19/05/2026
صباح الخير
حيكون منشور خارج عن المألوف ومش من عادتي إثارة مثل هالنوع من المواضيع الجدلية في صفحتي ..
لكن الموضوع زاد عن حده وأصبح كارثي وخارج عن السيطرة ويحتاج وقفة جادة من الجهات ذات العلاقة ..
الجميع يتحرى الدقة في شراء ملابس أو أجهزة او أكل، يسأل مرة واثنين، ويقارن ويتأكد من جودة الشيء قبل ما يشريه ..
إلا في موضوع الصحة يستخسر في نفسه ويمشي لأقرب مكان داير عرض أو تخفيض أو سامحوني في الكلمة بعض الأحيان ( تسويق رخيص جدا ) بدون ما يتأكد من هوية الطبيب ومؤهلاته ..
والنتيجة مضاعفات كارثية نشوفوا فيها يوميًا في عياداتنا ..
الاجراءات (الجراحية) هي تخصص ( جراحة التجميل ) فقط، مهما كانت مهارة طبيب الجلدية او الأسنان أو أي تخصص عدا ( جراحة التجميل ) فهو مش حيقدر يتعامل مع المضاعفات والشي هذا نشوفوا شبه يوميًا ..
على سبيل المثال لا الحصر، حالات شفط الدهون وحقن الدهون هذي اجراءات تبدو في ظاهرها بسيطة، لكنها معقدة وتحتاج لدرجة عالية من التعقيم، وعلم بذاته مش حتمنحه ليك دورات الثلاث ايام مهما كانت شطارتك ..
أي إجراء فيه اختراق للجلد يسمى invasive procedure وهذي وظيفة ومجال الجراحين ..
يوصلوا مع المريض لمرحلة يعجز عن علاج المشكلة ويتذكر أخيرا إن في تخصص اسمه ( جراحة تجميل ) .. ومرات الأوان يكون فات للأسف ..
أنا نحترم حدود التخصصات جدا، ونتمنى جدا من الجميع احترام حدودهم وتخصصاتهم ومش كل شي ننظروله كمصدر كسب مادي وفرصة نحصل فلوس من المريض بأي شكل أو شوفوني أنا السوبر هيرو ونعرف نشتغل كل شيء ..
وأخيرا، لأي إنسان مطلق الحرية في إنه يتجه لحد يرتاحله او اقتنع بشغله وانبهر بالسوشيال ميديا متاعه، لكن يتحمل نتيجة اختياراته الخاطئة .
لكن شخصيا مش حنستقبل اي حالة صايرلها مضاعفات من الجلسات التجميلية اللاجراحية دايرها عند حد ( مش طبيب جلدية، ومش جراح تجميل ) .
ومش حنستقبل اي حالة جاية بمضاعفات نتيجة (إجراء جراحي) تم اجراءه عند اي تخصص آخر عدا ( جرّاح تجميل مؤهل ) .
ودمتم سالمين
