Dr. Pyae Phyoe Kyaw

10/02/2026

ဆေးဝါးနဲ့ပတ်သက်လို့ ဗဟုသုတ အနည်းအကျဉ်းတော့ရှိသင့်တယ်ဆိုတာကို ကျွန်တော် ခဏခဏပြောဖူးတယ်။

ဒီနေ့လည်း လူနာတယောက် ဆေးမှားသောက်နေတာဗျာ။
ဘယ်လိုလုပ်သိရသလဲဆိုရင် ကျွန်တော်က ဘယ်လူနာပဲ ဆေးခန်းလာပြပြ ပုံမှန်နေ့စဉ်သောက်နေတဲ့ဆေးရှိလားဆိုပြီး မေးလေ့ရှိတယ်။
ဒီနေ့လည်း ဒီလူနာကိုမေးတော့ ဆေး ၄မျိုးသောက်နေတယ်လို့သိရတယ်။ လေဖြတ်ထားတယ်၊ သွေးတိုးရှိတယ်လို့ပြောတယ်။
သူက ဆေးလည်းယူလာတော့ တောင်းကြည့်လိုက်တယ်။
အဲ့ဒီမှာ ဆီးချိုဆေးတမျိုးဖြစ်တဲ့ Gliclazide 80mg ကိုတွေ့တော့
"ဆီးချို​လည်း ရှိတာလား" လို့မေးလိုက်တယ်။

"ဆီးချိုက မရှိဘူး" လို့ဖြေတယ်။

"သောက်နေတဲ့ဆေးထဲမှာ ပါတယ်နော်" ဆိုပြီး ဆေးမှတ်တမ်းတောင်းကြည့်လိုက်တယ်။

ဆရာဝန်ညွှန်ကြားထားတာမှာ အဲ့ဆေးမပါဘူးဖြစ်နေတယ်။ ဆီးချိုလည်း စစ်ထားပါတယ်။ မရှိပါဘူး။
ဒါနဲ့ ဆက်စစ်ပေးရတယ်။

နောက်ဆုံးတော့ အကြောင်းရင်းကိုတွေ့တယ်။
Aspirin75mg ဆိုတဲ့ သွေးကျဲဆေးကုန်သွားလို့ ဆေးကဒ်အခွံကိုင်ပြီး သွားပြန်ဝယ်တာမှာ Gliclazide80mg ပေးလာတာ။ သွားဝယ်တာကလည်း ဆေးခန်းနဲ့တွဲလျက်ဖွင့်ထားတဲ့ဆေးဆိုင်ကပဲ။

ဘယ်လိုမှားသွားလဲတော့ မပြောတတ်ပါဘူး။
ဆေးပုံစံ၊ ဆေးကဒ်ပုံချင်းကလည်း တခြားစီကို။
ဒါနဲ့လူနာကပြောတယ်။

"ကျွန်တော်သွားဝယ်တော့ ပုံစံတူတော့ မရှိတော့ဘူး တူတာပေးလိုက်မယ်၊ သောက်လို့ရတယ်ဆိုပြီးပြောပေးလိုက်တာ"
"ရောင်းပေးတဲ့သူက ပြောသေးတယ်
ညွှန်ထားတာကတော့ 75 အားပေါ့
အခုပေးလိုက်တာက 80 အား
5 အားပဲ ကွာတယ် သောက်လို့ရတယ်တဲ့"

"ဒါနဲ့ ကုန်တိုင်းဒါပဲ ထပ်ဝယ်သောက်နေတာ" တဲ့။

အေးရောဗျာ။

ဒါကြောင့်ပြောတာ ဆေးဝါးဗဟုသုတလေးတွေ ဖြည့်ထားကြပါဦး။
ကိုယ်သောက်နေရတဲ့ဆေးဝါးတွေကို သိနိုင်ဖို့ ကြိုးစားကြပါ။
ဆေးကဒ်ပေါ်မှာ​ စာလုံးအကြီးနဲ့ ရေးထားတဲ့ Brand Name/ Trade Name ထက် ပါဝင်တဲ့ဆေးအမယ် Chemical Name / Generic Name ကိုသာ သေချာမှတ်ပေးပါ။ ဒါမှသာ ဝယ်တဲ့အခါ သေချာ စစ်ဆေးယူနိုင်မှာပါ။

ဒီရှေ့လျှောက် ဆေးဝါးအကြောင်းလေးတွေကို ရေးပေးပါဦးမယ်။
Over the counter drugs အိမ်သုံးဆေးဝါးတွေကနေ အရင် စရေးပေးပါမယ်။
နောက်မှ အသုံးများတဲ့ Prescription drugs ဆရာဝန်ညွှန်ကြားချက်နဲ့မှ သောက်သင့်တဲ့ ဆေးတွေအကြောင်း ဆက်ရေးပါမယ်။

ဖတ်ချင်ကြလားဗျာ။

31/12/2025

(၂၀၂၅)ခုနှစ်က ကုန်ပါတော့မယ်။
(၂၀၂၅)ခုနှစ်အတွက် စားရိတ်မျှပေး စာရင်းလေးကို တင်ပြပေးဖို့ အချိန်ရောက်လာပါပြီ။

