Dr. Aye Min Htoo

27/04/2026

Warts ( ကြွက်နို့ )

ကြွက်နို့ (Warts)ဆိုတာ Human Papillomavirus (HPV) ဗိုင်းရပ်စ်ပိုးကြောင့် ဖြစ်တဲ့ အသားပိုလေးတွေ ဖြစ်တယ်။ အရေပြားအပေါ်ဆုံးလွှာမှာ ဗိုင်းရပ်စ်ပိုး ကူးစက်ခံရတဲ့အခါ ဆဲလ်ကွဲပွားမှုဖြစ်ပြီး ကြွက်နို့တွေ ဖြစ်ပေါ်လာတယ်။ ကြွက်နို့ဖြစ်စေတဲ့ ဗိုင်းရပ်စ်ဟာ မျိုးကွဲပေါင်း ၁၀၀ ကျော်ရှိပါတယ်။ ကြွက်နို့ဖြစ်သူနဲ့ အရေပြားချင်း တိုက်ရိုက်ထိတွေ့ရာက ကူးစက်စေတယ်။ဗိုင်းရပ်စ်ပိုးတွယ်ကပ်နေတဲ့ မျက်နှာသုတ်ပဝါ၊ ဖိနပ်၊ ရေချိုးဇလုံ စတာတွေကို မျှဝေသုံးစွဲမိခြင်းကြောင့် ကူးစက်နိုင်တယ်။ ကြွက်နို့ရှိတဲ့နေရာကို ကုတ်ခြစ်မိရာက ခန္ဓာကိုယ်တခြားနေရာကို ပြန့်သွားတတ်ပါတယ်။

ကြွက်နို့ အမျိုးအစားများ

၁။ ပုံမှန်ကြွက်နို့ (Common Warts)

ပုံမှန်ကြွက်နို့ဟာ ကြမ်းတမ်းပြီး အသားပိုဆန်ဆန် အညိုရောင်၊ မီးခိုးရောင် လုံးဝန်းတဲ့ အဖုလေးတွေဖြစ်တယ်။ လက်၊ လက်ချောင်းများ၊ ဒူးခေါင်း၊ တံတောင်ဆစ်စတဲ့နေရာတွေမှာ အတွေ့များတယ်။

၂။ ခြေဖဝါးကြွက်နို့ (Plantar Warts)

ခြေဖဝါးအောက်ခြေမှာ အဖြစ်များတယ်။

ပင်းအပ်ပေါက်ဆန်ဆန် အနက်ရောင် အစက်ငယ်လေးတွေ တွေ့ရှိရတတ်တယ်။ ခြေဖဝါးမှာ ဖိမိရင် နာကျင်မှု ရှိတတ်တယ်။

၃။ ချပ်ပြားကြွက်နို့ (Flat Warts)

အလယ်မှာချိုင့်နေတဲ့ ပြားချပ်ချပ် အဖုတွေဟာ Flat Warts တွေဖြစ်ကြတယ်။ အဝါရောင်၊ အညိုရောင်၊ ပန်းရောင်ရှိပြီး မျက်နှာ၊ လက်မောင်း၊ ပေါင်ခြံစတဲ့နေရာတွေမှာ အဖြစ်များတယ်။

၄။ ကြာပွင့်ကြွက်နို့ (Filiform Warts)

အရေပြားမှာ အချွန်အတက်ပုံစံ အသားပိုစတွေဟာ Filiform Warts ကြွက်နို့တွေဖြစ်ပါတယ်။

နှာခေါင်း၊ ပါးစပ်၊ မျက်ခွံစတဲ့ မျက်နှာအရေပြားမှာ အဖြစ်များပါတယ်။

အရေပြားမှာ ရုတ်တရက်ပေါ်ထွက်လာတဲ့ ကြမ်းတမ်းသော အသားပိုလေးတွေဟာ ကြွက်နို့ရဲ့လက္ခဏာဖြစ်တယ်။ အသားပိုအဖုတွေဟာ တခါတရံ ယားယံတတ်တယ်။ခြေဖဝါးကြွက်နို့တွေကို ဖိကိုင်ကြည့်ရင် နာကျင်နိုင်တယ်။ ကြွက်နို့ကို မတော်တဆကုတ်မိရင် သွေးထွက်လွယ်တယ်။ ခြေဖဝါး အနက်စက်လေးတွေဟာ သွေးခြည်ဥပြီးပေါ်လာတဲ့ အစက်တွေဖြစ်တယ်။

ကုသနည်း

ကြွက်နို့အများစုဟာ သူ့အလိုအလျှောက် ပျောက်ကင်းတတ်ပေမယ့် လနဲ့ချိီပြီး ကြာနိုင်ပါတယ်။ ကြွက်နို့အသားပိုတွေ ရုတ်တရက်ပွားများလာရင် ကုသမှုခံယူဖို့ လိုပါတယ်။

ကြွက်နို့ဒဏ်ရာကို ကြွက်နို့တို့ဆေး၊ လိမ်းဆေး၊ ပလာစတာ ကပ်နိုင်တယ်။ Salicylic acid, Cantharidin, Imiquimod cream စတဲ့လိမ်းဆေးတွေ အသုံးပြုကြတယ်။ လိမ်းဆေး၊တို့ဆေးနဲ့ မသက်သာရင် သေးငယ်တဲ့ ခြစ်ထုတ်ကိရိယာ (curette) နဲ့ ခြစ်ထုတ်ပစ်နိုင်တယ်။ အရည်နိုက်ထရိုဂျင် သို့မဟုတ် ကိရိယာသုံးပြီး အေးခဲကုထုံး (Cryotherapy) နည်းနဲ့ ကြွက်နို့ကို ဖျက်စီးပစ်နိုင်တယ်။ လေဆာနည်းနဲ့ (Laser Therapy) ဖယ်ရှားလို့လည်းရတယ်။ Trichloroacetic acid လို အပြင်းစားအက်ဆစ်(chemial peel) တွေနဲ့ ကြွက်နို့ကို ဖျက်ဆီးပစ်နိုင်တယ်။

အိမ်တွင်းကုထုံးများ

· သံပရာရည် သို့မဟုတ် ပင်စိမ်းရွက်အနှစ်ရည်လိမ်းခြင်း

· ကြက်ဆူဆီ လိမ်းပေးခြင်း

· သစ်ကြံပိုးခေါက် အနှစ်ရည်လိမ်းခြင်း

· ဗီတာမင် စီ ဆေးလုံးကို ကြိတ်ခြေပြီး ရေအနည်းငယ်နှင့်ရောကာ တို့လိမ်းပေးခြင်း။

ကာကွယ်နည်း

ကြွက်နို့ဖြစ်တဲ့နေရာ မကုတ်ပါနဲ့။ ရောဂါပြန့်ပွားခြင်းကို ပိုဆိုးစေတယ်။ လက်ကို ဆပ်ပြာ၊ရေနဲ့မကြာခဏ ဆေးကြောပါ။ ကြွက်နို့ရှိသူ ကိုင်တွယ်ထားတဲ့ ပစ္စည်း(ဖိနပ်၊ မျက်နှာသုတ်ပဝါ) တွေကို မျှဝေသုံးစွဲခြင်း မပြုလုပ်ပါနဲ့။

