ЈЗУ Универзитетска клиника за психијатрија - Скопје

21/08/2026

Тим од ЈЗУ Универзитетската клиника за психијатрија на чело со директорката, проф. д-р Славица Арсова, денеска започна соработка со Дневниот центар „Гнездо“ – центар за деца и родители во социјален ризик, со цел преку заеднички активности да се придонесе кон емоционалниот и социјалниот развој на децата.

Во рамките на летниот камп се оствари првата заедничка работилница, на која децата имаа можност да се запознаат со основните емоции и да разговараат за нивното препознавање и изразување.

Посебно внимание, а и многу насмевки, предизвика нашиот Роџер 🐾, кој уште еднаш покажа колку присуството на животно може природно да создаде чувство на сигурност, блискост и доверба кај децата. Преку контактот со него, децата разговараа и за придобивките од имањето милениче, но и за одговорноста што ја носи грижата за едно живо суштество - неговите потреби, чувства и благосостојба.

Ваквите средби се особено важни бидејќи создаваат простор во кој децата можат да учат преку непосредно искуство, игра и комуникација, истовремено развивајќи социјални и емоционални вештини кои се значајни за нивното понатамошно растење и развој.

Соработката со организации и центри кои секојдневно работат со деца и семејства во социјален ризик е важен дел од заложбите на Клиниката за отворање кон заедницата, превенција и унапредување на менталното здравје уште од најрана возраст.

10/06/2026

Вчера бевме дел од прекрасен настан во Културно-информативниот центар (КИЦ), каде што нашата пациентка и вистински борец, Stefanija D Graovac, ја промовираше својата прва збирка поезија „Нервозна сум“, која ја посвети на тимот од Дневната болница на Клиниката за психијатрија.

Преку својата дебитантска книга, Стефанија храбро и искрено проговорува за менталното здравје, осаменоста, ранливоста и општествените табуа. Збирката содржи 77 песни, поделени во пет циклуси, кои заедно создаваат еден длабоко личен и автентичен поетски дневник.

Особено сме трогнати од песната што таа ја посвети на тимот од Дневната болница:

„Кога беше тажна мојата душа,
стручен тим крикот ми го слушна,
најдов дом во нивното катче,
пријателство и љубов, не само апче.“

Промотор на книгата беше нејзиниот уредник Никола Гелевски, кој оцени дека „Нервозна сум“ е збирка што не бара милост, туку нуди искреност – највисоката форма на храброст. Според него, авторката својата „попреченост“ ја претвора во поетска сила, покажувајќи дека токму различниот поглед може појасно да го согледа светот.

Од сѐ срце ѝ честитаме на нашата храбра Стефанија и ѝ посакуваме ова да биде само почеток на едно долго и успешно книжевно патување. Горди сме што бевме дел од нејзиниот пат и што денес можеме да ја славиме нејзината сила, талент и упорност.

28/05/2026

Нашата ѕвезда на клиниката 🐾

26/05/2026

Денешните генерации живеат онлајн и немаат време да го направат вистинското емотивно поврзување.
Д-р Билјана Гагачовска во гостувањето на „Да си кажеме“ на ТВ Телма.

20/05/2026

Почеток на една убава соработка!

20/05/2026

Денеска поминавме прекрасен ден со нашиот Роџер, кој се дружеше со дечињата од Државното училиште за рехабилитација на деца и младинци со оштетен вид „Димитар Влахов“.

Несомнено, не постои поубава глетка од детски насмевки, особено кога се споделени со милениче!

Директорката на ЈЗУ Универзитетската клиника за психијатрија, проф. д-р Славица Арсова, и директорката на „Димитар Влахов“ Александра Јаковчевска потпишаа и Меморандум за соработка, со кој ќе се продлабочат идните активности меѓу двете институции.

Планирано е обезбедување стручна и психосоцијална поддршка за учениците, реализација на заеднички активности, работилници и проекти, подигнување на јавната свест за потребите и потенцијалите на лицата со попреченост, како и поттикнување на инклузија, емпатија и хумано општество.