စားရိတ်မျှပေးအစီအစဉ်ဆိုတာက
ဆေးခန်းကိုလာတဲ့ စစ်ရှောင်လူနာတွေ၊ ခက်ခဲနွမ်းပါးလူနာတွေ အနေနဲ့ စိုက်ထုတ်ကုန်ကျစားရိတ် လျော့နည်းသက်သာစေဖို့ ဆိုပြီး လုပ်ဖြစ်ခဲ့တဲ့ အစီအစဉ်​လေး ဖြစ်ပါတယ်။
(၉.၈.၂၀၂၁)ရက်​နေ့မှာ စတင်ဖြစ်ခဲ့ပါတယ်။

လွိုင်ကော်မြို့ပေါ်ကို စစ်ဘေးရှောင်တွေ စရောက်လာခဲ့တဲ့အချိန်ပေါ့။ သူတို့တွေက လိုအပ်ချက်တွေများတော့ ဆေးခန်းလာပြတဲ့အခါ ကျွန်တော်နိုင်သလောက် အခမဲ့ကုပေးဖြစ်ခဲ့တယ်။ နောက်ပိုင်းကျတော့ ကျွန်တော်လည်း ဝန်ထုပ်ဝန်ပိုးမဖြစ်ရလေအောင်၊ ရေရှည်လည်း အဆင်ပြေအောင်ဆိုပြီး အခုလိုမျိုး စီစဉ်ဖြစ်ခဲ့ပါတယ်။

စလုပ်တုန်းကတော့ မျှဝေခြင်းအစီအစဉ်လို့ ခေါ်ခဲ့ပါတယ်။
မိတ်ဆွေအရင်းတွေကနေ အစပြုမျှဝေပေးတဲ့ ငွေလေးအနည်းငယ်နဲ့ စခဲ့ပါတယ်။
ဒီလိုနဲ့ ဆေးခန်းလာလူနာတွေထဲက ပိုသူတွေကလည်း လိုသူတွေအတွက် မျှဝေလှူပေးခဲ့ရင်းကနေ မျှဝေခြင်းအစီအစဉ်က သူ့အလိုလို လည်ပတ်နိုင်တဲ့ အစီအစဉ်လေး ဖြစ်ခဲ့ပါတယ်။

(၂၀၂၁)ခုနှစ်မှာ လူနာ (၂၀၀)ဦး
(၂၀၂၂)ခုနှစ်မှာ လူနာ (၆၉၄)ဦး
(၂၀၂၃)ခုနှစ်မှာ လူနာ (၁၄၂၀)ဦး ကို စားရိတ်မျှပေး၊ အဲ့ထဲက အချို့ကို အလုံးစုံအခမဲ့ ကုသပေးနိုင်ခဲ့ပါတယ်။
နှစ်တိုင်းအတွက် နှစ်ချုပ်စာရင်းတွေကိုတော့ နှစ်ကုန်တိုင်းမှာ တင်ပြခဲ့ပြီးဖြစ်ပါတယ်။

ဒီကြားထဲမှာ ကိုယ်တိုင်လည်း စစ်ရှောင်ခဲ့ရပါသေးတယ်။ ပထမအကြိမ်က ဆိုက်ခေါင်မှာ ၃လ ကြာခဲ့ပြီး၊ ဒုတိယအကြိမ်က အောင်ပန်းမှာ တနှစ် နဲ့ ၆လကျော် ကြာခဲ့ပါတယ်။

(၂၀၂၄)ခုနှစ် တနှစ်လုံးကိုတော့ အောင်ပန်းမှာပဲ ဖြတ်သန်းခဲ့ရပါတယ်။
(၂၀၂၄)ခုနှစ်မှာ လူနာ (၂၉၄)ဦးကို စားရိတ်မျှပေး၊ (၄၇)ဦးကို အလုံးစုံအခမဲ့ ကုသပေးနိုင်ခဲ့ပါတယ်။
စစ်ရှောင်အစပိုင်း ကိုယ်ပိုင်ဆေးခန်း မဖွင့်နိုင်ခင်၊ သူများဆေးခန်းထိုင်ချိန်မှာလည်း လူနာ (၁၈၄)ဦးကို ကျွန်တော်ရမယ့် စမ်းသပ်ခ မယူဘဲ ကြည့်ရှုကုသပေးခဲ့ပါတယ်။
(မှတ်တမ်းတင်ထားချင်လို့ ထည့်ရေးလိုက်တာပါ။)

(၂၀၂၅)ခုနှစ် ကိုတော့ အောင်ပန်းမှာ ၆လ ဖြတ်သန်းခဲ့ပြီးနောက် လွိုင်ကော်ပြန်ခဲ့ပါတယ်။
လွိုင်ကော်မှာ (၆)လ ကြာခဲ့ပါပြီ။

(၂၀၂၅)ခုနှစ် တနှစ်လုံးမှာ လူနာ (၄၈၉)ဦးကို စားရိတ်မျှပေး၊ (၃၀)ဦးကို အလုံးစုံ အခမဲ့ ကြည့်ရှုကုသပေးခဲ့ပါတယ်။

