Easi-V, Naypyidaw (2026)

19/07/2022

🇲🇲 အာဇာနည်နေ့ တို့မမေ့ 🇲🇲

၁၉၄၇-ခုနှစ် ဇူလိုင်လ (၁၉) ရက်၊
နံနက် (၁၀) နာရီ (၃၇) မိနစ် အချိန်တွင် ကျဆုံးသွားခဲ့သော ဗိုလ်ချုပ်အောင်ဆန်းနှင့်တကွ အာဇာနည် ခေါင်းဆောင်ကြီးများအားလုံးကို Easi-V မိသားစုမှရိုသေလေးစားစွာဂါရဝပြုအပ်ပါသည်🙏

#အာဇာနည်နေ့

12/07/2022

“ဝါဆိုလပြည့်နေ့"

ဝါဆိုလပြည့်နေ့ ဓမ္မစကြာအခါတော်နေ့တွင် မိဘပြည်သူများအားလုံး စိတ်၏ချမ်းသာခြင်း၊ ကိုယ်၏ကျန်းမာခြင်းနှင့်ပြည့်စုံ၍ ကောင်းမှုကုသိုလ်များ ပွားများနိုင်ကြပါစေလို့ EasiV မိသားစုမှဆုတောင်းမေတ္တာပို့သလိုက်ပါတယ်ရှင့်...🙏

#ဝါဆိုလပြည့်နေ့

08/07/2022

ပန်းနာရင်ကြပ်ရောဂါ

အအေးမိနှာစေးခြင်း ၊ ဆေးလိပ်သောက်ခြင်း ၊ ဓာတ်မတည့်သောအရာများ ၊ ယားယံစေသော အရာများနှင့်ထိတွေ့မိခြင်း ၊ တိရစ္ဆာန်အမွှေး ၊ ဖုန်မှုန့် ၊ ဆေးလိပ်ငွေ့များ ၊ ခြင်ဆေးငွေ့များကိုရှုရှိုက်မိခြင်း ၊ လေထုညစ်ညမ်းမှု ၊ မီးခိုးငွေ့နှင့်ဓာတုဓာတ်ငွေ့များကိုရှုရှိုက်မိခြင်း ၊ အပူအအေးမမျှတခြင်း ၊ ရာသီအပြောင်းအလဲများကြောင့် အသက်ရှုလမ်းကြောင်းပိုးဝင်ခြင်း နှင့် အသက်ရှုလမ်းကြောင်းကျဥ်းမြောင်းခြင်းတို့ကြောင့် ပန်းနာရင်ကြပ်ရောဂါဖြစ်ပွားတတ်ပါသည်။

အသက်ရှုလမ်းကြောင်းပိုးဝင်ကာ ပုံမှန်ထက်ပို၍အသက်ရှုရခက်ခြင်း ၊ ရင်ဘတ်ကြပ်ခြင်း ၊ အိပ်နေစဥ် နှင့် အားကစားလုပ်ချိန်အသက်ရှုကြပ်ခြင်း ၊ ဓာတ်မတည့်သောအရာများ ကိုရှုရှိုက်မိခြင်းကြောင့် အသက်ရှုရကြပ်ခြင်း ၊ အဆက်မပြတ်ချောင်းဆိုးခြင်း ၊ ချွဲထွက်များခြင်း ၊ အသက်ရှုတဲ့အခါ လေသံထွက်ခြင်း (တဖြည်းဖြည်း တိုးရာမှကျယ်လာခြင်း) စသည့် လက္ခဏာများခံစားရပါသည်။
အရှင်းပျောက်သွားသောရောဂါမဟုတ်ပါ သို့သော်လည်း ဝေဒနာသက်သာစေရန် ကုသလို့ရသော နည်းလမ်းများရှိပါသည်။ Corticosteroid inhaler , Leukotriene modifiers , Combination inhalers , Theophylline စသည့်ဆေးဝါးများဖြင့်သက်သာအောင်ကုသလို့ရပါသည်။ ဆေးဝါးများသာမက လူနေမှုပုံစံကိုပါပြောင်းလဲမှသာအဆင်ပြေမည်ဖြစ်သည့်အတွက် မီးခိုးများ ၊ ဖုန်မှုန့်များ ၊ ဓာတုဓာတ်ငွေ့များ မရှုရှိုက်မိအောင်အတတ်နိုင်ဆုံးရှောင်ရှားခြင်း ၊ အအေးမခံခြင်း ၊ အမြဲနွေးနွေးထွေးထွေးသာနေထိုင်သင့်ခြင်း ၊ အားကစားလွန်လွန်ကျွံကျွံမလုပ်သင့်ခြင်း ၊ ညအိပ်ချိန်တွင် humidifier စက်ဖွင့်ထားပြီးအိပ်ခြင်း နှင့် အပြင်ထွက်လျှင်နှာခေါင်းစည်းတတ်ထားခြင်းတို့ဖြင့် ဂရုပြုနေထိုင်သင့်ပါသည်။

