11/06/2026
ويعدين يلومو على البنت ليش تم استقطابها و استخدامها في تصفية و ليش تتجه ان تكون بلوقر و تعيش على الدعايات وتاكل وتوكل عائلتها و حتى زوجها 💔
ايه قولو الفجي على الناس ،سيدنا على بن ابي طالب رضى الله عنه ،قال لو كان الفقر رجل لقتلته 💔
انا منبررش ، لكن اللوم الاول والاخير علينا كلنا ، من يوم يومنا الليبين العم والخال و الجار و المدرسة والتلفزيون زمان وووالخ يربو ، ايه يربو في الصغار و يساعدو الاهل في تنشئتهم و مهما دراو وفلتو يجو يجو للطريق .
ومن امته الواحد يطيب قبل ميبعثش وميضوقش و السبيزة تنبعث و الفاكهه وهكذا .
توه الي تكلمي عيله تسمع حسه ، محد يبي من ينهي صغاره او يحكي علبهم شي و لا يصدقو الابلات ووووالخ ميبوش في صغارهم
والتلفزيون والنت بدو ضد الاهل و كانا ممنهج على التشجيع على الغلط
وهذا غير العائلات بدت نفسك نفسك ، المهم مرته راضيه عليه و صغاره معيشهم و سلامتكم ان شاء الله تنحرقو وتشحتو بالشارع ،لايشوف جاره ولا خوه ولا اخته ولا بوه ولا امه و لا حتى يساعدو زميلهم بالعمل وووالخ
متقولوش من الزحمه ، الله غالب البركة قلت و بدت البنت تجازف و معاش تخاف وادوووس ادوووس بالقوة على فطرتها و الخلقة الي نشئة عليها ، قبل البنت تكلمها ظالمة او مظلومه دموعها يتسرسبو و العبرة و حرقه في صدرها و فعلا تتوجع ، توه لا لا مفيش احساس مفيش عاطفه و بالعكس صوتها عالي و ترد و تكشخ ويبدا الي غالطه فيه بالطريق هوه الي ساكت .
الملخص ارجعو زي قبل وشدو في يدين بعض. و يا ليبيا ساعدي بناتك و عائلاتك و شبابك بش ميمشوش للطريق السهل والربح السريع ويبدا تافه ومعاش يفكر في صلاح بلاده وخدمتها بعلمه و شهادته واخلاقه .