(၂၀၂၄)ခုနှစ်ရဲ့ လက်ကျန်ငွေ ၂၀၀၀၀၀၊
(၂၀၂၅)ခုနှစ်အတွင်း လက်ခံရရှိငွေ ၂၈၀၂၀၀၀၊
စစ်မရှောင်ခင်က လွိုင်ကော်ဆေးခန်း စာရင်းကျန်ငွေ ၆၆၅၀၀၀ စုစုပေါင်း ၃၆၆၇၀၀၀ ကျပ်နဲ့ (၂၀၂၅)ခုနှစ်ကို ဖြတ်သန်းခဲ့ပါတယ်။
ဒီငွေထဲကနေ ကင်ဆာလူနာ (၂)ဦးအတွက် ၁သိန်းကျပ်စီနဲ့ နာတာရှည်လူနာတဦးအတွက် ၅၀၀၀၀ ကျပ်ကို မျှဝေပေးလိုက်ပါသေးတယ်။

အများရဲ့ မျှဝေမှုလေးတွေကနေ အခုလိုမျိုး ပြုလုပ်ပေးခွင့်ရခဲ့တာ ဖြစ်ပါတယ်။

လက်ရှိအချိန်အထိ ကျန်ငွေ (၄၀၆၀၀၀)ကျပ် ကျန်ရှိနေပါသေးတယ်။

(၂၀၂၆)ခုနှစ်ကို အစပြုဖို့ ကြိုးစားရင်း
(၂၀၂၅)ခုနှစ်ကို နှုတ်ဆက်လိုက်ပါတယ်။

(မှတ်ချက်။ ယခုပိုစ့်သည် အလှူခံပိုစ့် မဟုတ်ပါ။ ရန်ပုံငွေ လုံလောက်မှုရှိနေပါတယ်။)

29/11/2025

ဒီနေ့ အသက်(၆၀)ကျော်အရွယ်အမျိုးသမီးကြီး အကြောင်းတခုနဲ့ဆေးခန်းလာပြတယ်။
မေးမြန်းရင်းနဲ့ သူ့ရဲ့ ညာဖက်ရင်သားမှာ အကျိတ်ကြီးတခုရှိတဲ့အကြောင်း သိရတယ်။
စမ်းသပ်ကြည့်တော့ ရင်သားအကျိတ်က ပုံမှန်မဟုတ်ဘူး။ သူကလည်းပြောတယ်။
အကျိတ်ကမညီမညာနဲ့ တဖြည်းဖြည်းကြီးလာတယ်၊ အရေပြားကလည်း ပြောင်းလဲလာတယ်တဲ့။ ဘယ်လောက်ကြာပြီလဲဆိုတော့ နှစ်နဲ့တောင်ရှိနေပြီတဲ့။

"ဘာဖြစ်လို့မပြဘဲထားတာလဲ" လို့ ကျွန်တော်က ကရုဏာဒေါသောနဲ့မေးတော့ သူကဖြေတယ်။

"ဒီအကျိတ်မျိုးက ပြရမယ်မှန်းလည်းသိတယ်၊ ဆေးကုဖို့လိုမှန်းလည်းသိတယ်"
"ဆေးကုဖို့က ပိုက်ဆံလိုသေးတယ်လေ"
"ဘယ်မှာလဲ ပိုက်ဆံ" တဲ့။

သူကထပ်ပြောတယ်။

"အဒေါ်က တယောက်တည်းသမား၊ အပျိုကြီး၊ ပင်စင်စားတယောက်"
"အဒေါ့်အသက်အရွယ်နဲ့ မရှိရှိတာလေး ရောင်းချပြီး ကုသလို့ ကောင်းသွားခဲ့ရင်တောင် ကျန်နေတဲ့ သက်တမ်းကို ဒုက္ခတွေတပွေကြီးနဲ့ ဖြတ်သန်းရမှာကလည်း ငရဲပါပဲ"
"အဲ့ဒီအစား ကံစီမံတဲ့အတိုင်း ပေးသလောက်လေးနေပြီး အချိန်တန်သေရတာက ပိုမကောင်းဘူးလားဆရာ" တဲ့။

ကျွန်တော် စက္ကန့်ပိုင်းလောက် ဘာမှပြန်မပြောနိုင်အောင် ဆွံ့အသွားခဲ့တယ်။
သူပြောတာလည်း မမှားဘူးမဟုတ်လား။

13/08/2025

မေးခွန်း (၁၃၁)

ပိုးကြောင့်ဖြစ်သော အရေပြားယားနာများအနက် ---------- ပိုးကြောင့်ဖြစ်သော အရေပြားယားနာက အဖြစ်အများဆုံးဖြစ်သည်။

(က) ဘက်တီးရီးယားပိုး
(ခ) မှိုပိုး
(ဂ) ဗိုင်းရပ်စ်ပိုး

13/08/2025

မေးခွန်း (၁၃၀)

