27/08/2026
2026 අගෝස්තු 13 වැනිදා තරුව පුවත්පතේ පළවූ මගෙ ලිපිය
-------------------
විවාහයේ සතුට සොරාගන්නා
සංසාරගත ග්රහ දෝෂ හඳුනාගමු
❤️ විවාහය යනු හුදෙක් පුද්ගලයන් දෙදෙනෙකුගේ මානසික හා ශාරීරික එක්වීම පමණක් නොව, ජීවිතයේ සමස්ත ගමන්මගම අලුත් මගකට යොමු කරන තීරණාත්මක සංධිස්ථානයකි. එබැවින් පෙරදිග සංස්කෘතිය තුළ විවාහය පුද්ගලයෙකුගේ දෙවන උපත ලෙස හඳුන්වනු ලබයි. යමෙකුගේ පළමු උපත හෙවත් මෙලොවට බිහිවීම තීරණය කිරීමේ හැකියාවක් හෝ බලයක් අප සතුව නැත. එය පූර්ව කර්මානුරූපව සිදුවන්නකි. නමුත් දෙවන උපත වන විවාහය පිළිබඳව බුද්ධිමත්ව විමසා බලා, නිවැරදි තීරණ ගනිමින් සාර්ථක හා සාමකාමී අනාගතයක් ගොඩනගා ගැනීමේ නිදහස සහ හැකියාව බුද්ධිමත් මනුෂ්යයා සතුව පවතී.
❤️ විවාහ දිවිය සාර්ථක කරගැනීම සඳහා අතීතයේ සිටම අපේ පාරම්පරික සමාජය තුළ භාවිත කළ හොඳම සහ ප්රායෝගිකම මාර්ගෝපදේශනය වන්නේ ජ්යොතිෂ විද්යාවට අනුව යුවළගේ ගැලපීම පරීක්ෂා කිරීමයි. විවාහ පරීක්ෂාවකින් සිදුවන්නේ යුවළක් අතර පවතින ශාරීරික, මානසික මෙන්ම චරිත ලක්ෂණවල ගැලපීම සියුම් ලෙස හඳුනාගැනීමයි. විශේෂයෙන්ම ලිංගික සුවය, පවුලේ පැවැත්ම සහ අනාගත දූදරුවන් කෙරෙහි බලපාන ග්රහ පිහිටීම් පූර්වයෙන් හඳුනාගැනීමෙන්, පසුවට ඇතිවිය හැකි නොගැලපීම්, මතභේද සහ හිත් රිදවීම් රාශියක් වළක්වා ගැනීමට පූර්ව දැනුවත්භාවයක් ලබාගත හැක. දෙදෙනාගේ ජන්ම පත්ර සැසඳීම තුළින් ඉදිරි අනාගතයේදී මතුවිය හැකි ශක්තීන් මෙන්ම දුර්වලතාවයන්ද කලින් හඳුනාගැනීමට මහඟු අවස්ථාවක් සැලසේ.
❤️ එසේ හඳුනාගන්නා නොගැලපීම් සහ අභියෝග තමන්ගේ පෞද්ගලික ජීවිතය තුළ මතු නොවීමට වග බලා ගැනීම පුද්ගලයාගේ බුද්ධියට, ඉවසීමට සහ ආත්ම ශක්තියට භාර කටයුත්තකි. ජ්යොතිෂය යනු වෙනස් කළ නොහැකි දේව නියමයක් හෝ අනිවාර්ය තීන්දුවක් නොවේ. එය හුදෙක් මගපෙන්වීමක් සහ අනතුරු ඇඟවීමකි. මාර්ගයේ ඇති වලගොඩැලි සහ බාධා ගැන පූර්ව දැනුවත්භාවයක් ලැබූ පසු, රථය පරිස්සමෙන් පදවාගෙන යාම රියදුරා සතු වගකීමක් වන්නා සේම, විවාහ දිවියේ අභියෝග ජයගැනීමද දෙදෙනාගේ අන්යෝන්ය අවබෝධය, කැපවීම සහ ඉවසීම මත තීරණය වන කරුණකි.
