TK Counselling Service

TK Counselling Service Contact information, map and directions, contact form, opening hours, services, ratings, photos, videos and announcements from TK Counselling Service, Mental Health Service, No. 19 (1st floor), 20th Street (Lower Block), Latha Township, Yangon.

"ငါနဲ့တော့ မဖြစ်နိုင်‌ဘူး...""ဘယ်လောက်ကြိုးစားကြိုးစား မပြောင်းလဲနိုင်ဘူး...""ငါက ဒီလောက်ပဲ..."ဒီလို အတွေးတွေ ဝင်လာဖူးပါ...
22/07/2026

"ငါနဲ့တော့ မဖြစ်နိုင်‌ဘူး..."
"ဘယ်လောက်ကြိုးစားကြိုးစား မပြောင်းလဲနိုင်ဘူး..."
"ငါက ဒီလောက်ပဲ..."

ဒီလို အတွေးတွေ ဝင်လာဖူးပါသလား။

တကယ်တော့ ဒီအတွေးတွေဟာ ပြင်ပက ဝေဖန်မှုတွေကနေ လာတာမဟုတ်ပါဘူး။

ကိုယ့်စိတ်ထဲမှာ တဖြည်းဖြည်း တည်ဆောက်လာတဲ့ ယုံကြည်ချက်တွေကနေ လာတာ ဖြစ်ပါတယ်။

စိတ်ပညာမှာတော့ ဒါကို Learned Helplessness လို့ ခေါ်ပါတယ်။

လူတစ်ယောက်ဟာ အကြိမ်ကြိမ် ကျရှုံးမှု၊ ဝေဖန်ခံရမှု၊ ငြင်းပယ်ခံရမှုတွေကို ကြုံတွေ့လာတဲ့အခါ...

နောက်တစ်ကြိမ် အခွင့်အရေး ရလာရင်တောင် "ကြိုးစားလည်း အကျိုးမရှိဘူး" လို့ ယုံကြည်လာတာပါ။

တကယ်တော့...
ပြောင်းလဲလို့ မရတာလည်း မဟုတ်ပါဘူး။
မပြောင်းလဲနိုင်ဘူးလို့ ယုံကြည်နေမိတာ ဖြစ်ပါတယ်။

ဒီအ‌တွေးက သင်တစ်ခုခု လုပ်တော့မယ်ဆိုရင် အဆင်မပြေဘူးလို့ ပြော‌ကောင်း‌ပြောပါလိမ့်မယ်။

ဒါပေမယ့် ယုံကြည်သင့်တာက အဲ့အ‌တွေး‌က ခု သင့်အနာဂတ်ကို အဆုံးအဖြတ် မပေးနိုင်‌တော့ပါဘူး။

ဒါက အတိတ်က ငါ ကြုံခဲ့ရတဲ့ အတွေ့အကြုံကြောင့်လို့တွေးမြင်ပါ။

ဒီနေ့ မလုပ်နိုင်ခဲ့ရင်
မနက်ဖြန်လည်း ငါ မလုပ်နိုင်ဘူးလို့ မဆိုလိုပါဘူး။

နေ့တိုင်း နည်းနည်းစီ ကြိုးစားတာ၊ သင်ယူတာကို မရပ်ဘဲ ဆက်လုပ်ကြည့်လိုက်ပါ။ အဲ့တာကပဲ သင့်ရဲ့အ‌တွေးနဲ့ ဘဝကို ပြောင်းလဲပေးပါလိမ့်မယ်။

ဒါကြောင့်...
တစ်ခုခု လုပ်တော့မယ်ဆိုရင် ကိုယ့်ကိုယ်ကိုယ် မေးကြည့်ပါ။

"ငါ တကယ်မလုပ်နိုင်တာလား... ဒါမှမဟုတ် မလုပ်နိုင်ဘူးလို့ ယုံကြည်နေမိတာလား?"

အဖြေက သင့်ဘဝကို ပြောင်းလဲ‌အောင် လုပ်ပေးနိုင်ပါလိမ့်မယ်။

သိထားသင့်တာက

သင်ကိုယ်တိုင် ကန့်သတ်ထားတာ‌တွေက အမြဲတမ်း အမှန်တရား မဟုတ်ပါဘူး။

တစ်ခါတလေ...
ဒါတွေက စိတ်ထဲမှာ ကြာရှည်စွာ နေရာယူထားတဲ့ ယုံကြည်ချက်ဟောင်းတွေသာ ဖြစ်ပါတယ်။

ဒီယုံကြည်ချက်‌‌အ‌ဟောင်း‌တွေကို စတင်ပြောင်းလဲတဲ့နေ့ကစပြီး...
သင့်ဘဝဟာလည်း တဖြည်းဖြည်း ပြောင်းလဲလာမှာ ဖြစ်ပါတယ်။

လူတိုင်း လူတိုင်း မိမိတို့လျှောက်လမ်းသော ခရီးလမ်းတိုင်းမှာ အဆင်ပြေချောမွေ့ကြပါစေရှင့်။

🧑‍🎓 Dr.Khin Aye Soe
(Counselling Psychologist)





လူတစ်ယောက်ကို ခုချိန်ထိ မမေ့နိုင်သေးဘူး ဒါက "အချစ်ကြီးလို့ပဲ" လို့ ထင်တတ်ကြပါတယ်။ ဒါပေမယ့် တချို့အခြေအနေတွေမှာ ဒါဟာ အချစ...
19/07/2026

လူတစ်ယောက်ကို ခုချိန်ထိ မမေ့နိုင်သေးဘူး ဒါက "အချစ်ကြီးလို့ပဲ" လို့ ထင်တတ်ကြပါတယ်။

ဒါပေမယ့် တချို့အခြေအနေတွေမှာ ဒါဟာ အချစ်ကြောင့်မဟုတ်ဘဲ Emotional Addiction (စိတ်ပိုင်းဆိုင်ရာ စွဲလမ်းမှု) ကြောင့် ဖြစ်နေတတ်ပါတယ်။

Emotional Addiction ဆိုတာ
လူတစ်ယောက်ကို ချစ်တာထက် ကိုယ့်ရဲ့ စိတ်လုံခြုံမှု၊ ပျော်ရွှင်မှုနဲ့ ကိုယ့်တန်ဖိုးကို အဲဒီလူတစ်ယောက်အပေါ် အလွန်အကျွံ မှီခို‌နေတဲ့ အခြေအနေ ကို ဆိုလိုပါတယ်။

ဒီလိုအခြေအနေမှာ...
📌 သူ့ဆီက Message သို့မဟုတ် Reply မရရင် စိတ်မငြိမ်တော့ဘူး။
📌 သူ့ရဲ့ စကားတစ်ခွန်း၊ အပြုအမူတစ်ခုကြောင့် တစ်နေ့လုံး Mood ပြောင်းသွားတတ်တယ်။
📌 ကိုယ့်လိုအပ်ချက်ထက် သူ့စိတ်ကျေနပ်မှုကိုပဲ ဦးစားပေးနေမိတယ်။
📌 ကိုယ့်ကို နာကျင်စေတယ်ဆိုတာ သိပေမယ့် အဆက်အသွယ် မဖြတ်နိုင်သေးဘူး။
📌 တစ်ယောက်တည်း ရှိရတဲ့အချိန်မှာ အထီးကျန်မှု၊ စိုးရိမ်မှုတွေ ပြင်းထန်လာတတ်တယ်။
📌 သူ့ရဲ့ အတည်ပြုချက် (Validation) မရရင် ကိုယ့်ကိုယ်ကိုယ် တန်ဖိုးမရှိသလို ခံစားရတတ်တယ်။

ဒီလိုသာ ဆိုရင်တော့ သင်ဟာ Emotional Addiction ကို ခံစားနေရတာပါ။

Emotional Addiction ဖြစ်စေတဲ့ အကြောင်းရင်းတွေကတော့...
🌱 Childhood Emotional Neglect (ကလေးဘဝ စိတ်ခံစားချက် လုံလုံလောက်လောက်မခံခဲ့ရခြင်း)
🌱 Insecure Attachment (မလုံခြုံတဲ့ တွယ်တာမှုပုံစံ)
🌱 Low Self-esteem (ကိုယ့်ကိုယ်ကိုယ် တန်ဖိုးထားမှု နည်းခြင်း)
🌱 Fear of Abandonment (စွန့်ပစ်ခံရမှာကို အလွန်ကြောက်ရွံ့ခြင်း)
🌱 Trauma သို့မဟုတ် အတိတ်က စိတ်ဒဏ်ရာအတွေ့အကြုံများ

စတဲ့အချက်တွေကြောင့် ဖြစ်လာတတ်ပါတယ်။

ဒီလို Emotional Addiction ဖြစ်လာရင် တစ်ဖက်လူကို အရမ်းစွဲလမ်းလာတဲ့အတွက် သတိထားရမယ့်အချက်က...

ဒါဟာ အချစ်မဟုတ်ပါဘူး ဆိုတာကို နားလည် လက်ခံလိုက်ပါ။

အကယ်၍ ဒီလိုပုံစံတွေပဲ သင့်ဘဝမှာ ထပ်ခါထပ်ခါ ဖြစ်ပေါ်နေတယ်ဆိုရင် "ငါက အချစ်ကြီးလို့" လွတ်မချနိုင်တာ မဟုတ်ပါဘူး။

ကိုယ့်ရဲ့ အတွင်းစိတ်ဒဏ်ရာတွေနဲ့ စိတ်မလုံခြုံမှု‌တွေကို ကုစားဖို့ လိုအပ်နေတာပဲ ဖြစ်ပါတယ်။

ဒီနေ့ကနေစပြီး ကိုယ့်ရဲ့ခံစားချက်တွေ ကို အသိအမှတ်ပြုပါ။ လိုအပ်ပါက ဆွေးနွေးမှု ခံယူကြည့်ပါ။

ကုစားတယ် ဆိုတာ...
လူတစ်ယောက်ကို မေ့ပျောက်သွားဖို့ ဆိုတာထက်

📌ကိုယ့်စိတ်ခံစားချက်ကို လက်ခံနားလည်ဖို့၊
📌ကိုယ့်တန်ဖိုးကို အခြားသူရဲ့ အသိအမှတ်ပြုမှုမလိုဘဲ ယုံကြည်မှုတည်ဆောက်ဖို့၊
📌Healthy Boundaries (ကျန်းမာတဲ့ နယ်နိမိတ်များ) သတ်မှတ်တတ်လာဖို့၊
📌တစ်ယောက်တည်းလည်း အေးချမ်းစွာ နေထိုင်နိုင်တဲ့ စိတ်လုံခြုံမှုကို တည်ဆောက်နိုင်ဖို့၊

အတွက်ပဲ ဖြစ်ပါတယ်‌နော်။

လူတိုင်း ကောင်းမွန်တဲ့ ဆက်ဆံရေးတွေကို ပိုင်ဆိုင်ကြရပြီး စိတ်ရောကိုယ်ပါ ကျန်းမာပျော်ရွှင်ကြပါစေရှင်။