အသက် ---------- အောက် ကလေးများအား screen time လုံးဝမပေးသင့်ပါ။

(က) ၁နှစ်ခွဲ အောက်
(ခ) ၂နှစ် အောက်
(ဂ) ၂နှစ်ခွဲ အောက်

13/08/2025

ကျန်းမာရေးဉာဏ်စမ်းအစီအစဉ်ကို အလျဉ်းသင့်သလိုလေး ပြန်စကြရအောင်။

မေးခွန်း (၁၂၉) အဖြေမှန်ကိုရွေးပါ။

ရေယုန်သေးကို ဖြစ်စေသောပိုးနှင့် ရေယုန်ကြီးကိုဖြစ်စေသောပိုးသည် အတူတူပင်ဖြစ်သည်။

(က) မှန်
(ခ) မှား

အဖြေမှန်ကို နောက်ရက်တွင် ဖြေဆိုရှင်းလင်းသွားပါမယ်။

28/07/2025

ညှင်း

ညှင်းဆိုတာ ဘယ်လိုမျိုးလဲ

မြန်မာလို "ပွေး" ၊ "ဝဲ"၊ "ညှင်း" ဟူ၍ သတ်မှတ်ခေါ်ဝေါ်ကြသော အရေပြားရောဂါ (၃)မျိုးရှိသည်။ (၃)မျိုးစလုံးသည် အဖြစ်များသည်။ ထိုအထဲက မြင်လိုက်သည်နှင့် တန်းသိနိုင်သော "ညှင်း" အကြောင်းကို စာဖတ်သူများ ဗဟုသုတ တိုးပွားစေရန် ရေးသားတင်ဆက်ပေးသွားပါမည်။

ညှင်းဆိုသည်မှာ

ညှင်းသည်လည်း ပွေးကဲ့သို့ပင် မှိုပိုးကြောင့်ဖြစ်သည့် အရေပြားရောဂါတမျိုးဖြစ်သည်။ ခန္ဓာကိုယ်ပေါ်တွင် မှိုပိုးအလွန်အမင်းပေါက်ဖွားရှင်သန်နေထိုင်မှုကြောင့် အရေပြားအရောင်ကို အပြောင်းအလဲဖြစ်စေသည်။ များသောအားဖြင့် သေးငယ်သောအဖြူရောင်အကွက်များကို ဖြစ်စေသည်။ ထိုသို့ဖြစ်ရခြင်းသည် မှိုပိုးများက အရေပြား၏ ရောင်ခြယ်ထုတ်လုပ်မှုကို အဟန့်အတားဖြစ်စေသောကြောင့်ဖြစ်သည်။ ဤသည်ကို ဆေးပညာအခေါ်အဝေါ်တွင် Tinea Versicolor သို့မဟုတ် Pityriasis Versicolor ဟု ခေါ်သည်။ Malassezia Species of Fungus သည် ညှင်းကိုဖြစ်စေသော မှိုပိုးအနွယ်ဝင်များဖြစ်သည်။

ရောဂါလက္ခဏာများ

သေးငယ်သောအဖြူရောင်အကွက်များက ညှင်း၏ အဓိကလက္ခဏာဖြစ်သည်။ အများအားဖြင့် အဖြူရောင်အကွက်ဟုဆိုရသော်လည်း လူ၏ ပင်ကိုယ်အရေပြားအရောင်ပေါ်မူတည်၍ ပုံမှန်ထက်ဖျော့သွားခြင်းဟုဆိုလျှင် ပိုမှန်သည်။
အနည်းငယ် ယားယံစေတတ်သည်။

ဘယ်နေရာတွေမှာ အဖြစ်များသလဲ❓

လည်ပင်းတဝိုက်၊ ရင်ဘတ်၊ ကျောကုန်းနှင့် လက်မောင်းတို့တွင် ပို၍ အဖြစ်များသည်။

ကူးစက်တတ်သလား❓

ညှင်း သည် ခန္ဓာကိုယ်ပေါ်တွင် ရှိနှင့်ပြီးသား သဘာဝအတိုင်းနေနေသော မှိုပိုးများက အ​ခြေအနေတခုခုကြောင့် အလွန်အမင်းပေါက်ဖွားရှင်သန်နေထိုင်လာလျှင် ဖြစ်သည်။ လူတဦးမှ တဦးထံသို့ မကူးစက်စေတတ်ပါ။ ပွေး ကိုဖြစ်စေသော မှိုပိုးများမှာမူ အလွန်ကူးစက်မြန်သည့် မှိုအမျိုးအစားများဖြစ်၍ လူတဦးမှ တဦးထံသို့ ကူးစက်တတ်သည်။ ဤသည်မှာ မှိုပိုးကြောင့်ဖြစ်သည်ခြင်း တူသော်လည်း ပွေးနှင့် ညှင်း ကွဲပြားသွားရသည့် အချက်ဖြစ်သည်။

ဘယ်လိုလူတွေက ညှင်း ဖြစ်တတ်သလဲ❓

မှိုပိုးများသည် ပူနွေးစိုစွတ်သည့် အခြေအနေကို နှစ်သက်သည်။ ထို့ကြောင့် ရာသီဥတု ပူနွေးစိုစွတ်သောနေရာတွင် နေထိုင်သူများ၊ ချွေးထွက်များသူများနှင့် အရေပြားအဆီပြန်တတ်သူများသည် ညှင်း အဖြစ်များသည်။ ဟော်မုန်းဓာတ်အပြောင်းအလဲကလည်း ညှင်း ဖြစ်စေမှုကို ပိုမိုအားပေးသည်။ ထို့ကြောင့် ဆယ်ကျော်သက်အရွယ်များတွင် ပို၍ ဖြစ်တတ်ကြခြင်းဖြစ်သည်။ ကိုယ်ခံအားကျဆင်းနေသူများသည်လည်း အခြားသူများထက် ပို၍ဖြစ်တတ်သည်။

