសុខាភិបាល ថ្នាក់ដឹកនាំមន្ទីរសុខាភិបាលខេត្ត និងថ្នាក់ដឹកនាំមន្ទីរពេទ្យបានធ្វើគារវកិច្ចទទួលស្វាគមន៍យ៉ាងកក់ក្តៅគណៈប្រតិភូភារធារីស្ថានទូតសហរដ្ឋអាមេរិក ដែលដឹកនាំដោយលោកស្រី Aleks Zittle a,i.,Chargé d'Affaires U.S. Embassy,

ក្រោយពីកិច្ចទទួលស្វាគមន៍ និងការធ្វើបទបង្ហាញរបស់មន្ទីរពេទ្យ គណៈប្រតិភូបានអញ្ជើញបន្តទៅទស្សនកិច្ចបន្ថែមនៅផ្នែកមន្ទីរពិសោធន៍វេជ្ជសាស្ត្រ ផ្នែកជំងឺរ៉ាំរ៉ៃHIV និងផ្នែកពិគ្រោះជំងឺក្រៅទូទៅ ផងដែរ។

លោកស្រី Aleks Zittle a,i.,Chargé d'Affaires U.S. Embassy បានថ្លែងអំណរគុណ និងសូមកោតសរសើរ ដល់ថ្នាក់ដឹកនាំ និងបុគ្គលិក មន្ត្រីរាជការរបស់មន្ទីរពេទ្យបង្អែកខេត្តសៀមរាប ដែលបានខិតខំប្រឹងប្រែងបម្រើសេវាជូនអតិថិជនជាតិ និងអន្តរជាតិ សម្រេចបានទទួលលទ្ធផលល្អប្រសើរនាពេលកន្លងមក។

09/09/2026

កិច្ចប្រជុំស្ដីពីការពិនិត្យវឌ្ឍនភាពការងារ នៅមន្ទីរពេទ្យខេត្តសៀមរាប សម្រាប់គម្រោងសិក្សាស្រាវជ្រាវបែបអនុវត្ត (AMS-HICAP) ស្តីពី «ការកាត់បន្ថយការប្រើប្រាស់ឱសថប្រឆាំងមេរោគមិនសមស្រប សម្រាប់ជំងឺរលាកសួតដែលឆ្លងពីសហគមន៍ ដែលស្របនឹងបរិបទជាក់ស្តែងនៅមន្ទីរពេទ្យ»។

មន្ទីរពេទ្យបង្អែកខេត្តសៀមរាប៖ ថ្ងៃសុក្រ ទី៤ ខែកញ្ញា ឆ្នាំ២០២៦ លោកស្រីឱសថការី លាក់ ឡាំលាវ ប្រធានមន្ទីរពេទ្យបង្អែកខេត្តសៀមរាប និងក្រុមការងារបង្គោលបានទទួលស្វាគមន៍វត្តមាន ឯកឧត្តមសាស្ត្រាចារ្យរង ហេង សុទ្ធី អនុរដ្ឋលេខាធិការក្រសួងសុខាភិបាល និងជាសមាជិកគណៈកម្មការប្រឹក្សាយោបល់លើគម្រោងសិក្សាស្រាវជ្រាវ AMS-HICAP បានដឹកនាំក្រុមការងារចុះពិនិត្យវឌ្ឍនភាពការងារនៅមន្ទីរពេទ្យខេត្តសៀមរាប ដែលជាមន្ទីរពេទ្យមួយក្នុងចំណោមមន្ទីរពេទ្យទាំងប្រាំមួយ ដែលបានចូលរួមក្នុងការអនុវត្តគម្រោងនេះ។

ឯកឧត្តមសាស្ត្រាចារ្យរង បានជួបសំណេះសំណាលជាមួយថ្នាក់ដឹកនាំមន្ទីរពេទ្យ និងក្រុមការងារបង្គោលនៃគម្រោង AMS-HICAP នៅក្នុងមន្ទីរពេទ្យ ដោយនៅក្នុងកិច្ចប្រជុំនេះមន្រ្តីបង្គោលបានធ្វើបទបង្ហាញសង្ខេបអំពីវឌ្ឍនភាពការងាររយៈពេលកន្លងមក រួមទាំងមានការពិភាក្សាលើការងារបច្ចេកទេសមួយចំនួន ដើម្បីបន្តការងារនេះឱ្យកាន់តែមានប្រសិទ្ធភាពខ្ពស់។

