Cabinet De Pédiatrie Dr. Ferdaous ELMoukhlis

30/08/2023

Nous portons à votre connaissance que votre cabinet de pédiatrie sera fermé pour congé annuel , durant la période allant du 31/08/23 au 10/09/23.
Merci

19/12/2022

12/11/2022

⁉️ماذا تعرف عن التهاب اللوزتين؟؟ الحلاقم؟

❌️بزاف ديال الآباء أثناء الفحص كيبغيو يوريوني حلاقم ولادهم و هما كيقيصو لهم عنقهم .. كنقولهم في كل مرة لا اسيدي الحلاقم راهم داخل الفم.. هادوك راه ولسيسات..

☑️فشنو هما اللوزتين؟
هما نسيج لمفاوي كاين فالحلق كيلعب دور مهم في المناعة و مقاومة الجراثيم باعتبار الفم هو مدخل الجراثيم الرئيسي.
و لكن في بزاف د الاحيان عند بزاف د الأشخاص و الأطفال خصوصا.. هاد اللوزتين كيبقاو ديما يمرضو و يتعفنو .. بفيروسات (50%) او بكتيريا .

🦠البكتيريا الرئيسية هي streptocoque bêta hémolytique A كتمثل 40% من حالات التهاب اللوزتين

😷فاش كنطلو على اللوزتين يمكن نلقاوهم حمرين ملتهبين او مقيحين (هنا كنكونو متأكدين ان السبب بكتيريا) و الطفل كيكون عندو علامات هي: حمى مع صعوبة فالبلع ألم في العنق و تحت الأذن.. و واحد العلامة مهمة ردو معاها البال هي: حريق فكرشو.. و في بعض الأحيان قيء و اسهال.

✅️في جميع الحالات، اي التهاب لوزتين خصوصا اذا كان مصحوبا بتقيح او تقرحات خصو يعتبر بكتيري و يتداوا بالمضاد الحيوي..

❓️لماذا؟
لان اذا تركنا هاد الالتهاب بدون علاج دوائي.. غاديا تدخل المناعة ديالنا بشكل طبيعي لمقاومة بكتيريا streptocoque... و لكن هاد البكتيريا عندها بروتينات كتشبه لبروتينات متواجدة في بعض انسجة الإنسان كانسجة القلب (الصمامات.. بطانة القلب..) و غشاء المفاصل..
فبذلك ردة الفعل المناعية كتعطي التهاب و كتدمر هاد الأنسجة.
لهاد السبب كتسمعو بأن الحلاقم كيديرو روماتيزم المفاصل و القلب

⁉️فوقاش خص الطفل يحيدهم؟
اذا ماكانش روماتيزم. فثلاث حالات:
✔️اذا كانو كيجيوه ست مرات فالعام مع تأثير سلبي على حياة الطفل خصوصا التمدرس
✔️اذا كانو كيخنقوه فالنوم
✔️اذا كانو كبار و مصحوبين باللحميات (الجلود)

اذا كان روماتيزم.. الزامي يتحيدو مع بروتوكول علاجي يمكن يتبعو الطفل لمدة تتراوح ما بين سنة إلى حدود سن 20 سنة.

🤗هاد المنشور كتبتو نزولا عند طلب ام جات عندي البارح و الصورة هي صورة لوزتي طفلها. كنشكرها لأنها طلبت مني نشرها.

دمتم سالمين.
د.فردوس المخلص

12/11/2022

12/11/2022

⚠️ماذا تعرف عن التهاب القصيبات الهوائية الفيروسي الحاد؟؟؟
🚼هي مرض يصيب الرضع خصوصا فالجو البارد

❌️ينتج عن التهاب كيوصل إلى أعمق بلاصة فالقصبة الهوائية هي القصيبات التنفسية الصغيرة🫁.. فبالتالي كيسد هاد القصيبات..

🦠سببه فيروسات الانفلونزا لي كتصيب الكبار و الصغار

❌️هاد الفيروسات كتعطي للرضع حالة زكام : سيلان الانف 🤧و احتقانه، كحة ناشفة😮‍💨، حرارة تقدر تكون بسيطة ، مرتفعة🤒 او ماتكونش.. بعد ايام قليلة سرعان ما الكحة تزداد شدة مع ظهور صفير في الصدر و صعوبة في التنفس قد تصل إلى عدم القدرة على الرضاعة، زرقة الأطراف و الفم، نهجة.. فالحالات الصعيبة.