နောက်ဆက်တွဲများ

ညှင်း သည် ဆိုးရွားသော နောက်ဆက်တွဲ ပြဿနာများကို မဖြစ်စေတတ်သော်လည်း မကုသဘဲထားလျှင် ပိုမိုပွားများ ပျံ့နှံ့လာတတ်သည်။ အရေပြားအရောင် အပြောင်းအလဲများ ပို၍ သိသာလာစေသည်။

ကာကွယ်ရန်များ

အလွန်အမင်း ချွေးထွက်စေခြင်း၊ နေရောင်ခြည်နှင့် တိုက်ရိုက်ထိတွေ့ခြင်းတို့ကို ရှောင်ကြဉ်ခြင်းက ညှင်းမဖြစ်စေရန် ကာကွယ်ရာရောက်သည်။ ပူ​နွေးသော ရာသီဥတုတွင်နေထိုင်သူများအဖို့ ကိုယ်ကိုကျပ်စေသော အဝတ်အစားများ ဝတ်ဆင်ခြင်းကို ရှောင်ကြဉ်သင့်သည်။

ကုသနည်း

မှိုသတ်ဆေး သောက်ဆေး၊ လိမ်းဆေး အမျိုးအစား အမျိုးမျိုးရှိသည့်အနက် မိမိ၏ အရေပြား အခြေအနေ​နှင့် သင့်လျော်သည့် ဆေးအမျိုးအစားကို ဆရာဝန်ညွှန်ကြားချက်အတိုင်း အချိန်ကာလအတိအကျ လိုက်နာသောက်သုံးလိမ်းကျံပေးခြင်းက အကောင်းဆုံးကုသနည်းဖြစ်သည်။

မှတ်သားရန်အချက်

ဆရာဝန်ညွှန်ကြားသည့်အတိုင်း ကုသမှုပြီးသွားသော်လည်း အရေပြားတွင်ဖြစ်ထားသော အဖြူကွက်ကဲ့သို့ အရေပြားအပြောင်းအလဲများသည် ချက်ချင်း ပုံမှန်အခြေအနေသို့ မရောက်နိုင်ချေ။ မှိုပိုးများသေပြီးနောက် လအနည်းငယ်အကြာမှသာလျှင် ပုံမှန်အရေပြားအခြေအနေကို ပြန်ရမည်ဖြစ်သည်။

အချုပ်အနေဖြင့် ညှင်းသည် တကိုယ်ရည် မသန့်ရှင်းခြင်းကြောင့် ဖြစ်သည့် အရေပြားရောဂါ မဟုတ်ပါ။ ညှင်းသည် အမြင်အားဖြင့်ပင် သိသာလွယ်သည့်အားလျော်စွာ ညှင်း ဖြစ်နေကြောင်းသိသည်နှင့် ကုသမှုခံယူနိုင်လျှင် အမြန်ဆုံး သက်သာပျောက်ကင်းမည်ပင်ဖြစ်သည်။ ညှင်းအကြောင်းပိုမိုပြည့်စုံစွာ သိရှိနိုင်ကြပါစေကြောင်း ရေးသားလိုက်ရပါသည်။

ဒေါက်တာပြည့်ဖြိုးကျော်

(အကျိုးရှိပါက မျှဝေပေးခြင်းဖြင့် အများဖတ်ရှုနိုင်အောင် ကူညီပေးပါ။)

04/07/2025

ဝဲ

ကုတ်လေ ယားလေ ဝဲ

"ကြည့်မကောင်းဘူး ဖေကြီးရာ
ဘရိတ်ဒန်စ့် ကနေတာ"
"ကတာမဟုတ်ဘူး ငါ့သားရဲ့
ယားလို့ကုတ်တာကွဲ့"
ဝဲဆေးကြော်ငြာတခုကိုတောင် အမှတ်ရမိသွားသည်။ ဝဲ က အဲ့လောက်တောင်ယားစေသည်လားဟူ၍ ငယ်ငယ်က တွေးမိဖူးသည်။
နောက်ထပ်အမှတ်ရသည်က ရပ်သီချင်းတပုဒ်ထဲက စာသားဖြစ်သည်။
"ကုတ်လေ ယားလေ ဝဲ လိုပဲ"
"ဒုတ်တွေ ဓားတွေ ဆွဲလိုဆွဲ"
ဤသီချင်းစာသားအရလည်း ဝဲက အတော်လေး ယားစေလောက်သည်။
ဒီလိုနှင့် ယခုရေးသားသည့် ဝဲရောဂါအကြောင်းကို
"ကုတ်လေ ယားလေ ဝဲ" ဟူ၍ အမည်ပေးဖြစ်ခဲ့သည်။

