https://www.facebook.com/113185233673013/

ໂຮງໝໍບໍລິເວນ 107, สนามบินสากลหลวงพระบาง, Luang Prabang (2026)

21/08/2026

ໂຮງໝໍບໍລິເວນ 107 ກອງທັບ ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ
ປະຈໍາປີ 2025.
==============================================
ວັນທີ 21 ສິງຫາ 2026 ນີ້ ໂຮງໝໍບໍລິເວນ 107 ກອງທັບ ໄດ້ຈັດຕັ້ງພິທີ ມອບໃບຢັ້ງຢືນການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈໍາປີ 2025 ໂດຍການເປັນປະທານຂອງ ສະຫາຍ ພັນໂທ ສຸວັນ ສໍປະກາຍແກ້ວ ເລຂາຄະນະພັກຮາກຖານ, ຫົວໜ້າການເມືອງໂຮງໝໍບໍລິເວນ 107 ກອງທັບ, ມີຄະນະພັກ-ຄະນະບັນຊາ, ບັນດາຄະນະໜ່ວຍພັກ ຕະຫຼອດຮອດສະມາຊິກພັກສົມບູນ-ສຳຮອງເຂົ້າຮ່ວມ.
ໃນພິທີ ສະຫາຍ ພັນໂທ ສົມພອນ ພວງແກ້ວ ຮອງຫົວໜ້າພະແນກການເມືອງ ໄດ້ຜ່ານບົດສະຫຼຸບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2025 ເຊິ່ງໄດ້ຕີລາຄາການນຳພາຮອບດ້ານໂດຍສະເພາະແມ່ນພາລະບົດບາດ, ໜ້າທີ່ການເມືອງຂອງກົມກອງ, ການປັບປຸງກໍ່ສ້າງພັກທາງດ້ານການເມືອງ-ນຳພາແນວຄິດ, ການຈັດຕັ້ງ, ແບບແຜນການນຳພາກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕາມ 5 ເນື້ອໃນ, ປັບປຸງການຈັດຕັ້ງ, ອົງການຈັດຕັ້ງມະຫາຊົນ ແລະການປະຕິບັດໜ້າທີ່ວຽກງານວິຊາສະເພາະການແພດໃນໄລຍະຜ່ານມາ ໄດ້ຍົກໃຫ້ເຫັນເຖິງດ້ານດີ-ດ້ານອ່ອນ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະຜ່ານທິດທາງແຜນການໃນຕໍ່ໜ້າ. ຈາກນັ້ນ ສະຫາຍ ພັນຕີ ສີລາກອນ ບຸນພະຍອງ ຫົວໜ້າຂະແໜງຈັດຕັ້ງພັກ ໄດ້ຜ່ານມະຕິຕົກລົງຂອງຄະນະພັກກະຊວງປ້ອງກັນປະເທດ ເລກທີ 2309/ຄພກປທ, ລົງວັນທີ 22 ພຶດສະພາ 2026 ວ່າດ້ວຍການຮັບຮອງໜ່ວຍພັກປອດໃສ, ເຂັ້ມແຂງ, ໜັກແໜ້ນ ບັນດາກົມກອງທີ່ຂຶ້ນກັບກົມໃຫຍ່ພະລາທິການກອງທັບປະຈໍາປີ 2025 ໃນນັ້ນມີໜ່ວຍພັກທີ່ຂຶ້ນກັບໂຮງໝໍບໍລິເວນ 107 ຈໍານວນ 14 ໜ່ວຍພັກ, ໄດ້ຮັບຮອງເປັນໜ່ວຍພັກປອດໃສ, ເຂັ້ມແຂງໜັກແໜ້ນສະໄໝທີ VII ມີ 07 ໜ່ວຍພັກ, ສະໄໝທີ V ມີ 04 ໜ່ວຍພັກ, ຮັບຮອງໃໝ່ມີ 03 ໜ່ວຍພັກ ໂດຍແມ່ນສະຫາຍປະທານພິທີເປັນຜູ້ມອບໃບຢັ້ງຢືນນາມມະຍົດໃນຄັ້ງນີ້.
ໂອກາດນີ້ ສະຫາຍ ພັນໂທ ສຸວັນ ສໍປະກາຍແກ້ວ ເລຂາຄະນະພັກຮາກຖານ, ຫົວໜ້າການເມືອງໂຮງໝໍບໍລິເວນ 107 ກອງທັບ ໄດ້ສະແດງຄວາມຊົມເຊີຍຕໍ່ຜົນງານທີ່ບັນດາໜ່ວຍພັກຍາດມາໄດ້, ສະຫາຍໄດ້ເນັ້ນໜັກຫຼາຍບັນຫາເປັນຕົ້ນແມ່ນການສຶກສາອົບຮົມການເມືອງແນວຄິດ, ການປັບປຸງກໍ່ສ້າງກຳລັງ, ອີກເທື່ອໜຶ່ງສະຫາຍໄດ້ຮຽກຮ້ອງໃຫ້ພະນັກງານ, ສະມາຊິກພັກ-ນັກຮົບ ຍົກສູງຄວາມຮັບຜິດຊອບສູງຕໍ່ໜ້າທີ່ວຽກງານທີ່ໄດ້ຮັບມອບໝາຍ, ເອົາໃຈໃສ່ຄົ້ນຄວ້າຮໍ່າຮຽນວິຊາສະເພາະເຕັກນິກການແພດ ເພື່ອຮັບໃຊ້ພໍ່ແມ່ປະຊາຊົນໂດຍປະຕິບັດຄໍາຂວັນ 5 ດີ 1 ພໍໃຈ, ສືບຕໍ່ປັບປຸງກໍ່ສ້າງພັກໃຫ້ມີຄວາມເຕີບໃຫຍ່ເຂັ້ມແຂງ ເປັນກຳລັງແຮງໃຫ້ແກ່ກົມກອງ ຕິດພັນກັບການກໍ່ສ້າງກົມກອງ 3 ປອດ ແລະກອງວັດທະນະທໍາ ໃຫ້ດີຂຶ້ນເລື່ອຍໆ.

ພາບ-ຂ່າວ: ນາງ ສຸລິຈັນ ພັດທະນາ.