ဒေါက်တာအေးမင်းထူး
အရေပြားအထူးကုဆရာဝန်

08/04/2026

သင်္ကြန်နှစ်သစ်ကူး ဆေးခန်းပိတ်ရက် ကြေငြာခြင်း

💦 10 April 2026 မှ 20 April 2026 ရက်နေ့
အထိ ဆေးခန်းပိတ်မည် ဖြစ်ပြီး

💦 21 April 2026 ရက်နေ့တွင် ပုံမှန်အတိုင်း
ပြန်လည်ဖွင့်လှစ်မည်ဖြစ်ကြောင်း ကြိုတင်
အသိပေးအပ်ပါသည်။

💦 ပိတ်ရက်အတွင်း ဆေးခန်းဖုန်းများလဲ
ပိတ်ထားမည်ဖြစ်ကြောင်း လေးစားစွာအသိပေး
အပ်ပါသည်။

24/01/2026

တပတ်အတွင်း မျက်နှာဝင်းပလာအောင်

တပတ်အတွင်း မျက်နှာအသားအရေကို သိသိသာသာပြောင်းလဲနိုင်တဲ့ နည်းတခုရှိတယ်။ လုပ်ရတာ မခက်ဘူး။သုံးရမယ့် ပစ္စည်းတွေကလည်း သုံးမျိုးတည်း။ ကြက်ဥ(အကာ)၊ ခါကြက်ဥ(မုန်လာဥနီ) နဲ့ နနွင်းနည်းနည်း သုံးရုံပါပဲ။ လုပ်ရလွယ်ပြီး ရလာဒ်ကလည်း မနည်းလှပါ။၂-၃ကြိမ်ခန့်လုပ်ရုံနဲ့ ထူးခြားတဲ့ ပြောင်းလဲမှုကို မြင်တွေ့နိုင်တယ်။ဒီနည်းက ဝက်ခြံအမဲစက်သာမက အမာရွတ်တွေအတွက်လည်း ကောင်းတယ်။ အရေးအကြောင်းနဲ့ အတွန့်အခေါက် ကင်းစင်စေမယ်။

ပါဝင်ပစ္စည်း
ကြက်ဉအကာ - (၁) လုံး
မုန်လာဥနီ အနှစ် - လက်ဖက်ရည် (၁) ဇွန်း
နနွင်း - လက်တဆိတ်စာ

(မုန်လာဥနီမရှိရင် လိမ္မော်သီးကို အရည်ညှစ်ပြီး ပြောင်းလဲသုံးနိုင်ပါတယ်၊အဆင်ပြေရာသုံးပါ)

အဆိုပါ ပစ္စည်း သုံးမျိုးကို ရောပြီး ခွက်တခုတည်း ထည့်ပါ။ ပြီးရင် ရောသမအောင် မွှေပါ။ မလိမ်းခင် မျက်နှာ အရင်သစ်လိုက်ပါ။ ခဏ ခြောက်သွေ့အောင်ထားပါ။ ဂွမ်းစ သို့မဟုတ် စုတ်တံသုံးပြီး အဆိုပါအရောကို မျက်နှာပေါ်လိမ်းပါ။ ငါးမိနစ်ထားပြီး အခြောက်ခံပါ။ ခြောက်သွေ့သွားရင် အပေါ်က ဒုတိယအကြိမ် နောက်တထပ်လိမ်းပါ။ ၁၅ မိနစ်ကြာတဲ့အခါ ရေနွေးစိမ်အဝတ်နဲ့ မျက်နှာကို သန့်စင်လိုက်ပါ။ အားလုံးပြီးတာနဲ့ မျက်နှာပြန်သစ်ပါ။ ဒီနည်းအတိုင်း တပတ်ကို နှစ်ကြိမ်လုပ်သင့်တယ်။ ပထမတကြိမ်လုပ်ပြီးတာနဲ့ ဝင်းပတဲ့ မျက်နှာ အသားအရေကို ပိုင်ဆိုင်နိုင်ပါလိမ့်မယ်။ ကြည်လင်နေတဲ့ မျက်နှာလေးကို တပတ်အတွင်း မြင်တွေ့ရမှာ ဖြစ်တယ်။

ဒေါက်တာ အေးမင်းထူး
အရေပြားအထူးကု ဆရာဝန်။

27/12/2025

မန္တလေးအရေပြားဆေးခန်းတွင် တာဝန်ထမ်းဆောင်ရန် အောက်ပါဝန်ထမ်းများ အလိုရှိသည်။

ဆေးခန်းအကူ/receptionist ဝန်ထမ်း (အမျိုးသမီး) - (၄) ဦး
Delivery (အမျိုးသား) - (၁) ဦး

စည်းကမ်းချက်များ
(၁) ဆေးခန်းအကူနှင့် receptionist အတွက် အသက် (၂၀)နှစ်မှ (၃၅) နှစ် အတွင်း ဖြစ်ရမည်။
(၂) အသက်ငယ်ရွယ်၍ ရုပ်ရည်ချောမောပြေပြစ်ရမည်။
(၃) အိမ်ထောင်မရှိသူ၊ အပျိုဖြစ်ရမည်။
(၄) ဝန်ထမ်းအချင်းချင်း ပေါင်းသင်းဆက်ဆံရေး ကောင်းမွန်ရမည်။
(၅) အလုပ်တွင် သွက်လက်တက်ကြွစွာ လုပ်ဆောင်နိုင်ရမည်။
(၅) အလုပ်ချိန်မှာ မနက် (၉)နာရီမှ (၆)နာရီဖြစ်သည်။
(မှတ်ချက် - skin care နှင့် cosmetic ပိုင်း စိတ်ဝင်စားသူများလျှောက်ထားနိုင်သည်။

(၁) Delivery post အတွက် အသက် (၃၅)နှစ်အောက် အမျိုးသားဖြစ်ရမည်။
(၂) ဆိုင်ကယ်ကျွမ်းကျင်စွာစီးတတ်သူ ဖြစ်ရမည်။ ကိုယ်ပိုင်ဆိုင်ကယ်ရှိရမည်။
(၃) ကားမောင်းတတ်သူကို ဦးစားပေးရွေးချယ်မည်။