Toxic/Abusive relationship ကြောင့် စိတ်ဒဏ်ရာများကို ကုစားလိုသူတွေအတွက် TK Counselling Service တွင် Relationship Counselling Package စီစဉ်ပေးထားတာ ရှိပါတယ်ရှင့်။

အသေးစိတ်သိလိုပါက Page Messenger မှတစ်ဆင့် ဆက်သွယ်မေးမြန်းစုံစမ်းနိုင်ပါတယ်ရှင့်။

🧑‍🎓 Dr.Khin Aye Soe
(Counselling Psychologist)


စိုးရိမ်ပူပန်မှု ဆိုတာ လူတိုင်းရဲ့ဘဝမှာ တစ်ချိန်မဟုတ်တစ်ချိန် ကြုံတွေ့ရနိုင်တဲ့ သဘာဝကျတဲ့ စိတ်ခံစားမှုတစ်ခုပါ။ ဒါဟာ သင့်...
14/07/2026

စိုးရိမ်ပူပန်မှု ဆိုတာ လူတိုင်းရဲ့ဘဝမှာ တစ်ချိန်မဟုတ်တစ်ချိန် ကြုံတွေ့ရနိုင်တဲ့ သဘာဝကျတဲ့ စိတ်ခံစားမှုတစ်ခုပါ။

ဒါဟာ သင့်ရဲ့ အားနည်းချက်လည်း မဟုတ်ပါဘူး။
သင့်မှာ တစ်ခုခုမှားယွင်းနေတာလည်း မဟုတ်ပါဘူး။

တကယ်တော့ စိုးရိမ်ပူပန်မှုဟာ ဦးနှောက်ရဲ့ "သတိပေးစနစ် (Alarm System)" တစ်ခုဖြစ်ပါတယ်။ အန္တရာယ်ရှိနိုင်တဲ့ အခြေအနေတွေကို ကြိုတင်သတိထားစေဖို့၊ ပြင်ဆင်နိုင်ဖို့နဲ့ သင့်ကို ကာကွယ်ပေးဖို့ ဖြစ်ပါတယ်။

ဒါပေမယ့် တစ်ခါတစ်ရံ ဒီသတိပေးစနစ်က အန္တရာယ်မရှိတဲ့ အခြေအနေတွေမှာတောင် လွန်ကဲစွာ သတိပေးနေတတ်ပါတယ်။

အဲဒီအခါ နှလုံးခုန်မြန်လာတာ၊ အသက်ရှူမဝသလို ခံစားရတာ၊ အတွေးတွေ မရပ်နိုင်တော့တာ၊ အဆိုးဆုံးဖြစ်နိုင်တာတွေကိုပဲ ထပ်ခါထပ်ခါ တွေးနေမိတာမျိုး ဖြစ်လာနိုင်ပါတယ်။

ဒီလိုအချိန်မှာ Anxiety ကို တွန်းလှန်ဖို့ထက် နားလည်ပြီး စီမံခန့်ခွဲတတ်ဖို့ က ပိုအရေးကြီးပါတယ်။

🔰အဆင့် (၁) — စိုးရိမ်ပူပန်မှုကို အသိအမှတ်ပြုပါ။
"အခု ငါ စိုးရိမ်နေတယ်။"

ဒီခံစားချက်ကို ငြင်းပယ်ဖို့ မလိုပါဘူး။ ဖိနှိပ်ဖို့လည်း မလိုပါဘူး။ ကိုယ့်မှာ ဒီလိုခံစားချက် ရှိနေတယ်ဆိုတာကို အရင်ဆုံး လက်ခံပေးဖို့ပါ။

🔰အဆင့် (၂) — မတွန်းလှန်ပါနဲ့။

စိုးရိမ်ပူပန်မှုကို "မဖြစ်ရဘူး" လို့ တိုက်ခိုက်လေလေ၊ စိတ်က ပိုပြီး သတိထားလာလေလေ ဖြစ်လာတတ်ပါတယ်။ တစ်ခါတစ်ရံ "ရှိနေပါစေ" လို့ ခွင့်ပြုပေးလိုက်တာက Anxiety ကို တဖြည်းဖြည်း ငြိမ်သက်လာစေပါတယ်။

🔰အဆင့် (၃) — သူ့ရဲ့ ရည်ရွယ်ချက်ကို နားလည်ပါ။

"ဒီစိုးရိမ်စိတ်က ငါ့ကို ဘာကနေ ကာကွယ်ဖို့ ကြိုးစားနေတာလဲ။" လို့ ကိုယ့်ကိုယ်ကိုယ် မေးကြည့်ပါ။ Anxiety ဟာ သင့်ကို ထိခိုက်စေဖို့ မဟုတ်ပါဘူး။ သင့်ကို လုံခြုံစေချင်လို့သာ အချက်ပေးနေတာ ဖြစ်ပါတယ်။

🔰အဆင့် (၄) — အခြေအနေကို အမှန်တကယ် သုံးသပ်ပါ။

ကိုယ့်ကိုယ်ကိုယ် ပြန်မေးပါ။
📌ဒီအခြေအနေက တကယ်အန္တရာယ်ရှိသလား။
📌ငါစိုးရိမ်နေတာက အမှန်တကယ်လား၊ ဒါမှမဟုတ် အတွေးသက်သက်ပဲလား။
📌တကယ်ဖြစ်လာရင် ငါ ဘယ်လို ကိုင်တွယ်နိုင်မလဲ။

✔️အတွေးနဲ့ အမှန်တရားကို ခွဲခြားမြင်နိုင်လာတာက Anxiety ကို လျော့ကျစေပါတယ်။

🔰အဆင့် (၅) — ကိုယ့်ရဲ့ လိုအပ်ချက်ကို နားထောင်ပါ။
တစ်ခါတစ်ရံ Anxiety က သင့်အတွက်သတင်းစကားတစ်ခု သယ်ဆောင်လာပါတယ်။

ဥပမာ...
✔️ငါ အနားယူဖို့ လိုနေတာလား။
✔️ငါ အလုပ်ပင်ပန်းလွန်းနေလို့လား။
✔️ငါ ကိုယ့်ခံစားချက်ကို လျစ်လျူရှုထားမိလို့လား။
✔️ငါ တစ်ယောက်တည်း အရာအားလုံးကို ထမ်းထားမိ‌နေလို့လား။
စိုးရိမ်ပူပန်မှုကို ရန်သူအဖြစ် မမြင်ဘဲ၊ ကိုယ့်အတွက် အချက်ပေးသံတစ်ခုအဖြစ် နားထောင်ကြည့်ပါ။

🔰အဆင့် (၆) — ကိုယ့်ကိုယ်ကိုယ် အေးချမ်းစေတဲ့ အလေ့အကျင့်တစ်ခု လုပ်ပါ။

Anxiety ဖြစ်နေတဲ့အချိန်မှာ..
✔️အသက်ကို ဖြည်းဖြည်း ရှူသွင်းပါ။
✔️ခန္ဓာကိုယ်ကို သတိထားပါ။
✔️ရေနွေးနွေးလေး သောက်ပါ။
✔️ခဏလေး လမ်းလျှောက်ပါ။
✔️ယုံကြည်ရတဲ့သူနဲ့ စကားပြောပါ။
ခန္ဓာကိုယ် ငြိမ်သက်လာတာနဲ့အမျှ စိတ်လည်း တဖြည်းဖြည်း ငြိမ်လာတတ်ပါတယ်။

🔰အဆင့် (၇) — ကိုယ့်ကိုယ်ကိုယ် နူးညံ့စွာ ပြောပေးပါ။
နောက်ဆုံးမှာ ကိုယ့်ကိုယ်ကိုယ် ဒီလိုပြောပေးပါ။

"အခု ငါ စိုးရိမ်နေတာကို သတိထားမိတယ်။ ဒီခံစားချက်ကို နားလည်တယ်။ ဒါဟာ ထာဝရမဟုတ်ဘူး။ ငါ ဒီအခြေအနေကို အေးအေးဆေးဆေး ဖြတ်ကျော်နိုင်ပါတယ်။" လို့ ပြောပေးပါ။

စိုးရိမ်ပူပန်မှုက သင့်ဘဝရဲ့ အစိတ်အပိုင်းတစ်ခုသာ ဖြစ်ပါတယ်။ သင့်ရဲ့ စိုးရိမ်ပူပန်မှုကို သင်ကိုယ်တိုင်နားလည်လာလေလေ၊ လက်ခံနိုင်လာလေလေ၊ သူ့ရဲ့ ပြင်းထန်မှုကလည်းတဖြည်းဖြည်း လျော့ကျလာပါလိမ့်မယ်။

တစ်ခုရှိတာက ဒီစိုးရိမ်ပူပန်မှုက သင့်ရဲ့နေ့စဉ်ဘဝ၊ အလုပ်၊ ပညာရေး ဒါမှမဟုတ် လူမှုဆက်ဆံရေးတွေကို ထိခိုက်လာတဲ့အထိ ဖြစ်လာရင်တော့ စိတ်ပိုင်းဆိုင်ရာကျွမ်းကျင်သူ နဲ့ ဆွေးနွေးတိုင်ပင်သင့်ပါတယ်ရှင့်။

လူတိုင်း စိတ်အေးချမ်းပြီး ကျန်းမာတဲ့ဘဝကို ပိုင်ဆိုင်နိုင်ကြပါစေရှင့်။

မိမိတို့ရဲ့ စိတ်ပိုင်းဆိုင်ရာ အခက်အခဲများကို လုံခြုံစွာ ရင်ဖွင့်ဆွေးနွေးလိုသူများအတွက် TK Counselling Service တွင် Mental Health Counselling Package စီစဉ်ပေးထားရှိပါတယ်ရှင့်။

အသေးစိတ် သိရှိလိုပါက Page Messenger မှတစ်ဆင့် ဆက်သွယ်မေးမြန်းစုံစမ်းနိုင်ပါတယ်ရှင့်။

👩‍🎓Dr.Khin Aye Soe
(Counselling Psychologist)

Narcissist မှန်ရင်...သင် ကောင်းကောင်း လုပ်ရင်လည်း ဝေဖန်တယ်။သင် မှားရင်လည်း ဝေဖန်တယ်။သင် ဘာမှ မလုပ်ရင်လည်း ဝေဖန်တယ်။သင်ဘယ...
11/07/2026

Narcissist မှန်ရင်...
သင် ကောင်းကောင်း လုပ်ရင်လည်း ဝေဖန်တယ်။
သင် မှားရင်လည်း ဝေဖန်တယ်။
သင် ဘာမှ မလုပ်ရင်လည်း ဝေဖန်တယ်။

သင်ဘယ်လောက်ပဲ ကြိုးစားကြိုးစား...

သူတို့အတွက် သင်က "လုံလောက်မှု" မရှိ‌နေပါဘူး။

သူတို့က...