❤️ ජ්යොතිෂ දැනුමෙන් බුද්ධිමත් වන යුවළක් විවාහ ජීවිතයේදී මුහුණදීමට සිදුවන කටුක අවස්ථා උපායශීලීව ජය ගනිති. අනවශ්ය ගැටුම් සහ අසමගිය ඇතිවිය හැකි අසුබ කාල වකවානු කලින් හඳුනාගෙන, එම කාලයන්හිදී වඩාත් ඉවසීමෙන්, කැපවීමෙන් සහ අන්යෝන්ය අවබෝධයෙන් කටයුතු කිරීමට ඔවුන් පෙළඹේ. එමගින් කේන්ද්රයේ පවතින දෝෂයන්හි අයහපත් බලපෑම පවා මගහැර සාර්ථක විවාහ ජීවිතයක් ගත කිරීමට මගපෑදේ.
❤️ ජ්යොතිෂානුකූලව විවාහ පරීක්ෂාවේදී ස්ත්රී පුරුෂ දෙදෙනාගේ පොරොන්දම් ගැලපීම ඉතා වැදගත් තැනක් ගන්නා බව නොරහසකි. පොරොන්දම් පරීක්ෂාවේදී වැඩි ප්රමාණයකින් සොයා බලනු ලබන්නේ විවාහ අපේක්ෂිත යුවළගේ මානසික තත්ත්වය, ආකල්ප, ලේ ගැලපීම්, ලිංගික ගැලපීම සහ චරිත ලක්ෂණ එකිනෙකට ගැලපෙන්නේ කෙසේදැයි විමසා බැලීමටයි. එකිනෙකා තේරුම් ගැනීමේ හැකියාව සහ මානසික බැඳීම මැන බැලීමට මෙමගින් හොඳ මගපෙන්වීමක් ලැබේ.
❤️ නමුත් සාර්ථක සහ සුරක්ෂිත විවාහයක් සඳහා පොරොන්දම් ගැලපීම පමණක් කිසිසේත්ම ප්රමාණවත් නොවන බව අප මතක තබාගත යුතුය. ජන්ම කේන්ද්රවල ග්රහයන් පිහිටා සිටින ආකාරය අනුව විවාහ අපේක්ෂිත දෙදෙනාට යෙදී ඇති විවාහ දෝෂ පිළිබඳව ගැඹුරින් පරීක්ෂා කිරීම අත්යවශ්ය කරුණකි. යම් හෙයකින් කේන්ද්රවල ඇති බරපතල විවාහ දෝෂ භංග වන්නේ නැත්නම්, පොරොන්දම් විස්සම සුබ ලෙස ගැලපුණද විවාහ දිවිය සැපවත් හෝ සාමකාමී එකක් නොවන බව ජ්යොතිෂයේ ස්ථාවර මතයයි. විවාහ දිවිය නීරස කිරීමටත්, අසමගිය සහ අසාර්ථකත්වය ඇති කිරීමටත් හේතුවන විවිධ ග්රහ යෝග රාශියක් පැරණි ජ්යොතිෂයේ ඉගැන්වේ. මෙවැනි දෝෂ සහිත ග්රහ පිහිටීම් පිළිබඳ පූර්ව අවබෝධයක් ලබා ගැනීම තුළින් විවාහයෙන් පසු මතුවිය හැකි බරපතල ගැටලු රැසක් වළක්වා ගැනීමට අවස්ථාව සැලසේ. එබැවින් කේන්ද්ර සැසඳීමේදී හුදෙක් පොරොන්දම්වලට පමණක් සීමා නොවී ග්රහ පිහිටීමට මුල් තැන දීම අත්යවශ්ය වේ.