အင်တာဗျူးရက်
-အလုပ်အတွက် အင်တာဗျူးဖြေဆိုရမည်ဖြစ်သည်။
-လျှောက်လွှာကို ဆေးခန်းသို့ လူကိိုယ်တိုင်ဖြစ်စေ (သို့) ကိုယ်စားဖြစ်စေ လာတင်ထားနိုင်သည်။ လျှောက်လွှာတင်ပြီးလျှင် အင်တာဗျူးဖြေဆိုရမည့်အချိန်ကို ဆေးခန်းမှ အကြောင်းကြားပေးမည်။
-ပျမ်းမျှ အင်တာဗျူး ၂ကြိမ် ဖြေဆိုရမည်။
-နောက်ဆုံးအဆင့် အောင်မြင်သူများကိုသာ အလုပ်ခန့်ပါမည်။
(သတိပြုရန် - Viber မှ ပေးပို့သော CV Form များ လက်မခံပါ။ လူကိုယ်တိုင်လာရောက်နိုင်မှသာ လျှောက်ထားသင့်သည်။

အလုပ်ချိန် သတ်မှတ်ချက်
မနက် (၉)နာရီမှ ညနေ (၆)နာရီ

(မှတ်ချက် - အချိန်အပြောင်းအလဲရှိနိုင်သည်)

လျှောက်ထားရန်
အထက်ဖော်ပြပါ အရည်အချင်းပြည့်မှီသူ *မည်သူမဆို* CV form, cover letter, လိုအပ်သည့် စာရွက်စာတန်း အထောက်အထားများနှင့်အတူ အောက်ဖော်ပြပါ လိပ်စာသို့ လာရောက် လျှောက်ထားနိုင်ပါသည်။

ဆက်သွယ်ရန်
၆၆လမ်း၊ ၃၉လမ်းထောင့် မန္တလေး။
09 402588148, 092051590

အသေးစိတ်အချက်အလက်ကို ထပ်မံသိရှိလိုပါက 09402588148 သို့ ဆက်သွယ်စုံစမ်းနိုင်ပါသည်။

(မှတ်ချက် - CV form တွင် မျှော်မှန်းလစာကို တစ်ပါတည်း ထည့်သွင်းဖော်ပြရမည်)

This is the official page of Dr. Aye Min Htoo's Dermatology clinic in Myanmar.

15/11/2025

လူတိုင်းသိတဲ့ ဝဲယားနာဖြစ်ရင် ယားယံတဲ့ အနီဖုလေးတွေဖြစ်တယ်။ ဒီဝဲရောဂါက အရည်ကြည်ဖုဖြစ်တယ်။ bullous scabies ခေါ်ပါတယ်။ သာမန်ဝဲကုသမှုနဲ့ မတူပဲကုရတယ်။ ပျံ့ပွားလွယ်တယ်။ လူတစ်ရာမှာ တစ်ယောက် တွေ့ရခဲလို့ ဗဟုသုတရအောင် တင်ပေးလိုက်ပါတယ်။

ဆေးပညာက ရှုပ်ထွေးတယ်...

20/10/2025

အဖြစ်များတဲ့ ပျားရည်ဖတ်အနာ

Impetigo (ပျားရည်ဖတ်အနာ)ဟာ ဘက်တီးရီးယားပိုးကြောင့် ဖြစ်တဲ့ အနာတစ်မျိုး ဖြစ်ပါတယ်။ ဒီအနာဟာ ကူးစက်လွယ်ပြီး ကလေးငယ်တွေ အများဆုံးဖြစ်ကြတယ်။ မွေးကင်းစမှ အသက် (၅)နှစ်အတွင်း အဖြစ်များတယ်။မျက်နှာ၊ လက်၊ ခြေထောက် စတဲ့နေရာတွေမှာ အဓိကတွေ့ရတယ်။ impetigoကို မြန်မာလို အနာစက်လို့ ဘာသာပြန်ကြတယ်။ တကယ်တော့ ပိုးဝင်ကာစ red sore အဆင့်မှာပဲ အနာစက်လို့ ခေါ်ဝေါ်သင့်တယ်။ ဆေးရုံဆေးခန်းမှာရောက်လာတဲ့ impetigo အများစုဟာ အဝါရောင် ပျားရည်ဖတ်တွေကပ်နေတဲ့ အနာ (yellow-colored honey crust)ပုံစံမျိုးနဲ့ ရောက်လာလေ့ရှိပါတယ်။ပျားရည်ဖတ်အနာတွေဟာ ယားယံတတ်ပါတယ်။

Impetigo(ပျားရည်ဖတ်အနာ)ကို အဓိကဖြစ်စေနိုင်တဲ့ ဘက်တီးရီးယားပိုး နှစ်မျိုးရှိတယ်။ အဖြစ်အများဆုံးက Staphylococcus aureus ပိုးကြောင့် အဓိကဖြစ်တယ်။ Streptococcus pyogenes ပိုးကြောင့်လည်း ဖြစ်တတ်သေးတယ်။ သာမန်အားဖြင့် အဆိုပါပိုးတွေဟာ အရေပြားမှာ ပုံမှန်အတိုင်းနေထိုင်ကြတယ်။ အရေပြားမှာ ခြစ်ရာ၊ ပွန်းရာ၊ ရှရာ ဝင်ရုံလောက်နဲ့ impetigo အနာဖြစ်ဖို့ လုံလောက်ပါတယ်။

စဖြစ်ဖြစ်ချင်း အရေပြားပေါ်မှာ ရောင်ရမ်းတဲ့ အနာစက်ပုံစံဖြစ်လေ့ရှိတယ်။ ကြာရင် အနာကပေါက်ထွက်ပြီး အရည်တွေ စိမ့်ထွက်လာတယ်။ ဒီအရည်တွေကတဆင့် ပျားရည်ဆန်ဆန် အဝါဖတ်တွေဖြစ်ပေါ်လာတယ်။ အနာက ပေါက်ထွက်တဲ့အခါ တခြားနေရာကို ကူးစက်ပျံ့နှံ့လွယ်တယ်။ တခါတရံ အနာနဲ့အတူ အဖျားကြီးတာ၊ နာကျင်ကိုက်ခဲတာမျိုးရှိနိုင်တယ်။ တခါတရံ ပိုးကောင် အင်းဆက်ကိုက်ခံရတဲ့ဒဏ်ရာ (သို့မဟုတ်) နှင်းခူနာနဲ့ ဝက်ခြံလို အရေပြားရောဂါတွေက တဆင့် ခန္ဓာကိုယ်ထဲသို့ ဝင်ရောက်ပြီး အနာဖြစ်လာတယ်။ အများစုဟာ နှာခေါင်း၊ ပါးစပ်၊ မေးစေ့တစ်ဝိုက်မှာ ဖြစ်ကြတယ်။