19/08/2026

ໂຮງໝໍບໍລິເວນ 107 ກອງທັບ ປາຖະກະຖາ 3 ວັນປະຫວັດສາດຂອງຊາດ.
=====================================
ໃນວັນທີ 19 ສິງຫາ 2026 ນີ້ ໂຮງໝໍບໍລິເວນ 107 ກອງທັບ ໄດ້ສຳເລັດພິທີປາຖະກະຖາ 3 ວັນປະຫວັດສາດຄື: ວັນສ້າງຕັ້ງແນວລາວສ້າງຊາດ ຄົບຮອບ 76 ປີ (13 ສິງຫາ 1950-13 ສິງຫາ 2026), ວັນປະກາດໃຊ້ລັດຖະທຳມະນູນແຫ່ງ ສປປ ລາວ ຄົບຮອບ 35 ປີ (15 ສິງຫາ 1991-15 ສິງຫາ 2026 ແລະວັນຍຶດອໍານາດທົ່ວປະເທດ ສປປລາວ ຄົບຮອບ 81 ປີ (23 ສິງຫາ 1945-23 ສິງຫາ 2026) ໃຫ້ກຽດເປັນປະທານ ແລະປາຖະກະຖາໂດຍ ສະຫາຍ ພັນໂທ ສຸວັນ ສໍປະກາຍແກ້ວ ເລຂາຄະນະພັກຮາກຖານ, ຫົວໜ້າການເມືອງໂຮງໝໍບໍລິເວນ 107 ພ້ອມດ້ວຍຄະນະ, ມີບັນດາຫົວໜ້າພະແນກ-ຂະແໜງການ ຕະຫຼອດຮອດນາຍ ແລະພົນທະຫານທົ່ວກົມກອງເຂົ້າຮ່ວມ.
ໃນພິທີ ສະຫາຍ ສຸວັນ ສໍປະກາຍແກ້ວ ປະທານພິທີ ໄດ້ຫວນຄືນ 3 ວັນປະຫວັດສາດຂອງຊາດ ໂດຍໄດ້ຍົກໃຫ້ເຫັນເຖິງການກຳເນີດ ແລະເຕີບໃຫຍ່ຂະຫຍາຍຕົວຂອງອົງການແນວລາວສ້າງຊາດ (ແນວໂຮມແຫ່ງຊາດລາວ), ຊາດລາວເປັນຊາດໜຶ່ງທີ່ມີປະຫວັດສາດແຫ່ງ ການກໍ່ຕັ້ງອັນສະຫງ່າງາມ, ມີຄວາມສາມັກຄີປອງດອງ ແລະ ມີມູນເຊື້ອໃນການຕໍ່ສູ້ຢ່າງພິລະ ອາດຫານ, ພາຍຫຼັງປະເທດຊາດໄດ້ຮັບ ການປົດປ່ອຍຢ່າງສົມບູນ, ພັກເຄື່ອນໄຫວເປີດເຜີຍ, ມີອົງການລັດເຮັດບົດບາດບໍລິຫານຄຸ້ມຄອງ, ແນວລາວສ້າງຊາດ, ບັນດາອົງການຈັດຕັ້ງມະຫາຊົນ ແລະ ອົງການສັງຄົມຕ່າງໆ ໄດ້ ຍົກສູງບົດບາດໃນການເຕົ້າໂຮມກ້ອນກໍາລັງສາມັກຄີປອງດອງທົ່ວປວງຊົນ, ໂຄສະນາ-ສຶກສາ ອົບຮົມປະຊາຊົນຢ່າງກ້ວາງຂວາງ, ເສີມຂະຫຍາຍ ສິດເປັນເຈົ້າຂອງປະຊາຊົນ, ປຸກລະດົມປະຊາຊົນບັນດາເຜົ່າປະຕິບັດແຜນນະໂຍບາຍຮຳບາດແຜສົງຄາມໄລຍະ 10 ປີທຳອິດ, ປະຕິບັດ 2 ໜ້າທີ່ ຍຸດທະສາດຄື: ປົກປັກຮັກສາ ແລະ ພັດທະນາປະເທດຊາດ, ປະຕິບັດແນວທາງ ປ່ຽນແປງໃຫມ່ຢ່າງຮອບດ້ານ ແລະມີຫຼັກການຂອງພັກ, ປຸກລະດົມຂະບວນການແກ້ໄຂຄວາມທຸກຍາກ, ຫັນລົງກໍ່ສ້າງຮາກຖານການເມືອງຕິດພັນກັບການພັດທະນາຊົນນະບົດຮອບດ້ານສ້າງບ້ານ-ກຸ່ມບ້ານພັດທະນາ, ຍູ້ແຮງວຽກງານ 3 ສ້າງ, ຊຶ່ງໄດ້ປະກອບສ່ວນອັນສໍາຄັນໃຫ້ແກ່ການ ຫຼຸດຜ່ອນຄວາມທຸກຍາກຂອງປະຊາຊົນບັນດາເຜົ່າເທື່ອລະກ້າວ ແລະສ້າງເງື່ອນໄຂໃຫ້ແກ່ການນໍາພາປະເທດຊາດຫຼຸດພົ້ນສະຖານະພາບປະເທດດ້ອຍພັດທະນາ ໃນປີ 2020. ສະພາບແວດລ້ອມການກຳເນີດ ແລະຄວາມໝາຍ, ຄວາມສຳຄັນຂອງວັນລັດຖະທຳມະນູນແມ່ນກົດໝາຍພື້ນຖານຂອງຊາດ ທີ່ກຳນົດລະບອບການເມືອງ, ເສດຖະກິດ ແລະສັງຄົມ, ສິດ ແລະພັນທະພື້ນຖານຂອງພົນລະເມືອງ, ການຈັດຕັ້ງລະບົບອຳນາດແຫ່ງລັດ ພ້ອມທັງຢັ້ງຢືນເຖິງຄວາມເປັນເອກະລາດ, ອຳນາດອະທິປະໄຕ ແລະຜືນແຜ່ນດິນອັນຄົບຖ້ວນຂອງປະເທດຊາດພາຍໃຕ້ການນໍາພາຂອງພັກ, ດ້ວຍເຫດນັ້ນກອງປະຊຸມເທື່ອທີ 6 ຂອງສະພາປະຊາຊົນສູງສຸດ ຊຸດທີ II (1991) ໄດ້ຮັບຮອງເອົາລັດຖະທຳມະນູນສະບັບທຳອິດຂອງ ສປປ ລາວ ຊຶ່ງໄດ້ປະກາດໃຊ້ໃນວັນທີ 15 ສິງຫາ 1991. ຈາກນັ້ນໄດ້ຫວນຄືນວັນຍຶດອໍານາດທົ່ວປະເທດໂດຍຍົກໃຫ້ເຫັນເຖິງຂະບວນວິວັດແຫ່ງບາດກ້າວໄຊຊະນະຂອງການປະຕິວັດຊາດພາຍໃຕ້ການນຳພາຂອງພັກປະຊາຊົນປະຕິວັດລາວ ທຸກຂະບວນການຕໍ່ສູ້ກູ້ຊາດ ສາມາດຍຶດອຳນາດທົ່ວປະເທດໄດ້ໃນວັນທີ 23 ສິງຫາ 1945 ແຕ່ພວກຈັກກະພັດບໍ່ລົດລະຄວາມພະຍາຍາມທີ່ຈະເອົາລາວເປັນຫົວເມືອງຂຶ້ນຈຶ່ງໄດ້ເຂົ້າມາຮຸກຮານລາວແຕ່ກໍ່ຍ້ອນຄວາມສະຫຼາດສ່ອງໃສຂອງພັກ, ຍ້ອນຄວາມສາມັກຄີອັນເປັນປຶກແຜ່ນຂອງພໍ່ແມ່ປະຊາຊົນບັນດາເຜົ່າທົ່ວປະເທດ ພ້ອມກັນຕໍ່ສູ້ຍາດເອົາເອກະລາດ ປະຊາທິປະໄຕ ແລະຜືນແຜ່ນດິນອັນຄົບຖ້ວນໄວ້ຢ່າງໝັ້ນຄົງ, ມາຮອດປີ 1975 ກອງປະຊຸມສູນກາງພັກໄດ້ວາງທິດທາງ ແລະໜ້າທີ່ລວມໃນການຕໍ່ສູ້ຍາດເອົາໄຊຊະນະຂັ້ນສຸດທ້າຍຂອງການປະຕິວັດ ໂດຍນໍາໃຊ້ 3 ບາດຄ້ອນຍຸດທະສາດ ເພື່ອຍຶດອຳນາດໃນທົ່ວປະເທດແບບ "ບົວບໍ່ຊໍ້ານ້ຳບໍ່ຂຸ່ນ" ມັນແມ່ນໄຊຊະນະຂອງແນວທາງອັນຖືກຕ້ອງ, ແມ່ນໄຊຊະນະຂອງກຳລັງແຮງ ແຫ່ງຄວາມສາມັກຄີເປັນຈິດໜຶ່ງໃຈດຽວຂອງປວງຊົນລາວທັງຊາດ.
ການປາຖະກະຖາ 3 ວັນປະຫວັດສາດໃນຄັ້ງນີ້ແມ່ນເພື່ອເຮັດໃຫ້ພະນັກງານ-ນັກຮົບທົ່ວກົມກອງໄດ້ເຊື່ອມຊຶມເອກະສານໃຫ້ເຂົ້າໃຈຢ່າງເລິກເຊິ່ງຕໍ່ມູນເຊື້ອອັນສະຫງ່າງາມ ແລະຜົນງານອັນໃຫຍ່ຫຼວງໃນພາລະກິດຕໍ່ສູ້ປົດປ່ອຍຊາດກໍ່ຄືພາລະກິດ ປົກປັກຮັກສາ ແລະພັດທະນາປະເທດຊາດທີ່ພັກ-ລັດ, ແນວລາວສ້າງຊາດ ແລະປະຊາຊົນລາວບັນດາເຜົ່າຍາດມາໄດ້ຕະຫຼອດໄລຍະທີ່ຜ່ານມາ ເພື່ອເສີມຂະຫຍາຍມູນເຊື້ອອັນດີງາມດັ່ງກ່າວເຂົ້າໃນການພັດທະນາປະເທດຊາດ.

ພາບ-ຂ່າວ: ນາງ ສຸລິຈັນ ພັດທະນາ.