❤️ එලෙස විවාහ දිවිය නීරස කරන සහ බිඳදමන යෝග අතුරින් ප්රධාන වශයෙන් සලකා බැලිය යුතු විවාහ දෝෂ කිහිපයක් වේ. ඒ අතරින් භෞම දෝෂය හෙවත් අඟහරු දෝෂය, ශනි මංගල දෝෂය සහ විෂ කන්යා දෝෂය යනු පවුල් සංස්ථාවන්ට දැඩි ලෙස බලපෑම් එල්ල කරන ප්රධාන විවාහ දෝෂයන්ය.
❤️ ජ්යොතිෂයේදී භෞම යනු මංගල හෙවත් අඟහරු (කුජ) ග්රහයාට භාවිත කරන තවත් නමකි. කුජ යනු ආවේගශීලී බව, කෝපය, ලිංගික ශක්තිය, ප්රචණ්ඩත්වය සහ තරඟකාරී බව නිරූපණය කරන අධික තේජස් සහිත ග්රහයෙකි. ලග්නය, චන්ද්ර කේන්දරය හා සිකුරු සිටින රාශිය මුල් කරගෙන ගණනය කිරීමේදී පළමුවන, දෙවන, හතරවන, හත්වන, අටවන සහ දොළොස්වන යන ස්ථානයන්ගෙන් එකක කුජ තැන්පත් වී තිබීමෙන් භෞම දෝෂය හටගනී.
❤️ මෙහිදී එකී භාවයන්හි කුජ හැසිරෙන ආකාරය විවිධය. ලග්න භාවයේ කුජ සිටී නම් සහකරුට හෝ සහකාරියට යටත් නොවීමේ දැඩි ප්රවණතාවයක් සහ තදකාරී බවක් ඇති වේ. දෙවන භාවයේ කුජ සිටී නම් සැර පරුෂ වචන භාවිතය නිසා පවුල තුළ නිතර අසමගිය සහ හදිසි ආර්ථික පරිහානියක් සිදු වේ. හතර වන භාවයේ කුජ සිටී නම් ගෘහස්ථ සතුට බිඳවැටීම, ගෙදරදොර නිතර රණ්ඩු සරුවල් ඇතිවීම සිදු වේ. හත් වන භාවයේ කුජ සිටී නම් විවාහ සබඳතාවල දැඩි මතභේද, ලිංගික නොගැලපීම්, වෙන්වීම් හෝ දික්කසාද ඇති වේ. අට වන භාවයේ කුජ සිටී නම් සහකරුගේ ආයුෂයට හෝ සෞඛ්යයට බලපෑම් ඇතිවෙමින් විවාහයෙන් පසු අනපේක්ෂිත කරදර උදාවේ. දොළොස් වන භාවයේ කුජ සිටී නම් යහන් සුවය අඩුවීම, අනවශ්ය වියදම් සහ මානසික නොසන්සුන්තාවය ඇති වේ.
❤️ භෞම දෝෂය භංග නොවී විවාහයක් සිදු වූ විට ඉතා සුළු කරුණකට පවා විශාල ලෙස කෝපයට පත්වීම නිසා පවුල් සංස්ථාව තුළ සාමය නැති වී යයි. විවාහ යෝජනා සාර්ථක කරගැනීමට බාධා මතුවීම, යෝජිත විවාහ අවසාන මොහොතේ කැඩී යාම හෝ විවාහයෙන් පසු වෙන්වීමට සිදුවීමද මෙහි ප්රතිඵලයි. දෙදෙනා අතර රුචිකත්වයන් වෙනස් වීම නිසා හටගන්නා හිත් රිදවීම් මෙන්ම අනික් පාර්ශ්වයට ලෙඩ රෝග, හදිසි අනතුරු හෝ කායික පීඩා ඇති වීමේ ඉඩකඩද වැඩිය.