လက္ခဏာများ

(၁) Non-bullous Impetigo (ရိုးရိုးအနာစက်)
ရိုးရိုးအနာစက် (Non-bullous Impetigo) နဲ့ အရည်ကြည်ဖုအနာ (Bullous Impetigo) ဆိုပြီး နှစ်မျိုးရှိတယ်။ ဒီထဲမှာ Non-bullous Impetigo (ရိုးရိုးအနာစက်)က အဖြစ်များဆုံး ဖြစ်ပါတယ်။Staphylococcus aureus (၈၀%) နဲ့ Streptococcus pyogenes (၁၀%) ပိုးနှစ်မျိုးလုံးကြောင့် ဖြစ်နိုင်တယ်။ ကနဦးမှာ အနီရောင်အစက်ငယ်တွေ စတင်ဖြစ်ပေါ်လာတယ်။ ဒီအနာစက်တွေက ပြည်ဖုငယ် (vesicles/pustules)တွေ အဖြစ်မြန်မြန်ဆန်ဆန် ပြောင်းလဲသွားတယ်။ ပြည်ဖုလေးတွေ ပေါက်ထွက်ပြီးနောက်ပိုင်း အဝါရောင် (ပျားရည်နှင့်တူတဲ့) အဖတ်များ ဖြစ်လာပါတယ်။ အနာကျက်ပြီး အညိုရောင် (သို့) အနီရောင် အမာရွတ်တွေ ကျန်ရစ်တတ်ပါတယ်။

(၂) Bullous Impetigo (အရည်ကြည်ဖုအနာ)
အရည်ကြည်ဖုထွက်တဲ့ impetigo အနာဟာ Staphylococcus aureus ပိုးကြောင့် ဖြစ်တယ်။ ပိုးဝင်ပြီးမကြာခင် အရေပြားမှာ အရည်ကြည်ဖုလုံး (bullae)တွေ စတင်ထွက်ပေါ်လာတယ်။ အရည်ကြည်ဖုဟာ အစပိုင်းမှာ ကြည်လင်နေသလောက် နောက်ပိုင်းမှာ ပြည်တည်နာဆန်ဆန် နောက်ကျိပါတယ်။ အရည်ဖုတွေ ပေါက်ထွက်သွားပြီး အဝါရောင်အဖတ်တွေ ကပ်လာပါတယ်။ အနာက နာကျင်ကိုက်ခဲတာမျိုး ရှိတတ်တယ်။

Impetigo (ပျားရည်ဖတ်အနာ) တွေဟာ အလွန်ကူးစက်လွယ်ပါတယ်။ ရောဂါရှိသူနဲ့ အရေပြားချင်း တိုက်ရိုက်ထိတွေ့မိရုံနဲ့ ကူးစက်နိုင်တယ်။ ရောဂါရှိသူ သုံးထားတဲ့ အဝတ်အစား၊ မျက်နှာသုတ်ပဝါ၊ အိပ်ရာခင်း၊ ရေချိုးဆပ်ပြာ စသည်တို့ကို မျှဝေသုံးစွဲမိခြင်းကြောင့်လည်း ကူးစက်နိုင်ပြန်တယ်။ တခါတရံ ရောဂါရှိသူကိုယ်တိုင်က ယားယံတဲ့ ပျားရည်ဖတ်အနာတွေကို ကုတ်ခြစ်မိပြီး အခြားနေရာသို့ ပြန့်ပွားစေနိုင်တယ်။ ဒါ့ကြောင့် လက်ကို သန့်ရှင်းဖို့ လိုပါတယ်။

ဘယ်အချိန်မှာ ဆရာဝန်ပြမလဲ
အောက်ပါလက္ခဏာတွေ ပေါ်ပေါက်လာရင် ဆရာဝန်နှင့် ချက်ချင်းပြသပါ။
· အနာတွေ ဆက်လက်ပြန့်ပွားနေခြင်း
· ကိုယ်ပူခြင်း
· အနာက နာကျင်လာခြင်း၊ နီရဲလာခြင်း၊ ရောင်ရမ်းလာခြင်း
· ဆီးသွားနည်းခြင်း (ကျောက်ကပ်ပြဿနာ လက္ခဏာ)
· မောပန်းနွမ်းနယ်ခြင်း

ကုသနည်း
Impetigo ရောဂါက ကုရလွယ်ပါတယ်။ ရောဂါမပြင်းထန်ရင် ပဋိဇီဝပိုးသတ်လိမ်းဆေး (Antibiotic Ointment)တွေ သုံးနိုင်တယ်။ Mupirocin လိမ်းဆေး သို့မဟုတ် Fusidic Acid လိမ်းဆေးတွေ ဆရာဝန်ညွှန်ကြားချက်ဖြင့် သုံးစွဲနိုင်တယ်။ ရောဂါအခြေအနေ ပြင်းထန်ရင် ဒါမှမဟုတ် ရောဂါပျံ့ပွားနေတဲ့အခါမျိုးမှာ ပဋိဇီဝသောက်ဆေး (Oral Antibiotics) တွေ သောက်ဖို့လိုပါတယ်။ cephalexin, cloxacillin, dicloxacillin စတဲ့ သောက်ဆေးတွေကို ဆရာဝန်ညွှန်ကြားချက်နဲ့ သောက်သုံးနိုင်တယ်။

အိမ်တွင်းကုထုံး
· အနာကို သန့်ရှင်းအောင်ထားပါ။ ရေသန့်သန့်နဲ့ ဆပ်ပြာအသုံးပြုပြီး ဆေးကြောပါ။
· အနာပေါ်က အဖတ်တွေကို ဖယ်ရှားဖို့ ရေနွေးအိတ် သို့ ရေနွေးအဝတ်စ အုပ်ပေးနိုင်တယ်။
· အနာကို ပလာစတာ (သို့) ပတ်တီးစနဲ့ စည်းထားပါ။ ပိုးပြန့်ပွားမှုကို ကာကွယ်ပေးပါတယ်။
· ယားယံတဲ့အနာကို မကုတ်မိဖို့ အထူးဂရုပြုပါ။ ကလေးငယ်တွေမှာ လက်အိတ်စွပ်ပေးနိုင်ပါတယ်။

ကာကွယ်ခြင်း
· လက်ကို ဆပ်ပြာနှင့် မကြာခဏ ဆေးကြောပါ။
· ရောဂါရှိသူ သုံးစွဲထားတဲ့ အဝတ်အစား၊ အိပ်ရာခင်း၊ ပဝါများကို သီးသန့်လျှော်ဖွတ်ပါ။
· အရေပြားပေါ်ရှိ အနာ၊ ခြစ်ရာ၊ ကိုက်ခံရဒဏ်ရာများကို သန့်ရှင်းအောင်ထားပါ၊ ဆေးထည့်ပါ။
· ရောဂါရှိသူသည် ဆေးကုသမှုစတင်ပြီး ၂ရက်အတွင်း (သို့) ခြောက်သွေ့ပြီး အနာကျက်တဲ့အထိ ကျောင်း/အလုပ်မှ နားပြီး အိမ်မှာနေသင့်တယ်။