ဝဲ ဆိုတာဘာလဲ ❓

ဝဲသည် လူအများရင်းနှီးပြီးဖြစ်သည့် အရေပြားရောဂါတမျိုးဖြစ်သည်။ ဆေးပညာအခေါ်အဝေါ်တွင် Scabies ဟုခေါ်သည်။ Sarcoptes Scabiei ဟူသည့် သေးငယ်သောပိုးမွှားကြောင့်ဖြစ်သည်။ ထိုပိုးငယ်လေးများသည် ခန္ဓာကိုယ်အရေပြားအတွင်းသို့ ထိုးဖောက်ဝင်ရောက်ပြီး တွင်းတူးသည်။ ခန္ဓာကိုယ်နေရာအနှံ့သို့ လမ်းကြောင်းဖောက်တတ်သည်။ ပိုးမွှားအမများက ဥ ဥချသည်။ သည်လိုနှင့် ဝဲပိုးတွေ ပွားများလာသည်။ ဝဲပိုးမှထွက်သော ဓာတ်နှင့် အညစ်အကြေးများက လူ့ခန္ဓာကိုယ်အရေပြားနှင့် ဓာတ်မတည့်သဖြင့် အလွန်အမင်း ယားယံခြင်းကိုဖြစ်စေသည်။ ကုတ်လေ ယားလေ ဖြစ်စေသည်။ ကလေး၊ လူကြီးမရွေး ဖြစ်ပွားတတ်သည်။

ရောဂါလက္ခဏာများ

အရေပြားတွင် အလွန်အမင်း ယားယံခြင်းသည် ထူးခြားသော အဓိက လက္ခဏာဖြစ်သည်။ ညဖက်တွင် ပိုယားစေသည်။ အိပ်ရေးပျက်ရလောက်အောင်ပင် ယားယံစေသည်။
ဝဲပိုး ပျံ့နှံ့ရောက်ရှိရာနေရာများတွင် ယားနာအဖုများကို ဖြစ်ပေါ်စေသည်။
တခါတရံတွင် ဝဲပိုး လမ်းကြောင်းဖောက်အရာများကိုပါ သိသာစွာ မြင်တွေ့ရတတ်သည်။
ထို့အပြင် ကုတ်ခြင်းကြောင့်ဖြစ်ပေါ်လာသော အရေပြားအနာများ၊ ခြစ်ရာများနှင့်လည်း တွဲ၍ မြင်တွေ့နိုင်သည်။
ဝဲပိုးများသည် ချောင်ကြိုချောင်ကြားနေရာများတွင် အနေများသည်။ အထူးသဖြင့်
လက်ချောင်းကြား၊ ခြေချောင်းကြား၊
ပေါင်ကြား၊ ချိုင်းကြား၊
တံကောက်ကွေး၊ တံတောင်ကွေး၊
ဝမ်းဗိုက်တဝိုက်၊ ခါးတဝိုက်၊ ရင်ဘတ်တဝိုက်နေရာများတွင် အနေများသည်။ ထို့ကြောင့် ယားနာဖုများကို ထိုနေရာများတွင် ပို၍ တွေ့ရသည်။

ဘယ်လို ကူးစက်တတ်သလဲ ❓

ဝဲ သည် လူတဦးမှ တဦးထံသို့ ကူးစက်တတ်သည်။
အရေပြားအချင်းချင်း တိုက်ရိုက်ထိတွေ့မှုက အလွယ်ကူဆုံးသော ကူးစက်နည်းဖြစ်သည်။
အဝတ်အစား၊ စောင်၊ အိပ်ယာခင်း၊ တဘက်စသည်တို့ကို မျှဝေသုံးစွဲခြင်း မှတဆင့်လည်း ကူးစက်နိုင်သည်။
ထို့ကြောင့် မိသားစုဝင်တဦးတွင် ဝဲ ရောဂါဖြစ်ပါက အတူနေမိသားစုများကိုပါ ကူးစက်စေနိုင်သည်။

ကုသနည်းများ

ဝဲပိုးကို သေစေသည့် လိမ်းဆေး၊ သောက်ဆေးအမျိုးမျိုးရှိသည်။ ရောဂါအခြေအနေအပေါ်မူတည်၍ သင့်လျော်သောဆေးကို မိမိဆရာဝန်က ညွှန်ကြားပေးခြင်းသည် အကောင်းဆုံးဖြစ်သည်။
ဆရာဝန်ညွှန်ကြားချက်မလိုဘဲ မိမိသဘောဖြင့် ဝယ်ယူအသုံးပြုနိုင်သည့် OTC လိမ်းဆေးတချို့ရှိသော်လည်း ကလေးငယ်များ၊ ကိုယ်ဝန်ဆောင်များ၊ နို့တိုက်မိခင်များအတွက်မူ ဆရာဝန်ညွှန်ကြားချက်ဖြင့်သာ အသုံးပြုသင့်သည်။
စနစ်တကျ လိုက်နာ ကုသပါက ၂ပတ်မှ ၄ပတ်အတွင်း အပြီးသတ်ပျောက်ကင်းနိုင်သည်။