❤️ නමුත් කේන්දරයක කුජ 1, 2, 4, 7, 8, 12 හි සිටි පමණින්ම එය භෞම දෝෂය ලෙස ගෙන බිය විය යුතු නැත. ජ්යොතිෂ නීතිවලට අනුව ස්ත්රී, පුරුෂ දෙදෙනාගේම කේන්දරවල කුජ දෝෂය සමාන බලයකින් පිහිටා ඇත්නම්, එම දෝෂ දෙක එකිනෙක කැපී ගොස් අහෝසි වේ. එසේම කුජ සිටින ස්ථානයට සුබ ග්රහයෙකු වන ගුරුගේ දැක්ම ලැබීම හෝ සිකුරු සමඟ එකට සිටීම තුළින්ද, කුජ ග්රහයා තමාට හිමි මේෂ, වෘශ්චික රාශියක ස්වක්ෂේත්රව හෝ මකර රාශියේ උච්චව සිටීමෙන්ද, මිතුරු රාශියක සිටීමෙන්ද දෝෂය භංග වේ. විශේෂයෙන්ම සිංහ සහ කටක ලග්න හිමියන්ට කුජ යෝගකාරක ග්රහයා වන බැවින් ඔවුන්ට මෙම දෝෂ බලපෑම අතිශයින්ම අඩුය.
❤️ අනෙක් අතට, ජ්යොතිෂයේදී ශනි යනු සෙනසුරු ග්රහයා වන අතර, මංගල යනු කුජ ග්රහයාය. සෙනසුරු සහ අඟහරු යන බලවත්ම පාපී ග්රහයන් දෙදෙනාගේ සංයෝගයෙන් හෝ දෘෂ්ටියෙන් නිර්මාණය වන දෝෂය ශනි මංගල දෝෂය හෙවත් කුජ-ශනි යෝගය ලෙස හැඳින්වේ.
❤️ ජ්යොතිෂයට අනුව සෙනසුරු යනු මන්දගාමී, උදාසීන, දුකට අධිපති බව නිරූපණය කරන ග්රහයෙකි. කුජ යනු ඉක්මන්, ආවේගශීලී සහ ප්රචණ්ඩ බව නිරූපණය කරන ග්රහයෙකි. එකිනෙකට සම්පූර්ණයෙන්ම ප්රතිපක්ෂ ස්වභාවයන් ඇති මෙම ග්රහයන් දෙදෙනාගේ එකතුව ජන්මියාගේ මනස තුළත්, ජීවිතය තුළත් දැඩි ඝට්ටනයන් සහ නොසන්සුන්තාවයන් නිර්මාණය කරයි.
❤️ කේන්දරයේ යම් ස්ථානයක සෙනසුරු සහ කුජ යෝග වීමෙන් හෝ එකිනෙකාට දෘෂ්ටි හෙලීමෙන් ශනි මංගල දෝෂය නිර්මාණය වේ. සෙනසුරු සිටින ස්ථානයේ සිට 7 වන ස්ථානයේ කුජ සිටීමෙන්, එනම් අංශක 180කින් එකිනෙකා දැකීමෙන් හෝ සෙනසුරුගේ 3, 7, 10 දෘෂ්ටීන් කුජටත්, කුජගේ 4, 7, 8 දෘෂ්ටීන් සෙනසුරුටත් වැටීම තුළින් මෙම දෝෂය හටගනී. එමෙන්ම සෙනසුරුට හිමි රාශියක කුජ සිටීම සහ කුජට හිමි රාශියක සෙනසුරු සිටීම එනම් පරිවර්තනයෙන්ද මෙම දෝෂය ඇති වේ. විශේෂයෙන්ම ශනි මංගල යෝගය ලග්නයට, හත්වැන්නට සහ අටවැන්නට ඉතාම අසුභ බව පුරාණ ආචාර්ය මතයයි.
