09/04/2026
9 април – Светски ден на психоонкологијата 2026
Во рамки на глобалната иницијатива World Psycho-Oncology Day 2026, иницирана од International Psycho-Oncology Society, нашата болница учествуваше во реализација на активности посветени на подигнување на свеста за важноста на психолошката поддршка кај онколошките пациенти.
На Факултетот по психологија на Меѓународен Славјански Универзитет психологот м-р. Розита Андовова од ЈЗУ Општа болница Гевгелија одржа стручно предавање на тема Психосоцијални аспекти на онколошките заболувања, наменето за студенти по психологија, психолози и здравствени професионалци, со цел унапредување на знаењата и поттикнување на интегриран пристап во грижата за пациентите. Изразуваме благодарност до факултетот за соработката и поддршката, како и за препознавањето на значењето на поврзувањето на теоријата со практиката, што претставува клучен чекор во развојот на идните професионалци.
Како дел од оваа иницијатива и како дел од сеопфатната грижа која ја применуваме во нашата установа, дополнително воведуваме отворен ден за онколошки пациенти во психолошкото советувалиште, секоја среда од 11:30 до 14:30 часот, а во чекалните пред ординациите ќе бидат достапни и летоци со мотивирачки пораки кои ги охрабруваат пациентите да побараат психолошка поддршка.
Психолошката грижа е суштински дел од лекувањето. Зад секоја дијагноза стои човек кој има потреба да биде слушнат, разбран и поддржан.
Благодарност до сите кои беа дел од организацијата и реализацијата на оваа иницијатива.