13/08/2026

ກະຊວງສາທາລະນະສຸກສຳເລັດຊຸດອົບຮົມ ແລະຊຸກຍູ້ຕິດຕາມກ່ຽວກັບລະບົບການເຝົ້າລະວັງກໍລະນີຂອງພະຍາດໄຂ້ຍຸງລາຍ.
=========================
ໃນວັນທີ 13 ສິງຫາ 2026 ນີ້ ກະຊວງສາທາລະນະສຸກໄດ້ສຳເລັດຊຸດຝຶກອົບຮົມການທົບທວນຄືນ ແລະຊຸກຍູ້ຕິດຕາມກ່ຽວກັບລະບົບການເຝົ້າລະວັງກໍລະນີຂອງພະຍາດໄຂ້ຍຸງລາຍ ຢູ່ໂຮງໝໍບໍລິເວນ 107 ໂດຍການເປັນປະທານຮ່ວມຂອງທ່ານ ພັນໂທ ດຣ ຄຳຄ່ອງ ພິມມະວົງສາ ຮອງອຳນວຍການໂຮງໝໍບໍລິເວນ 107, ມີທ່ານ ດຣ ນາງລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່ກະຊວງສາທາລະນະສຸກ ພ້ອມດ້ວຍທີມງານສູນກາງ ຈາກກົມຄວບຄຸມພະຍາດຕິດຕໍ່ ທີ່ເປັນຜູ້ປະສານງານຫຼັກ. ຈາກຊ່ຽວຊານປິ່ນປິວ ໄຂ້ຍຸງລາຍຈາກພະແນກຊືມເຊື້ອໂຮງໜໍມະໂຫສົດ ແລະ ວິຊາການຈາກກົມປິ່ນປົວ ແລະຟື້ນຟູໜ້າທີ່ການ, ຈາກສູນວິເຄາະລະບາດວິທະຍາ ພ້ອມນັ້ນຍັງມີ ວິຊາການຈາກ ອົງການ CHAI ທີ່ໃຫ້ການສະໜັບສະໜູນໃນຄັ້ງນີ້, ພ້ອມດ້ວຍພະນັກງານວິຊາການໂຮງໝໍບໍລິເວນ 107 ເຂົ້າຮ່ວມ.
ຈຸດປະສົງການຝຶກອົບຮົມໃນຄັ້ງນີ້ເພື່ອຮັບປະກັນການນຳໃຊ້ນິຍາມກໍລະນີໄຂ້ຍຸງລາຍຂອງແຕ່ລະໜ່ວຍງານພາຍໃນໂຮງໝໍ, ສຶກສາ ແລະປະເມີນການເກັບກຳຂໍ້ມູນຂອງການບັນທຶກ ແລະການລາຍງານກໍລະນີໄຂ້ຍຸງລາຍໃນປຶ້ມບັນທຶກຄົນເຈັບ, ຝຶກອົບຮົມການທົບທວນ ແລະລົງຊຸກຍູ້ຕິດຕາມລະບົບເຝົ້າລະວັງກໍລະນີພະຍາດໄຂ້ຍຸງລາຍ, ຮັບປະກັນຄວາມເຂົ້າໃຈ ແລະຄວາມສຳຄັນຂອງວຽກງານເຝົ້າລະວັງພ້ອມກັບການນຳໃຊ້ນິຍາມກໍລະນີໄຂ້ຍຸງລາຍຢ່າງເປັນເອກະພາບໃນວຽກງານກັ່ນກອງ, ການບັນທຶກກໍລະນີ ແລະການລາຍງານຂອງແຕ່ລະໜ່ວຍງານພາຍໃນໂຮງໝໍຕາມລະບົບເຝົ້າລະວັງແຫ່ງຊາດ, ເພື່ອສຶກສາ ແລະປະເມີນວິທີການເກັບກຳ, ການບັນທຶກ ແລະການລາຍງານກໍລະນີພະຍາດໄຂ້ຍຸງລາຍໃນປຶ້ມບັນທຶກຄົນເຈັບໃນປະຈຸບັນ, ວາງແຜນຕິດຕາມຜົນຫຼັງຝຶກອົບຮົມຂອງວຽກງານລາຍງານ ແລະການລະບາດຂອງພະຍາດໄຂ້ຍຸງລາຍ. ໃນນັ້ນໄດ້ນຳສະເໜີພາບລວມຂອງລະບົບເຝົ້າລະວັງພະຍາດ ໂດຍສະເພາະວຽກງານພະຍາດໄຂ້ຍຸງລາຍໃນປະຈຸບັນ ແລະນິຍາມຕາມລະບົບເຝົ້າລະວັງແຫ່ງຊາດ, ຜົນໄດ້ຮັບຂອງການລົງຊຸກຍູ້ຕິດຕາມວຽກງານກໍລະນີໄຂ້ຍຸງລາຍໃນໄລຍະຜ່ານມາ, ປຶກສາຫາລືສະພາບປະຈຸບັນ ແລະແຜນການຕໍ່ໜ້າ, ການບັນທຶກອາການ ແລະຜົນຂອງການບົ່ງມະຕິຂອງກໍລະນີໄຂ້ຍຸງລາຍຕາມລະບົບເຝົ້າລະວັງແຫ່ງຊາດ, ຝຶກປະຕິບັດຕົວຈິງສຳລັບການຊັກປະຫວັດອາການຄົນເຈັບ, ການບັນທຶກອາການ ແລະຜົນການບົ່ງມະຕິຂອງຄົນເຈັບພະຍາດໄຂ້ຍຸງລາຍຕາມລະບົບເຝົ້າລະວັງແຫ່ງຊາດ.

ພາບ-ຂ່າວ: ນາງ ສຸລິຈັນ ພັດທະນາ.

04/08/2026

ໂຮງໝໍບໍລິເວນ 107 ກອງທັບປະດັບທຽບຊັ້ນໃຫ້ນາຍທະຫານ.
==========================
ວັນທີ 04 ສິງຫາ 2026 ນີ້ໂຮງໝໍບໍລິເວນ 107 ກອງທັບ ໄດ້ສຳເລັດພິທີປະດັບທຽບຊັ້ນໃຫ້ນາຍທະຫານທີ່ຈົບສາຍນອກກອງທັບ ໂດຍການເປັນປະທານຂອງ ສະຫາຍ ພັນໂທ ສຸວັນ ສໍປະກາຍແກ້ວ ເລຂາຄະນະພັກຮາກຖານ, ຫົວໜ້າການເມືອງໂຮງໝໍບໍລິເວນ 107 ກອງທັບ, ມີບັນດາຫົວໜ້າພະແນກ-ຂະແໜງການ, ພະນັກງານທີ່ກ່ຽວຂ້ອງ ຕະຫຼອດນາຍທະຫານທີ່ໄດ້ຮັບຊັ້ນໃໝ່ເຂົ້າຮ່ວມ.
ໃນພິທີສະຫາຍ ພັນຕີ ນິວອນ ສາທອງຍົດ ຫົວໜ້າຂະແໜງພະນັກງານ ໄດ້ຜ່ານຂໍ້ຕົກລົງຂອງກົມໃຫຍ່ການເມືອງກອງທັບ ວ່າດ້ວຍການປະດັບທຽບຊັ້ນນາຍທະຫານ ໃຫ້ນັກຮຽນ ຮຽນຈົບວິຊາສະເພາະຈາກສາຍລັດຢູ່ກົມໃຫຍ່ພະລາທິການ ໂດຍປະຕິບັດຕາມມາດຕາ 19 ແລະມາດຕາ 20 ຂອງກົດໝາຍວ່າດ້ວຍນາຍທະຫານກອງທັບປະຊາຊົນລາວ ສະບັບເລກທີ 43/ສພຊ, ລົງວັນທີ 14 ມິຖຸນາ 2018; ກົມໃຫຍ່ການເມືອງກອງທັບຕົກລົງປະດັບທຽບຊັ້ນຮ້ອຍໂທໃຫ້ນັກຮຽນຈົບວິຊາສະເພາະສາຍລັດຢູ່ໂຮງໝໍບໍລິເວນ 107ກອງທັບ ຈໍານວນ 05 ສະຫາຍ, ຍິງ 02 ສະຫາຍ.
ໂອກາດນີ້ ສະຫາຍ ພັນໂທ ສຸວັນ ສໍປະກາຍແກ້ວ ໄດ້ສະແດງຄວາມຊົມເຊີຍຕໍ່ຜົນງານທີ່ບັນດາສະຫາຍຍາດມາໄດ້, ສະຫາຍໄດ້ເນັ້ນໜັກໃຫ້ນາຍທະຫາທີ່ໄດ້ຮັບຊັ້ນໃໝ່ໃຫ້ສືບຕໍ່ເຝິກຝົນຫຼ່ໍຫຼອມຕົນເອງ ທາງດ້ານວິຊາສະເພາະເຕັກນິກ, ຍົກສູງຄວາມຮັບຜິດຊອບຕໍ່ໜ້າທີ່ວຽກງານ, ມີທັດສະນະຫຼັກໝັ້ນການເມືອງໜັກແໜ້ນ, ອຸ່ນອ່ຽນທຸ່ນທ່ຽງ, ເຊື່ອໝັ້ນຕໍ່ການຈັດຕັ້ງ, ເປັນແບບຢ່າງນຳໜ້າທີ່ດີໃນການເຄື່ອນໄຫວວຽກງານ, ມີຄວາມສາມັກຄີກັບໝູ່ເພື່ອນທັງພາຍໃນ-ພາຍນອກຢ່າງແໜ້ນແຟ້ນ, ພ້ອມກັນສືບຕໍ່ປັບປຸງກໍ່ສ້າງກົມກອງໃຫ້ມີຄວາມເຕີບໃຫຍ່ເຂັ້ມແຂງຂຶ້ນເລື່ອຍໆ.

ພາບ-ຂ່າວ: ນາງ ສຸລິຈັນ ພັດທະນາ.