❤️ ශනි මංගල දෝෂය පිහිටි ජන්මියාට සෙනසුරුගේ තදබල බවත්, කුජගේ ආවේගයත් නිසා සිත තුළ නිතර අසහනය, කලකිරීම සහ පාලනය කරගත නොහැකි කෝපයක් ඇතිවේ. කුජ ලේ සහ ශල්යකර්ම නිරූපණය කරන අතර සෙනසුරු අස්ථි සහ දීර්ඝකාලීන රෝග නිරූපණය කරයි. එම නිසා ලේ තුවාල, හදිසි අනතුරු, ශල්යකර්ම, නහර සහ අස්ථි සම්බන්ධ රෝගයන්ට ගොදුරු වීමේ ප්රවණතාව වැඩිය. විශේෂයෙන්ම විවාහ ජීවිතය තුළ නිතර නිතර රණ්ඩු සරුවල්, මතභේද, අන්යෝන්ය සැකය සහ හිතුවක්කාරී තීරණ නිසා යුග දිවිය අසන්තෝෂදායක වීම හෝ වෙන්වීමට සිදු වේ. හතේ හෝ අටේ මෙම දෝෂය පිහිටියහොත් දෙදෙනා අතර ලිංගික නොගැලපීම්, උදාසීන බව හෝ අධික තෘෂ්ණාව නිසා ගැටලු මතුවේ.
❤️ කේන්දරයක ශනි මංගල යෝගය යෙදී තිබුණ පමණින්ද බිය විය යුතු නැත. කුජ-ශනි යෝග වී සිටින ස්ථානයට හෝ එම ග්රහයන්ට ගුරු ග්රහයාගේ සුබ දැක්ම ලැබීමෙන් දෝෂය සම්පූර්ණයෙන්ම පාහේ සමනය වේ. සෙනසුරු හෝ කුජ තමාට හිමි රාශියක ස්වක්ෂේත්රව හෝ උච්ච රාශියක සිටීමෙන්ද, ස්ත්රී පුරුෂ දෙදෙනාගේම කේන්දරවල ශනි මංගල දෝෂය සමාන බලයකින් පිහිටා තිබීමෙන්ද එය කැපී යයි. තුලා හෝ වෘෂභ ලග්න හිමියන්ට සෙනසුරු යෝගකාරක වන අතර, කර්කටක හෝ සිංහ ලග්න හිමියන්ට කුජ යෝගකාරක වේ. එවැනි ලග්න හිමියන්ට මෙම දෝෂයේ ප්රභලත්වය ඉතා අඩුය.
❤️ මීට අමතරව අතීත පරාශර ඇතුළු පැරණි ජ්යොතිෂ ඍෂිවරුන් විසින් විවාහ පරීක්ෂාවේදී විශේෂයෙන්ම අවධානය යොමු කළ යුතු තදබල විවාහ දෝෂයක් ලෙස විෂ කන්යා දෝෂය හඳුන්වා දී ඇත. පුරාණයේ සතුරන් නැසීම පිහිටි විෂ ශරීරගත කළ කාන්තාවන් විෂ කන්යාවන් ලෙස හැඳින්වූ අතර, ජ්යොතිෂයේදී එම නාමය යොදාගන්නේ විවාහ ජීවිතයේ සතුට, සමගිය සහ පැවැත්ම විෂ කර දමන, සහකරුට හෝ පවුල් ජීවිතයට අයහපත් බලපෑම් එල්ල කරන විශේෂ ග්රහ නැකත් සංයෝගයක් හැඳින්වීමටය. මෙම දෝෂය ප්රධාන වශයෙන් නිර්මාණය වන්නේ උපන් දිනයට හිමි තිථිය, උපන් දිනයට හිමි දවස සහ උපන් නැකත යන ත්රිත්වය එකිනෙක විශේෂිත ලෙස සංයෝග වීමෙනි.
❤️ ඉරිදා දිනක දොළොස්වන තිථිය ලබා කැති, අස්ලිස හෝ සියාවස නැකතින් උපන් ස්ත්රීන් ද, අඟහරුවාදා දිනක දෙවන තිථිය ලබා සියාවස නැකතින් උපන් ස්ත්රීන් ද, අඟහරුවාදා හත්වන තිථිය ලබා විසා හෝ සියාවස යන නැකතින් උපත ලද ස්ත්රීන් ද, සෙනසුරාදා දිනක දෙවන තිථිය ලබා අස්ලිස නැකතින් උපත ලද ස්ත්රීන් ද, සෙනසුරාදා හත්වන තිථිය ලබා කැති නැකතින් උපත ලද ස්ත්රීන් ද විෂ කන්යාවියෝ ලෙස හඳුන්වයි.