ឯកឧត្តមសាស្ត្រាចារ្យរង បានថ្លែងអំណរគុណ និងកោតសរសើរចំពោះថ្នាក់ដឹកនាំមន្ទីរពេទ្យ ផ្តល់ការគាំទ្រ និងជំរុញលើកទឹកចិត្តដល់ក្រុមការងារ និងការកោតសរសើរដល់ក្រុមការងារដែលបានអនុវត្តការងារនេះមកជាបន្តបន្ទាប់ និងសូមឱ្យបន្តប្រឹងប្រែងទៅមុខទៀត ដើម្បីនិរន្តរភាពនៃការប្រើប្រាស់ឱសថប្រឆាំងមេរោគឱ្យបានសមស្រប។ ការចូលរួមរបស់មន្ទីរពេទ្យ គឺជាការចូលរួមក៏សំខាន់មួយក្នុងការអនុវត្តការងារ AMS នៅក្នុងវិស័យសុខាភិបាលនេះ។

ក្នុងដំណើរពិនិត្យវឌ្ឍនភាពការងារនេះ លោកសាស្រ្តាចារ្យជំនួយ បូរី សុថ្ថារិទ្ធ អញ្ជើញមកពីមន្ទីពេទ្យកាល់ម៉ែត បានចុះអនុវត្តផ្ទាល់ជាមួយក្រុមការងារ ដោយចែករំលែកអំពីបទពិសោធក្នុងការធ្វើរោគវិនិច្ឆយ និងការប្រើប្រាស់ឱសថប្រឆាំងមេរោគឱ្យបានសមស្របទៅលើអ្នកជំងឺរលាកសួត ដែលឆ្លងពីសហគមន៍ផងដែរ ចំណែកវិទ្យាស្ថានជាតិសុខភាពសាធារណៈ ក៏នៅតែបន្តរួមចំណែកក្នុងការបណ្តុះបណ្ដាល ដែលជាតម្រូវការចាំបាច់របស់ក្រុមការងារក្នុងការអនុវត្ត AMS-HICAP។

04/09/2026

វីដេអូ៖ កិច្ចសម្ភាសន៍ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល ជាមួយសមាគមសាសនាចក្រនៃពួកបរិសុទ្ធថ្ងៃចុងក្រោយ។

Interview H.E.Prof. Chheang Ra, Minister of Health with The Association of the Church of Jesus Christ of Latter-Day.

01/09/2026

ថ្ងៃអង្គារ ៤រោច ខែស្រាពណ៌ ឆ្នាំមមី អដ្ឋស័ក ពុទ្ធសករាជ២៥៧០ ត្រូវនឹងថ្ងៃទី១ ខែកញ្ញា ឆ្នាំ២០២៦ លោកស្រីឱសថការី លាក់ ឡាំលាវ ប្រធានមន្ទីរពេទ្យបង្អែកខេត្តសៀមរាប អមដំណើរដោយលោកឱសថការី លឹម ហេង អនុប្រធាន ក្រុមTiger Team និងផ្នែករដ្ឋបាល និងធនធានមនុស្ស ផ្នែកគណនេយ្យ និងហិរញ្ញវត្ថុ ព្រមទាំងបុគ្គលិក មន្ត្រីរាជការ បានអញ្ជើញចូលរួមដាក់កម្រងផ្កាគោរពវិញ្ញាណក្ខន្ធ ជូនសារលិខិតរំលែកទុក្ខ រួមទាំងបច្ច័យក្នុងពិធីបុណ្យសពឧបាសិកា ចាន់ សុភី ដែលត្រូវជាម្តាយបង្កើតលោកឱសថ សំ សិលាវិចិត្រ ប្រធានឃ្លាំងឱសថរបស់មន្ទីរពេទ្យ បានទទួលមរណភាពកាលពីថ្ងៃចន្ទ ទី៣១ ខែសីហា ឆ្នាំ២០២៦ ដោយរោគាពាធ🙏🙏🙏។