❌ သင်လုပ်သမျှကို ဝေဖန်တယ်

"မင်း ဒီလိုလုပ်တာ မှားတယ်"
"မင်း ဒီလိုပြောတာ မကောင်းဘူး"
"မင်း ဒီလိုဝတ်တာ မလိုက်ဖက်ဘူး"
"မင်း ဒီလိုစားတာ မကျန်းမာဘူး"

သင် ဘာလုပ်လုပ် သူ့အတွက် မှားနေတယ်။

❌ သင့်ကို တခြားသူတွေနဲ့ နှိုင်းယှဉ်တယ်

"မင်း အစ်မက မင်းထက် ပို‌တော်တယ်"
"မင်း သူငယ်ချင်းက မင်းထက် ပိုအောင်မြင်တယ်"
"သူတို့တွေက မင်းလို မဟုတ်ဘူး"

ဒါက သင့်ကို မလုံခြုံအောင်၊ မနာလိုအောင် လုပ်တာပါ။

❌ သင့်ရဲ့ အားနည်းချက်တွေကိုပဲ ထောက်ပြတယ်

သင့်ရဲ့အမှားတွေ၊ အားနည်းချက်ကိုပဲ ရွေးပြောတယ်။
သင်ကောင်းတာတွေကို ဘယ်တော့မှ ပြောလေ့မရှိဘူး။

ဥပမာ - သင်က ၉၀% ကောင်းကောင်းလုပ်ထားပေမယ့်...

သူက ၁၀% မှားတဲ့အပိုင်းကိုပဲ ဆွဲပြီးဝေဖန်‌ပါလိမ့်မယ်။

❌ "ငါ မင်းအတွက် ကောင်း‌စေချင်လို့ စေတနာနဲ့ပြောတာ"

သင်စိတ်ဆိုးတဲ့အခါ...

သူက "ငါ မင်းအတွက် ကောင်း‌စေချင်လို့ပြောတာ" လို့ပြန်ပြောတယ်။

ဒါက သူ့ရဲ့ဝေဖန်မှုကို တရားမျှတအောင်လုပ်တဲ့ နည်းလမ်းပါ။

Narcissist ရဲ့ နေ့စဉ်ဝေဖန်ခြင်းကို ခံ‌‌နေရသူမှာ

📌ကိုယ့်ကိုယ်ကိုယ် ယုံကြည်မှု ပျက်စီးလာခြင်း
📌စိုးရိမ်စိတ်၊ စိတ်ကျရောဂါ ဖြစ်လာခြင်း
📌ကိုယ်ပိုင်ဆန္ဒ ပျောက်ဆုံးလာခြင်း
📌ကိုယ့်ရဲ့ထင်မြင်ချက်ကို အဆက်မပြတ် သံသယဝင်ခြင်း
📌သူ့အပေါ် စွဲလမ်းလာခြင်း၊ ခွဲခွာ၍မရခြင်း
📌ကြာလာရင် C-PTSD ထိဖြစ်လာနိုင်ခြင်း

ဒါကြောင့် သင်လုပ်သင့်တာက...

✅ သူ့ရဲ့ဝေဖန်မှုတွေကို ကိုယ်ပိုင်မယူပါနဲ့

သူက "မင်း ဒီလိုလုပ်တာ မှားတယ်" ဆိုရင်...

👉 သင့်ကိုယ်သင် ပြန်ပြောပါ - "ဒါက သူ့ရဲ့အမြင်သက်သက်ပါ။

✅ သင့်ရဲ့ ကောင်းတဲ့အပိုင်းတွေကို သတိရပါ

သူက သင့်ရဲ့အားနည်းချက်တွေကိုပဲ ပြောပေမယ့်...

👉 သင့်ကိုယ်သင် သင့်ရဲ့ ကောင်းတဲ့အပိုင်းတွေကို သတိရပေးပါ။

"ငါ့မှာ ဒီလိုကောင်းတဲ့အချက်‌တွေ ရှိတယ်" ဆိုတာ အမြဲ သတိရပေးပါ။

✅ သူ့ကို စကားများများမပြောပါနဲ့

သူက ဝေဖန်နေရင်...

👉 "ဟုတ်ကဲ့" လို့ပဲ အတိုချုံးပြန်ဖြေပြီး ထွက်သွားလိုက်ပါ။

သူနဲ့ ငြင်းခုန်တာက အချိန်ကုန်ပါတယ်။ သူက ဘယ်တော့မှ ရပ်မှာမဟုတ်ပါဘူး။

✅ သင့်ကိုယ်သင် မေးပါ...

"ဒီလူက ငါ့ဘဝမှာ ဘာကောင်းကျိုးပေးလဲ။"

အဖြေက "ဘာမှမပေးဘူး" ဆိုရင်...

သင်နဲ့သူ့ကြားမှာ အကွာအဝေးယူဖို့ မီးနီပြထားပါ။

✅ သင့်ကိုယ်သင် တန်ဖိုးထားပါ

Narcissist တွေရဲ့ ဝေဖန်မှုတွေကြောင့် သင့်ရဲ့တန်ဖိုးကို ချပစ်လိုက်ဖို့ မလိုပါဘူး။

သင့်တန်ဖိုးက သင့်ဆီမှာသာ ရှိပါတယ်။

သတိရပါ...

Narcissist တွေရဲ့ဝေဖန်မှုတွေ ဆိုတာ သင့်ကို ကောင်းစေချင်လို့ ချစ်လို့ စေတနာနဲ့ပြောတာ မဟုတ်ပါဘူး။

အမှန်တရား

သင့်ကိုချစ်တဲ့သူက သင့်ကို အမြဲအားပေးတယ်။
သင့်ကိုချစ်တဲ့သူက သင့်ရဲ့လုပ်ရပ်ကောင်းတွေကို အသိအမှတ်ပြုပေးတယ်။
သင့်ကိုချစ်တဲ့သူက သင့်ကို ကြီးထွားလာအောင် အမြဲကူညီ‌ပေးပါတယ်။

ဒါကြောင့် Narcissist တွေရဲ့ ဝေဖန်‌မှုအောက်မှာ သင်ကိုယ်တိုင် ပြိုလဲ မသွားမိပါ‌စေနဲ့။

သင်ကိုယ်တိုင်က လုံလောက်‌နေပြီးသား၊တန်ဖိုးရှိနေပြီးသားပါ‌နော်။ 🌸

လူတိုင်း စိတ်ရော ကိုယ်ပါ ကျန်းမာကြပါစေရှင်။

Narcissist တွေရဲ့ Abuse လုပ်ခြင်းကို ခံနေရပါက TK Counselling Service တွင် Mental Health Counselling Package စီစဉ်ပေးထားတာ ရှိပါတယ်ရှင့်။

အသေးစိတ်သိလိုပါက Page Messenger မှတစ်ဆင့် ဆက်သွယ်မေးမြန်းစုံစမ်းနိုင်ပါတယ်ရှင့်။

👩‍🎓 Dr.Khin Aye Soe
(Counselling Psychologist)




Relationship မှာ ဒီအခြေအနေမျိုး ကြုံ‌နေရရင် သတိ‌ထား‌‌ပါ‌နော်။ ပထမ အစပိုင်းမှာ သူက သင့်ကို အရမ်းကောင်းကောင်းမွန်မွန် ဆက်ဆ...
08/07/2026

Relationship မှာ ဒီအခြေအနေမျိုး ကြုံ‌နေရရင် သတိ‌ထား‌‌ပါ‌နော်။ ပထမ အစပိုင်းမှာ သူက သင့်ကို အရမ်းကောင်းကောင်းမွန်မွန် ဆက်ဆံတယ်။

သူက...
သင့်ကို နေ့တိုင်း ချီးကျူးတယ်
သင့်အတွက် လက်ဆောင်တွေ အမြဲပေးတယ်
သင့်ကို "မင်းက ငါ့ဘဝမှာ အကောင်းဆုံးလူပဲ" လို့ပြောတယ်
သင့်ကို အချိန်ပြည့်အာရုံစိုက်တယ်
သင့်ကို "မင်းမရှိရင် ငါမနေနိုင်ဘူး" လို့ပြောတယ်

သင်လည်း "ဝိုး... ဒီလူက ငါ့ကို တကယ်ချစ်တာပဲ" လို့ ထင်မိတယ်။

ဒါပေမယ့်... ဒါက စိတ်ပညာအရ "Love Bombing" လို့ခေါ်တဲ့ တစ်ဖက်လူကို စွဲလမ်းလာဖို့ ထိန်းချုပ်တဲ့နည်းတစ်ခုသာ ဖြစ်ပါတယ်။

ဘာကြောင့် ဒီလိုလုပ်တာလဲ...
သင်က သူ့အပေါ် စွဲလန်းအောင်လို့ပါ။
ဘာလို့ဆို..
သင်သူ့အပေါ် စွဲလန်းလာလေလေ...
သူက သင့်ကို ထိန်းချုပ်ဖို့ ပိုလွယ်ကူလွယ်လို့ပါပဲ။

Love Boming ဆိုတာ တစ်ဖက်လူကို ကိုယ့်ပစ်မှတ်ထဲ ရောက်လာဖို့ သွေးဆောင်ဖျားယောင်းခြင်းသာ ဖြစ်ပါတယ်။

⬇️ Love Bombing လုပ်တတ်တဲ့သူ‌တွေရဲ့ ချဉ်းကပ်ပုံ အဆင့်ဆင့်

🔴 အဆင့် ၁ - အလွန်အကျွံ ချီးကျူးခြင်း

သူက သင့်ကို ဒီလိုစကားတွေ ပြောတယ်...

"မင်းက ငါ့ဘဝမှာ အကောင်းဆုံးလူပဲ"
"မင်းလိုလူ ဒီကမ္ဘာမှာ မရှိဘူး"
"ငါ မင်းကို ပထမဆုံးတွေ့ကတည်းက ချစ်မိသွားတယ်"
"မင်းက ပြီးပြည့်စုံတဲ့လူပဲ"

ဒါတွေက သင့်ကို Unique ဖြစ်စေတယ်၊ Special ဖြစ်တယ် ဆိုတဲ့ ခံစားချက်ကို ဖန်တီးပေးတယ်။

🔴 အဆင့် ၂ - အချိန်ပြည့်အာရုံစိုက်ခြင်း

သူက...

နေ့တိုင်း ဖုန်းဆက်တယ်
နေ့တိုင်း မက်ဆေ့ချ်ပို့တယ်
သင့်ကို အမြဲတွေ့ချင်တယ်
သင့်ရဲ့အချိန်တိုင်းကို သူနဲ့ကုန်ဆုံးစေချင်တယ်

သင်လည်း "သူက ငါ့ကို တကယ်ဂရုစိုက်တာပဲ" လို့ ထင်မိတယ်။

🔴 အဆင့် ၃ - လက်ဆောင်တွေနဲ့ ဖျားယောင်းခြင်း

သူက...

