26/08/2026
Една од најчестите причини за нашата анксиозност може да биде постојаното кажување ДА, кога сакаме да кажеме НЕ.
“Не можам да ги измијам чиниите, ми треба одмор”
“Немам капацитет да ја преземам оваа работна задача”
“Ми треба одмор и не сакам да одам на слава”
Толку едноставно звучат овие реченици, но за некои од нас да ги изговориме значи голема опасност.
Опасност дека можеби:
“Ќе ми се налути сопругот”
“Ќе зборат дека сум мрзелив/а”
“Ќе се разочараат од мене и ќе ме напуштат”
И додека нашето тело вреска “НЕ”, ние повторно кажуваме “ДА” и ги потиснуваме нашите потреби и граници.
И токму тогаш кога не го слушаме нашето тело почнуваат психосоматски симптоми како срцебиење стегање во градите, немир, анксиозност и стравови.
Но, зошто нѝ е толку тешко да престанеме да им угодуваме на другите?
Можеби затоа што сме научиле дека за да бидеме добри, сакани и прифатени, треба да им угодуваме на сите.
Можеби во минатото сме научиле дека нема да бидеме добри луѓе и ќе не напуштат ако
Не помогнеме.
Не премолчиме.
Не се прилагодиме.
И токму тука се заплеткува клопчето.
Настанува конфузија, нејасност и анксиозност.
Се губи границата помеѓу нас и другите.
Тешко е да препознаеме кои се нашите потреби и граници.
Од една страна имаме потреба за одмор и за време за себе.
Да кажеме што нѝ е потребно, што нѝ пречи, што сакаме.
Од друга страна се појавува стравот
“Што ќе се случи ако се изберам себеси?”
“Што ако ги повредам другите?”
“Ќе помислат ли дека сум себичен/а?”
“Ќе ми се растури ли бракот?”
И овие стравови е нормално да ги чувствуваме, затоа што со години сме научиле да кажуваме “ДА” и да се потиснуваме себеси.
И нема гаранција дека нема со сигурност да се остварат.
Некој можеби навистина ќе се налути.
Некој можеби навистина ќе се разочара од нас.
Некој можеби нема да му одговара нашето “НЕ”
Но, другата алтернатива е веќе позната.
Останување во анксиозност уште долго.
И навистина не е лесно да се направи чекор кој е различен од се што сме правеле до сега.
Уште потешко е кога сме сами во целата конфузија и магла. Кога немаме поддршка од луѓето околу нас.
Токму затоа некогаш е потребна поддршка од пријател или психотерапевт кој ќе нѝ помогне да стигнеме до поголема јасност:
Што е мое, а што е туѓо?
Да нѝ биде огледало и да разбереме каде сами се одржуваме во круг на анксиозност?
Како ги потиснуваме на нашите потреби и граници, на сметка на угодување на потребите на другите.
И постепено да откриеме дека ако кажам „НЕ“, тоа не значи дека не го почитувам или не го сакам другиот.
Туку дека не се отфрлам себеси за да му угодам.
Доколку сакаш да дознаеш повеќе што всушност е анксиозноста и зошто се појавува, можеш да го погледнеш бесплатниот вебинар на следниот линк:
https://www.gestaltmacedonia.com/webinar