သတိထားရမည့်အချက်များ

❗ ဝဲ ပိုးများကို သေစေသည့် လိမ်းဆေး၊ သောက်ဆေးများကသာ ဝဲ ရောဂါကို အပြီးသတ် ပျောက်ကင်းစေနိုင်သည်။ အခြားယားနာလိမ်းဆေးများက ဝဲပိုးများကို မသေစေနိုင်ပါ။
❗ ဝဲပိုးများသည် အဝတ်အစား၊ စောင်၊ အိပ်ယာခင်းများတွင် ကပ်ညှိတွယ်နေနိုင်သည်။
ခန္ဓာကိုယ်တွင် ပျောက်အောင်ကုသပြီးဖြစ်သော်လည်း ရောဂါပိုး ကပ်ညှိတွယ်နေသော ထိုအရာများမှတဆင့် ပြန်လည်ကူးစက်ဖြစ်ပွားစေနိုင်သည်။
❗ ထို့ကြောင့် ဆေးကုသနေစဉ်တွင် အဝတ်အစား၊ စောင်၊ အိပ်ယာခင်းတို့ကို၊ စနစ်တကျ လျော်ဖွတ်၊ နေလှန်း၊ မီးပူထိုးခြင်းတို့ကို ပူးတွဲပြုလုပ်သင့်သည်။
မိသားစုဝင်တဦးတွင် ဝဲ ရောဂါဖြစ်ပွားပါက အတူနေမိသားစုဝင်များကိုပါ ရောဂါရှာဖွေစစ်ဆေးစေ၍ လိုအပ်ပါက ကုသစေသင့်သည်။ သို့မှသာ တဦးမှ တဦး ပြန်လည်ကူးစက်ခြင်းကို တားဆီးနိုင်မည်ဖြစ်သည်။

အချုပ်အားဖြင့်ဆိုရလျှင် ဝဲ ရောဂါသည် အလွယ်တကူကုသ၍ရသော အရေပြားရောဂါတခုဖြစ်သည်။ ဝဲ ပေါက်ခြင်းသည် ရှက်စရာမဟုတ်ပါ။
ဝဲ ရောဂါ လက္ခဏာများ သိရှိ​ထားခြင်းဖြင့် ဝဲဟု သံသယရှိပါက ဆရာဝန်နှင့်ဆွေးနွေးကုသလိုက်ခြင်းအားဖြင့် ယားယံခြင်းဒုက္ခ၊ ကုတ်ရခြင်းဒုက္ခများကို ရှောင်ရှားနိုင်ကြပါစေကြောင်း အသိပေးရေးသားလိုက်ရပါသည်။

ဒေါက်တာပြည့်ဖြိုးကျော်

(အခြားသူတွေပါ ဖတ်ရှုနိုင်ဖို့ မျှဝေပေးသွားကြပါဦး။)

20/06/2025

လွိုင်ကော်မှာ ပြန်ဖွင့်ပါပြီ။

08/06/2025

ပွေး

ဘယ်လို အရေပြားရောဂါကို ပွေးလို့ခေါ်တာလဲ❓

"ဆရာရေ ပွေးပေါက်နေလို့ ဘာလုပ်ရမလဲ"
"ပွေး ဆေးလေး ညွှန်းပေးလို့ရလား ဆရာ"
"ပွေးအတွက် ဘာလိမ်းဆေးကောင်းလဲ ဆရာ"

လူနာတွေကတော့ လွယ်လွယ်ကူကူ ပွေးဟူ၍ သတ်မှတ်လိုက်ကြသည်။ သူတို့ဆိုလိုသည့် ပွေးက အမှန်တကယ် ပွေးဖြစ်နေသည်လည်း ရှိသည်။
ပွေးမဟုတ်သည်လည်း ရှိသည်။
ဒီလိုနှင့် ပွေးအကြောင်းကို အသေးစိတ် ရေးပြဖို့ ဖြစ်လာရသည်။

ပွေးဆိုတာဘာလဲ❓

ပွေးဟူသည် အရေပြားပေါ်တွင် မှိုပိုးကြောင့်ဖြစ်သော ယားနာတမျိုးဖြစ်သည်။ ယားယံခြင်းကို ဖြစ်စေသည်။
မှိုပိုးဟုခေါ်ရာတွင် ဖြစ်စေသည့် မှိုပိုးအမျိုးအစား အများကြီးရှိသေးသည်။ ဆေးပညာအခေါ်အဝေါ်အရ Tinea (သို့မဟုတ်) Ringworm ဟုခေါ်သည်။ ဖြစ်ပွားသည့် နေရာအပေါ်မူတည်၍ အခေါ်အဝေါ် ကွဲပြားကြသေးသည်။
ခန္ဓာကိုယ်၏ မည်သည့်နေရာတွင်မဆို ဖြစ်ပွားနိုင်သည်။
အဖြစ်အများဆုံးနေရာများလည်း ရှိသည်။ ၎င်းတို့မှာ
ခြေထောက်၊
လက်၊
ခြေသည်း လက်သည်း၊
ပေါင်ကြား၊ တင်ပါး၊
ဦးရေပြား၊
မျက်နှာ၊
နောက်ကျောနှင့် ရင်ဘတ်၊ ဝမ်းဗိုက်တို့ ဖြစ်သည်။

ပွေး၏ ပုံသဏ္ဍာန်က ဘယ်လိုရှိလဲ❓

ပွေး၏ ပုံပန်း သဏ္ဍာန်က အခြားအရေပြားရောဂါများလောက် မရှုပ်ထွေးပါ။ ထင်သာမြင်သာ ရှိလှသည်။ ကိုယ်ခန္ဓာပေါ်တွင် ဖြစ်သော ပွေးသည် ထင်သာမြင်သာ အရှိဆုံးဟု ဆိုရမည်။
အများအားဖြင့် အနီရောင်အကွက်ဖြင့် မြင်တွေ့ရတတ်သည်။ အနီကွက်သည် ကွင်းကလေးကဲ့သို့ဖြစ်ပြီး အနားသတ်သည် ပုံမှန်အရေပြားထက် ပို၍ ကြွနေတတ်သည်။ အလယ်တွင် အရောင်ဖျော့ပြီး အနားသတ်က ပို၍ နီရဲသည်။ မကုသဘဲထားလျှင် အနားသတ်သည် တဖြည်းဖြည်းပိုကျယ်ပြန့်လာသည်။ ခန္ဓာကိုယ်၏ အခြားနေရာများအထိ ပျံ့သွားလေ့ရှိသည်။