❤️ විෂ කන්යා දෝෂය ඇති විට නොසිතන මොහොතක අඹුසැමියන් අතර දැඩි මතභේද, අසමගිය සහ මානසික දුරස්ථභාවයක් නිර්මාණය වේ. විවාහයෙන් පසු සහකරුට හදිසි ලෙඩ රෝග, අනතුරු හෝ ආයුෂ පීඩා ඇතිවීමේ ප්රවණතාවයක් පවතී. මෙම දෝෂය සහිත තැනැත්තියට හෝ තැනැත්තාට නිතර නිතර හඳුනාගත නොහැකි ශාරීරික අසනීප, ගර්භාෂගත ආබාධ හෝ දැඩි මානසික ආබාධ තත්ත්වයන් ඇතිවිය හැක. විවාහ යෝජනා අවසන් මොහොතේ කැඩී යාම හෝ සුදුසු සහකරුවෙකු සොයාගැනීමට නොහැකි වීමද සිදුවේ.
❤️ ඉහත ආකාරයට විෂ කන්යා යෝගය යෙදී තිබුණත් නමය අධිපති එම රාශියේම සිට ලග්නය හෝ චන්ද්ර ලග්නයේ ගුරු, සිකුරු හෝ පුර සඳු සිටී නම් විෂ කන්යා යෝගය නිවාරණය වන බව සඳහන් වේ. එනමුත් විෂ කන්යා යෝග සහිත උපත ලත් අය සඳහා ගැලපෙන පුරුෂ ජන්ම කේන්ද්රය කුමක්ද කියා පැරණි මූලාශ්රවල පැහැදිලිව සඳහන් කර නැත. එය හුදෙක් අසුභ යෝගයක් ලෙස පමණක් විස්තර කර තිබේ.
❤️ ජ්යොතිෂයට අනුව ජන්ම කේන්දරයක සටහන් වන භෞම දෝෂය, ශනි මංගල දෝෂය සහ විෂ කන්යා දෝෂය වැනි තදබල විවාහ දෝෂ යනු පූර්ව ආත්මයන්හි සිදුකරන ලද සංසාරික අකුසල කර්මයන්හි ඵලවිපාකය. පූර්ව ආත්මවලදී තම විවාහක සහකරුට හෝ සහකාරියට ශාරීරික හා මානසිකව පීඩා කිරීම, ගෘහස්ථ හිංසනයන්හි යෙදීම, අන් අයගේ පවුල් සබඳතා සහ විවාහ යෝජනා හිතාමතා කඩාකප්පල් කිරීම මෙන්ම ලිංගික චරිත දූෂණයන්හි යෙදීම භෞම දෝෂය පිහිටීමට ප්රධාන ලෙස බලපායි.
❤️ දුක, කර්මය, පාලනය නියෝජනය කරන සෙනසුරු සහ ආවේගය, හිංසාව නියෝජනය කරන කුජ එක්වීමෙන් සෑදෙන ශනි මංගල දෝෂය ඉතා බරපතල කර්ම අභියෝගයකි. පූර්ව ජන්මයන්හි තමන් යටතේ සේවය කළ අසරණ සේවකයන්ට, දුප්පතුන්ට සහ ආබාධිතයන්ට බලය යොදවා අනුකම්පා විරහිතව වදහිංසා පැමිණවීම, බලතල අවභාවිත කරමින් අහිංසකයන්ගේ ජීවිත විනාශ කිරීම සහ පවුලේ වගකීම් හිතාමතා පැහැර හරින්නන් ලෙස අඹුදරුවන් අසරණ කර දමා යාම මෙයට හේතු වේ.
