26/04/2026
كتير إجاني انتقادات سيئة بآخر فترة من حبلي الثاني. بس هالموضوع ما زعجني كتير. ليش؟ لأن عالsocial media، نحن معرّضين لكل شي. عطول بقولها، إن يعني كأنك عم تحكي بالمجتمع قدام أكتر من ١٠٠،٠٠٠ شخص. شو متوقع؟ الكل يكون محترم؟ مهذب؟ حنون؟ متفهم؟ ذكي؟
الدنية فيها من كل أنواع البشر. وفي بشر، ريتن ما يكونوا بديار حدا. كان فيي إلغي الفيديو، وإحمي مشاعري اللي أكيد ما ناقصها ناس رجعيين تأثر عليها، خصوصة مع كل التغييرات اللي بتقطع فيها الأم. بس قررت خلّي، لفرجي غيري إن بالحياة من واجه كتير أشياء ما بتكون بالحسبان. بس أكيد ما بآمن إن الواحد يسكت وما يجاوب. بالعكس، الشخص اللي بيإذيك بالكلام أو بالنظرات أو بشو ما كان، جاوبه وما تحبس بقلبك.
ما حدا بخاف عحاله أكثر من الشخص نفسه، وما حدا بيزعل عحاله أكثر من الشخص نفسه، وما حدا شايف حاله بكل خيال وبكل نظرة عالمراية أكثر من الشخص نفسه. الإم بتمرّ بمراحل كثيرة، ومنها التغييرات الجسدية. وما حدا قدها بكون عارف وشايف هالتغيير. بس إذا نحن عم من جرّب نستوعب هالتغيير، إنت مين لتجي تقيمنا يا قليل الفكر؟
أنا بعرف حالي كثير منيح لوين وصلت، والحدالله بعرف كتير منيح إرجع متل ما كنت قبل وأحسن. بس فشر عكل شخص متلكن، يجرحني أنا أو أي إم غيري، اللي أصلاً بس تنظر لحالها عالمرآة، مش عم تعرف مين هالمرأة اللي عم تشوفها.
اليوم صرلي ١٣ يوم مولدي، والحمدالله جسمي مرتاح كتير، وصار نازل وزني ١٢ كغ لحد اليوم. باقي ٢٥ كغ. لنشوف جسمي قديش رح يساعدني لنزلهن من هلأ لكم شهر هو وعم يشفى من عملية قيصرية ثانية بظرف ١٤ شهر، وبنفس الوقت عم يغذي طفل رضيع.
إذا إنتِ كمان إم، أو عندك طريق طويلة شوي لتوصلي لهدف معين، تابعيني لنخوض هالمشوار سوا! 🤍