ဘယ်လိုလူတွေမှာ အဖြစ်များသလဲ❓

ကလေးငယ်များ၊ ဆယ်ကျော်သက်အရွယ်များတွင် အဖြစ်များသော်လည်း အသက်အရွယ်မရွေး၊ ကျား မ မရွေး ဖြစ်နိုင်သည်။ မှိုပိုးသည် ပူနွေးစိုစွတ်သည့် အခြေအနေကို နှစ်သက်သည့်အားလျော်စွာ ခန္ဓာကိုယ်တွင် ထိုအခြေအနေမျိုးဖန်တီးထားပေးသည့်နေရာတွင် ပေါက်ဖွားရှင်သန်နေထိုင်လေ့ရှိသည်။
ချွေးထွက်များသူများ၊ အားကစားသမားများ၊ အိမ်မွေးတိရစ္ဆာန်များကိုထိတွေ့ ကိုင်တွယ်လေ့ရှိသူများ၊ အဝလွန်သူများ၊ ကိုယ်ခံစွမ်းအားကျဆင်းနေသူများသည် အခြားသူများထက် ပို၍ ဖြစ်တတ်သည်။
တဦးနှင့်တဦး အရာဝတ္ထုများကို မျှဝေသုံးစွဲခြင်းသည် မှိုပိုးကူးစက်ခြင်းကို ဖြစ်စေသည်။

နောက်ဆက်တွဲများ

ပွေးကို မကုသဘဲထားလျှင် ပိုမိုပွားများ ပျံ့နှံ့လာတတ်သည်။ ကုသရန် ပို၍ ခက်ခဲသွားတတ်သည်။
မသန့်ရှင်းသော လက်ဖြင့် ကုတ်ခြင်းမှတဆင့် နောက်ဆက်တွဲ ဘက်တီးရီးယားပိုးဝင်ခြင်းပါ တွဲ၍ ဖြစ်တတ်သည်။

ကာကွယ်နည်းများ

အဝတ်အစား၊ သဘက်၊ စောင် စသည်များအား မျှဝေသုံးစွဲခြင်း မပြုလုပ်ပါနှင့်။
အတွင်းခံများကို ကောင်းစွာ မခြောက်သွေ့သေးဘဲ မဝတ်ဆင်ပါနှင့်။
အများသုံး ရေကူးကန်၊ ရေချိုးခန်းများကို ရှောင်ကြဉ်ပါ။
အသားချင်းထိရသည့် အားကစားနည်းများ ပြုလုပ်ပြီးတိုင်း ရေချိုးသန့်စင်ပါ။

ကုသနည်း

မှိုသတ်ဆေး သောက်ဆေး၊ ထိုးဆေး၊ လိမ်းဆေး အမျိုးအစား အမျိုးမျိုးရှိသည်။
မိမိ၏ အရေပြားရောဂါ အခြေအနေ​အပေါ်မူတည်၍ သင့်လျော်သော ဆေးအမျိုးအစားကို ဆရာဝန်ညွှန်ကြားချက်အတိုင်း အချိန်ကာလအတိအကျ လိုက်နာသောက်သုံးခြင်းက
အကောင်းဆုံးဖြစ်သည်။ သို့မှသာ အချိန်တိုအတွင်း ရောဂါ သက်သာပျောက်ကင်းနိုင်မည်ဖြစ်သည်။
မိမိသဘောဖြင့် ဆေးဝယ်လိမ်းခြင်းသည် အပြီးသတ်မပျောက်ကင်းဘဲ ဖြစ်လိုက်ပျောက်လိုက် ဖြစ်ခြင်း၊ အချိန်ကာလပိုကြာလာခြင်း၊ ကုသရ ပိုမိုခက်ခဲခြင်းစသည့် ဆိုးကျိုးများကို ကြုံရနိုင်သည်။

အချုပ်အနေဖြင့် ပွေးဟူသည် အဖြစ်များသော အရေပြားရောဂါတမျိုးဖြစ်ပြီး ကမ္ဘာ့လူဦးရေ၏ (၂၀)ရာခိုင်နှုန်းခန့်က ပွေးပေါက်ဖူးကြသည်။ ထို့ကြောင့် ပွေးပေါက်ခြင်းသည် ရှက်စရာ မဟုတ်ပါ။ ပွေးအကြောင်း ဗဟုသုတရှိထားခြင်းဖြင့် မိမိနှင့် မိမိ၏ မိသားစု ကျန်းမာရေးအတွက် အထောက်အကူဖြစ်နိုင်ပါစေကြောင်း ဆုမွန်ကောင်းတောင်း ရေးသားလိုက်ရပါသည်။

ဒေါက်တာပြည့်ဖြိုးကျော်

(အကျိုးရှိပါက မျှဝေပေးခြင်းဖြင့် ကူညီပါဦး။)

18/05/2025