ဈေးကြီးတဲ့ လက်ဆောင်တွေ ပေးတယ်
ခရီးစဉ်တွေ စီစဉ်ပေးတယ်
သင့်အတွက် ငွေကုန်ကြေးကျခံတယ်
သင့်ကို အံ့အားသင့်စေတဲ့ အရာတွေ လုပ်ပေးတယ်

ဒါတွေက သင့်ကို "သူက ငါ့အတွက်ဆို ဘာမှ မနှမြောဘူး" လို့ ခံစားရစေတယ်။

သင်က တဖြည်းဖြည်းနဲ့ ... ဒီလူက "ငါ့ကို တော်တော်တန်ဖိုးထားတာပဲ" လို့ မြင်နေမိတယ်။

🔴 အဆင့် ၄ - သင့်ကို သူ့အပေါ် မှီခိုလာအောင် လုပ်ခြင်း

ဒီအချိန်မှာ သင်က...

သူ့ကို အမြဲစဉ်းစားနေတယ်
သူလုပ်ပေးတာတွေအားလုံးမြင်ယောင်နေတယ်
သူ့မက်ဆေ့ချ်ကို စောင့်နေတယ်
သူမရှိရင် ဘယ်လိုနေရမှန်းမသိဘူး
သူ့ကို အားကိုးလာတယ်

တဖြည်းဖြည်းနဲ့ သင်က သူလိုချင်တဲ့နေရာ‌ကို ရောက်လာတယ်။

အဲ့နောက်မှာ ဆက်ဖြစ်လာတာက...

🔴 အဆင့် ၅ - ရုတ်တရက် အေးစက်သွားခြင်း

သူက ....သင့်ကို
ချီးကျူးတာတွေ ရပ်သွားတယ်
အာရုံစိုက်တာတွေ လျော့သွားတယ်
အချိန်မပေးတော့ဘူး
ဝေဖန်စပြုလာတယ်

"သင်က သူ့ကို စိတ်ပျက်စေတယ်" လို့ ခဏခဏ ပြောလာတယ်။
အဲ့အချိန်မှာ သင်က "ငါ ဘာမှားလို့လဲ" လို့ ခဏခဏတွေး‌မိတယ်။
အဲ့နောက် သူ့ကို ပြန်ကျေနပ်အောင်လုပ်ဖို့ သင်ပိုပြီးကြိုးစားမိလာတယ်။ နောက်ဆုံး "ငိုယိုတောင်းပန်တဲ့အထိ"ပေါ့။

🔴 အဆင့် ၆ - ပြန်လည်ချီးကျူးခြင်း

သူက ပြန်ပြီး ချီးကျူးတယ်၊ လက်ဆောင်ပေးတယ်။

သင်လည်း "အေး... သူက ငါ့ကိုတကယ်ချစ်တာပဲ" လို့ ပြန်ထင်မိတယ်။

အဲ့အချိန်တုန်းက ငါကပဲ မှားခဲ့တာနေမှာပါ ဆိုပြီး " သင့်ကိုယ်သင် လှည့်စား" ပြန်တယ်။

ဒါပေမယ့် ဒီသံသရာက ၁ ကြိမ် မဟုတ် ၂ ကြိမ် မဟုတ် ထပ်ခါထပ်ခါ ဖြစ်နေတယ်။

ချစ်လိုက် လျစ်လျူရူထားလိုက်၊ ချီးကျူးလိုက် ဝေဖန်လိုက်၊ ပေးလိုက် ယူလိုက် လုပ်နေတယ်။

အဲ့‌တာကြောင့် သင့်စိတ်တွေအရမ်း ရှုပ်ထွေးလာတယ်။

ဒီအခြေအနေမှာ သင်လုပ်သင့်တာက...

📌ချီးကျူးတာတွေကို သတိထားပါ။

တစ်ယောက်ယောက်က သင့်ကို အရမ်းချီးကျူးနေရင် "ဒါက ပုံမှန်လား" လို့ ကိုယ့်ကိုယ်ကိုယ်မေးပါ။
👉 အရမ်းကောင်းပြ‌နေတာက အန္တရာယ် ရှိတတ်ပါတယ်။

📌 အချိန်ယူပါ။

သူက မြန်မြန်ဆုံးဖြတ်ချက်ချခိုင်းရင်.. "ငါ စဉ်းစားဖို့ အချိန်လိုတယ်" လို့ပြောပါ။
👉တကယ်ချစ်တဲ့သူက သင့်ကို အချိန်ပေးပါတယ်။

📌 သင့်ရဲ့ သူငယ်ချင်းတွေကို မေးကြည့်ပါ

သူ့အကြောင်း သင့်ရဲ့ ယုံကြည်ရတဲ့သူငယ်ချင်းတွေကို မေးကြည့်ပါ..."သူငယ်ချင်းတို့ ဒီလူကို ဘယ်လိုထင်လဲ"
👉 သူတို့က သင်မမြင်တဲ့ အချက်တွေကို ပြောပြ‌ပေးနိုင်ပါတယ်။

Love Bombing ဆိုတာ တကယ့်အချစ် မဟုတ်ဘူး၊ သင့်ကို ပိုင်ဆိုင်ရဖို့အတွက် ထောင်ချောက်တစ်ခုပါ။

အဲ့လူတွေက သူတို့ မလိုချင်တော့တဲ့အခါကျရင် သင့်ဆီက ထွက်သွားဖို့ ဝန်မလေးတတ်သူ‌တွေပါ။

သတိရပါ...
တကယ့်အချစ်က ဖြည်းဖြည်းနဲ့မှန်မှန်သွားပါတယ်။
တကယ့်အချစ်က သင့်ကို ထိန်းချုပ်မှု မရှိပါဘူး။
တကယ့်အချစ်က သင့်ကို လွတ်လပ်စွာ နေခွင့်ပေးပါတယ်။
တကယ့်အချစ်က သင့်ကို လေးစားမှု ရှိပါတယ်။
တကယ့်အချစ်က သင့်စိတ်ကို ဒွိဟဖြစ်စေတာ၊ သံသယဖြစ်စေတာတွေ မလုပ်ပါဘူး။
တကယ့်အချစ်က ရိုးသားမှု ရှိပါတယ်။

ဒါကြောင့် သင့်ဆီကို ရောက်လာတဲ့အချစ်က အရမ်းမြန်ပြီး ၊ အရမ်း Over ဖြစ်လွန်းရင် သတိထားပါ။ ဘာလို့ဆို အဲ့အရာရဲ့နောက်ကွယ်မှာ ရည်ရွယ်ချက်တစ်ခု ရှိနေတတ်လို့ပါ။

ဘာ‌ကြောင့်လဲ သိချင်ရင်တော့...
အချိန် ၁ ခု စောင့်ကြည့်လိုက်ပါ။
"အဖြေ ပေါ်လာပါလိမ့်မယ်"

Toxic/Abusive relationship ကြောင့် စိတ်ဒဏ်ရာများကို ကုစားလိုသူတွေအတွက် TK Counselling Service Relationship Counselling Package စီစဉ်ပေးထားတာ ရှိပါတယ်ရှင့်။

အသေးစိတ်သိလိုပါက page messenger မှတစ်ဆင့် ဆက်သွယ်မေးမြန်းစုံစမ်းနိုင်ပါတယ်ရှင့်။

👩‍🎓 Dr.Khin Aye Soe
(Counselling Psychologist)



"Trauma Bonding" ဆိုတာ အပေါ်ယံကြည့်ရင် သာမန်ဆက်ဆံရေးတစ်ခုလိုပဲ ထင်ရပေမယ့် သင့်ကို စိတ်ဒဏ်ရာ‌ အပေးနိုင်ဆုံးနဲ့ အန္တရာယ်အရ...
04/07/2026

"Trauma Bonding" ဆိုတာ အပေါ်ယံကြည့်ရင် သာမန်ဆက်ဆံရေးတစ်ခုလိုပဲ ထင်ရပေမယ့် သင့်ကို စိတ်ဒဏ်ရာ‌ အပေးနိုင်ဆုံးနဲ့ အန္တရာယ်အရှိဆုံးချည်‌နှောင်မှုပါ။

"Trauma Bonding ပုံစံတွေမှာ...
သူက...
သင့်ကို ချစ်တယ်လို့ပြောပြီး နာကျင်စေတဲ့အရာတွေ အမြဲလုပ်တယ်
သင့်ကို ဂရုစိုက်တယ်လို့ပြောပြီး အမြဲထိန်းချုပ်တယ်
သင့်ကို နာကျင်စေပြီးမှ "ငါမင်းကိုချစ်လို့ပါ" "ငါမင်းအတွက်ပဲ" လို့ ပြန်ပြောတယ်
သင့်ကို စိတ်ဆိုးအောင်လုပ်ပြီးမှ လက်ဆောင်တွေပေးတယ်၊ ချစ်တယ်လို့ပြောတယ်
သင့်ကို ငိုအောင်လုပ်ပြီးမှ ပွေ့ဖက်တယ်၊ နှစ်သိမ့်တယ်

သင်လည်း...
"သူဒီလိုလုပ်တာ ငါ့ကိုချစ်လို့ပဲ" နောက်ဆုံးတော့ " သူပြောင်းလဲလာမှာပါ" ဆိုပြီး စဉ်းစားမိလာတယ်။

ဘာကြောင့် ဒီလိုဖြစ်လာရတာလဲဆိုရင် ...

စိတ်ပညာအရ လူတွေက ပြင်းထန်တဲ့ စိတ်ခံစားမှုတွေကို ကြုံရတဲ့အခါ (အထူးသဖြင့် နာကျင်မှုနဲ့ ချစ်ခြင်းကြားက) ဦးနှောက်ထဲမှာ Dopamine နဲ့ Cortisol ဆိုတဲ့ ဟော်မုန်းတွေ ထွက်လာပြီး စွဲလမ်းစေတဲ့ သက်ရောက်မှုကို ဖြစ်စေပါတယ်။

ဒါက လောင်းကစားစွဲလမ်းခြင်း(Gambling Addiction) နဲ့ ဆင်တူပါတယ်။ တစ်ခါတစ်ခါ ပေးတဲ့ဆုလာဘ်က သင့်ကို ဆက်ပြီးကစားနေအောင်လုပ်ပြီး ရှုံးတာတွေကိုတော့ မေ့သွားစေပါတယ်။

ဒီဆက်ဆံရေးမှာလည်း နာကျင်မှုကြားထဲက "ချစ်ခြင်းအစအနလေးတွေက " သင့်ကို ဆက်နေဖို့ ဆွဲဆောင်ထားခြင်းခံရတာပါ။ ဒါက Trauma Bonding ပါပဲ။

Trauma Bonding ဖြစ်လာဖို့ လူနှစ်ဦးကြားမှာ ဒီလိုအခိုက်အတန့်တွေ ကြာရှည်စွာ ရှိခဲ့နိုင်ပါတယ်။

အစပိုင်းမှာ သူက သင့်ကို အလွန်အကျွံချစ်ခင်ဂရုစိုက်ပြီး အာရုံစိုက်မှုပေးတယ်။ နောက်ပိုင်းမှာ အကြောင်းမဲ့ သင့်ကို နာကျင်စေတဲ့ အပြုအမူတွေ လုပ်လာတယ်၊ ပြီးရင် သူက တောင်းပန်တယ်၊ ပြန်ချစ်တယ်၊ ပြန်ဂရုစိုက်တယ်။ ဒီအချိန်မှာ သင့်စိတ်ထဲမှာ "သူက ငါ့ကိုချစ်လို့ပဲ ဒီလိုလုပ်မိတာ" ဆိုတဲ့ ခံစားချက် စတင်ဖြစ်ပေါ်လာတယ်။