ဒေါက်တာအေးမင်းထူး
၂၀.၁၀.၂၀၂၅

02/10/2025

🎇🪔 သီတင်းကျွတ် ဆေးခန်းပိတ်ရက် 🎇🪔

အောက်တိုဘာ ( 4.10.2025 မှ 8.10.2025 )နေ့အထိ ဆေးခန်းပိတ်မည်ဖြစ်ကြောင်း ကြိုတင်အသိပေးအပ်ပါသည်။

October 9 ရက်နေ့တွင် ပုံမှန်အတိုင်းပြန်လည်ဖွင့်လှစ်မည်ဖြစ်ပါသည်။

ဆေးခန်းလိပ်စာ
၆၆ လမ်း၊ ၃၉ လမ်းထောင့်၊ မန္တလေးမြို့။
09-2051590, 09-402588148

www.drayeminhtoo.com

14/09/2025

ခရုသင်းကြောင့် စိတ်မညစ်စေရ

ခရုသင်းဆိုတာ အသားအရောင် မညီညာဘဲ အဖြူကွက်တွေ ပေါ်ပေါက်လာတာမျိုးကို ခေါ်ပါတယ်။ စာရင်းဇယားတွေအရ တကမ္ဘာလုံးမှာ ခရုသင်း(vitiligo)ဖြစ်သူ ၆၅သန်းလောက်ရှိမယ်လို့ ခန့်မှန်းရတယ်။ ကမ္ဘာ့လူဦးရေရဲ့ ၁ ရာခိုင်နှုန်းလောက်ဟာ ခရုသင်း ဖြစ်နေတယ်လို့ တွေ့ရှိရပါတယ်။ အမေရိကားတစ်နိုင်ငံထဲမှာကို ဒီလိုရောဂါသည်ပေါင်း ၂ သန်းလောက် ရှိနေပါတယ်။မိဘနှစ်ပါးအနက် တယောက်ယောက်မှာ ဒီရောဂါရှိရင် ကလေးငယ်မှာဖြစ်ဖို့ ၅-၁၀ရာခိုင်နှုန်း ရှိတာကြောင့် မျိုးရိုးလိုက်တယ် ယူဆကြတယ်။ ခုခံအားချင်းပြန်တိုက်တဲ့ ရောဂါရှိသူတွေမှာ ပိုတွေ့ရတယ်။ အသားလတ်သူထက် အသားမည်းသူတွေမှာ အဖြူကွက်တွေက ပိုထင်ရှားတယ်။ ဖြစ်လာရင် ပျောက်ဖို့ခက်ခဲတဲ့ အရေပြားရောဂါထဲမှာ ခရုသင်းရောဂါလည်း ပါဝင်ပါတယ်။

ခရုသင်း၊သမင်ဖြူကွက်တွေ ဘာ့ကြောင့် ဖြစ်သလဲ
ခရုသင်းကို ဖြစ်စေတာက melaninခေါ်တဲ့ ရောင်ခြယ်ပစ္စည်း ချို့တဲ့လို့ပါ။ တနည်းအားဖြင့် အမည်းရောင်ခြယ်ဆဲလ်တွေ ပျက်ဆီးကုန်တာ။အရေပြားတထောက်စာမှာ အသားအရောင် ပြောင်းလဲမှုဟာ melaninခေါ်တဲ့ ရောင်ခြယ်ပစ္စည်းကြောင့် ဖြစ်ပါတယ်။မယ်လနင်ဆိုတာကို အမိုင်နိုအက်ဆစ်တမျိုးဖြစ်တဲ့ tyrosineကနေ ရရှိပါတယ်။ နေရောင်နဲ့ထိတွေ့တဲ့အခါ အရေပြားကို ကာကွယ်ဖို့ melaninခေါ်တဲ့ အမည်းရောင် ပစ္စည်းတမျိုးကို melanocytesခေါ်တဲ့ အရေပြားဆဲလ်တွေက ထုတ်ပေးရပါတယ်။ ဘာေ့ကြာင့်လဲဆိုတော့ နေရောင်မှာ ပါဝင်တဲ့ ဓာတ်ရောင်ခြည်တွေ၊ခရမ်းလွန်ရောင်ခြည်တွေကို မယ်လနင်(melanin)ဓာတ်က ကာကွယ်ပေးနိုင်လို့ပါ။ ခရုသင်းခေါ်တဲ့အရေပြားရောဂါမှာ ပြဿနာက မယ်လနင်(melanin)တွေ ချို့တဲ့တာ၊ပျက်ဆီးတာဖြစ်ပြီး အရေပြားကို အရောင်မခြယ်နိုင်တော့တာပါ။

လူ့ခန္ဓာ ကိုယ်၏ ကိုယ်ခံအားစနစ် လုပ် ဆောင်ချက် ချို့ယွင်းခြင်းနှင့် မျိုးရိုး ဗီဇတို့ကြောင့်ဖြစ်သည်။ ခုခံအားချင်း ပြန်တိုက်ခိုက်တဲ့autoimmune diseaseကြောင့် T-lymphocyte တွေက ဖျက်ဆီးလို့ ဖြစ်စေနိုင်တယ်။ စိတ် ဖိစီးမှုများခြင်း၊ Chemical Agents နှင့် ထိတွေ့မှုများခြင်း ၊ ဗိုင်းရပ်စ်ပိုးမွှား များကြောင့်လည်း ဖြစ်တတ်ပါသည်။ဆံပင်ဆိုးဆေးမှာ ပါဝင်တဲ့ phenolဓာတ်တမျိုးကြောင့်လည်း ဖြစ်နိုင်ပါသေးတယ်။ တခါတရံ အသားမစားသူတွေမှာ အဖြူကွက်လေးတွေ တွေ့ရတတ်ပေမယ့် နောက်ပိုင်းမှာ ပြန်ပျောက်သွားတတ်ပါတယ်။

ခရုသင်းရဲ့ လက္ခဏာ
ခရုသင်း ကနဦးအစမှာ အဖြူကွက်တွေ ပေါ်မှန်းမသိ ပေါ်ပေါက်လာပါတယ်။ အများစုဟာ ယားတာ၊နာတာမျိုးမရှိတတ်ဘူး။ တခါတရံ ဖြစ်စမှာ ယားတာမျိုးတော့ ရှိနိုင်တယ်။အကွက်ငယ်ကနေ အကွက်ကြီးထိ အမျိုးမျိုး ဖြစ်နိုင်တယ်။ နေရာကွက်ပြီး ဖြစ်နိုင်သလို တကိုယ်လုံးလည်း ဖြစ်နိုင်တယ်။ အကွက်ရဲ့အနားသတ်တွေက မညီမညာဖြစ်နေမယ်။အရောင်ရင့်တာ(သို့)အရောင်ဖျော့တာ နှစ်မျိုးလုံးဖြစ်နိုင်တယ်။ အသားမည်းသူတွေမှာ ပိုသိသာတယ်။ တခြားအရေပြားရောဂါတွေနဲ့ မှားနိုင်တယ်။ ၉၅ရာခိုင်နှုန်းဟာ အသက် ၄၀မတိုင်မှီ စဖြစ်ကြတယ်။အများစုဟာ အသက် ၁၀နှစ်မှ၃၀နှစ်အတွင်း ဖြစ်ကြတယ်။ ဖြစ်တဲ့ပုံစံပေါ်မူတည်ပြီး သုံးမျိုးခွဲထားတယ်။

၁။focal vitiligo
နေရာကွက်ပြီး ဖြစ်သလို မသိသာတတ်ဘူး။ဖြစ်ပြီးရင် ပျောက်ဖို့လွယ်တယ်။ ကလေးတွေမှာ သူ့ဘာသာပြန်ပျောက်သွားနိုင်တယ်။

၂။segmental vitiligo
ခန္ဓာကိုယ်တခြမ်းထဲမှာသာ ဖြစ်တယ်။အာရုံကြောရဲ့ dorsal rootမှာဖြစ်လို့ ကျောရိုးမရဲ့ တဖက်တည်းမှာ ကွက်ပြီးဖြစ်တယ်။ ပျံ့နှံဖို့လွယ်သလို လိမ်းဆေးပေးတဲ့အခါလည်း ပျောက်ဖို့ပိုလွယ်တယ်။

၃။generalised vitiligo
တကိုယ်လုံးအနှံ့တွေ့ရတဲ့ပုံစံ ဖြစ်ပါတယ်။ အဖြစ်လည်း များတယ်။အကယ်၍ အဖြူကွက်တွေက တပြင်လုံး နေရာအနှံ့ဖြစ်ရင် vitiligo universalisလို့ ခေါ်ပါမယ်။ အရှင်လတ်လတ် အဖြူဘဝပြောင်းသွားသူပေါ့။

မွေးရာပါmelaninဓာတ် လုံးဝချို့တဲ့နေသူကို albinismလို့ ခေါ်ပါတယ်။မသိသူတွေကတော့ အင်္ဂလိပ်ခေတ်က လူဝင်စားလို့ ယူဆကြတယ်။ ကွာခြားချက်က သမင်ဖြူ(vitiligo)ဆိုတာ မွေးရာပါ မဟုတ်ပါဘူး။

ခရုသင်းလို အရေပြားရောဂါကို ကျွမ်းကျင်ဆရာဝန်က ဆုံးဖြတ်ပေးရတယ်။ တခါတရံ နှင်းခူလိုတခြား အရေပြားရောဂါတွေနဲ့ မှားတတ်တယ်။ သိသာစေချင်ရင် wood's lamp(ultraviolet lamp)အလင်းပေးပြီး ခွဲခြားနိုင်တယ်။လိုအပ်ရင် အသားစဖြတ်ယူပြီး စမ်းသပ်နိုင်ပါတယ်။ တခြား ခုခံအားရောဂါတွေပါ ဆက်လက်စစ်ဆေးရပါမယ်။

ခရုသင်းကြောင့် နောက်ဆက်တွဲ ဘာတွေဖြစ်နိုင်လဲ
သူများနဲ့ မတူတဲ့ အဖြူကွက်တွေကြောင့် စိတ်ဓာတ်ကျလွယ်လာတယ်။ စိတ်ဒဏ်ရာရလာတယ်။ ကိုယ့်ဘာသာ သိမ်ငယ်လာတယ်။ ယုံကြည်မှုမရှိတော့ဘူး။ နာတာရှည်ရောဂါဆိုပြီး လူထဲမသွားချင်တော့ဘူး။ ဒါ့ပြင် အရေပြားကို ကာကွယ်ပေးတဲ့ ရောင်ခြယ်ပစ္စည်း ပျက်ဆီးတာမို့ နေရောင်ဒဏ်ကို ပိုခံစားရမယ်။ အသားအရေကြမ်းတာ၊မညီညာတာ ဖြစ်လာသလို နေလောင်လွယ်လာတယ်။ မျက်စိ၊နားစတာတွေမှာဖြစ်ရင် အမြင်အာရုံ၊ အကြားအာရုံချို့ယွင်းတာ ဖြစ်နိုင်တယ်။

ဘယ်လိုကုသနိုင်လဲ
ကုသတဲ့နည်းတွေကတော့ သောက်ဆေး၊လိမ်းဆေး၊အလင်းကုထုံး စသည်ဖြင့် အမျိုးမျိုးရှိတယ်။ပျောက်ကင်းနှုန်းတွေ မတူကြဘူး။ ရောဂါတုံ့ပြန်မှု မြင်တွေ့ဖို့ ၃လ-၂နှစ်ထိ ကြာနိုင်ပါတယ်။သေးတဲ့အကွက်တွေကို မသိသာအောင်၊လျှော့နည်းအောင် လုပ်ပေးနိုင်တယ်။

၁- ခရုသင်းအတွက် သောက်ဆေးအမျိုးမျိုးရှိတယ်။ တချို့က psoralen ဆေးတွေသောက်ကြတယ်။ ဘေးထွက်ဆိုးကျိုးများတယ်။ အဖြူကွက်က သက်သာမလာဘဲ အရေပြားကပိုမည်းကုန်လို့ အဖြူကွက်က ထင်းလာပါတယ်။ ဒါ့ကြောင့် နောက်ပိုင်းသိပ်မသုံးကြတော့ဘူး။ လေ့လာမှုတွေအရ phenylalanine နဲ့ tyrosine လို အမည်းရောင်ခြယ်ဓာတ် အားဖြည့်ပေးတဲ့ သောက်ဆေးတွေ အသုံးပြုနိုင်တယ်။ khellin extract အားဖြည့်ဆေး နဲ့ အလင်းကုထုံးတွဲကုရင် အဖြူကွက်ပျောက်ကင်းနိုင်ချေ ပိုပြီး များလာတယ်။ Khellin ဆိုတာ သဘာဝ psoralens ဓာတ်တစ်မျိုးဖြစ်ပြီး ဖိုတွန်အလင်းမှုန်တွေကို ကောင်းကောင်း တုံ့ပြန်နိုင်တယ်။ Vitinext plus သောက်ဆေးထဲမှာ ဒီဓာတ်တွေပါတယ်။ တစ်ရက် တစ်ကြိမ်-နှစ်ကြိမ် သောက်သုံးနိုင်တယ်။