23/07/2026

ໂຮງໝໍບໍລິເວນ 107 ກອງທັບ ຈັດພິທີຮັບສະມາຊິກພັກສົມບູນໃໝ່.
ໃນໄລຍະກາງເດືອນກໍລະກົດ 2026 ທີ່ຜ່ານມານີ້ຢູ່ໂຮງໝໍບໍລິເວນ 107 ໄດ້ຈັດພິທີຮັບສະມາຊິກພັກສໍາຮອງເລື່ອນເປັນສະມາຊິກພັກສົມບູນ ໂດຍການເປັນປະທານຂອງສະຫາຍ ພັນໂທ ສີແພງ ມີດາຈັນ ຄະນະພັກຮາກຖານ, ຫົວໜ້າພະແນກການເມືອງໂຮງໝໍບໍລິເວນ 107 ກອງທັບ, ມີສະຫາຍ ພັນຕີ ສີລາກອນ ບຸນພະຍອງ ຫົວໜ້າຂະແໜງຈັດຕັ້ງພັກ, ມີບັນດາຄະນະໜ່ວຍພັກ, ສະມາຊິກພັກສົມບູນ-ສໍາຮອງ ເຂົ້າຮ່ວມ.
ໃນພິທີສະຫາຍ ພັນຕີ ສີລາກອນ ບຸນພະຍອງ ຫົວໜ້າຂະແໜງຈັດຕັ້ງພັກກໍ່ໄດ້ຂຶ້ນອ່ານມະຕິຕົກລົງຂອງຄະນະປະຈໍາພັກ ອົງການກົມໃຫຍ່ພະລາທິການກອງທັບ ວ່າດ້ວຍການອະນຸມັດສະມາຊິກພັກສໍາຮອງເລື່ອນເປັນສະມາຊິກພັກສົມບູນ ໂດຍອີງຕາມກົດລະບຽບຂອງພັກປະຊາຊົນປະຕິວັດລາວ ສະໄໝທີ XI, ໝວດທີ I, ມາດຕາ 2, ຂໍ້ ຂໍ ແລະຂໍ້ ຄໍ ວ່າດ້ວຍສະໄໝສໍາຮອງຂອງສະມາຊິກພັກ ແລະການພິຈາລະນາເລື່ອນສະມາຊິກພັກສໍາຮອງເປັນສະມາຊິກພັກສົມບູນ, ໃນນັ້ນລວມມີໜ່ວຍພັກພະແນກຫ້ອງການ-ການເມືອງ ແລະໜ່ວຍພັກນັກສຶກສາແພດຊັ້ນກາງ ລວມມີສະມາຊິກພັກສົມບູນໃໝ່ຈໍານວນ 03 ສະຫາຍ, ຍິງ 03 ສະຫາຍ.
ໂອກາດນີ້ ສະຫາຍ ພັນໂທ ສີແພງ ມີດາຈັນ ປະທານພິທີ ກໍ່ໄດ້ໃຫ້ກຽດໂອ້ລົມຕັກເຕືອນຕໍ່ສະມາຊິກພັກສົມບູນໃໝ່ ໂດຍໄດ້ສະແດງຄວາມຊົມເຊີຍຕໍ່ຜົນງານທີ່ສະມາຊິກພັກສົມບູນໃໝ່ຍາດມາໄດ້ໃນຕະຫຼອດໄລຍະ 1 ປີທີ່ຜ່ານມາ, ນັ້ນກໍ່ຍ້ອນຄວາມຫ້າວຫັນ, ບຸກບືນ, ຝຶກຝົນຫຼ່ໍຫຼອມຕົນເອງຢ່າງຮອບດ້ານ, ພ້ອມນັ້ນກໍ່ໄດ້ຍົກໃຫ້ເຫັນເຖິງສິດ, ໜ້າທີ່ ແລະຂໍ້ຫ້າມຂອງສະມາຊິກພັກສົມບູນ ເພື່ອໃຫ້ສະມາຊິກພັກສົມບູນໃໝ່ໄດ້ຮັບຮູ້ ແລະເຂົ້າໃຈຢ່າງເລິກເຊິ່ງຕໍ່ແນວທາງນະໂຍບາຍຂອງພັກ-ລັດ. ອີກເທື່ອໜຶ່ງສະຫາຍໄດ້ຮຽກຮ້ອງໃຫ້ສະມາຊິກພັກສືບຕໍ່ເອົາໃຈໃສ່ຝຶກຝົນຫຼ່ໍຫຼອມ ຕົນເອງທາງດ້ານການເມືອງ-ແນວຄິດ, ມີ ທັດສະນະຫຼັກໝັ້ນຕໍ່ອຸດົມການຂອງພັກ-ລັດ, ມີແນວຄິດອຸ່ນອ່ຽນທຸ່ນທ່ຽງເຊື່ອໝັ້ນຕໍ່ການນຳພາຂອງພັກຢ່າງຕາຍໃຈ, ຕັ້ງໜ້າອອກແຮງປັບປຸງກໍ່ສ້າງພັກ ເພື່ອປະກອບສ່ວນເຂົ້າໃນການກໍ່ສ້າງກົມກອງໃຫ້ມີຄວາມກ້າວໜ້າ, ມີຄວາມສະຫງົບທີ່ຕິດພັນກັບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ເພື່ອສືບຕໍ່ພາລະກິດປົກປັກຮັກສາ ແລະສ້າງສາພັດທະນາປະເທດຊາດໃຫ້ມີຄວາມຈະເລີນກ້າວໜ້າໄປຢ່າງບໍ່ຢຸດຢັ້ງ.

ຂໍ້ມູນ - ພາບ: ນາງ ສຸລິຈັນ ພັດທະນາ.

22/07/2026

ໂຮງໝໍບໍລິເວນ 107 ກອງທັບຈັດພິທີປາຖະກະຖາວັນສ້າງຕັ້ງສະຫະພັນແມ່ຍິງລາວ ຄົບຮອບ 71 ປີ
================================
ເນື່ອງໃນໂອກາດວັນສ້າງຕັ້ງສະຫະພັນແມ່ຍິງລາວ ຄົບຮອບ 71 ປີ (20 ກໍລະກົດ 1955 - 20 ກໍລະກົດ 2026) ຂະແໜງສະຫະພັນແມ່ຍິງ ໂຮງໝໍບໍລິເວນ 107 ກອງທັບ ໄດ້ຈັດຕັ້ງ ພິທີປາຖະກະຖາວັນສ້າງຕັ້ງສະຫະພັນແມ່ຍິງລາວຂຶ້ນໃນວັນທີ 22 ກໍລະກົດ 2026 ໃຫ້ກຽດເປັນປະທານ ແລະປາຖະກະຖາໂດຍ ສະຫາຍ ພັນໂທ ສີແພງ ມີດາຈັນ ຄະນະພັກຮາກຖານ, ຫົວໜ້າພະແນກການເມືອງໂຮງໝໍບໍລິເວນ 107 ກອງທັບ, ມີສະຫາຍ ພັນໂທ ນາງ ທອງວັນ ຄັນທະລີ ຫົວໜ້າຂະແໜງສະຫະພັນແມ່ຍິງ, ມີບັນດາສະຫາຍຄະນະໜ່ວຍພັກ ບັນດາເລຂາ-ຄະນະໜ່ວຍສະຫະພັນແມ່ຍິງ ຕະຫຼອດຮອດເອື້ອຍນ້ອງສະຫະພັນແມ່ຍິງທົ່ວກົມກອງເຂົ້າຮ່ວມ.
ໂອກາດນີ້ສະຫາຍປະທານກໍ່ໄດ້ຫວນຄືນປະຫວັດສາດມູນເຊື້ອຕົ້ນກຳເນີດ, ການເຕີບໃຫຍ່ຂະຫຍາຍຕົວຂອງເອື້ອຍນ້ອງແມ່ຍິງໃນແຕ່ລະໄລຍະ ໂດຍຍົກໃຫ້ເຫັນເຖິງຜົນງານການເຄື່ອນໄຫວຂອງອົງການຈັດຕັ້ງແມ່ຍິງລາວບັນດາເຜົ່າທີ່ໄດ້ເສຍສະຫຼະເລືອດເນື້ອເຫື່ອແຮງຢ່າງຫຼວງຫຼາຍໃນການຕໍ່ສູ້ກູ້ຊາດ, ອຸທິດຕົນເພື່ອພາລະກິດຕໍ່ສູ້ປົດປ່ອຍຊາດຄຽງບ່າຄຽງໄຫຼ່ກັບເພດຊາຍຢ່າງອົງອາດກ້າຫານ, ມາຮອດວັນທີ 20 ກໍລະກົດ 1955 ຈຶ່ງຖືເອົາວັນ ດັ່ງກ່າວນັ້ນເປັນວັນກຳເນີດຂອງອົງການຈັດຕັ້ງສະຫະພັນແມ່ຍິງລາວ, ນັບແຕ່ມື້ສ້າງຕັ້ງເປັນຕົ້ນມາ ອົງການຈັດຕັ້ງສະຫະພັນແມ່ຍິງລາວກໍ່ໄດ້ເຄື່ອນໄຫວຕາມພາລະບົດບາດ, ໜ້າທີ່ຂອງຕົນຢ່າງ ແຂງແຮງ, ປັບປຸງແບບແຜນວິທີເຮັດວຽກໃຫ້ສອດຄອງກັບຄວາມຮຽກຮ້ອງຕ້ອງການຂອງພັກ-ລັດ ໃນແຕ່ລະໄລຍະຢ່າງເລິກເຊິ່ງ, ເພື່ອສືບຕໍ່ເສີມຂະຫຍາຍມູນເຊື້ອອັນດີງາມ ພ້ອມກັນເອົາໃຈໃສ່ໂຄສະນາເຜີຍແຜ່ ແລະເສີມຂະຫຍາຍຄວາມດຸໝັ່ນຂະຫຍັນພຽນ, ມີນໍ້າໃຈປະຢັດຊື່ສັດ ບໍລິສຸດຕໍ່ພັກຕໍ່ປະເທດຊາດ, ຍອມເສຍສະຫຼະ ຜົນປະໂຫຍດສ່ວນຕົວເພື່ອສ່ວນລວມ, ມີນໍ້າໃຈເອື້ອເຟື້ອເພື່ອແຜ່, ຮັກເຊື້ອແພງຊາດ ແລະມີກິລິຍາມາລະຍາດອ່ອນຫວານ ໄປພ້ອມກັບການ ອານຸລັກຮັກສາວັດທະນະທຳ, ຮີດຄອງປະເພນີອັນດີງາມຂອງຊາດລາວ
ພ້ອມທັງປະກອບສ່ວນໃນການປົກປັກຮັກສາ, ສ້າງສາພັດທະນາປະເທດຊາດ ແລະພັດທະນາແມ່ຍິງຈົນມາເຖິງທຸກວັນນີ້ ອັນໄດ້ຍົກຖານະບົດບາດຂອງອົງການຈັດຕັ້ງແມ່ຍິງລາວສູງຂຶ້ນໃນເວທີການເມືອງຢູ່ພາຍໃນ ແລະສາກົນທຽບເທົ່າກັບເພດຊາຍ. ສະຫາຍຍັງໄດ້ຍົກໃຫ້ເຫັນເຖິງຄວາມເອົາໃຈໃສ່ຂອງພັກ - ລັດທີ່ມີຕໍ່ອົງການຈັດຕັ້ງແມ່ຍິງ, ຂະບວນການຈັດຕັ້ງສະຫະພັນແມ່ຍິງລາວໄດ້ຮັບໄຊຊະນະກໍ່ຍ້ອນມີບັນດາທ່ານຜູ້ນຳຊີ້ນຳ-ນໍາພາຢ່າງໃກ້ຊິດຕິດແທດ, ຄະນະພັກແຕ່ລະຂັ້ນເຫັນໄດ້ຫຼາຍບັນຫາທີ່ສຳຄັນໃນການພັດທະນາປະເທດຊາດ, ພັດທະນາແມ່ຍິງໃຫ້ມີຄວາມຮູ້, ຄວາມສາມາດຮອບດ້ານ, ພ້ອມນັ້ນພັກ-ລັດກໍ່ຍັງໄດ້ເອົາໃຈໃສ່ສະໜັບສະໜູນທຸກຂະບວນການຂອງເອື້ອຍນ້ອງແມ່ຍິງ ໂດຍສະເພາະແມ່ນຂະບວນການສົ່ງເສີມສິດທິມະນຸດສະຍະທຳ, ສິດສະເໝີພາບລະຫວ່າງ ຍິງ-ຊາຍ ໃຫ້ມີຄວາມເທົ່າທຽມກັນ ແລະໃນກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດຄັ້ງທີ IX ໃນປີ 2025 ກໍ່ໄດ້ຮັບຮອງເອົາຄຳຂວັນຄື: "ພັດທະນາຄວາມສະເໝີພາບຍິງ-ຊາຍ ຕິດພັນກັບການພັດທະນາປະເທດຊາດ".