❤️ එසේම, සබඳතාවල සතුට හා පැවැත්ම විෂ කර දමන විෂ කන්යා දෝෂයට බලපාන්නේ අතිශය කපටි සහ ද්රෝහී අකුසල කර්මයන්ය. පෙර ආත්මවලදී තම සහකරුට රහසින් වසවිස දීම හෝ ශාරීරිකව විෂ ශරීරගත කර හානි කිරීම, අන් අයගේ පවුල් සංස්ථා තුළ නාගසර්පයන් මෙන් කේළාම් කියමින් බිඳීම් ඇතිකිරීම සහ අසරණ ස්ත්රීන් හා පුරුෂයන් රැවටීමට ලක්කර ඔවුන්ගේ අනාගතය අන්ධකාර කිරීම මෙයට ප්රධාන හේතු ලෙස දැක්වේ.
❤️ කෙසේ වෙතත්, ජ්යොතිෂය මගින් පෙන්වා දෙන්නේ කර්මය යනු වෙනස් කළ නොහැකි දේව නියමයක් නොවන බවයි. කර්මය අභිභවා කුසලයෙන් ඉදිරියට යා හැකි බව බෞද්ධ දර්ශනය තුළත් පැහැදිලිව විග්රහ කර ඇත. කේන්දරයක යෙදී ඇති භෞම, ශනි මංගල හෝ විෂ කන්යා වැනි විවාහ දෝෂයන්හි අයහපත් බලපෑම් අවම කරගැනීම සඳහා ජ්යොතිෂයේ සහ අභිචාරික පද්ධතියේ ප්රධාන ශාන්තිකර්ම, බෝධි පූජා සහ දේව වත්පිළිවෙත් කිහිපයක් පෙන්වා දී තිබේ.
❤️ කුජ දෝෂ සඳහා අඟහරුවාදා දිනක කුජ හෝරාවෙන්, එනම් උදෑසන 6.00 සිට 7.00 අතර හෝ සවස 1.00 සිට 2.00 අතර කාලයේදී, බෝධීන් වහන්සේ වටා තැඹිලි තෙල් හෝ එළඟි තෙල් පහන් 7ක් දල්වා, රතු පැහැති මල් සහ පඬුරු පූජා කර බෝධි පූජා පැවැත්වීම ඉතා සුබයි. කුජ ග්රහයාගේ අධිපති දෙවියා වන්නේ රුහුණු කතරගම දෙවිඳුන්ය. එබැවින් අඟහරුවාදා දිනවල කැවිලි, අග්ගලා, රතු රටඉඳි, රතු මල් සහ පළතුරු පූජා තබා කතරගම දෙවියන්ට පින් දී විවාහ බාධා දුරුකර දෙන ලෙස යතිකා කිරීම ප්රතිඵලදායක වේ.
❤️ ශනි මංගල දෝෂ සඳහා සෙනසුරාදා දිනක ශනි හෝරාවෙන් බෝධීන් වහන්සේ උදෙසා තල තෙල් පහන් 7ක්, නිල් කටරොළු මල්, ඊතණ සහ නිල් පඬුරු පූජා කර බෝධි පූජා තැබිය යුතුය. පූජාව අවසානයේ රතන පිරිත, මෝර පිරිත, අභිසම්භිධාන පිරිත සහ ධජග්ග පිරිත සජ්ඣායනා කරමින් චිත්ත ඒකාග්රතාවය ගොඩනගා ගැනීම මැනවි. සෙනසුරුගේ දෝෂ සමනය පිණිස විෂ්ණු දෙවියන් උදෙසා කැකුළු සහලින් පිසූ කිරිපිඬු, නිල් මල් සහ තල තෙල් පහන් පූජා කර විෂ්ණු ස්තෝත්ර ගායනා කිරීමද මැනවි. එසේම විෂ කන්යා දෝෂය සඳහා, පවුල් ජීවිතයේ සමගිය සහ කාන්තාවන්ගේ ගර්භාෂගත රෝග මෙන්ම විවාහක අභියෝග දුරුකර ගැනීමට පත්තනි මෑණියන් උදෙසා කිරිඅම්මාවරුන්ගේ දානයක් දීම හෝ පත්තනි දේවාලයක කිරිපිඬු පූජාවක් පැවැත්වීම උචිත වේ.