၂- Phototherapy အလင်းရောင်ပေးပြီး ဖျော့နေတဲ့အကွက်တွေကို ပြန်ဖြည့်ပေးတယ်။ UV Aသို့ UV Bလို ခရမ်းလွန်ရောင်ခြည်ပေးပြီး ကုသရတယ်။ နောက်ပိုင်းမှာ ဆိုးကျိုးပိုနည်းတဲ့ UV Bကို အသုံးပြုလာကြတယ်။ ပြုပြင်ထားတဲ့ အလင်း (သို့) နေရောင်ထိချိန်ကို ဆေးလိမ်းပြီး နာရီဝက်မှာ ပြပေးရတယ်။ နောက်ပိုင်း အလင်းပြချိန် တဖြည်းဖြည်း ပိုကြာစေရတယ်။ သတိပြုရမှာက လိုအပ်တဲ့အချိန်ပမာဏသာ ထိတွေ့စေရမယ်။ ၆လ-၁နှစ်လောက် ပုံမှန်လုပ်ပေးရတယ်။ လေ့လာမှုတခုမှာ vitamin B12နဲ့ folic acidပါ တွဲပေးရင် အလင်းပေးကုသခြင်းကို ပိုမိုအကျိုးရှိစေတယ်။ပိုကောင်း၊ပိုသိသာချင်ရင် vitinext cream လိမ်းဆေးလိမ်းပြီး နေရောင်ပြပေးရတယ်။

၃- အရေပြားအစားထိုးတယ်ဆိုတာ ကောင်းတဲ့အရေပြားဆဲလ်တွေကို transplant အစားထိုးတဲ့နည်းဖြစ်ပါတယ်။

၄-အဖြူကွက်ပမာဏပိုများရင်(၅၀ရာခိုင်နှုန်းထက်များရင်) အကောင်းတိုင်းကျန်နေတဲ့ အရေပြား အရောင်ချွတ်တဲ့နည်း သုံးပေးနိုင်ပါတယ်။ monobenzone လို အရောင်ချွတ်ဆေး ပေးပြီး အရေပြားကို တသားတည်းဖြစ်အောင် အရောင်ချွတ်ပစ်တယ်။ monobenzone သုံးရင် အမည်းရောင်တွေအကုန်ကျွတ်သွားမှာမို့ တကိုယ်လုံးအဖြူ ဖြစ်သွားမှာကို ကြိုတင်သတိပေးရတယ်။ ရှိသင့်တဲ့အရောင်တွေ အကုန်ကျွတ်ကုန်တာမို့ ခရမ်းလွန်ရောင်ခြည်ကို မကာကွယ်နိုင်တော့ဘူး။ အရေပြားကင်ဆာဖြစ်နိုင်ချေမြင့်တက်လာတယ်။

၅-laser treatmentဆိုတာ အရေပြားရောဂါတွေမှာ စမ်းသပ်အောင်မြင်နေတဲ့ ကုသနည်းဖြစ်ပါတယ်။ အရေပြားမှာ မကောင်းတာ၊အရုပ်ဆိုးတာမျိုး ရှိရင် လေဆာရောင်ခြည်သုံးပြီး ကုသနိုင်တယ်။ ခရုသင်းမှာ excimer laserဆိုတာကို အသုံးပြုရတယ်။ဖြစ်တဲ့အဖြူကွက်က သေးငယ်ရင် ပိုအကျိုးရှိတာ တွေ့ရပါတယ်။

၆-Cosmetic camouflageဆိုတာ မိတ်ကပ်သုံးပြီး အရေပြားမညီညာတာကို ပြုပြင်ဖုံးကွယ်တာမျိုး ဖြစ်ပါတယ်။ သာမန်မိတ်ကပ်ထက်သာတဲ့အချက်က ရေစိုခံပြီး ၃-၄ရက်လောက် ကြာရှည်ခံတာဖြစ်ပါတယ်။ အရောင်စုံကို ရွေးချယ်နိုင်တယ်။သတိပြုရမယ့် အချက်က နေလောင်တာကို ကာကွယ်ပေးမယ်မဟုတ်ဘူး။ အမြင်အာရုံကို လှည့်စားတဲ့သဘောသာ ဖြစ်ပါတယ်။

၇-နေလောင်ကာလိမ်းဆေး
ခရုသင်း(သမင်ဖြူ)ကွက်တွေမှာ နေလောင်ကာလိမ်းဆေး ပေးနိုင်တယ်။အနည်းဆုံး SPF30 ပါဝင်တဲ့ နေလောင်ကာမျိုး လိမ်းပေးသင့်တယ်။

ဘာတွေ သိထားသင့်လဲ...
ခရုသင်းဟာ ကူးစက်ရောဂါမဟုတ်ဘူး။ ဒါ့ကြောင့် အတူနေမိသားစုဝင်တွေကို မကူးစက်နိုင်ပါဘူး။

ဆောင်ရန်၊ရှောင်ရန်
စိမ်းတဲ့ အသီးအရွက်များများစားပါ။
hydroquinoneပါဝင်တဲ့ ဘလူးဘယ်ရီ၊သစ်တော်သီး စတာတွေ ရှောင်ပါ။
ကော်ဖီ၊လက်ဖက်ရည်၊ချောကလက်၊အရက်၊ဘီယာ ရှောင်နိုင်ရင် ပိုကောင်းတယ်။

စိတ်ဖိစီးမှုကင်းဝေးအောင် အိပ်ရေးဝဝအိပ်ပါ။ တရားထိုင်တာ၊ယောဂကျင့်တာမျိုး လုပ်ပေးနိုင်ပါတယ်။ သောက်ဆေးထဲမှာ vitamin A ၊C ၊E၊ B12 ၊ folic acid ၊PABA ၊ iron၊ copper၊ zinc၊ selenium အိုမီဂါသရီး ပါဝင်တဲ့အားဆေးမျိုးသောက်ပေးနိုင်တယ်။phenylalanine အသားဓာတ်နဲ့ curcuminဓာတ်တွေက အကျိုးရှိတာ တွေ့ရတယ်။

အဖြူမြင်တိုင်း ခရုသင်း မဟုတ်..
အဖြူမြင်တိုင်း ခရုသင်းလို့တော့ မထင်စေချင်ဘူး။ တခြားရောဂါတွေလည်း ၁၀မျိုးမကရှိလို့ ဆရာဝန်နဲ့ သေချာပြသသင့်တယ်။ ဆေးပညာမှာ တိုးတက်မှုတွေရှိပြီဖြစ်လို့ စိတ်ဓာတ်ကျဖို့ မလိုဘဲ ကျွမ်းကျင်ဆရာဝန်နဲ့ စနစ်တကျကုသရင် သက်သာလာနိုင်ပါတယ်။

ဒေါက်တာအေးမင်းထူး
၁၄.၉.၂၅

02/09/2025

ပါးပြင်ပေါ်က တင်းတိပ်လို အမဲစက်များ
-------------------------------------
(အမဲစက်ထွက်သူများ ဖတ်ရန်)