နောက်တော့ သူ့ရဲ့ စိတ်နေစိတ်ထားက ခန့်မှန်းမရတော့တဲ့အခါ သင်က သူ့ကို ကြိုတင်တွက်ဆဖို့ ကြိုးစားမိလာတယ်။ "ဒီနေ့ သူ ဘာလို့ ဒီလိုပြောတာလဲ" "ငါ ဘာလုပ်ရင် သူစိတ်ကောင်းဝင်မလဲ" "သူ့ကို ဘယ်လိုကျေနပ်အောင်လုပ်ရမလဲ" ဆိုပြီး သူ့ရဲ့ စိတ်ခံစားချက်တွေကို ထိန်းညှိဖို့ ကြိုးစားလာတယ်။ သူကတော့ ဘယ်လိုမှ ခန့်မှန်းလို့မရတဲ့သူတစ်ယောက်လို ဖြစ်လာ‌‌နေတယ်။

ဒီအချိန်မှာ သင်က သူ့ကို အမြဲစဉ်းစားနေတယ်၊ သူ့ရဲ့အာရုံစိုက်မှုကို အမြဲတောင့်တနေတယ်။ သူမရှိရင် ဘယ်လိုနေရမှန်းမသိဘူး၊ သူ့ကို ကျေနပ်အောင်လုပ်ဖို့ ကိုယ့်ကိုယ်ကိုယ် စွန့်လွှတ်ပြီး သူ့အပေါ် စိတ်ပိုင်းဆိုင်ရာ မှီခိုလာတယ်။ သူကတော့ သင့်ကို နာကျင်စေတာနဲ့ ချစ်တာကို ဆက်လုပ်မြဲ ဆက်လုပ်နေတယ်။

နောက်ဆုံးမှာ သင်က သူ့ရဲ့ ဆိုးညစ်တဲ့အပြုအမူတွေအတွက် ကိုယ့်ကိုယ်ကိုယ် ဆင်ခြေပေးလာတယ်။
"သူ့မှာ ငယ်ဘဝဒဏ်ရာတွေရှိတယ်" "သူက ဒီလိုပဲ၊ ငါနားလည်‌ပေးရမယ်" "သူက ငါ့ကိုချစ်လို့ပဲ ဒီလိုဖြစ်တာ" ဆိုပြီး အကြောင်းပြချက်တွေ ရှာပေးနေတယ်။ သူကတော့ ဘယ်တော့မှ မပြောင်းလဲလာဘူး။

နောက်ပိုင်းမှာ သင်ကပဲ နာကျင်ရတဲ့သူလုံးလုံး ဖြစ်သွား‌တော့တယ်။အဲ့အချိန်မှာ သူ့ကို ခွဲထွက်ဖို့ ကြိုးစားပေမယ့်မအောင်မြင်‌‌ဘူး။ သူ့လုပ်ရပ်‌တွေကို မုန်းပေမယ့် ချစ်နေတုန်းပဲ၊ သူ့ကို ထားခဲ့ချင်ပေမယ့် သူ့ဆီပြန်သွားနေတုန်းပဲ၊ ခွဲထွက်ပြီးရင်လည်း ပြန်လိုချင်နေတုန်းပဲ။

ဒီအခြေအနေကြောင့် သင်က စိတ်ပင်ပန်း လူပင်ပန်း ဖြစ်နေတယ်ဆိုရင်...

💈"ဒါဟာ အချစ်မဟုတ်ဘူး" ဆိုတာကို အသိအမှတ်ပြုပါ။

ချစ်ခြင်းက နာကျင်မှုကို မဖြစ်စေပါဘူး။ သူက သင့်ကို ခဏခဏနာကျင်စေပြီး ချစ်တယ်လို့ပြောရင်... ဒါချစ်တာ မဟုတ်ပါဘူး၊ စိတ်ဒဏ်ရာပေးနေတာပါ။

💈အဆက်အသွယ်ဖြတ်‌‌ပါ။

Trauma Bonding ကနေ လွတ်မြောက်ဖို့ အထိရောက်ဆုံးနည်းလမ်းက အဆက်အသွယ်ဖြတ်တာပါ။

ဖုန်းနံပါတ်ပိတ်ပါ၊ Social Media ပိတ်ပါ၊ သူ့ဆီကနေ သတင်းတွေ မကြားရအောင်လုပ်ပါ၊ ဒါက ခက်ခဲပေမယ့် လွတ်မြောက်ဖို့ တစ်ခုတည်းသော နည်းလမ်းပါ။

💈 သင့်ရဲ့ ခံစားချက်တွေကို နားလည်ပေးပါ။

Trauma Bonding ကနေ ထွက်လာတဲ့အခါ သင်က...
ဝမ်းနည်းတာ၊ ဒေါသထွက်တာ၊ စိတ်ရှုပ်ထွေးတာ၊ အပြစ်ရှိတယ်လို့ခံစားရတာတွေ ဖြစ်နိုင်တယ်။ ဒါတွေအားလုံးက ပုံမှန်ပါ။ ကိုယ့်ကိုယ်ကိုယ် အချိန်ပေးပါ။

💈သင့်ရဲ့ ကိုယ်ပိုင်အ‌နေအထားကို ပြန်တည်ဆောက်ပါ။

ဒီဆက်ဆံရေးမှာ သင်က ကိုယ့်ကိုယ်ကိုယ် မေ့သွားခဲ့နိုင်တယ်။ အခုပြန်တည်ဆောက်ပါ...
✔️ကိုယ်ကြိုက်တဲ့အရာတွေ ပြန်လုပ်ပါ
✔️ကိုယ့်ရဲ့ ဝါသနာတွေကို ပြန်ရှာပါ
✔️ကိုယ့်ကိုယ်ကိုယ် ဂရုစိုက်ပါ
✔️ကိုယ့်ရဲ့ အိပ်မက်တွေကို ပြန်မြင်ယောင်ပါ

💈လိုအပ်ရင် ပရော်ဖက်ရှင်နယ် အကူအညီယူပါ။

Trauma Bonding ဆိုတာ စွဲလမ်းမှုတစ်မျိုးပါ။ ဒါကကိုယ်တစ်ယောက်တည်း ဖြေရှင်းဖို့ ခက်ခဲနိုင်ပါတယ်။ သင်ကိုယ်တိုင်က ဒီစွဲလမ်းမှုကနေ လွတ်မြောက်ဖို့အတွက် ကျွမ်းကျင်သူတွေရဲ့ အကူအညီ လိုအပ်နိုင်ပါတယ်။

သတိရပါ...

Trauma Bonding ဆိုတာ ချစ်ခြင်း မဟုတ်ပါဘူး၊ နာကျင်မှုကြားက တစ်ခါတစ်ခါ ရလာတဲ့ ဂရုစိုက်မှု၊နှစ်သိမ့်‌မှု‌တွေ ကို စွဲလမ်းခြင်းပါ။

သင်က သူ့ကို ချစ်လို့ သူ့ဆီကနေ မထွက်လာနိုင်တာ မဟုတ်ပါဘူး၊ သင့်ရဲ့ ဦးနှောက်က ဒီစိတ်ခံစားမှုတွေကို စွဲလမ်းသွားလို့ ထပ်ခါတလှည့်လှည့် ချည်‌နှောင်ခြင်း ခံနေရတာပါ။

စိတ်ဒဏ်ရာနဲ့ချည်‌နှောင်တဲ့ကြိုးက နာကျင်နေမှန်းသိသိနဲ့ ဆွဲထားချင်‌နေတုန်းပဲ....

ဒီ စွဲလမ်းမှု၊ ချည်နှောင်မှုတွေကို စနစ်တကျ ကုစားဖို့ TK Counselling Service မှာ Mental Health Counselling Package / Relationship Counselling Package တွေ စီစဉ်ပေးထားတာ ရှိပါတယ်ရှင့်။

အသေးစိတ်သိလိုပါက Page Messenger မှတစ်ဆင့် ဆက်သွယ်မေးမြန်းစုံစမ်းနိုင်ပါတယ်ရှင့်။

👩‍🎓 Dr.Khin Aye Soe
(Counselling Psychologist)


ဆက်ဆံရေးတိုင်းမှာ သဘောထားကွဲလွဲမှုတွေ၊ နားလည်မှုလွဲတာ၊ ပဋိပက္ခတွေ ဆိုတာ ရှိတတ်စမြဲပါ။ ဒါက ပုံမှန်ပါပဲ။သို့သော် အရေးကြီးတ...
01/07/2026

ဆက်ဆံရေးတိုင်းမှာ သဘောထားကွဲလွဲမှုတွေ၊ နားလည်မှုလွဲတာ၊ ပဋိပက္ခတွေ ဆိုတာ ရှိတတ်စမြဲပါ။ ဒါက ပုံမှန်ပါပဲ။

သို့သော် အရေးကြီးတာတစ်ခုက ပဋိပက္ခကို ရှောင်နေတာမျိုး မဟုတ်ဘဲ ကျန်းမာတဲ့နည်းနဲ့ ဖြေရှင်းတတ်ဖို့ လိုပါမယ်။

ကြုံရတဲ့ ပဋိပက္ခ‌တွေကို ဖြေရှင်းတဲ့အခါမှာ...

