Cabinet medical Dr Adil Bahdoul

06/06/2025

27/06/2023

3-استهلك بلا ما تهلك.

ساليتوا غسلتوا الامعاء سيقتو ... متخليوش السقيطة معلقة فالشمس او مكان ساخن ؛ علقوها فمكان بارد باش تنشف مزيان و سيروا كولوا القطبان و شربوا الدكيكة و دوزوا الساعة المباركة مع وليداتكم و عائلتكم.
متنساوش راسكم راه الجو حار و السقيطة نشفات و متنساوش راه فيها شحوم و مع الحرارة غادي تذوب و تقدر تكون سبب فتسريع تعفن اللحوم فيما بعد. اذن ما عليكم غير تهزو الادوات و تبداو فالتقطيع ديال اللحوم فمكان نقي و يكون معاكم اواني نقية تحطوا فيها اللحوم المقطعة.
قطع اللحوم خاصكم تحطوها فوق اواني مسطحة و متكدسوهاش فأنية واحدة ؛ لان القطع مرتبة فوق اواني مسطحة كتخلي البرودة تضربها من جميع الجهات و كتبرد بسرعة: اللحوم لي غادي تستهلك فيوم او يومين ممكن تبقى فالمبرد اما اللحوم الاخرى خاصها تحط فالفريزر و كيف قلت لكم فاواني مسطحة حتى تجمد مزيان و من بعد ممكن تجمع فاكياس بلاستيكية مخصصة للتجميد و متديروش الغلط انكم تكدسوا اللحوم فاكياس و هي مزالت طرية. الاكياس متحطهومش بطريقة مكدسة فالفريزر لانه بهذه الطريقة الخاطئة كتنقصوا من وصول البرودة لقلب الاكياس و بالتالي الاكياس السطحية كتجمد و الداخلية كتعفن. متنساوش انه كل فريزر عندو قدرة محددة ماشي تعمروه و تبغيوه يجمد لكم اللحوم. احسن طريقة هي اللحوم تكون فاواني سطحية تسمح بمرور الهواء البارد حتى يتم التجميد عاد نديرهم فالاكياس.
مرة مرة طلوا على الاكياس و شوفوا واش مجمدين واش الفريزر خدام مزيان.
هد الطريقة كتسمح لكم انكم تاخذوا اللحوم الكافية لي غادي تستهلكوا و تختاروا القطع لي بغيتوا 🙂
الناس لي كتقطع عند الجزار ردوا بالكم راه كيكون الزحام و كتعطل اللحوم قبل التقطيع و الجزارين خاصهم ينتابهوا و يحاولوا ينظفوا الادوات دياولهم بعد كل سقيطة لتفادي انتقال التعفن من سقيطة لاخرى.
بطبيعة الحال اذا الحولي كيتوفر على الختم البلاستيكي خصكم تحتافظو به باش اذا قدر الله وقع مشكل ممكن تتجهوا لاقرب مصلحة بيطرية...
عيد مبارك سعيد