ພາບ-ຂໍ້ມູນ: ນາງ ສຸລິຈັນ ພັດທະນາ.

17/07/2026

ໂຮງໝໍບໍລິເວນ 107 ກອງທັບ
ປາຖະກະຖາວັນສ້າງຕັ້ງຂະແໜງການພະລາທິການກອງທັບ ຄົບຮອບ 70 ປີ.
=======================
ວັນທີ 17 ກໍລະກົດ 2026 ນີ້ ໂຮງໝໍບໍລິເວນ 107 ກອງທັບ ໄດ້ຈັດຕັ້ງພິທີປາຖະກະຖາມູນເຊື້ອວັນສ້າງຕັ້ງຂະແໜງການພະລາທິການກອງທັບ ຄົບຮອບ 70 ປີ (ວັນທີ 05 ສິງຫາ 1956 - 05 ສິງຫາ 2026) ໂດຍການເປັນປະທານຂອງ ສະຫາຍ ພົນຈັດຕະວາ ວົງສັກ ສີພັນດອນ ກຳມະການຄະນະປະຈໍາພັກກະຊວງປ້ອງກັນປະເທດ, ຮອງຫົວໜ້າກົມໃຫຍ່ພະລາທິການກອງທັບ ພ້ອມດ້ວຍຄະນະ, ມີຄະນະພັກ-ຄະນະບນຊາໂຮງໝໍບໍລິເວນ 107 ກອງທັບ, ອົງການຮັບສົ່ງລາວ-ຈີນ, ສາງນ້ຳມັນເລກ 2, ສາງນ້ຳມັນເລກ 3, ໂຮງງານຕັດຫຍິບພາກເໜືອ, ມີບັນດາທ່ານພະນັກງານອາວຸໂສບໍານານ, ພະນັກງານ-ນັກຮົບທົ່ວກົມກອງເຂົ້າຮ່ວມ.
ໃນພິທີ ສະຫາຍ ພັນເອກ ຈັນທະວົງ ອຸປະດີ ຮອງຫົວໜ້າກົມອຸປະໂພກ-ບໍລິໂພກ, ອານຸກຳມະການໂຄສະນາປາຖະກະຖາ ກົມໃຫຍ່ພະລາທິການກອງທັບ ໄດ້ເຜີຍແຜ່ເຊື່ອມຊຶມເອກະສານຕັ້ງໜ້າຝຶກຝົນຫຼ່ໍຫຼອມຄຸນສົມບັດສິນທຳປະຕິວັດ ແລະປັບປຸງແບບແຜນວິທີເຮັດວຽກຂອງພະນັກງານ-ນັກຮົບໃນໄລຍະໃໝ່ ເພື່ອເຮັດໃຫ້ພະນັກງານ-ນັກຮົບມີຄວາມຮັບຮູ້ເຂົ້າໃຈຢ່າງເລິກເຊິ່ງຕໍ່ກັບຄວາມໝາຍ, ຄວາມສຳຄັນ ແລະເນື້ອໃນຄຸນສົມບັດສິນທຳປະຕິວັດ, ມີນ້ຳໃຈຮັກຊາດ, ເຊື່ອໝັ້ນຕໍ່ການນຳພາຂອງພັກ, ຮູ້ຈໍາແນກມິດ-ສັດຕູ, ກຳແໜ້ນແນວທາງ ນະໂຍບາຍຂອງພັກ, ກົດໝາຍຂອງລັດ, ຕັດສິນໃຈ ເຮັດຫຼ້ອນໜ້າທີ່, ຕັ້ງໜ້າປະຕິບັດທຸກມະຕິ, ຄໍາສັ່ງ, ຍອມເສຍສະຫຼະເພື່ອປະເທດຊາດ, ເດັດດ່ຽວຕໍ່ສູ້ຕ້ານກົນອຸບາຍຫັນປ່ຽນໂດຍສັນຕິຂອງສັດຕູ, ມີສະຕິຕໍ່ການຈັດຕັ້ງ, ລະບຽບວິໄນຢ່າງເຂັ້ມງວດ, ດຸໝັ່ນຄົ້ນຄວ້າຮໍ່າຮຽນ, ດໍາລົງຊີວິດແບບປອດໃສຂາວສະອາດ, ມີນໍ້າໃຈ ຮັກຊາດຮັກລະບອບໃໝ່, ການປັບປຸງແບບແຜນວິທີເຮັດວຽກຂອງພະນັກງານ-ນັກຮົບໃນໄລຍະໃໝ່, ເພື່ອເຮັດໃຫ້ ແຕ່ລະວຽກດໍາເນີນໄປດ້ວຍຄວາມສໍາເລັດວ່ອງໄວ, ທັນເວລາ, ຖືກຕ້ອງ, ເໝາະສົມ, ມີຄຸນນະພາບ ແລະມີປະສິດທິຜົນສູງ. ຈາກນັ້ນ ສະຫາຍ ພົນຈັດຕະວາ ວົງສັກ ສີພັນດອນ ກຳມະການຄະນະປະຈໍາພັກກະຊວງປ້ອງກັນປະເທດ, ຮອງຫົວໜ້າກົມໃຫຍ່ພະລາທິການກອງທັບ ໄດ້ໃຫ້ກຽດຫວນຄືນມູນເຊື້ອວັນສ້າງຕັ້ງຂະແໜງການພະລາທິການກອງທັບ, ເຊິ່ງໄດ້ຍົກໃຫ້ເຫັນປະຫວັດສາດແຫ່ງການຕໍ່ສູ້ປົກປັກຮັກສາ ແລະ ພັດທະນາປະເທດຊາດຕະຫຼອດໄລຍະ 70 ປີ ຂອງວຽກງານພະລາທິການທັງເປັນການລໍ້າລຶກເຖິງຜົນງານ, ຄຸນງາມ ຄວາມດີຂອງພະນັກງານ-ສະມາຊິກພັກ, ຕະຫຼອດຮອດພໍ່ແມ່ປະຊາຊົນລາວບັນດາເຜົ່າ, ຜູ້ທີ່ເສຍສະຫລະ ເລືອດເນື້ອເພື່ອພາລະກິດປົດປ່ອຍຊາດ, ແລກກັບອິດສະລະພາບເຂົ້າມາໃນກຳມືກໍ່ຄືກັບຄວາມຢູ່ເຢັນເປັນສຸກຂອງຜືນດິນລາວເຮົາ. ວັນທີ 05 ສິງຫາ 1956 ສູນກາງໄດ້ມີດຳລັດສ້າງຕັ້ງຫ້ອງພະລາທິການຂອງກະຊວງປ້ອງກັນປະເທດຂຶ້ນໂດຍແມ່ນສະຫາຍ ທິດມ່ວນ ສາວຈັນທະລາ ເປັນຜູ້ຮັບຜິດຊອບອົງການພະລາທິການກະຊວງ ເຊິ່ງໄດ້ຮັບການຈັດຕັ້ງຄື: ຄະນະຮັບຜິດຊອບ ແລະພະແນກແຜນການ, ບໍລິຫານ ແລະ ຄຸ້ມຄອງມີ 25 ສະຫາຍ, ພະແນກການເງິນ ແລະບໍລິໂພກ 45 ສະຫາຍ, ພະແນກເພີ່ມພູນ ແລະ ລຳລຽງສະບຽງອາຫານ 31 ສະຫາຍ, ພະແນກຍຸດໂທ 30 ສະຫາຍ, ພະແນກອຸປະໂພກ 6 ສະຫາຍ, ພະແນກເສນາຮັກ 33 ສະຫາຍ, ກຳລັງຂົນສົ່ງ ທາງບົກ 2 ກອງຮ້ອຍ 336 ສະຫາຍ, ລວມທັງໝົດ ຈໍານວນພົນໃນຫ້ອງການ ແລະກົມກອງຍ່ອຍມີ 506 ສະຫາຍ ເພື່ອໃຫ້ເໝາະສົມກັບສະພາບການຕັ້ງທັບເວລານັ້ນ, ຫ້ອງພະລາທິການໄດ້ແບ່ງອອກເປັນ 2 ພາກສ່ວນຄື: ພາກສ່ວນຕົ້ນຕໍຢູ່ຊໍາເໜືອ, ພາກສ່ວນສໍາຮອງຢູ່ຜົ້ງສາລີ ຢູ່ແຕ່ລະທິດໄດ້ຈັດຕັ້ງກົມກອງພື້ນຖານມີໜ່ວຍປິ່ນປົວ, ໂຮງໝໍ, ໜ່ວຍຂົນສົ່ງ, ໜ່ວຍສ້ອມແປງ, ໂຮງຮຽນວິຊາ ສະເພາະ, ປີ1955-1956 ພວກເຮົາສາມາດເປີດ ຮຽນໄດ້ 20 ຊຸດ, ສ້າງພະນັກງານ ໄດ້ 559 ສະຫາຍ ຂອງຂະແໜງວິຊາສະເພາະເຕັກນິກຕ່າງໆເຊັ່ນ: ຄຸ້ມຄອງສະໝຸດບັນຊີ, ນາຍສາງ, ແພດ ແລະ ການຢາຊັ້ນຕົ້ນ, ຢູ່ຫ້ອງການ ແລະ ພະແນກຕ່າງໆ ໄດ້ ຈັດຕັ້ງຮຽນຢູ່ກັບທີ່ ເພື່ອຍົກສູງລະດັບທາງດ້ານ ວິຊາສະເພາະ ແລະດ້ານການເມືອງ, ໃນໄລຍະສັ້ນພວກເຮົາກໍ່ສ້າງພະນັກງານພະລາທິການໄດ້ພໍຕາມຄາດໝາຍໃນຄາວນັ້ນ, ລະດັບຄວາມຮູ້ ເວົ້າລວມຍັງຕໍ່າແຕ່ກໍ່ພະຍາຍາມຮັບໃຊ້ກົມກອງໃຫ້ດີທີ່ສຸດ, ວຽກງານພະລາທິການກອງທັບໃນ ພາລະກິດປ່ຽນແປງໃໝ່ ນັບແຕ່ພັກໄດ້ກຳນົດແນວທາງປ່ຽນແປງໃໝ່ຮອບດ້ານໃນປີ 1986 ໃນ ທ່າມກາງການປ່ຽນ ຜ່ານໄປສູ່ເສດຖະກິດຕະຫຼາດ ຕາມທິດສັງຄົມນິຍົມ ກອງທັບກໍໄດ້ກຳນົດແຜນຍຸດທະສາດໃນການປັບປຸງ ແລະກໍ່ສ້າງກອງທັບເປັນແຕ່ລະໄລຍະ, ວຽກງານພະລາທິການໄດ້ຮັບ ການປັບປຸງ ແລະເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງຖ້າທຽບໃສ່ເມື່ອກ່ອນ ພວກເຮົາມີລະບົບການຈັດຕັ້ງທີ່ເປັນເອກະພາບ, ເປັນລະບົບຄົບຊຸດແຕ່ຂັ້ນກະຊວງລົງຮອດກົມກອງພື້ນຖານ, ການຈັດຕັ້ງຮັບປະກັນ ແລະຄຸ້ມຄອງພະລາທິການໄດ້ກ້າວໄປສູ່ຕາມລະບຽບກົດໝາຍ, ບັນດາຂໍ້ກຳນົດ, ກົດລະບຽບ, ລະບອບໄດ້ຮັບການປັບປຸງ ແລະໄດ້ສ້າງໃໝ່ທີ່ແທດເໝາະກັບສະພາບການໃນແຕ່ລະໄລຍະ, ພ້ອມກັນນັ້ນ ວຽກງານພະລາທິການໄດ້ນໍາໃຊ້ເຄື່ອງມືທີ່ທັນສະໄໝ ເຂົ້າໃນວຽກງານເຮັດໃຫ້ແບບແຜນວິທີເຮັດວຽກໄດ້ຮັບການປັບປຸງຢ່າງບໍ່ຢຸດຢັ້ງ ຮັບປະກັນວຽກງານປົກກະຕິ, ວຽກງານກຽມພ້ອມສູ້ຮົບ, ອົບຮົມຫັດແອບ, ຊ້ອມຮົບ, ກອບກູ້ໄພພິບັດ, ຕ້ານພະຍາດລະບາດ ແລະກໍ່ສ້າງເສດຖະກິດ. ເພື່ອສືບຕໍ່ເສີມຂະຫຍາຍທາດແທ້ ແລະມູນເຊື້ອອັນສະຫງ່າງາມຂອງຕົນ, ຂະແໜງພະລາທິການຈະສືບຕໍ່ເອົາໃຈໃສ່ສຶກສາອົບຮົມມູນເຊື້ອ, ທາດແທ້ປະຕິວັດ ແລະທາດແທ້ປະຊາຊົນຂອງກອງທັບປະຊາຊົນໃຫ້ເລິກເຊິ່ງ ແລະ ໜັກແໜ້ນ, ປັບປຸງ-ກໍ່ສ້າງຂະແໜງພະລາທິການກອງທັບໃຫ້ເຂັ້ມແຂງ, ໜັກແໜ້ນ ແລະຫັນເປັນທັນສະໄໝ, ເຊື່ອມຊຶມ, ກຳແໜ້ນ ແລະ ປະຕິບັດແນວທາງການຕ່າງປະເທດຂອງພັກໃຫ້ຖືກຕ້ອງ, ເພີ່ມທະວີການພົວພັນຮ່ວມມືກັບກອງທັບ ບັນດາປະເທດສັງຄົມນິຍົມ ອ້າຍນ້ອງ, ສສ ຫວຽດນາມ, ສປ ຈີນ, ສ ລັດເຊຍ ແລະບັນດາປະເທດໃກ້ຄຽງ, ຮ່ວມມືໃນຂອບ ອາຊຽນ ເພື່ອປະກອບສ່ວນເຂົ້າໃນການເສີມສ້າງສັນຕິພາບ, ສະຖຽນລະພາບ ແລະການຮ່ວມມືຢ່າງຮອບດ້ານ.

