د.عبدالله البوسيفي

28/08/2026

رزقكم الله بكل الخير...
جمعتكم مبااااركه ...يااارب

10/08/2026

🍊 العصير الطبيعي... هل هو صحي فعلاً لولدك؟

من أكثر الأسئلة اللي نسمع فيها في العيادة:
"يا دكتور، أنا نعطي في ولدي عصير طبيعي كل يوم، أكيد هذا صحي؟"
الجواب:
لا مش ديما..

‼️ لما تعصري الفاكهة يصير الآتي:
🔸 تنقص كمية الألياف الموجودة في الفاكهة.
🔸 يشرب الصغار كمية كبيرة من السكريات الطبيعية في وقت قصير.
🔸 ما يحسش بالشبع زي لما ياكل الفاكهة كاملة.
📌 علي خاطر هكي توصي الأكاديمية الأمريكية لطب الأطفال (AAP) بـ:
❌ ممنوع إعطاء العصير للأطفال اللي عمرهم أقل من سنة.
🚨 وبعد عمر السنة:
✔️ يفضل ياكل الفاكهة كاملة بدل العصير.
✔️ ولو بتقدمي عصير، يكون 100% طبيعي وبكميات محدودة، مش كل يوم وبدون حساب.

⚠️ كثرة العصير ممكن تدير:
زيادة في الوزن.
تسوس الأسنان.
سدة نفس وضعف شهية للأكل.
إسهال عند بعض الصغار.

🍎 حطيها في بالك ديما:
ياكل برتقالة أفضل بهلبا من إنه يشرب عصير برتقال.
لأن الصغير ياخد الألياف، ويشبع أكثر، ويستفيد من الفاكهة بطريقة أحسن.


#طفل
#حرارة #مرض
#طفل #ولد #بنت 🤍
🩺👶

26/07/2026

مصحة الضياء للخدمات الطبية

اخصائي الاطفال
الدكتور عبد الله البوسيفي

برفقة الأستاذ محمد السعداوي

يتواجد اليوم الفترة الصباحية و المسائية


نسعى دائماً للأفضل 💪❤️

العنوان :- جنزور - الطريق الساحلي مقابل معهد نصر الدين القمي

‏‎‏Best regards
‏‎‏Family Of Aldiaa Clinic
0927131097
0917752040
‏‎‏[email protected]

21/07/2026

نصيحة هلبا مهمة للأم المرضعة 🤱
أنتِ كنتِ تاخذي في الحديد، وفيتامين (د)، والكالسيوم وقت الحمل.. علاش وقفتي الحاجات هادي بعد الولادة رغم إنها مهمة هلبا لِك وللصغير؟!
الأم المرضعة محتاجة هلبا لفيتامين (د) وللكالسيوم:
فيتامين (د): 800 وحدة دولية على الأقل يومياً.. يعني 8 قطرات يومياً من "فيدروب" (أو قطارتين في الأسبوع) وهذا أضعف الإيمان.
الكالسيوم: 800 ملجم يومياً.. يعني حبة واحدة "أوسيتوكير" أو "كالسترون" يومياً.
الحديد: يومياً على الأقل كجرعة وقائية لمدة 3 شهور كل سنة.

ملاحظة: الشيء هذا مهم هلبا لصحتك ولصحة البيبي متاعك..

نتمنى الصحة والعافية والشفاء التام لكل أم مرضعة وصغيرها ❤️
شكراً هلبا لكم!


#طفل
#حرارة #مرض
#طفل #ولد #بنت
#فيتامين

18/07/2026

يا ودي في هالنو هذا، ديروا بالكم على الصغار الله يحفظهم:

دوشولهم بمية فاتره(دافية شوية) مرة واثنين وثلاثة.. وعشرة في هجّالة الصيف هذي.

لبسوهم قطعتين قطن بس (فانيلية وشورت) أو قطعة وحدة وخلاص.

شربوهم مية كويس: لازم ياخذوا كمية مية كافية، يعني حولي 120 ملل لكل كيلو من وزن الصغير، هذا طبعاً لو كان بادي ياكل مع الرضاعة.

اخطيكم من الشمس: فكّونا من الشمس والدوّار في القوايل والأماكن الحامية اللي تغم النفس.
ضربة الشمس والإجهاد الحراري يرموا في الصغار رمي، ردوا بالكم عليهم.