လူတိုင်းကျန်းမာခြင်းဖြင့် အောင်မြင်မှုများရရှိနိုင်ပါစေ🙏

~~~ မေဖြိုးကြိုင် (ဆေးဝါးတက္ကသိုလ်) ~~~

#ပန်းနာရင်ကြပ်ရောဂါ

14/05/2022

🙏ကဆုန်လပြည့်နေ့🙏

ယနေ့မြန်မာသက္ကရာဇ် ၁၃၈၄ ခုနှစ်၊ ကဆုန်လပြည့်နေ့(ဗုဒ္ဓနေ့) တွင်မြန်မာပြည်သူပြည်သားအပေါင်း သာယာချမ်းမြေ့ကြပါစေကြောင်း Easi-V မိသားစုမှဆုတောင်းမေတ္တာပို့သအပ်ပါတယ်ရှင့်☺️

#ကဆုန်လပြည့်နေ့

08/05/2022

BPA နဲ့ပြုလုပ်ထားတဲ့ လူ့သုံးကုန်ပစ္စည်းတွေက ကျန်းမာရေးကိုဘယ်လိုထိခိုက်စေသလဲ❓❓❓

BPA ဆိုသည့် Bisphenol A သည် ဓာတုဒြပ်ပေါင်းတစ်မျိုးဖြစ်ပြီး ဟော်မုန်းစနစ်ကိုဟန့်တားပေးသော ပစ္စည်းတစ်မျိုးလည်းဖြစ်ပါသည်။Chemical တစ်မျိုးဖြစ်သည့် BPA(Bisphenol A)ကို အစားအစာနှင့်အအေးများကို ထုတ်ပိုးသော ပလတ်စတစ်ဘူးများ ၊ စည်သွတ်ဘူးများ ၊ ဘူးအဖုံးများ နှင့် ရေပိုက်များ ထုတ်လုပ်ရာတွင် ထည့်သွင်းထားကြောင်း တွေ့ရပါသည်။ BPA ဖြင့် ပလစ်စတစ်ပစ္စည်းများကို အများအားဖြင့် ထုတ်လုပ်ကြပါသည်။

BPAနှင့်ပြုလုပ်ထားသော လူသုံးကုန်ပစ္စည်းများကို အသုံးပြု၍ရသော်လည်း ပါးစပ်ထဲထည့်၍စားရသော စားသောက်ကုန်ပစ္စည်း (ဥပမာ- ပလစ်စတစ်ဘူး) များတွင် BPAပါဝင်နေပါက ရှောင်ကြဥ်သင့်ပါသည်။BPA ပါဝင်သောပစ္စည်းများကို ကာလအတော်ကြာသုံးစွဲမိပါက သန္ဓေသားဖွံ့ဖြိုးမှုကိုနှောင့်နှေးစေခြင်း ၊ ကလေးများတွင် ဦးနှောက်ဖွံ့ဖြိုးမှုကိုနှေးကွေးစေခြင်း ၊ အမျိုးသားအင်္ဂါ မှ သုတ်ထုတ်လုပ်မှုကို လျော့ကျစေခြင်း ၊ ကလေးများ၏အပြုအမူများ ပုံမှန်မဟုတ်ခြင်း များဖြစ်ပေါ်စေနိုင်ပါသည်။ လူကြီးများတွင် သွေးပေါင်ချိန်တက်ခြင်း ၊ ဆီးချိုရောဂါဖြစ်ခြင်း ၊ ကင်ဆာရောဂါ နှင့် နှလုံးသွေးကြောဆိုင်ရာရောဂါများဖြစ်ပွားနိုင်ပါသည်။

ပလစ်စတစ်ပစ္စည်းများ၏အောက်ခြေရှိ Recycle code number တွင် Recycle number 1,2,4,5,6 ဟု တွေ့ရှိပါက BPA free ပစ္စည်းများဖြစ်သည့်အတွက်စိတ်ချစွာသုံးစွဲနိုင်ပြီး Recycle number 3,7 ဖြစ်နေပါက သုံးစွဲရန်မသင့်သော BPAဖြင့်ပြုလုပ်ထားသော ပစ္စည်းများဖြစ်ပါသည်။ကျန်းမာရေးအတွက်ထိခိုက်စေသည့် BPA