✋️عند الرضع أقل من سن 3 أشهر في كثير من الاحيان ، الحالة الصحية ديالهم تستدعي الاستشفاء.

🚫كيفاش نتفاداو التهاب القصيبات الحاد؟
✅️نتجنب نخرج بالرضيع ف الأماكن العمومية👥️️..خصوصا فالجو البارد و المساء..
✅️اذا كان ولدي الكبير مريض بالزكام ما نخليهش يقرب لأخوه الرضيع و خصوصا يحضنو و يقبلو..🗣
✅️كما قلنا عدم تقبيل الرضيع كبارا و صغارا خصوصا اذا كنت مصاب بالزكام ..
✅️غسل اليدين جيدا اذا بغيت نهز الرضيع...نرضعو او نوكلو..
✅️تهوية البيت جيدا ..

ردو البال الله يخليكم راه مستعجلات الأطفال و مصالح التنفس كتفيض بهاد الحالات بين شهر نونبر و مارس..

دمتم سالمين
د. فردوس المخلص

09/10/2022

نهنئكم بذكرى المولد النبوي الشريف و نحيطكم علما ان عيادتنا ستظل في خدمتكم غدا الاثنين 10/10/2022

27/09/2022

❌الطفل و الشاشة.. واحد الكوبل لي أصبح inséparable..
⁉️ما سبب ذلك ..؟؟
❓لماذا بعض الاباء عوض يعطيو لوليداتهم الوقت.. يلعبوا معهم و يعلموهم...يربيوهم... ولاو يعطيوهم الهاتف او التلفاز...
👀كنتصدم فالعدد الهائل د الاباء و الامهات الذين كيشغلوا وليداتهم بالهاتف أثناء الفحص😒.. باش الطفل مايبكيش و بحجة أن الهاتف هو لي كيسكتوا... و أغلبية هؤلاء الأطفال كيكون عندهم اضطراب فالسلوك و تأخر الكلام...
⬅️من جهة أخرى كاين واحد الفكرة متداولة عند بعض الآباء هي أن مشاهدة الشاشات كتسبب فمرض التوحد... واش هذه الفكرة حقيقية؟؟ العلم لم يؤكد هاد القضية.. لان الأسباب المؤدية لاضطراب التوحد هي اسباب جينية... تعفنية.. فمرحلة التكوين الجنيني la vie prénatale و كتأثر على نمو عقل الطفل..
⬅️و لكن،
لي يجب على الاباء يعرفوه هو ان نمو الطفل الفكري و الحسي .. توازنه النفسي ..سلوكه و شخصيته .. مرتبطين بطريقة مباشرة بالحياة الاجتماعية التي تبدأ في البيت و الأسرة .. لذلك الأطفال خصهم حقهم من الوقت و الاهتمام.. ماشي التلفاز لي غا تعلموا.. يمكن يحفظ الالوان و اسماء الكواكب و الديناصورات... و لكن ما يعرفش يعبر بجملة على شي حاجة بغاها .. مايفهمش سؤال سهل...أو مايقدرش يركز فنشاط يدوي بسيط...
❌الأطفال لي عندهم تأخر أو اضراب يمكن يكونو ضحية د نقص تعليمي أو عاطفي خطير من طرف المحيط ديالهم.. لانهم بمثابة صفحة بيضاء.. لي بقات بيضاء .
✅الطفل الطبيعي اذا حطيتيه قدام الشاشة📺 غادي يتفرج شوية .. و يمل و يمشي يلعب🧸.. اذا لاحظتي ان طفلك يظل ساكنا محدقا بالشاشة و يمكن يجلس قدامها بالساعات.. لا يهتم لألعابه.. فهي علامة لي خصنا انتبهوا معها..
✅عقل الطفل الصغير في بعض الاحيان لا يستطيع مواكبة و استيعاب الاشياء الصاخبة و السريعة التي تمر أمامه فالشاشة.. فبالتالي كيبقى عقله bloqué او مضطرب كيولي غير كيدوز فالفيديوهات واحد مور الثاني .. يمكن ديك الشي يزيد من عصبيته خصوصا مع الهاتف.. فكتلاحظ انه كيبدا يبكي و ما كيصبرش اذا ازعجه إعلان أو شاف شي فيديو ما عجبوش.. و يمكن ما يبقاش يعرف يقرر أو يختار.. مما يزيد من حيرته ..
⚠️⚠️ يجب على الاباء الانتباه لاطفالهم.. مايمكنش ولدك عندو عاماين و ماكيقولكش ماما أو بابا... عصبي اكثر من الزائد و يعبر بلغة الصراخ.. ماكيشوفش فيك و انت كتهدر معه ، كيقوم بحركات غير طبيعية.. ماكيتجاوبش معاك.. لا ينفذ أمرا بسيطا...و انت ماجايب للدنيا خبر..
💌فرجاءا انتبهوا لفلذات اكبادكم ، اعطيوهم حقهم من وقتكم فهم أولويتكم..احضنوهم... اطفئو الشاشات.. و الله يعين كل أسرة على وليداتها..