တစ်ယောက်နဲ့တစ်ယောက် ဖြေရှင်းနည်းပုံစံတွေ တူကြမှာ မဟုတ်ပါဘူး။

ဒါကို နားလည်ထားရင် အငြင်းပွားမှုတွေ နည်းလာပြီး ပိုမိုကောင်းမွန်တဲ့ ဆက်ဆံရေးကို တည်ဆောက်‌နိုင်ပါလိမ့်မယ်။

ပဋိပက္ခ‌တွေကို ဖြေရှင်းနည်းပုံစံ (၅) မျိုး

တစ်ခုချင်းစီမှာ အားသာချက်၊ အားနည်းချက်တွေ ရှိပါတယ်။ ဘယ်အခြေအနေမှာ ဘယ်ပုံစံက အသင့်တော်ဆုံးလဲ ဆိုတာကိုပါ သိရှိထားဖို့ ရေးပေးလိုက်ပါတယ်နော်။

(၁) ယှဉ်ပြိုင်ခြင်း (Competing - Shark Style)

ဒီပုံစံက ကိုယ့်ရဲ့ လိုအပ်ချက်နဲ့ ရပ်တည်ချက်ကိုသာ အဓိကထားပြီး အခြားသူရဲ့ဘက်ကို သိပ်ထည့်မတွက်တတ်ပါ။ "ငါမှန်တယ်၊ မင်းမှားတယ်" ဆိုတဲ့ သဘောမျိုးနဲ့ အနိုင်ယူဖို့သာ ရည်ရွယ်တတ်ပါတယ်။

✔️ဘယ်အချိန်သုံးသင့်လဲ- အရေးပေါ်အခြေအနေ၊ မရှိမဖြစ်လိုအပ်တဲ့ ဆုံးဖြတ်ချက်တွေ၊ ကိုယ့်ရဲ့အခွင့်အရေးကို ကာကွယ်ရမယ့်အချိန်တွေမှာ သင့်တော်ပါတယ်။

➡️ သတိထားရမယ့်အချက်- ဆက်ဆံရေးကို ထိခိုက်စေနိုင်ပြီး ရေရှည်မှာ အဆင်မပြေဖြစ်တတ်ပါတယ်။

(၂) ရှောင်ရှားခြင်း (Avoiding - Turtle Style)
ဒီပုံစံက ပဋိပက္ခကို ရင်ဆိုင်ဖို့ ငြင်းဆန်ပြီး ခေါင်းစဉ်ပြောင်းတာ၊ တိတ်နေတာ၊ ဒါမှမဟုတ် အခြေအနေကနေ ထွက်ခွာသွားတာမျိုး လုပ်တတ်ပါတယ်။

✔️ဘယ်အချိန်သုံးသင့်လဲ- ကိစ္စက သိပ်အရေးမကြီးတဲ့အခါ၊ စိတ်ခံစားချက်တွေ အင်မတန်ပြင်းထန်နေချိန် အေးအေးဆေးဆေးဖြစ်ဖို့ အချိန်ယူချင်တဲ့အခါမျိုးမှာ သင့်တော်ပါတယ်။

➡️ သတိထားရမယ့်အချက်- အမြဲရှောင်နေရင် ပြဿနာတွေ ပိုကြီးလာနိုင်ပြီး နားလည်မှုလွဲတာတွေ ဖြစ်လာနိုင်ပါတယ်။

(၃) လိုက်လျောခြင်း (Accommodating - Teddy Bear Style)

ဒီပုံစံက ကိုယ့်ထက် အခြားသူရဲ့ လိုအပ်ချက်ကို ဦးစားပေးပြီး ကိုယ့်ရဲ့ဆန္ဒကို ခေါက်ထားလိုက်တာပါ။ ဟုတ်တယ် "မင်းပြောတာပဲ မှန်တယ်" ဆိုပြီး လိုက်လျောပေးလိုက်တာပါ။

✔️ဘယ်အချိန်သုံးသင့်လဲ- ကိုယ့်ထက် အခြားသူပိုအရေးကြီးတဲ့အခါ၊ ဆက်ဆံရေးကို ထိန်းသိမ်းဖို့ အဓိကကျတဲ့အခါ၊ ကိုယ်က အမှန်တကယ် အမှားဖြစ်နေတယ်လို့ သိတဲ့အခါမျိုးမှာ သင့်တော်ပါတယ်။

➡️ သတိထားရမယ့်အချက်- အမြဲလိုက်လျောနေရင် ကိုယ့်ကိုယ်ကိုယ် တန်ဖိုးမရှိတော့ဘူးလို့ ခံစားလာရနိုင်ပါတယ်။ ကိုယ့်ရဲ့စိတ်ဆန္ဒကို အမြဲ ဖိနှိပ်ထားမိရင် ကြာလာရင် မွန်းကြပ်လာပါလိမ့်မယ်။

(၄) အပေးအယူလုပ်ခြင်း (Compromising - Fox Style)

ဒီပုံစံက နှစ်ဖက်စလုံး တစ်ဝက်စီ လျှော့ပေးလိုက်ပြီး အလယ်အလတ်နေရာတစ်ခုကို ရှာတွေ့ဖို့ ကြိုးစားတာပါ။ "မင်းတစ်ဝက် ငါတစ်ဝက် လျှော့လိုက်ရအောင်" ဆိုတဲ့ သဘောပါ။

✔️ဘယ်အချိန်သုံးသင့်လဲ- အချိန်အကန့်အသတ်ရှိတဲ့အခါ၊ ယာယီဖြေရှင်းချက်တစ်ခု လိုအပ်တဲ့အခါ၊ နှစ်ဖက်စလုံးအတွက် တန်းတူအရေးပါတဲ့အခါမျိုးမှာ သင့်တော်ပါတယ်။

➡️ သတိထားရမယ့်အချက်- နှစ်ဖက်စလုံးကအပြည့်အဝ စိတ်ကျေနပ်မှု ရှိချင်မှ ရှိကြပါလိမ့်မယ်။

(၅) ပူးပေါင်းဆောင်ရွက်ခြင်း (Collaborating - Owl Style)

ဒီပုံစံက အကောင်းဆုံး ဖြေရှင်းနည်းပါ။ နှစ်ဖက်စလုံးရဲ့ လိုအပ်ချက်တွေကို အပြည့်အဝဖြည့်ဆည်းပေးနိုင်မယ့် win-win ဖြေရှင်းချက်ကို ရှာဖွေတာပါ။

ပွင့်လင်းတဲ့ ဆက်သွယ်မှု၊ နားထောင်မှုနဲ့ တီထွင်ဖန်တီးနိုင်တဲ့ အတွေးအမြင်တွေ လိုအပ်ပါတယ်။

✔️ဘယ်အချိန်သုံးသင့်လဲ- ရေရှည်အတွက် အရေးကြီးတဲ့ ဆုံးဖြတ်ချက်တွေ၊ နှစ်ဖက်စလုံးရဲ့ အမြင် ကွဲပြားပေမယ့် ပေါင်းစပ်လို့ရတဲ့အခါ၊ ဆက်ဆံရေးကို ပိုခိုင်မာစေချင်တဲ့အခါမျိုးမှာ သင့်တော်ပါတယ်။

➡️ သတိထားရမယ့်အချက်- အချိန်နဲ့ စွမ်းအင်အများကြီး လိုအပ်ပြီး အားလုံးက ပူးပေါင်းဆောင်ရွက်ဖို့ ဆန္ဒရှိမှသာ ဖြစ်နိုင်ပါတယ်။

ပူးပေါင်းဆောင်ရွက်ခြင်းက ရေရှည်မှာ အကျိုးအရှိဆုံးဖြစ်ပြီး ဆက်ဆံရေးကိုလည်း ခိုင်မာစေပါတယ်။

ဖြေရှင်းနည်းပုံစံက ဘာလဲဆိုတာ သိသွားပြီဆိုရင် အခြေအနေအလိုက် လိုက်လျောညီထွေ ပြောင်းလဲသုံးစွဲတတ်ဖို့က ပိုအရေးကြီးပါတယ်‌နော်။

ဒါကြောင့် ပဋိပက္ခတစ်ခုကြုံရင် "ငါ ဒီအခြေအနေမှာ ဘယ် Conflict Style ကို သုံးသင့်သလဲ?" ဆိုပြီး ကိုယ့်ကိုယ်ကိုယ် မေးကြည့်ခြင်းအားဖြင့် ပိုမိုထိရောက်တဲ့ ဆုံးဖြတ်ချက်တွေကို ချနိုင်မှာပါ‌နော်။

ဆက်ဆံရေးတွေကြား အဆင်မပြေမှုတွေအတွက်
TK Counselling Serviceမှာ Relationship Counseling Package / Workplace Relationship Package တွေစီစဉ်ပေးထားတာ ရှိပါတယ်ရှင့်။

အသေးစိတ် သိလိုပါက Page Messenger ကတစ်ဆင့်
ဆက်သွယ်မေးမြန်း စုံစမ်းနိုင်ပါတယ်ရှင့်။

🧑‍🎓Dr.Khin Aye Soe
(Counselling Psychologist)

လူအများစုက "Self-Worth အားနည်းတယ်" ဆိုတာကို ကိုယ့်ကိုယ်ကိုယ် သိပေမယ့် ဘယ်လိုဖြေရှင်းရမှန်း မသိကြဘူး။ဒါမှမဟုတ်..."ဒါက ငါ့...
30/06/2026

လူအများစုက "Self-Worth အားနည်းတယ်" ဆိုတာကို ကိုယ့်ကိုယ်ကိုယ် သိပေမယ့် ဘယ်လိုဖြေရှင်းရမှန်း မသိကြဘူး။

ဒါမှမဟုတ်...
"ဒါက ငါ့ရဲ့ ကိုယ်ရည်ကိုယ်သွေး၊ ဒီအတိုင်းပဲ" လို့ လက်ခံထားလိုက်တယ်။

ဒါမှမဟုတ်...
"အားကောင်းလာအောင် ငါ့ဘာသာငါ ကြိုးစားတည်‌ ဆောက်ယူမယ်" လို့ ဆုံးဖြတ်ပြီး ကြိုးစားပေမယ့် မအောင်မြင်‌ဘူး။

ဒါက ဘာ‌ကြောင့်လဲဆိုရင် Self-Worth ဆိုတာ စာအုပ်ဖတ်ရုံ၊ ဗီဒီယိုကြည့်ရုံနဲ့ အလွယ်တကူ ပြောင်းလဲနိုင်တဲ့အရာ မဟုတ်ပါဘူး။

အဓိက ဘာလဲဆိုတော့...
Self-Worth အားနည်းခြင်းရဲ့ ဇစ်မြစ်က "ငယ်စဉ်ကလေးဘဝ အတွေ့အကြုံများ"၊ "စိတ်ဒဏ်ရာများ (Trauma)"၊ "အဆိုးမြင်တဲ့ အတွေးပုံစံများ (Negative Thought Patterns)" နဲ့ ဆက်စပ်နေတတ်လို့ပါ။

ဒါတွေကို ကိုယ်တိုင်တစ်ယောက်တည်း ဖြေရှင်းဖို့က ခက်ခဲနိုင်ပါတယ်။

Self-Worth အားနည်းခြင်းအတွက် Counseling ဘာကြောင့် လိုအပ်သလဲ ဆိုရင်...