Hori's nevus ဆိုတာ ပါးပြင်မှာဖြစ်တဲ့ တင်းတိပ်ဆန်ဆန် အညိုရောင် (သို့) ပြာညစ်ညစ်ရောင် အမဲစက်တွေကို ခေါ်ပါတယ်။ အများစုဟာ တင်းတိပ်နဲ့ မှားကြတယ်။ မွေးကင်းစအရွယ်မှာ ဖြစ်တတ်တဲ့ မွေးရာပါအမဲစက် (Nevus Of Ota) နဲ့ ပုံစံဆင်တူတယ်။ Nevus Of Ota နဲ့ ကွာခြားတာက hori's nevus တွေဟာ မွေးရာပါမဟုတ်ဘဲ အရွယ်ရောက်ပြီး နောက်ပိုင်းမှ တဖြည်းဖြည်းချင်း ပေါ်ပေါက်လာတာဖြစ်ပါတယ်။ ဒီအမဲစက်တွေဟာ ပါးပြင်နှစ်ဖက်လုံးတပြိုင်နက်လိုလို ဖြစ်တတ်တယ်။ များသောအားဖြင့် အသက် ၃၀-၄၀အတွင်း အမျိုးသမီးတွေမှာ အဖြစ်များတယ်။

ဘာ့ကြောင့်ဖြစ်ပေါ်လဲ
ပုံမှန်အားဖြင့် အမည်းရောင်ဆဲလ် melanocytes တွေဟာ အရေပြားအပေါ်ယံလွှာ (epidermis) မှာပဲ ဖြစ်ပေါ်လေ့ရှိတယ်။ ဒီရောဂါမှာတော့ melanocytes တွေဟာ အရွယ်ရောက်လာတာနဲ့ အရေပြားအောက်လွှာ (dermis) ထဲမှာ ပုံမှန်မဟုတ်ဘဲ တဖြည်းဖြည်း စုပုံလာရာကနေ ဒီလို ပြာညိုရောင် အမဲစက်တွေ ပေါ်လာတာပါ။ ကြာလေများလေဖြစ်လာတယ်။ မျိုးရိုး၊ ဟော်မုန်းပြောင်းလဲမှုတွေနဲ့ နေရောင်ထိတွေ့မှုတွေနဲ့ ဆက်စပ်တယ်လို့ ဆိုနိုင်တယ်။ ဒီအမဲစက်ကို အာရှတိုက်ဖွား အမျိုးသမီးတွေမှာ အဓိကတွေ့ရတတ်ပါတယ်။ ဒါ့ကြောင့် မြန်မာနိုင်ငံမှာဖြစ်တဲ့သူ အင်မတန်ပေါတယ်။ အများစုက တင်းတိပ်နဲ့ မှားကြတယ်။

ကုသနည်း
ဒီလိုအမဲစက်ရောဂါဖြစ်ရင် လိမ်းဆေးသောက်ဆေးနဲ့ မသက်သာဘဲ လေဆာပစ်မှ ပျောက်ကင်းနိုင်တယ်။ လှိုင်းအလျား 1064nm ရှိတဲ့ Nd:YAG laser အမျိုးအစားကို အသုံးပြုပြီး အရေပြားအောက်လွှာမှာရှိတဲ့ အမဲရောင်ဆဲလ်တွေကို ဖြည်းဖြည်းချင်းဖြိုဖျက်ပစ်ရတယ်။ ကမ္ဘာ့နောက်ဆုံးပေါ် picosecond laser တွေက အာနိသင်အကောင်းဆုံးဖြစ်တယ်။ လေဆာကြောင့် ပျက်စီးသွားတဲ့ အမဲရောင်ဆဲလ်တွေကို အရေပြားအောက် သွေးဖြူဥတစ်မျိုးက ဝါးမြိုပြီး ဖျက်စီးပစ်တယ်။ လေဆာကဖျက်စီးလိုက်ပေမယ့် အမဲစက်က ချက်ချင်းမသိသာသေးဘဲ သွေးဖြူဥကသွားရောက်ဝါးမြိုအောင် အချိန်နည်းနည်းတော့ပေးရတယ်။ ဒီလိုနဲ့ တဖြည်းဖြည်းချင်း သက်သာအောင်လုပ်ရတယ်။ အရေပြားအောက်လွှာမှာဖြစ်တဲ့ အမဲစက်ဖြစ်လို့ ချက်ချင်းကြီး မသက်သာဘူး။ ကုရခက်တယ်။ တစ်ကြိမ်ပစ်ပြီးတိုင်း အရောင်တဖြည်းဖြည်း ပျော့သွားပြီး အနက်ရောင်စက် ပိုသေးသွားလာတယ်။ ဒီလိုနဲ့ အမည်းစက်ကင်းစင်အောင် ပြုလုပ်ရတယ်။ သတိပြုရမှာက အရောင်ဖျက်ဆေး (hydroquinone)တွေက ဒီအမဲကွက်တွေပိုဆိုးစေတယ်။ Hori's nevus တွေဟာ များသောအားဖြင့် လေဆာ ၆-၁၀ကြိမ် ထိ ပစ်ရတတ်ပါတယ်။ သိသာထင်ရှားတဲ့ ရလာဒ်အတွက် အနည်းဆုံး အချိန် (၆)လ၊(၁)နှစ် လိုအပ်ပါတယ်။

သိထားသင့်သည့်အချက်များ
* အမဲစက်တွေဟာ တစ်ကြိမ်ထဲနဲ့ အကုန်သက်သာသွားမှာ မဟုတ်ဘဲ တဖြည်းဖြည်းအရောင်ပျော့သွားတာ ဖြစ်ပါတယ်။
* အရေပြားသိသာပြောင်းလဲမှုရှိအောင် laser sessions အကြိမ်ရေအတွက်များစွာ လုပ်ဖို့လိုအပ်တယ်။
* သတိပြုရမှာက မျက်နှာအသားညိုတဲ့အရေပြားပိုင်ရှင်တွေမှာ (Fitzpatrick IV–V) မှာ post-inflammatory hyperpigmentation ခေါ်တဲ့ ရောင်ရမ်းမှုဖြစ်စဉ် ပိုဖြစ်နိုင်တဲ့အတွက်
လေဆာပြင်းအား(fluence) ကို စနစ်တကျတွက်ချက်ပြီးမှ အသေးစိတ်ကုသရတယ်။ ပြင်းအားများရင် အမဲစက်က ပိုဆိုးလာတတ်တာ သတိပြုပါ။ လေဆာပစ်ပြီး အမဲစက်တွေပိုထွက်လာတာ လေဆာပြင်းအား အချိန်အဆများလို့ ဖြစ်တယ်။
* လေဆာပစ်တဲ့အခါ သက်သာပျောက်ကင်းဖို့ အချိန် (၆)လထိ ပုံမှန်ပစ်ဖို့ လိုအပ်တယ်။
သက်သာပြီးနောက်ပိုင်း နေလောင်ကာလိမ်းဆေး နေ့စဉ်ပုံမှန်သုံးစွဲဖို့လည်း အထူးအရေးကြီးတယ်။

ဒေါက်တာအေးမင်းထူး
၂.၉.၂၅

26/08/2025

အမာရွတ်နဲ့ အမဲစက်တွေ အရှင်းပျောက်ဖို့ အချိန် ၈-၁၂ပတ်ထိ လိုအပ်နိုင်ပါတယ်...