دمتم سالمين..
د. فردوس المخلص.

02/09/2022

السلام عليكم ،
أثناء فحصي ل واحد البنيتة هاد الصباح جات دوز على السخانة.. طاحت عيني على سرب من القمل فشعرها .. قميلات بحجم النمل!! و الام ديالها الصراحة عارفاه و ماداواتوش..
كنطلب عافاكم من جميع الامهات يقلبوا وليداتهم مزيان قبل الدخول المدرسي .. لي عندو القمل.. الحنيشات... التولال نوع molluscum .. النار الفارسية ( منتشرة هاد الايام..).. يداويهم حيت هاد الأمراض جد معدية و سريعة الانتقال بين الأطفال فالمدارس.

حظ موفق لجميع الاطفال.

13/07/2022

Nous portons à votre connaissance que votre cabinet de pédiatrie sera fermé pour congé annuel, jusqu'au 1 août incha'Allah.

08/05/2022

Prurigo strophulus

⬅️هو واحد النوع من الحبوب الجد منتشر هاته الايام عند الاطفال (فصل الربيع و الصيف) خاصة لي عمرهم بين سنتين و عشر سنوات.

⬅️كيبان على شكل حبوب كيحكو الطفل بزاف. الحبوبة كتكون قاصحة شوية و فالوسط ديالها يمكن نلقاو نقطة حمراء او حويصلة عامرة بالماء (نبيلة كيما كنقولو).. تظهر فالاماكن المكشوفة كالرجلين، اليدين ، العنق و الحزام..

⬅️كاين لي كيسميه حبوب الحلاوة و الأغلبية ديال الاباء يظنون أنه حساسية د شي حاجة كلاها الطفل.

⬅️و لكن السبب الرئيسي ماشي هو الماكلة و إنما تحسس جلد الطفل غالبا من القراديات.. ديال البيت (الرطوبة أو الدار ما فيهاش الشمس) أو قراديات ديال الربيع (اذا كان الطفل كيلعب فالحديقة او مشى للبادية ..)

⬅️ كذلك كيكون نتيجة لعضة البرغوث او البق ( تواجد الحيوانات.. او chantiers بالقرب من المنزل) و حتى البعوض..

⬅️العلاج ديالو يقتصر على دواء الحكة و مرهم مضاد الالتهاب.. و الغسل بصابون معقم.. في بعض الاحيان كنعطيو بخاخات كتعقم المحيط من القراديات و الطفيليات.. و كذا دواء الجرب خصوصا اذا كيرجعو الحبوب و كيطولو..

⬅️يقدر يخلي ندوب داكنة اللون و لكن كتمشي مع الوقت.. و يقدر يبقى يرجع للطفل واخا بعد العلاج..

⬅️من الاحسن استشارة الطبيب خصوصا اذا أثر هاد الشي على نوم و راحة الطفل و الوقاية كتبقى أساسية..

دمتم سالمين

د. فردوس المخلص

20/03/2022

🔴فقر الدم الناتج عن نقص الحديد عند الاطفال:

⬅️جد شائع عند الطفل خصوصا بين عمر سنة و خمس سنوات..

⬅️كيقدر يجي لطفل من كل ثلاثة أطفال..