Благодарност до сите деца и до вработените во „Димитар Влахов“ за оваа прекрасна средба во една топла атмосфера, а секако и до нашиот Роџер, кој денеска уште еднаш нѐ потсети колку љубов, радост и топлина можат да донесат животните.

06/05/2026

Растројства во исхраната, булингот, анксиозноста и дeпресивноста кај младите - границата се намалува и има случаи на појава на овие проблеми уште од 7-8 годишна возраст.

Д-р Билјана Гагачовска, супспецијалист по детска и адолесцентна психијатрија од нашата клиника во разговор со д-р Ангелчо Андоновски, специјалист педијатар.

04/05/2026

Интервју со Иво Куновски од Клиниката за психијатрија, специјалист по медицинска психологија и доктор на науки по јавно здравје за феноменот наречен „токсичен позитивизам“, кој многу често се форсира по социјалните медиуми, кој понекогаш не ни дозволува да бидеме тажни, несреќни и да се чувствуваме незадоволно.

Човекот не е создаден да биде постојано позитивен. Сите животни ситуации не бараат позитивен став. Негативните емоции се составен дел од човекот, вели во интервју з...

30/04/2026

Четворица патници во различни возови, различни градови.
Секој во своето купе, со своја тежина, во свој универзум.

Првиот патник се буди вознемирен. Не наоѓа задоволство во ништо, постојано е загрижен и оптоварен со лоши мисли. Дури ни концертот на неговата ќерка не може да го израдува. Страда од генерализирано анксиозно растројство.

Вториот патник е жена која тешко се фокусира и едвај наоѓа сила да одговори на пораката од нејзиниот сопруг - „дали се качи во возот?“. Таа само посакува да остане дома и да спие, но кога ќе се разбуди, не се чувствува одморено. Се соочува со постојан замор, главоболки, чувство на безнадежност и отсуство на енергија. Депресија.

Третиот патник е млад човек кој слуша гласови што му влеваат страв. Гласови што ги слуша само тој. Границата меѓу реалноста и имагинарното станува нејасна. Станува збор за симптоми кои укажуваат на психоза.

Четвртиот патник е повозрасна жена која доаѓа на железничката станица, но не може да се сети зошто. Возот заминува, а таа останува на железничката станица со чувство дека нешто важно заборавила. Ова е секојдневието на лицата со деменција.

Овие четири приказни беа претставени преку кратки едукативни видеа на настанот организиран од фармацевтската компанија КРКА, каде што свои излагања имаа директорката на ЈЗУ Универзитетската клиника за психијатрија, проф. д-р Славица Арсова, проф. д-р Антони Новотни и проф. д-р Диме Боневски.

Преку овие примери, тројцата професори отворија дискусија за препознавање на симптомите, навремена дијагностика и на современи терапевтски пристапи.

Посебен акцент беше ставен на тоа дека постојат соодветни третмани и медикаменти прилагодени на индивидуалните потреби на секој пациент, со јасна цел: враќање на функционалноста и повторното поврзување со животот и неговите бои.

Во таа насока, беше нагласена улогата на современата фармакотерапија во третманот на овие состојби, како и значењето на достапни, ефикасни и безбедни терапевтски решенија. Компанијата КРКА, како долгогодишен партнер во здравствениот систем, континуирано развива и произведува лекови за третман на анксиозност, депресија, психотични нарушувања и деменција, придонесувајќи за подобар квалитет на живот на „патниците“.

ЈЗУ Универзитетската клиника за психијатрија изразува благодарност до фармацевтската компанија КРКА за поканата и за можноста да биде дел од настан што придонесува кон унапредување на знаењето и грижата за менталното здравје.

28/04/2026

Почитувани корисници на услугите на ЈЗУ Универзитетска клиника за психијатрија, во прилог се телефонските броеви на одделите на нашата клиника и на дежурните сестра и доктор, доколку сакате да добиете навремени информации.
Со почит.