ຂ່າວ: ນາງ ສຸລິຈັນ ພັດທະນາ

14/07/2026

ໂຮງໝໍບໍລິເວນ 107 ກອງທັບ ສຳເລັດວຽກງານກວດກາກຳລັງພົນທຽບຖານຂໍ້ມູນປະຈໍາປີ 2026.
=====================
ໃນລະຫວ່າງວັນທີ 13-14 ກໍລະກົດ 2026 ນີ້ ໂຮງໝໍບໍລິເວນ 107 ໄດ້ສຳເລັດການກວດກາວຽກງານກຳລັງພົນທຽບຖານຂໍ້ມູນປະຈໍາປີ 2026 ໂດຍການເປັນປະທານຂອງສະຫາຍ ພັນເອກ ທອງຈັນ ພົງສີພັນ ຮອງຫົວໜ້າຫ້ອງການເມືອງ ກົມໃຫຍ່ພະລາທິການກອງທັບ ພ້ອມດ້ວຍຄະນະຮັບຜິດຊອບກວດກາຈໍານວນພົນກົມໃຫຍ່ພະລາທິການກອງທັບ, ມີຄະນະພັກ-ຄະນະບັນຊາ, ມີບັນດາຫົວໜ້າພະແນກ-ຂະແໜງການ, ພະນັກງານ ແລະນັກຮົບກົມກອງເຂົ້າຮ່ວມ.
ໂດຍປະຕິບັດຕາມຄໍາສັ່ງຂອງກະຊວງປ້ອງກັນປະເທດ ວ່າດ້ວຍການຈັດຕັ້ງຜັນຂະຫຍາຍມະຕິກອງປະຊຸມຄົບຄະນະບໍລິຫານງານພັກກະຊວງປ້ອງກັນປະເທດຄັ້ງທີ 1 ສະໄໝທີ V ຂົງເຂດວຽກງານຄຸ້ມຄອງການຈັດຕັ້ງ ປະກອບຈຳນວນພົນກອງທັບ, ສະບັບເລກທີ 3670/ກປທ, ລົງວັນທີ 24/8/2021 ແລະຄໍາສັ່ງແນະນໍາ ຂອງກົມໃຫຍ່ເສນາທິການກອງທັບວ່າດ້ວຍການຈັດຕັ້ງກວດກາການຄຸ້ມຄອງກຳລັງພົນອົງການ ແລະກົມກອງຂຶ້ນກັບຂັ້ນຕົນ ສະບັບເລກທີ 1171/ກສນ, ລົງວັນທີ 29/04/2024, ອີງຕາມ ທິດຊີ້ນໍາຂອງຄະນະພັກອົງການກົມໃຫຍ່ພະລາທິການກອງທັບ ເພື່ອຮັບປະກັນວຽກງານການຈັດຕັ້ງຜັນຂະຫຍາຍຄໍາສັ່ງຂອງກົມໃຫຍ່ເສນາທິການກອງທັບວ່າດ້ວຍໃຫ້ຈັດຕັ້ງກວດກາການຄຸ້ມຄອງກຳລັງພົນອົງການ ແລະ ກົມກອງທີ່ຂື້ນກັບຂັ້ນຕົນໃຫ້ຖືກຕ້ອງຕາມຫຼັກການ, ຄະນະຮັບຜິດຊອບກວດກາຈໍານວນພົນກົມໃຫຍ່ພະລາທິການກອງທັບໄດ້ລົງເຄື່ອນໄຫວຕິດຕາມ, ກວດກາ, ເກັບກໍາຂໍ້ມູນການຄຸ້ມຄອງດ້ານຈໍານວນພົນ ຂອງນາຍແລະພົນທະຫານ ຢູ່ໂຮງໝໍບໍລິເວນ 107 ໂດຍມີຈຸດປະສົງ ຄາດໝາຍເພື່ອສືບຕໍ່ປະຕິບັດຕາມທິດຊີ້ນໍາຂອງກະຊວງປ້ອງກັນປະເທດໃນການກວດກາສະກັດກັ້ນ ແລະ ແກ້ໄຂບັນຫາການໂຕນປະລະໜ້າທີ່ຈາກກົມກອງ, ການຮັກສາບັນຊີລາຍຊື່ຄົນບໍ່ມີໜ້າ, ເພື່ອຮັກສາກໍາລັງຕົ້ນຕໍໃນການປະຕິບັດໜ້າທີ່ກຽມພ້ອມສູ້ຮົບ ແລະເຄື່ອນໄຫວສູ້ຮົບປົກປັກຮັກສາຄວາມເປັນເອກະລາດຂອງຊາດ ແລະ ກຽມພ້ອມຊ່ວຍ ເຫຼືອເວລາເກີດໄພພິບັດສຸກເສີນໃນທົ່ວປະເທດ ເພື່ອເພີ່ມທະວີການຄຸ້ມຄອງກຳລັງພົນ, ຮັບປະກັນໃນການອົບຮົມວຽກງານການເມືອງ, ການທະຫານ, ພະລາທິການ-ເຕັກນິກໃຫ້ພະນັກງານນັກຮົບມີຄວາມສຳນິສຳນານໃນການນໍາໃຊ້ອາວຸດຍຸດໂທປະກອນໃນກອງທັບ.

ພາບ-ຂ່າວ: ນາງ ສຸລິຈັນ ພັດທະນາ.

07/07/2026

ໂຮງໝໍບໍລິເວນ 107 ກອງທັບ ສະຫຼຸບການເຄື່ອນໄຫວວຽກງານຮອບດ້ານ 6 ເດືອນຕົ້ນປີ ແລະຜ່ານທິດທາງແຜນການ 6 ເດືອນທ້າຍປີ 2026.
========== ===================
ວັນທີ 07 ກໍລະກົດ 2026 ນີ້ ໂຮງໝໍບໍລິເວນ 107 ກອງທັບ ໄດ້ສຳເລັດກອງປະຊຸມສະຫຼຸບການເຄື່ອນໄຫວວຽກງານຮອບດ້ານ 6 ເດືອນຕົ້ນປີ ແລະຜ່ານທິດທາງແຜນການ 6 ເດືອນທ້າຍປີ 2026 ໂດຍການເປັນປະທານຮ່ວມ ຂອງສະຫາຍ ພັນເອກ ໄພວັນ ຈັນທະສຸກ ອໍານວຍການໂຮງໝໍບໍລິເວນ 107 ກອງທັບ, ມີສະຫາຍ ພັນໂທ ສຸວັນ ສໍປະກາຍແກ້ວ ຫົວໜ້າການເມືອງ, ມີຄະນະພັກ-ຄະນະບັນຊາ, ບັນດາຫົວໜ້າພະແນກ-ຂະແໜງການ, ພະນັກງານ - ນັກຮົບ ທົ່ວກົມກອງເຂົ້າຮ່ວມ.
ໃນກອງປະຊຸມສະຫາຍ ພັນໂທ ຄຳຄ່ອງ ພິມມະວົງສາ ຮອງອຳນວຍໂຮງໝໍບໍລິເວນ 107 ກອງທັບ ໄດ້ຜ່ານບົດສະຫຼຸບການເຄື່ອນໄຫວວຽກງານຮອບດ້ານໃນໄລຍະ 6 ເດືອນຕົ້ນປີ 2026 ເຊິ່ງຍົກໃຫ້ເຫັນຜົນງານທີ່ພົ້ນເດັ່ນຄື: ຂົງເຂດວຽກງານການເມືອງ ໄດ້ເຜີຍແຜ່ຂໍ້ກຳນົດ, ກົດລະບຽບ, ມະຕິຄໍາສັ່ງຕ່າງໆຂອງຂັ້ນເທິງເປັນແຕ່ລະໄລຍະ, ພະນັກງານ - ນັກຮົບມີຄຸນທາດການເມືອງໜັກແໜ້ນ, ອຸ່ນອ່ຽນທຸ່ນທ່ຽງ, ຂົງເຂດວຽກງານຫ້ອງການໄດ້ເອົາໃຈໃສ່ຕໍ່ວຽກງານສັງລວມ, ວຽກງານກຳລັງພົນ, ວຽກງານບໍລິຫານ, ຂົງເຂດວຽກງານພະລາທິການໄດ້ເອົາໃຈໃສ່ວຽກງານຮັບປະກັນຊີວິດການເປັນຢູ່, ປັບປຸງຄ້າຍຄູ, ສ້ອມແປງໄຟຟ້າ- ນໍ້າປະປາ, ຮັບປະກັນວຽກງານຄຸ້ມຄອງປົກປັກຮັກສາພາຫະນະເຕັກນິກ,ນ້ຳມັນເຊື້ອໄຟ ແລະການຄຸ້ມຄອງການໃຊ້ຈ່າຍງົບປະມານຕ່າງໆໄດ້ຕາມຄາດໝາຍ, ຂົງເຂດວຽກງານວິຊາສະເພາະເຕັກນິກການແພດ ໃນໄລຍະ 6 ເດືອນຕົ້ນປີມີຜູ້ເຂົ້າມາໃຊ້ບໍລິການໃນການກວດ ແລະນອນປິ່ນປົວທັງໝົດ 26,965 ເທື່ອຄົນ, ຄົນເຈັບເຂົ້ານອນປິ່ນປົວ 3,895 ເທື່ອຄົນ, ປິ່ນປົວດີ 3,820 ເທື່ອຄົນ, ສົ່ງໂຮງໝໍອື່ນ 67 ກໍລະນີ, ເສຍຊີວິດ 8 ກໍລະນີ, ຜ່າຕັດໃຫຍ່ 247 ກໍລະນີ, ຜ່າຕັດກາງ 313 ກໍລະນີ, ຜ່າຕັດນ້ອຍ 385 ກໍລະນີ ແລະຜ່າຕັດຜ່ານທໍ່ 11 ກໍລະນີ. ການປິ່ນປົວລະບົບປະກັນສຸຂະພາບກອງທັບມີຜູ້ປະກັນຕົນ, ຄູ່ສົມລົດ ແລະລູກມາໃຊ້ບໍລິການທັງໝົດ 5,364 ເທື່ອຄົນ ແລະຜ່ານທິດທາງແຜນການ 6 ເດືອນທ້າຍປີ 2026. ຈາກນັ້ນ ສະຫາຍ ພັນໂທ ບຸນຄົງ ແກ້ວສີດາ ຫົວໜ້າຂະແໜງນະໂຍບາຍໄດ້ຜ່ານລັດຖະດຳລັດຂອງປະທານປະເທດວ່າດ້ວຍການປະດັບຫຼຽນໄຊແຮງງານໃຫ້ນາຍທະຫານ ໃນນັ້ນມີຫຼຽນໄຊແຮງງານຊັ້ນ II ຈໍານວນ 22 ສະຫາຍ, ຫຼຽນໄຊແຮງງານຊັ້ນ III ຈໍານວນ 14 ສະຫາຍ, ຜ່ານດຳລັດຂອງນາຍົກລັດຖະມົນຕີ ວ່າດ້ວຍການປະດັບຫຼຽນກາແຮງງານໃຫ້ນາຍທະຫານຈໍານວນ 50 ສະຫາຍ ແລະມອບໃບຍ້ອງຍໍຂັ້ນລັດຖະບານ ຈໍານວນ 126 ສະຫາຍ.
ໂອກາດນີ້ສະຫາຍ ພັນເອກ ໄພວັນ ຈັນທະສຸກ ອຳນວຍການໂຮງໝໍບໍລິເວນ 107 ກອງທັບ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ບັນດາສະຫາຍຍາດມາໄດ້, ສະຫາຍໄດ້ຮຽກຮ້ອງໃຫ້ພະນັກງານແພດ-ໝໍເອົາໃຈໃສ່ປະຕິບັດຂໍ້ກຳນົດ, ກົດລະບຽບຂອງກົມກອງກໍ່ຄືຂອງກອງທັບວາງອອກ, ຍົກສູງຄວາມຮັບຜິດຊອບສູງຕໍ່ໜ້າທີ່ວຽກງານວິຊາສະເພາະການແພດ, ຮັກສາໄດ້ຈັນຍາບັນ-ຈັນຍາທໍາຂອງແພດປະຕິວັດ, ສ້າງຕົນເອງໃຫ້ກາຍເປັນນັກຮົບວັດທະນະທໍາຜູ້ດີເດັ່ນ, ສ້າງກົມກອງໃຫ້ມີຄວາມເຕີບໃຫຍ່ເຂັ້ມແຂງ ແລະທັນສະໄໝຂຶ້ນກວ່າເກົ່າ.
ພາບ-ຂ່າວ: ນາງ ສຸລິຈັນ ພັດທະນາ.