#طفل
#حرارة #مرض
#طفل #ولد #بنت ‎‎ #حرارة

14/07/2026

الوعي هو نص العلاج..
الوعي هذا حاجة مهمة بكُل؛ وعي الدكتور بطبيعة المشكلة والشكوى، ووعي المريض (أو اهله) بطبيعة المرض وطريقة علاجه وكيف يمشي فيه..
يعني مرات يكون الدكتور شاطر هلبا ومتمكن، لكن يغلط في التشخيص بسبب قلة وعي، أو قلة انتباه، أو لأنه مستعجل وهو يكشف..
ومرات ثانية يكونوا أهل الصغير خايفين عليه زيادة عن اللزوم، فيغلطوا في تقدير مشاكل بسيطة ويحسابوها كارثة، وتقعد الأم تجري بيه من دكتور لدكتور.. ومرات العكس؛ تمشي للصيدلية طول وتاخذ في دواء من راسها تحساب المشكلة بسيطة وهي في الأصل كارثة!

من الأمثلة على هذا:
عيل عمره 6 شهور مثلاً، بطنه منفوخة؛ الأم تحسابها غازات عادية، ورجّع مرة أو اثنين ترجيع بسيط لكن لونه مايل للخضورية شوية، وعنده إسهال بسيط مرتين أو ثلاثة زي الجيلي.. الأم هنا تحسابها نزلة معوية في بدايتها أو "تسنين"، وما تعرفش إن هذه هي الصورة الواضحة بكُل لانسداد الأمعاء اللي يقولوله (الانغماد المعوي - Intussusception)، وهذا يبي تدخل جراحي مستعجل وما يتحملش التأخير.
ومن الأمثلة اللي يحل فيها وعي الدكتور المشكلة طول:
عيل عمره سنتين، جا حرارته راكبة بكُل، وعطوه (حقن) مضاد حيوي قوي وخافض حرارة لكن الحرارة ما تبيش تنزل.. ولما جِي الدكتور كشف عليه بضمير، لقى عنده خراج (دملة) مكان ضرب الإبرة في العضلة الخلفية (الفخذ)، والموضوع هذا يبي مضاد حيوي بالـفم ومتابعة للخراج لأنه مرات يستحق فتح جراحي باش يتنظف.
ومن الأمثلة الثانية:
عيل عنده السكر من النوع الأول ويمشي بالإنسولين، لكن سكره ديما راكب فوق، وفجأة لما يدير مجهود أو يلعب يطيح سكره طول.. ولما كشفوا عليه، تبين إنه يطق في الإنسولين في نفس الأماكن اللي صاير فيها تليف في الجلد فما يمتصش الجسم، ولما يدير مجهود قوي، الدورة الدموية تنشط وتمتص الإنسولين المتراكم بسرعة.. وبمجرد ما غيروا مكان الحقن، الأمور تلوت وتعدلت تماماً.
وفي مثال ثاني:
عيل جا لواحد من الدكاترة الزملاء وهو يبكي ويعيط عياط متواصل وما يبيش يسكت؛ وقعدوا يشخصوا فيه؛ اللي يقول مغص، واللي يقول التهاب أذن وسطى، واللي يقول التهاب في مجرى البول.. وما فيش حاجة جابت نتيجة، والتفكير مشى لبعيد بكُل زي حساسية الحليب وغيره..
لكن لما نحّوا عليه حوايج كشفوا عليه بلقطة ذكية، لقوا عنده كسر في عظمة الترقوة (الكتف) بسبب طريقة شيلان غالطة أو جبدة مش تمام زي ما تشبحوا في الصورة هكي 👇.

الوعي راهو ضروري وأساسي؛ وعي الدكتور ووعي المريض..
وربي هو الشافي الموفق وحده سبحانه.


#طفل
#حرارة #مرض
#طفل #ولد #بنت 🤍
🩺👶

12/07/2026

شرقة الصغار (الاختناق).. دقايق ممكن تنقذ حياة طفلك 🚨
الصغار في العمر هذا يحبوا يكتشفوا كل حاجة بفمهم، وهذا اللي يخليهم عرضة للشرقة والاختناق في أي لحظة.

🔴 أكثر حاجات تسبب في الشرقة:
المكسرات والفيشار (البارلي).
العنب الكامل والحلوى اليابسة.
الفلووس الفضة (العملات المعدنية) والبطاريات الصغيرة.
الألعاب أو القطع الصغيرة اللي تتفصص.

⚠️ علامات الاختناق (لما يشرق الصغير):
صعوبة في التنفس أو يقطع النفس فجأة.
ما يقدرش يبكي ولا يتكلم.
شفايفه أو وجهه يبدوا يزرقّوا.

🚑 إذا كان الصغير يكح أو يبكي:
شجعيه يزيد يكح عشان تطلع الحاجة برووحها.
❌ ردي بالك تحطي صبعك في فمه بطريقة عشوائية؛ ممكن دفي الحاجه لداخل وتسكري مجرى النفس زيادة.