⬅️أسبابه:
🔴استهلاك الحديد الذي يستمده الرضيع من الام في الست أشهر الاولى.. و بالتالي كيولي يعتمد على راسو باش يكتسب الحديد .
🔴 نمو الطفل المتسارع و المستهلك بالدرجة الاولى لمادة الحديد.. مع نظام غذائي لا يلبي حاجات الجسم و يفتقر للبروتينات الحيوانية..
🔴فقدان الشهية ..
🔴اعتماد الرضيع اقل من سنتين على حليب الأم فقط (كيف ما كنقولوا كيرضع بالليل و النهار و ماكايكلش) # مع العلم ان انزيم الحليب الذي يقوم بنقل الحديد لحليب الام transferine ماكيبقاش فوق عمر 6 أشهر, كما ان كثير من الامهات المرضعات كيكون عندهم براسهم فقر دم.. #
🔴استهلاك الرضيع المفرط لحليب البقر و المعز او الحليب الغير المناسب للرضع.. المفتقرين لمادة الحديد.
🔴سوء امتصاص الحديد عن طريق الأمعاء..
🔴بعض العادات الغريبة كأكل التراب géophagie..
🔴 في بعض الحالات القليلة وجود نزيف فالجهاز الهضمي خصوصا قرحة المعدة.. عند الطفل الكبير شوية الذي يعاني من اعراض جهازه الهضمي..

⬅️علاماته:
🟡شحوب الطفل..
🟡احساسه بالتعب و نقص حركته.
🟡احساسه بالدوخة و الصداع و ارتفاع دقات قلبه.
🟡ضعف تكسر الاظافر ..
🟡تساقط الشعر و نموه بوتيرة بطيئة..
🟡فقدان الشهية..
🟡التهاب اللسان stomatite او تشقق و التهاب زاوية الشفتين perlèches..في الحالات المتقدمة..
🟡عادات غذائية غير طبيعية كأكل التراب و الطين...

⬅️أضراره:
⛔نقص فنمو الطفل (الطول و الوزن).. بالمقارنة مع سنه.
⛔نقص تركيز الطفل خصوصا فالمدرسة و يمكن يكون عنده مشاكل فالحفظ ..
⛔نقص مناعة الطفل و اصابته أكثر بالامراض التعفنية..
⛔قلة حركته و إحساسه الدائم بالخمول ..

⬅️لتفادي فقر الدم ننصح ب:
🟢تقليص الاستهلاك المفرط و طيلة النهار للحليب لدى الاطفال ..
🟢تغذية متوازنة غنية بالخضر الخضراء خصوصا ذات الاوراق الخضراء، الفيتامين س، اللحوم الحمراء ، البيض و العدس..
🟢 اعطاء مكملات الحديد لكل رضيع يأخذ رضاعة طبيعية ، عمره فوق 9 أشهر.. (جرعة وقائية).
🟢ادماج البروتين الحيواني في تغذية الرضيع ابتداءا من سن 6 أشهر ..
🟢عدم إعطاء الشاي للاطفال..

⬅️دور الطبيب أساسي في البحث عن علامات فقر الدم أثناء فحصه للطفل، و البحث عن مسبباته و كذا الاستفسار عن النظام الغذائي الذي يتبعه الطفل..
و حتى الاساتذة فدورهم مهم حيت فبعض الاحيان كيعلموا الاباء عن حالة طفلهم فالقسم كعدم التركيز و الاحساس بالعياء و قلة الحركة.. و كيكونو سبب فاكتشاف فقر الدم. نوجه لهم رسالة شكر.

⬅️علاج فقر الدم:
✔ يعتمد على مكمل الحديد لي خصو يتعطى من الاحسن مع الفيتامين س ، و ماناخدوش معاه الحليب او مشتقاته (العديد من الامهات كيعطيو سيرو الحديد مع الياغورت و هذا خطأ شائع)
✔مدة العلاج تختلف على حسب حدة النقص و يمكن تمشي لاكثر من 6 أشهر.
✔فبعض الحالات كنعاونو بفيتامين B9
✔ ضرورة اتباع نظام غذائي سليم و غني

و الوقاية كتبقى خير من العلاج.

دمتم في امان الله و حفظه.
د.فردوس المخلص

20/03/2022

نزولا عند طلب العديد من الامهات، نهدرو شوية على موضوع صيام الام المرضعة🤱..

هذا الموضوع فيه اختلافات و آراء متعددة.