၁။ အကြောင်းရင်းကို ရှာဖွေဖော်ထုတ်ပေးနိုင်ခြင်း

သင်ဟာ "ငါဘာမှမထိုက်တန်ဘူး" လို့ ခံစားနေရတဲ့ နောက်ကွယ်က အကြောင်းရင်း က ဘာလဲဆိုတာကို သိပါသလား။

တစ်ခါတလေ ဒါဟာ –

📌ငယ်ငယ်က မိဘတွေရဲ့ ပြောစကားတစ်ခွန်း
📌ဆရာတစ်ယောက်ရဲ့ ဝေဖန်မှု
📌သူငယ်ချင်းတွေရဲ့ နှိုင်းယှဉ်ခြင်း
📌ကျရှုံးမှုတစ်ခုရဲ့ စိတ်ဒဏ်ရာ

စတာတွေကနေ အစပြုခဲ့တာ ဖြစ်နိုင်ပါတယ်။

Psychologist / Counselor က သင်နဲ့အတူ ဒီဇစ်မြစ်တွေကို ပြန်ရှာဖွေပေးနိုင်ပြီး "ဘာကြောင့် ဒီလိုခံစားရတာလဲ" ဆိုတဲ့ အဖြေကို အတူတူရှာဖွေပေးပါလိမ့်မယ်။

၂။ အဆိုးမြင်တဲ့ အတွေးပုံစံဟောင်းတွေကို ပြောင်းလဲပေးနိုင်ခြင်း

သင်ဟာ ကိုယ့်ကိုယ်ကိုယ် ဒီလိုမျိုး ပြောနေတတ်လား –

✔️"ငါဒီအလုပ်ကို မလုပ်နိုင်ဘူး၊ ငါဟာ အရည်အချင်းမရှိဘူး။"
✔️"သူတို့ ငါ့ကို မကြိုက်ကြဘူး၊ ငါဟာ ချစ်ခြင်းနဲ့မထိုက်တန်သူတစ်ယောက်ပဲ။"
✔️"ငါ ဘာမှ အောင်မြင်မှာ မဟုတ်ဘူး။"

ဒီအတွေးတွေက "Automatic Negative Thoughts (ANTs)" လို့ခေါ်ပါတယ်။ ဒါတွေက သင်ကိုယ်တိုင်တောင် သတိမထားမိဘဲ နေ့စဉ်တွေးနေတတ်တယ်။

Psychologist/Counselor က ဒီအတွေးတွေကို သတိပြုမိအောင် ကူညီပေးပြီး အဲဒီအတွေးတွေရဲ့ "အမှန်တရား" ကို ပြန်လည်ဆန်းစစ်ပေးပါလိမ့်မယ်။

ဥပမာ –
"ငါဘာမှမအောင်မြင်ဘူး" ဆိုတဲ့အတွေးကို
"ငါ့မှာ အောင်မြင်မှုတွေရှိပါတယ်၊ ဒါပေမယ့် ငါသူတို့ကို လျစ်လျူရှုနေတယ်" ဆိုတဲ့ အတွေးအဖြစ် ပြောင်းလဲပေးနိုင်ပါတယ်။

၃။ ဘေးကင်းလုံခြုံတဲ့ နေရာတစ်ခု (Safe Space) ကို ပေးနိုင်ခြင်း

သင်ဟာ ကိုယ့်ရဲ့ အားနည်းချက်တွေ၊ မလုံခြုံမှုတွေ၊ ကြောက်စိတ်တွေကို တစ်စုံတစ်ယောက်ကို အပြည့်အဝ ပြောပြဖူးပါသလား။

လူအများစုက –

📌သူငယ်ချင်းတွေကို ပြောရင် "သူတို့ ငါ့ကို ဘယ်လိုမြင်မလဲ" ဆိုတဲ့ စိုးရိမ်စိတ်
📌မိသားစုကို ပြောရင် "သူတို့ စိတ်ပူမှာ" ဆိုတဲ့ စိုးရိမ်စိတ်
📌လုပ်ဖော်ကိုင်ဖက်တွေကို ပြောရင် "ငါ့အလုပ်အပေါ် သူတို့အမြင် ပြောင်းသွားမှာ" ဆိုတဲ့ စိုးရိမ်စိတ်

Counseling ဆိုတာ "ဘယ်သူကမှ စီရင်ဝေဖန်ခြင်း" မရှိတဲ့ နေရာတစ်ခုပါ။
သင်ဟာ ဒီနေရာမှာ ကိုယ့်ရဲ့ အားနည်းချက်အားလုံးကို လွတ်လပ်စွာ ဖွင့်ဟပြောဆိုနိုင်ပါတယ်။

၄။ ကိုယ့်ကိုယ်ကိုယ် ကြင်နာတတ်ဖို့ (Self-Compassion) သင်ယူနိုင်ခြင်း

လူအများစုက သူများကို ကြင်နာတတ်ပေမယ့် ကိုယ့်ကိုယ်ကိုယ်တော့ အရမ်းပြင်းထန်စွာ ဆက်ဆံတတ်ကြတယ်။

Psychologist/Counselor က သင့်ကို –

🌼ကိုယ့်ကိုယ်ကိုယ် ဘယ်လို ပိုပြီးကြင်နာရမလဲ
🌼ကိုယ့်အမှားတွေကို ဘယ်လို ခွင့်လွှတ်ရမလဲ
🌼ကိုယ့်ရဲ့ ခံစားချက်တွေကို ဘယ်လို အသိအမှတ်ပြုရမလဲ

ဆိုတာတွေကို လက်တွေ့ကျကျ သင်ယူနိုင်အောင် ကူညီပေးပါလိမ့်မယ်။

၅။ လက်တွေ့ကျတဲ့ Tools များကို သုံးပြီး လေ့ကျင့်ယူခြင်း

Self-Worth တည်ဆောက်ခြင်းဟာ တစ်ရက်ထဲနဲ့ မပြီးနိုင်ပါဘူး။ ဒါဟာ နေ့စဉ် လေ့ကျင့်ရမယ့် "ကျွမ်းကျင်မှု (Skill)" တစ်ခုပါ။

Psychologist/ Counselor က သင့်ကို –

✔️မိမိကိုယ်ကို သတိပြုမိခြင်း (Self-Awareness) လေ့ကျင့်ခန်းများ
✔️အဆိုးမြင်အတွေးတွေကို ပြောင်းလဲနည်းများ (Cognitive Restructuring)
✔️ကိုယ့်ကိုယ်ကိုယ် အားပေးစကားများ (Affirmations)
✔️နယ်နိမိတ်သတ်မှတ်နည်းများ (Boundary Setting)

စတဲ့ လက်တွေ့ကျတဲ့ Tools တွေကို သင်ယူနိုင်အောင် ကူညီပေးပါလိမ့်မယ်။

ဒါတွေက သင့်ရဲ့ နေ့စဉ်ဘဝမှာ လက်တွေ့အသုံးချလို့ရတဲ့ "ဘဝပြောင်းလဲနည်းများ" ပါ။

၆။ တစ်ယောက်တည်းမဟုတ်ဘူးဆိုတာ သိရှိခံစားနိုင်ခြင်း

Self-Worth အားနည်းတဲ့အခါ လူအများစုက "ငါတစ်ယောက်တည်းပဲ ဒီလိုခံစားရတာ" လို့ ထင်တတ်ကြတယ်။

ဒါပေမယ့် ဒီခံစားချက်က လူအများစု ကြုံဖူးတဲ့အရာပါ။ သင်တစ်ယောက်တည်း မဟုတ်ပါဘူး။

Psychologist / Counselor နဲ့ ဆွေးနွေးတဲ့အခါ သင့်ရဲ့ခံစားချက်တွေကို နားလည်တဲ့သူတစ်ယောက်ရှိတယ်ဆိုတာ သိရခြင်းက စိတ်သက်သာရာရစေပါတယ်။

Self-Worth အတွက် Counseling ဘယ်အချိန်မှာ စသင့်သလဲ

အောက်ပါအချက်တွေထဲက တစ်ခုခု ခံစားနေရရင် Counseling စဖို့ အချိန်ကောင်းပါပြီ –

📌 ကိုယ့်ကိုယ်ကိုယ် အဆက်မပြတ် ဝေဖန်နေတယ်။
📌 ကိုယ့်ရဲ့ အောင်မြင်မှုတွေကို အသိအမှတ်မပြုနိုင်ဘူး။
📌 သူများက ချီးကျူးရင် မယုံကြည်နိုင်ဘူး။
📌 ဆက်ဆံရေးတွေမှာ ကိုယ်က ပေးတာပဲလုပ်ပြီး လက်ခံတတ်ဖို့ ခက်တယ်။
📌 "ငါဒီအရာကို မထိုက်တန်ဘူး" လို့ အမြဲခံစားနေရတယ်။
📌 ကိုယ့်လိုအပ်ချက်တွေကို ဖော်ပြဖို့ ခက်တယ်။
📌 ဘဝမှာ ပျော်ရွှင်မှု၊ ကျေနပ်မှု ခံစားရဖို့ ခက်တယ်။

ဒီခံစားချက်တွေက သင့်ရဲ့ အလုပ်၊ ဆက်ဆံရေး၊ ကျန်းမာရေးကို ထိခိုက်လာပြီ။ သို့မဟုတ်

ဒီအချက်တွေထဲက တစ်ခုခုရှိ‌နေရင် သင်ဟာ အကူအညီရယူဖို့ လိုပါလိမ့်မယ်။

အကူအညီ ယူခြင်းဟာ အားနည်းချက် တစ်ခု မဟုတ်ပါဘူး၊ သတ္တိရှိမှု တစ်ခုပါ။

သတိရပါ
Self-Worth ဆိုတာ ဘာလဲ သင်ကိုယ်တိုင်အပြည့်အဝ နားလည်ထားဖို့နဲ့။ ဒါကို ဘယ်လို တည်ဆောက်ယူရမလဲ ဆိုတာကအစ သိထားဖို့ လိုပါတယ်။

ဒီခရီးကို တည်ဆောက်ယူရမှာ တစ်ယောက်တည်း အမြဲ လျှောက်နေစရာ မလိုပါဘူး။

ကျွမ်းကျင်တဲ့ Psychologist/ Counselor တစ်ယောက်ရဲ့ လက်တွဲလိုက်မှုက ဒီခရီးကို ကျော်လွှားနိုင်ဖို့ ကူညီပေးနိုင်သလို သင့်အနေနဲ့ ပိုပြီး လုံခြုံမှု ရှိစေမှာပါ။

သေချာတာတစ်ခုက
သင့်မှာ self-worth အားကောင်းလာလေလေ သင့်ဘဝက ပိုပြီးလွတ်လပ်ပေါ့ပါးလာပါလိမ့်မယ်။

Self-worth အားနည်းပြသနာကို ကျော်လွှားဖို့ အတွက် TK Counselling Service မှာ Self-Transformation Package စီစဉ်ပေးထားတာ ရှိပါတယ်ရှင့်။

ဒီ Package ထဲမှာ Self-Worth တည်ဆောက်ရမယ့်နည်းလမ်းများကို လက်တွေ့ သင်ပေးခြင်း၊ မိမိကိုယ်ကို ယုံကြည်မှုမြှင့်တင်ခြင်း၊ အတွေးပုံစံဟောင်းများကို ပြောင်းလဲခြင်းတို့ ပါဝင်ပါတယ်။

အသေးစိတ် သိလိုပါက Page Messenger ကတစ်ဆင့် ဆက်သွယ်မေးမြန်း စုံစမ်းနိုင်ပါတယ်ရှင့်။

🧑‍🎓 Dr.Khin Aye Soe
(Counselling Psychologist)

လူအများစုက Self-Care ဆိုတာ ဘဝကို ပျော်ရွှင်အောင်နေတာ၊ ကိုယ် လိုသလောက် သုံးစွဲလိုက်နိုင်တာ၊ ဒါမှမဟုတ် တစ်ယောက်တည်း အချိန်...
26/06/2026

လူအများစုက Self-Care ဆိုတာ ဘဝကို ပျော်ရွှင်အောင်နေတာ၊ ကိုယ် လိုသလောက် သုံးစွဲလိုက်နိုင်တာ၊ ဒါမှမဟုတ် တစ်ယောက်တည်း အချိန်ကုန်ဆုံးတာလို့ ထင်မှတ်တတ်ကြပါတယ်။