🚨 إذا كان الصغير ما يقدرش يتنفس ولا يطلع في صوت:
👶 أقل من سنة: اقلبيه على بطنه واعطيه 5 خبطات خفاف على ظهره (بين الكتاف) + وبعدين اقلبيه واعطيه 5 ضغطات على صدره.
🧒 أكبر من سنة: (ديريـله "ضغطات البطن" - تبتي يدك فوق السُرّة واضغطي لداخل ولفوق).

☎️ إذا أغمى عليه (فقد الوعي):
اتصلي بالإسعاف فوراً (أو اجري بيه لأقرب مصحة/مستشفى) وابدي في الإنعاش القلبي الرئوي لو كنتِ مدربة عليه ومدايرة دورة إسعافات.

✅ للوقاية:
ما تخليش الصغير ياكل أو يلعب بروحه من غير ما عينك عليه.
قطعي الماكلة لـ طروف صغيرة وباهية تناسب عمره (زي العنب والطماطم الكرزية).
دسي أي حاجات صغيرة وخليها بعيدة على اليد (خرز، فلووس، أزرار).

💙 التصرف السريع والصح وقت الشرقة ممكن ينقذ حياة طفلك في ثواني.


🤍
🩺👶

09/07/2026

⚠️ 5 مشاكل صحية ممكن يروح بيها طفلك من المصيف، وكيف تحميه منها؟!

👂 التهاب الودان: بسبب المية اللي تقعد داخل الودن.
👁️ التهاب العين: من الكلوور اللي في المسبح أو مية البحر الملوثة.
🤢 النزلات المعوية: ترجيع وإسهال لو صبّ صبّ مية مش نظيفة.
🦠 حساسية والتهابات الجلد: من الشمس القوية أو الفطريات.
🫁 تهيج حساسية الصدر: خصوصاً للصغار اللي يعانوا من فدة أو ربو بسبب الرطوبة أو الكلوور.

✅ كيف تحمي طفلك وتخلي رحلتكم ممتعة؟

الدوش مهم جداً: ضروري يتدوش بالماء النظيف والشامبو قبل وبعد ما ينزل للبحر أو المسبح.
التنشيف الباهي: جففّ وذانه وجسمه كويس بعد ما يطلع من المية.
رد بالك من بلع المية: فهم طفلك إنه ما يبلعش مية المسبح أو البحر وهو يعوم.
الحاجة الشخصية تقعد شخصية: ممنوع مشاركة الفوط (المناشف)، النظارات، أو الطواقي مع صغار ثانين.
رد بالك من الفدة: تظبيط بخاخات وبخار الطفل لو كان عنده حساسية صدر قبل السفر وخلال الرحلة.
ممنوع العوم لو مريض: لو طفلك عنده سخونة أو إسهال، ممنوع ينزل للمية نهائياً عشان صحته وصحة غيره.

🚨 ارفع طفلك للدكتور فوراً لو لاحظت عليه:

وجع قوي في الودن أو بدت تطلع منها إفرازات (مية أو قيح).
حمرار شديد في العين مع إفرازات مش طبيعية.
ترجيع وإسهال مستمر مع علامات جفاف (زي جفاف الفم أو خمول زgroup).
كحة قوية، تخشخيش (صفير) في الصدر، أو صعوبة في النفس.
حبوب أو طفح جلدي منتشر في جسمه، أو ركبت عليه السخونة.

💙 الوقاية ديماً خير من العلاج.. ديروا بالكم على صغاركم وصيفكم مبروك وممتع


#طفل
#حرارة #مرض
#طفل #ولد #بنت #الصيف #البحر

05/07/2026

جرعة صغيرة من فيتامين (أ).. لكن تحمي طفلك من مشاكل كبيرة!

هلبة من الأهالي يحسابوا إن جرعة فيتامين (أ) حاجة مش مهمة ويقدروا يفوتوها، لكن الحقيقة إنها من أهم الجرعات الوقائية للأعويل الصغار.

🧡 فيتامين (أ) يساعد على:
👁️ الحفاظ على صحة ونظر طفلك.
🛡️ تقوية جهاز المناعة ضد الأمراض.
🌱 دعم النمو الطبيعي للجسم.
🤒 يقلل من خطر الإصابة بمضاعفات بعض الأمراض والعدوى.

📅 علي خاطر هكي، احرصي إن طفلك ياخذ جرعة فيتامين (أ) في موعدها المحدد في التطعيمات والبرنامج الوقائي، حتى لو كان ما شاء الله ياكل كويس ويرضع.

❗لو فاتتكم الجرعة أو مش متأكدة طفلك خذاها ولا لأ، اسألي دكتور الأطفال أو أقرب مستوصف (وحدة صحية) ليكم.

💙 جرعة تاخذ دقائق… لكن فايدتها تقعد معاه سنين.


#طفل
#حرارة #مرض
#طفل #ولد #بنت

04/07/2026