❤️ මෙම දෝෂ සමනය පිණිස නිසි ලෙස ජීවම් කරන ලද නවරත්න යන්ත්රය පැළඳීම හෝ නවරත්න මුද්දක් පැළඳීමද ජ්යොතිෂයේ උපදෙස් දෙයි. තදබල කුජ සහ ශනි දෝෂ පවතින විට, එම දෝෂ සමනය වන පරිදි නියමිත ආතුරයාගේ නමට ජීවම් කරන ලද මහානුභාව අභිසම්භිධාන යන්ත්රය පැළඳීම අතිශය සුබයි.
❤️ පාරම්පරික අභිචාර ශාන්තිකර්මයන්හිදී, විවාහයට ඇති බාධා සහ දෝෂ දුරුකිරීම පිණිස යක්ෂ හා දේව දෝෂ සමනය කරන දෙවොල් මඩු ශාන්තිකර්මයක් සිදුකිරීමද අතීතයේ සිට පැවත එන තවත් ප්රබල පිළියමකි.
❤️ මීට අමතරව ප්රායෝගික අතිශය බලවත් පිළියම් කිහිපයක්ද ඇත. භෞම දෝෂය සහ ශනි-මංගල දෝෂවල ප්රචණ්ඩ බව සමනය කිරීමට ඇති හොඳම ප්රායෝගික පුණ්යකර්මය වන්නේ ලේ දන්දීමේ පින්කමකට සක්රීයව සහභාගී වීමයි.
❤️ වැඩිහිටි නිවාස, ආබාධිත තැන් සහ සේවකයන් උදෙසා ආහාර, ඇඳුම් පැළඳුම් හෝ ඖෂධ දානය කිරීම, මස් පිණිස කැපකළ සතුන් මරණයෙන් නිදහස් කිරීම සහ පක්ෂීන්ට හා මසුන්ට ආහාර ලබාදීම වැනි ප්රායෝගික පින්කම්ද මෙයට ඇතුළත් වේ.
❤️ මෙම සියලු වත්පිළිවෙත්වල ප්රධානතම අරමුණ වන්නේ මානසික සංසුන්බව සහ ආත්ම ශක්තිය ඇති කර ගනිමින් පූර්ව අකුසල් ක්ෂය කිරීමයි.
❤️ එයින් ලැබෙන මානසික පැහැදිලිකම තුළින් විවාහයේදී මතුවන කටුක අවස්ථා උපායශීලීව ජයගැනීමට පුද්ගලයාට ශක්තිය ලැබෙනු ඇත. මෙම පූර්ව අකුසලයන් අවබෝධ කරගෙන මේ ආත්මයේදී ආත්ම දමනය, ලෝ සතුන් කෙරෙහි මෛත්රිය පැතිරවීම, ලේ දන්දීම සහ අසරණයන්ට පිහිට වීම වැනි මහා කුසල් සිදුකිරීමෙන් එම අකුසල ශක්තීන් සමනය කරගත හැකියාව ඇති වේ.
❤️ එමගින් තව තවත් අකුසල කර්ම රැස් කර නොගෙන, සංසාරගත විවාහ දෝෂයන්ගෙන් අත්මිදී සතුටින් පිරි සාර්ථක විවාහ ජීවිතයක් ගත කිරීමට සෑම ජන්මියෙකුටම මගපෑදෙනු ඇත.
ප්රවීණ ජ්යෝතීර්වේදීනි
වාස්තු විශේෂඥ
මනෝවිද්යා උපදේශිකා
නයෝමී පබසරා මැණිකේ
0772279138