ဒါပေမယ့် စစ်မှန်တဲ့ Self-Care က ဒီထက်ပိုပြီး နက်ရှိုင်းပါတယ်။

ဒါဟာ ပျော်ရွှင်မှုသက်သက်မဟုတ်ဘဲ ကိုယ့်ကိုယ်ကိုယ် ရေရှည်အတွက် ပြုစုပျိုးထောင်ရတဲ့ နည်းလမ်းတစ်ခုပါ။ ခက်ခဲတဲ့အချိန်တွေမှာ ကိုယ့်ကိုယ်ကိုယ် ဘယ်လိုဆက်ဆံမလဲဆိုတာက Self-Care ရဲ့ အစစ်အမှန်ဖြစ်ပါတယ်။

ဒီ post မှာတော့ လူအများစု နားလည်မှုလွဲနေတဲ့ တကယ့် Self-Care ဆိုတာ ဘာလဲ ဆိုတာကို ဖော်ပြ‌ပေးလိုက်ပါတယ်‌နော်။

၁။ "Self-Care ဆိုတာ ပျော်ရွှင်မှုပဲ"

❌ အထင်လွဲမှု — Self-Care ဆိုတာ ပျော်ရွှင်အောင်နေရုံပဲ၊ စိတ်ဆန္ဒအတိုင်းလုပ်ရုံပဲသက်သက် မဟုတ်ပါဘူး။

✅ အမှန်တရား — စစ်မှန်တဲ့ Self-Care က ခံစားချက်ကောင်းရုံတင်မက၊ ခက်ခဲတဲ့အချိန်မှာ လိုအပ်တဲ့ စည်းကမ်းတွေ၊ နယ်နိမိတ်တွေကို လိုက်နာကျင့်သုံးခြင်းပါ။

ဥပမာ —
မနက်စောစောထတာ မကြိုက်ပေမယ့် ဒါက ကျန်းမာရေးအတွက် ကောင်းမွန်ပါတယ်။
ကိုယ်လက်လှုပ်ရှားမှုလုပ်တာ ပျင်းစရာကောင်းပေမယ့် ဒါက စွမ်းအင်ကို မြှင့်တင်ပေးပါတယ်။

၂။ "Self-Care က ကိုယ်တိုင်ပဲ အားလုံးလုပ်ရမယ်"

❌ အထင်လွဲမှု — အရာအားလုံးကို ကိုယ်တိုင်ဖြေရှင်းနိုင်တယ်၊ သူများကိုမှီခိုတာ အားနည်းချက်ပါ။

✅ အမှန်တရား — အကူအညီတောင်းတာ ကိုယ့်ကိုယ်ကိုယ် ဂရုစိုက်ခြင်းရဲ့ အစိတ်အပိုင်းတစ်ခုပါ။

လူတွေကို "ငါအခုပင်ပန်းတယ်၊ ကူညီပေးပါ" လို့ပြောတတ်ဖို့ သင်ယူခြင်းက သန်မာမှုပါ။ အားနည်းချက်မဟုတ်ပါဘူး။

လူသားတွေဟာ အပြန်အလှန်ဆက်သွယ်မှုနဲ့ အသက်ရှင်သန်ကြတဲ့သတ္တဝါတွေပါ။ တစ်ယောက်တည်း အားလုံးကို ထမ်းဆောင်ဖို့ မလိုအပ်‌ပါဘူး။

၃။ "Self-Care က တစ်ယောက်တည်းလုပ်ရမယ်"

❌ အထင်လွဲမှု — တစ်ယောက်တည်း အချိန်ဖြုန်းတာချည်းပဲ မဟုတ်ပါဘူး။

✅ အမှန်တရား — တစ်ခါတစ်ရံ အကောင်းဆုံး Self-Care က လူတွေနဲ့ ဆက်သွယ်ခြင်းပါ။

ချစ်ရသူနဲ့ ရင်ဖွင့်တာ၊ နားလည်တဲ့အသိုင်းအဝိုင်းမှာ ပါဝင်တာ၊ ပံ့ပိုးမှုရှာတာတွေလည်း Self-Care ပါပဲ။

တစ်ခါတစ်ရံ ကော်ဖီတစ်ခွက်သောက်ရင်း သူငယ်ချင်းနဲ့ စကားပြောတာဟာ ရက်သတ္တပတ်တစ်ခုလုံးရဲ့ ဖိစီးမှုကို ပြေလျော့စေနိုင်ပါတယ်။

၄။ "အားလုံးပြီးအောင်လုပ်မှ အနားယူမယ်"

❌ အထင်လွဲမှု — အလုပ်အားလုံးပြီးမှ အနားယူတယ် (ဘယ်တော့မှ မပြီးတော့ပါဘူး)။

✅ အမှန်တရား — အနားယူတာက ဆုလာဘ်မဟုတ်ဘူး၊ နေ့တိုင်း လုပ်ပေးဖို့ လိုအပ်တဲ့အရာပါ။

ပင်ပန်းနေပြီဆိုရင် အလုပ်မပြီးသေးတာတောင်မှ ရပ်လိုက်ဖို့ လိုပါမယ်။ ဒါက ကိုယ့်ကိုယ်ကိုယ် ဂရုစိုက်မှုပါ။
အလုပ်တွေက ဘယ်တော့မှ မကုန်နိုင်ပေမယ့် ကိုယ့်ရဲ့ စွမ်းအင်ကတော့ ကုန်သွားတတ်ပါတယ်။

ဒါကြောင့် ကိုယ့်ကိုယ်ကိုယ် ဦးစားပေးဖို့ သင်ယူခြင်းက Self-Care ရဲ့အခြေခံပါ။

၅။ "Self-Care က အမြဲတမ်း ကောင်းမွန်တဲ့ ခံစားချက်ကို ပေးရမယ်"

❌ အထင်လွဲမှု — Self-Care လုပ်တိုင်း ချက်ချင်းသက်သာမှု၊ ပျော်ရွှင်မှု ခံစားရရမယ်။ မခံစားရရင် မအောင်မြင်ဘူး မဟုတ်ပါဘူး။

✅ အမှန်တရား — စစ်မှန်တဲ့ Self-Care က ချက်ချင်းမဟုတ်ဘဲ ရေရှည်အတွက် ရင်းနှီးမြှုပ်နှံမှုတစ်ခုပါ။ တစ်ခါတစ်ရံ အခုချက်ချင်းတော့ မသက်သာသေးပေမယ့် နောင်အတွက် အကျိုးရှိစေပါတယ်။

ဥပမာ — ဆေးလိပ်ဖြတ်တာ၊ အရက်လျှော့သောက်တာ ချက်ချင်း မပျော်ရွှင်ပေမယ့် ကျန်းမာရေးအတွက် အကောင်းဆုံးပါ။
ခံစားချက်ကောင်းတာက Self-Care ရဲ့ ရည်ရွယ်ချက်မဟုတ်ပါဘူး၊ ဒါက ရလဒ်တစ်ခုပါ။

၆။ "Self-Care က ပြီးပြည့်စုံတဲ့ ချိန်ခွင်လျှာကို ရှာတွေ့ဖို့ပဲ"

❌ အထင်လွဲမှု — အလုပ်၊ ဘဝ၊ ကျန်းမာရေး၊ ဆက်ဆံရေး အားလုံးကို ဟန်ချက်ညီညီ ထိန်းနိုင်ရမယ်။ အကုန်လုံး အညီအမျှ ဖြစ်ရမယ်။

✅ အမှန်တရား — ပြီးပြည့်စုံတဲ့ ချိန်ခွင်လျှာဆိုတာ မရှိပါဘူး။ Self-Care ဆိုတာ ဘဝရဲ့ အခြေအနေအလိုက် ဦးစားပေးမှုတွေကို ပြောင်းလဲနိုင်ဖို့ လိုက်လျောညီထွေရှိခြင်းပါ။

ဥပမာ —
အလုပ်အရမ်းများတဲ့ရက်မှာ ကိုယ်လက်လှုပ်ရှားမှု လျှော့ပြီး အိပ်ရေးဝဝအိပ်တာ။ အပြည့်အဝ အနားယူဖို့ လိုတာ။
စိတ်အဆင်မပြေတဲ့ရက်မှာ လူမှုဆက်ဆံရေးကို လျှော့ပြီး တစ်ယောက်တည်းနေတာ။

ချိန်ခွင်လျှာက အားလုံးကို တစ်ပြေးညီလုပ်တာ မဟုတ်ပါဘူး၊ အချိန်မှန်မှာ မှန်တဲ့အရာကို ရွေးချယ်နိုင်တာပါ။

တစ်နေ့မှာ အလုပ်ကို ဦးစားပေးရင်၊ နောက်တစ်နေ့မှာ ကိုယ့်ကိုယ်ကိုယ် ဦးစားပေးဖို့ လိုတာလည်း ရှိနိုင်တယ်။ဒါကိုပဲ လိုက်လျောညီထွေရှိတဲ့ Self-Care လို့ ခေါ်ဆိုရခြင်းပါ။

Self-Care ဆိုတာ သင်ထင်သလို ရိုးရှင်းတဲ့ ပျော်ရွှင်မှုတစ်ခုတည်း မဟုတ်ပါဘူး။ ဒါဟာ —

*သင်ကိုယ်တိုင်နဲ့ ရိုးသားတဲ့ ဆက်ဆံရေး၊
*ခက်ခဲတဲ့အချိန်မှာ ရပ်တည်နိုင်တဲ့ ခွန်အား၊
*နေ့စဉ်ဘဝမှာ သေးသေးလေးတွေကို သတိပြုမိခြင်း၊
*ကိုယ့်ကိုယ်ကိုယ် သနားကရုဏာနဲ့ ဆက်ဆံခြင်းတွေပဲ ဖြစ်ပါတယ်‌နော်။

လူတိုင်း လူတိုင်း စိတ်ချမ်းသာကိုယ်ကျန်းမာကြပါစေရှင့်။

မိမိတို့ရဲ့ စိတ်ပိုင်းဆိုင်ရာအခက်အခဲများကို ရင်ဖွင့်ဆွေးနွေးလိုပါက TK Counselling Service ရဲ့ Page Messenger ကတစ်ဆင့် Booking ယူထားနိုင်ပါတယ်ရှင့်။

🧑‍🎓Dr.Khin Aye Soe
(Counseling Psychologist)






Address

No. 19 (1st Floor), 20th Street (Lower Block), Latha Township
Yangon

Opening Hours

Monday 06:00 - 21:00
Tuesday 06:00 - 21:00
Wednesday 06:00 - 21:00
Thursday 06:00 - 21:00
Friday 06:00 - 21:00
Saturday 06:00 - 21:00
Sunday 06:00 - 21:00

Telephone

+959450334140

Website

Alerts

Be the first to know and let us send you an email when TK Counselling Service posts news and promotions. Your email address will not be used for any other purpose, and you can unsubscribe at any time.

Contact The Practice

Send a message to TK Counselling Service:

Shortcuts

Share

Category