31/10/2022
عايزة تسمعي كلمة "حاضر" من ولادك أكتر ؟
جربي تستخدمي: "طبعاً ممكن" أكتر ..
⭐️قبل ما تقولي لأ .. فكري كويس .. هل فعلاً لازم أقول "لأ" ؟؟؟؟ولا دي حاجة ممكن اسمح بيها .. أو اسمح بحاجة بدالها .. خلي ال "لأ" في يومهم معدودة !
⭐️جربوا حاجة النهارده .. خلي حد يقعد قدامك و يكرر كلمة " لأ" .. "لأ" .. "لأ" كتييير بغلاسة وشدة … و راقبي احساسك و دقات قلبك ! احساس وحش جداً
محدش بيحب كلمة "لأ" !
ما تستخدموهاش الا لما فعلاً تحتاجوها
وحتى لو محتاجين نقول لأ .. ممكن نقولها من غير ما نقولها !!! 👇🏻👇🏻👇🏻
ماما ممكن آخد عصير ؟
❎ "لأ ! مافيش عصير غير لما تاكل"
✅ " طبعاً ممكن .. أول ما تخلص أكلك"
ماما ممكن نشتري ليجو جديد ؟
❎ "لأ ! لسه شاري واحد الأسبوع اللي فات"
✅ " طبعاً ممكن .. آخر الشهر زي ما اتفقنا"
لو بس نركز و احنا بنختار كلماتنا ! 😍
💕💕" وقولوا للناس حسناً " 💕💕