02/07/2026

ໂຮງໝໍບໍລິເວນ 107 ກອງທັບສຳເລັດກອງປະຊຸມສະຫຼຸບການເຄື່ອນໄຫວວຽກງານຊາວໜຸ່ມ 6 ເດືອນຕົ້ນປີ 2026.
===========================
ວັນທີ 01 ກໍລະກົກ 2026 ນີ້ ຂະແໜງຊາວໜຸ່ມໂຮງໝໍບໍລິເວນ 107 ກອງທັບໄດ້ສຳເລັດກອງປະຊຸມສະຫຼຸບການເຄື່ອນໄຫວວຽກງານຊາວໜຸ່ມ 6 ເດືອນຕົ້ນປີ 2026 ແລະທິດທາງແຜນການ 6 ເດືອນທ້າຍປີ 2026 ໂດຍການເປັນປະທານຂອງສະຫາຍ ພັນໂທ ສີແພງ ມີດາຈັນ ຄະນະພັກຮາກຖານ, ຫົວໜ້າພະແນກການເມືອງໂຮງໝໍບໍລິເວນ 107, ມີສະຫາຍ ຮ້ອຍເອກ ພອນສັກ ລໍໄພບູນ ຫົວໜ້າຂະແໜງຊາວໜຸ່ມ, ມີຂະແໜງສະຫະພັນແມ່ຍິງ, ມີບັນດາຄະນະໜ່ວຍພັກ, ຄະນະໜ່ວຍຊາວໜຸ່ມພ້ອມດ້ວຍສະມາຊິກຊາວໜຸ່ມທົ່ວກົມກອງເຂົ້າຮ່ວມ.
ສະຫາຍ ຮ້ອຍເອກ ພອນສັກ ລໍໄພບູນ ຫົວໜ້າຂະແໜງຊາວໜຸ່ມ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານຂອງຂະແໜງຊາວໜຸ່ມ ໃນໄລຍະ 06 ເດືອນຜ່ານມາ ເຫັນໄດ້ວ່າສະມາຊິກຊາວໜຸ່ມມີແນວຄິດຫຼັກໜັ້ນ, ອຸ່ນອ່ຽນທຸ່ນທ່ຽງຕໍ່ໜ້າທີ່ວຽກງານ, ມີສະຕິຕໍ່ການຈັດຕັ້ງ, ສະມາຊິກຊາວໜຸ່ມເຮັດໜ້າທີ່ວິຊາສະເພາະການແພດໄດ້ດີ, ມີຜົນງານທີ່ພົ້ນເດັ່ນຄື: ກວດເລືອດຄົນເຈັບ 32,660 ຄັ້ງ, ສ່ອງລັງສີ 2,980 ເທື່ອຄົນ, ກວດເດັກ 1,522 ເທື່ອຄົນ, ກວດແມ່ມານຝາກທ້ອງ 1,471 ເທື່ອຄົນ, ຟອກໄຂ່ຫຼັງຄົນເຈັບ 187 ກາ, ຄຽງຄູ່ກັນນັ້ນກໍ່ໄດ້ເຄື່ອນໄຫວວຽກງານຂະບວນການຕ່າງໆຂອງກົມກອງເຊັ່ນ: ຂະບວນການກິລາກາຍຍະກຳ, ຂະບວນການສິລະປະວັນນະຄະດີ, ຂະບວນການອອກແຮງງານອະນາໄມໃນຂອບເຂດຮັບຜິດຊອບ, ວຽກງານປັບປຸງກໍ່ສ້າງຄ້າຍຄູ ແລະຜ່ານທິດທາງແຜນການໃນຕໍ່ໜ້າ. ຈາກນັ້ນ ຜ່ານຂໍ້ຕົກລົງຂອງຫ້ອງການເມືອງກົມໃຫຍ່ພະລາທິການກອງທັບ ວ່າດ້ວຍການສິ້ນສຸດການເປັນສະມາຊິກຊາວໜຸ່ມປະຊາຊົນປະຕິວັດລາວ ຈໍານວນ 07 ສະຫາຍ, ຍິງ 06 ສະຫາຍ.
ໂອກາດນີ້ສະຫາຍປະທານກໍ່ໄດ້ ສະແດງຄວາມຊົມເຊີຍຕໍ່ຜົນງານ ແລະຜົນສໍາເລັດທີ່ສະມາຊິກຊາວໜຸ່ມໂຮງໝໍບໍລິເວນ 107 ຍາດມາໄດ້, ສະຫາຍໄດ້ຮຽກຮ້ອງໃຫ້ອ້າຍນ້ອງຊາວໜຸ່ມທົ່ວກົມກອງຈົ່ງພ້ອມກັນສືບຕໍ່ເອົາໃຈໃສ່ປະຕິບັດຂໍ້ກໍານົດ ກົດລະບຽບ, ຍົກສູງສະຕິຕໍ່ການຈັດຕັ້ງ, ເອົາໃຈໃສ່ຝຶກຝົນຫຼ່ໍຫຼອມຕົນເອງທາງດ້ານຄຸນສົມບັດ ສິນທຳປະຕິວັດ, ສືບຕໍ່ປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມໃຫ້ໄດ້ດີ, ຍົກສູງນໍ້າໃຈແພດປະຕິວັດຕິດພັນກັບຄໍາຂວັນ 5 ດີ 1 ພໍໃຈຂອງກະຊວງສາທາລະນະສຸກວາງອອກ ທັງເປັນກໍາລັງແຮງໃຫ້ກົມກອງ ໃຫ້ສົມກັບຄໍາຂະໜານນາມວ່າ: "ຊາວໜຸ່ມປຽບເໝືອນນົກອິນຊີໃນຍຸກໃໝ່ ເປັນສິນໄຊໃນຍຸກປັດຈຸບັນ" ແລະພ້ອມກັນສ້າງກົມກອງໃຫ້ມີຄວາມເຕີບໃຫຍ່ເຂັ້ມແຂງຂຶ້ນເລື່ອຍໆ.

ພາບ-ຂ່າວ: ນາງ ສຸລິຈັນ ພັດທະນາ.

ໂຮງໝໍບໍລິເວນ 107

21/08/2026

19/08/2026

13/08/2026

04/08/2026

23/07/2026

22/07/2026

17/07/2026

14/07/2026

07/07/2026

02/07/2026

Address

Telephone

Website

Alerts

Contact The Practice

Shortcuts

Share

Category

Listing takedown request