11/09/2026
تعالوا بنحكيلكم حاجة .. الاسبوع هذا كنت في المصيف و مرضت بنتي نزلة معوية و مافيش كيف نجيبلها دواء .. تعرفت ع امراة في المصيف هدرزنا شويه وخدينا ارقام بعض و كل وحدة مشت للشاليه متاعها .. كلمتني قالتلي تعالي نسهروا ويلعبوا الصغار قلتلها بنتي مريضة ماتقدرش .. قالتلي عطيتيها دواء ؟ قلتلها مافيش حد يجيبلي الدواء .. مافيش نص ساعة ولقيت ولدها يطقطق ع الباب ومدلنا دواء .. في اللحظة هادي فكرت في حاجتين مهمات .. فكرت ان قداش في ناس طيبة و كويسة حتى لو قابلنا ناس مش كويسة وما ثمرش فيهم الخير .. وفكرت ان الخير الي نديروه كيف ربي يردهولنا بطريقة تانية وفي لحظة ضعف .. الناس الطيبة والاصيلة مازال موجودين في الدنيا .. والخير الي نديروه حتى لو مش في اهله حيجي يوم ويرجعلنا لان هذا وعد ربي لينا والإنسان الكويس ربي يسخرله ناس كويسه .. تفكرت كلام ماما لما نلقاها ادير خير في ناس مايستاهلوش وتقوللي " ربي ديما واقف معاي وعمره ما يسيبني " .. موقف بسيط لكن لمس قلبي .. شكرا للمراة الي جابت الدواء لبنتي .. اسأل الله عز وجل يوقف جنبك ديما ويحفظلك ولادك يا اصيله يا بنت الاصول .. مانعرفكش لكن درتي فيا خير عمري ما ننساه ❤️
