11/07/2026
සාමාන්‍ය රෝගියා vs හදිස්සි රෝගියා
මම අවසන් වසර වෛද්‍ය විභාගය නිම කරද්දිම නැවත මගේ ජීවිත කාලය තුළ සේවය කරන්නේ නෑ කියලා හිතාගත්තු අංශ දෙකක් තිබෙනවා. එකක් ප්‍රසව සහ නාරිවේද අංශය, අනික ළමා රෝග අංශය. මේ නිසාම මගේ සීමාවාසික පුහුණුව සඳහාත් මම තෝරා ගන්නේ වෛද්‍ය සහ ශල්‍ය වෛද්‍ය අංශයන්. එහෙම තීරණය කළේ ඇයි කියල පස්සේ කියන්නම්. කොහොම හරි 2019 අන්තිම වෙනකොට ළමා රෝග අංශයකත්, ඉන්පසු නව ජන්ම දැඩි සත්කාර ඒකකයක් මට සේවය කරන්න සිද්ධ වෙනවා. ළමා රෝග ඒකකයේ අය හැම වෙලාවකම ප්‍රසව ඒකක‍යත් එක්ක බොහොම ලඟින් කටයුතු කරනවා. මොකද උපදින්න ඉන්න දරුවාගේ ජීවිතයට සුලු හෝ තර්ජනයක් දකින අවස්ථාවක ඉතාම වේගයෙන් ක්‍රියාත්මක විය යුතු නිසා. ඒ දරුවා පමණක් නෙවෙයි, අවසානයේ මවගේ ජීවිතයටත් ඔවුන් වග කිව යුතු නිසා.
මම මගේ සේවා කාලය තුළ දුටු ප්‍රසව හා නාරිවේද විශේෂඥ වෛද්‍යවරුන් හැමෝම බොහොම වගකීමෙන් කටයුතු කළ අය. ශල්‍ය වෛද්‍ය අංශයේ over the phone රෝගීන් manage කරන්න බෑ. ජ්‍යෙෂ්ඨ වෛද්‍යවරයෙකුගේ උපකාරයක් අවශ්‍ය නම්, කො‍යි ලෝකෙක හිටියත් දුවන් එන්න වෙනවා. වෛද්‍ය විද්‍යාව පිළිබඳ හුඟක් නීති අණ පණත් වල මෙම හදිස්සි අවස්ථා වලදී අනෙකුත් සියලු රෝගී සත්කාර අභිබවනය කරමින් වෛද්‍යවරුන්ට සහභාගි වීමට බලය ලබා දී ඇත්තේ ඒ නිසා (ඔව්, පුද්ගලික වෛද්‍ය සේවා සම්බන්ධ චක්‍රලේඛයද ඇතුලුව). වෛද්‍යවරයාට හැකියාවක් තිබෙනවා නම් ඒ පිළිබඳ අනෙකුත් අංශ දැනුවත් කරනවා. ඒකටත් වෙලාව නැති වෙන්න පුලුවන්.
පහත රූපයේ සිදුවීමට අදාළව එම වෛද්‍යවරයා සියලු දේ හරියට කරලා තිබෙනවා වගේම, බොහොම ඉවසීමෙන් අදාළ අවස්ථාව (aggitate patient/patient party) කළමණාකරණය කරන බව පෙනෙනවා. ඉදිරියේදී වෛද්‍යවරු වෙනන් ඉන්න වෛද්‍ය සිසුවන්ටත් ඔහු ඉතා වැදගත් පූර්වාදර්ශයක් ලබා දෙනවා.
දැනටමත් overload වී ඇති සෞඛ්‍ය පද්ධතියක මෙවැනි දේවල් වලදි ප්‍රමුඛතාවය අනුව අනිවාර්යයෙන්ම කටයුතු කරන්න සිද්ධ වෙනවා. ඔබ කොච්චර මුදල් ගෙව්වත්, හදිස්සි රෝගියාට ලැබිය යුතු ප්‍රමුඛතාවය නම් වෙනස් වෙන්නේ නෑ.
කාලීන සෞඛ්‍ය ප්‍රවණතා පිළිබඳ නවතම තොරතුරු දැන ගැනීමට Dr Chandima 👨🏻⚕️ පිටුව follow කරන්න.
වෛද්‍ය චන්දිම ජයසිංහ [11-07-2026]