القدرة على صيام رمضان و الارضاع كترجع للأم و الطفل الرضيع..

⬅️فلذلك خصنا نشوفوا جوج نقط:
🚺النقطة الأولى:
-هي واش الام المرضعة بصحة جيدة...
-بماذا تحس اثناء الصيام: دوخة.. عطش.. وجع الرأس.. تعب شديد...
- واش الام عندها فقر دم؟ مرض مزمن؟
- واش نقص لها الحليب ؟
🚫فهذه الحالات يجوز الإفطار..

🚼النقطة الثانية هي ماذا يحصل للرضيع جراء الصيام؟
- إذا نقص عدد حفاظاته أثناء فترة الصيام..
- اولا توقف فالزيادة فالوزن..
- أولا كيبكي النهار كامل و كيبغي يرضع باستمرار و مكيحسش بالشبع..
🚫 فهذه الحالات يجوز افطار الام المرضعة..
ملاحظة: يمكن يتسبب صيام الام فالامساك عند الرضيع فهاته الفترة.. على الام الاكثار من السوائل و أكل الفواكه..

⬅️ اذا كان عمر الطفل أقل من 4 أشهر :
-على العموم، لا ينصح بصيام الام اذا كانت كترضع طبيعي 100%
-و لكن كيفما كنعرفو ان افراز الحليب كيتحفز أكثر فأكثر بالرضاعة.. فكلما رضع البيبي كلما جاء الحليب خصوصا بالليل اذا رضع الطفل بزاف كيجيب الحليب د النهار د الغد..
-اذن: إذا كانت الام بصحة جيدة، كتشرب كمية كبيرة من السوائل بين فترة الفطور و السحور.. تغذيتها سليمة و غنية بالمعادن و micronutriments ،المواد المدرة للحليب و الأغذية الغنية بالدهون و البروتين خصوصا في السحور... اولا كتاخذ فيتامينات تساعدها انها تكمل نهارها بدون تعب.. اذا ما نقصش ليها الحليب.... فلا عيب من المحاولة.. و يمكن تبدأ بتجربة صيام نهار اه نهار لا ..
و لكن الاغلبية ترجح عدم الصوم..

-اذا كان عمر الرضيع أقل من 4 شهور و يرضع رضاعة طبيعية و اصطناعية.. فلا ضرر ان تصوم الام و تعطي للرضيع الحليب الاصطناعي في فترة الصيام.. و بعد الافطار ترضع طبيعي حتال السحور..
بشرط :تبقى فنفس عدد الرضاعات لي كتعطي فاليوم حيت كل ما زاد عدد الرضاعات كل ما البيبي كيولفها و ينسى الثدي..
و شريطة عدم إدخال الحليب الاصطناعي فقط لغرض انها تصوم ..

⬅️اذا كان عمر الطفل اكثر من 4 شهور:
-يمكن للمرأة الصيام اذا كانت كترضع طبيعي على قدر استطاعتها و صحتها..
-كما يمكن لها ادخال الطعام تدريجيا للطفل ابتداءا من 4 أشهر (واخا هاد الماكلة فبداية التنويع الغذائي ما غديش تعوض الرضاعة)..
- اما فوق عمر 6 اشهر فالطفل يستمد les macro et micronutriments من الماكلة و كيكمل بحليب الأم..

⬅️كيف ما قلنا المرأة المرضع التي تصوم خصها:
⚠️تفطر فحالة انها ماقدرتش تصوم و ما تقاومش على حساب صحتها و صحة رضيعها..
⚠️ تسحر مزيان و تأخر ما امكن وجبة السحور..
‏⚠️ تشرب السوائل بكثرة طيلة مدة الافطار بنسب متساوية..
‏⚠️ تأكل المواد لي كتجيب الحليب فحال الألبان.. الفواكه الجافة.. زريعة الكتان.. سلو.. البيض ..الشوفان.. السمك.
⚠️ ‏و ماشي عيب تعاون بالفيتامينات خصوصا فيتامين" د " و الكالسيوم.

⬅️فالاخير كنقول لكل أم مرضعة الله يعينها على الصيام اذا عندها شك او تساؤل تستشر طبيب الاطفال او طبيبها .. و الله يحفظ أبناءنا من كل شر.

دمتم سالمين و عواشركم مبروكة.
د.فردوس المخلص