ပါဝင်သောပစ္စည်းများကို အတတ်နိုင်ဆုံး‌ရှောင်ရှားသင့်ပါသည်။ ယခုအခါစျေးကွက်ထဲတွင် BPA free ဟုတံဆိပ်ကပ်ထားသော လူသုံးကုန်ပစ္စည်းများရှိလာသည့်အတွက် BPAမပါဝင်သောပစ္စည်းများကိုရွေးချယ်ဝယ်ယူနိုင်ပါသည်။ ပူသောအစားအစာများစားသောအခါ ပလတ်စတစ်ဖြင့်ပြုလုပ်ထားသည့် ပစ္စည်းများကိုသုံးစွဲမည့်အစား ဖန် ၊ ကြွေ နှင့် စတီးဖြင့် ပြုလုပ်ထားသော ပန်းကန်များ ၊ ခွက်များ ၊ ရေဘူးများ စသည့် လူသုံးကုန်ပစ္စည်းများကို သုံးစွဲခြင်းဖြင့် ကျန်းမာရေးအတွက်အထူးဂရုပြုသင့်ကြောင်း အကြုံပြုလိုက်ပါတယ်ရှင့်....

🙏လူတိုင်းကျန်းမာခြင်းဖြင့် အောင်မြင်မှုများရရှိနိုင်ပါစေ🙏

-----မေဖြိုးကြိုင်(ဆေးဝါးတက္ကသိုလ်)-----

13/04/2022

🙏မဟာသင်္ကြန် 💦

မြန်မာသက္ကရာဇ် (၁၃၈၄ ခုနှစ်) မြန်မာနှစ်သစ်ကူးအချိန်အခါသမယမှာ ရွှင်လန်းချမ်းမြေ့ကြပါစေကြောင်း Easi-V Myanmar မိသားစုမှ ဆုတောင်းမေတ္တာပို့သလိုက်ပါတယ်ရှင့်🙏🙏🙏

08/04/2022

အစာအဆိပ်သင့်လျှင် ဘာတွေလုပ်ဆောင်သင့်လဲ❓
~~~~~~~~~~~~~~~~~~~~~~~~~~~
အစာအဆိပ်သင့်ခြင်းသည် အသီးအရွက်များကိုသေချာမဆေး‌ကြောပဲစားခြင်း ၊ အစားအစားခင် လက်ကို စင်ကြယ်အောင်မဆေးခြင်း ၊ မှိုနှင့် အဆိပ်အတောက်ဖြစ်စေသောအသီးအဖုများကိုစားမိခြင်း ၊ အသားစိမ်း ၊ ငါးစိမ်းများကိုပူပူနွေးနွေးချက်ပြုတ်မစားသောက်ဘဲ အစိမ်းစားခြင်း နှင့် အသားများမကျက်ခြင်း တို့ကြောင့် ဘက်တီးရီးယား နှင့် ဗားရပ်စ်ပိုးများ ခန္ဓာကိုယ်ထဲတွင်ဝင်‌ရောက်ကာ အစာအဆိပ်သင့်ခြင်း ဖြစ်ပေါ်တတ် ပါသည်။ အစာအဆိပ်သင့်သောအခါ အန်ခြင်း ၊ ဝမ်းလျောခြင်း ၊ မူးဝေခြင်း နှင့် ဖျားခြင်း တို့ဖြစ်တတ်ပါသည်။

အခန့်မသင့်လို့အစာအဆိပ်သင့်ခဲ့လျှင်
🔸ရေဓာတ်ဆုံးရှုံးမှုများသည့်အတွက် ရေ နှင့် ဓာတ်ဆား များများသောက်ပေးရမည်။
🔸နို့ နှင့် နို့ထွက်ပစ္စည်းများ စားသုံးခြင်းကိုရှောင်ရှားရမည်။
🔸အရက် နှင့် ကော်ဖီသောက်သုံးခြင်း မပြုလုပ်သင့်ပါ။
🔸ကုန်ဆုံးသွားသော အားအင်များအတွက် အနားများများယူ‌ပေးရပါမည်။
🔸ဝမ်းပိတ်ဆေး နှင့် အအန်ပျောက်ဆေးများကို ဆေးဝါးပညာရှင်ရှိသောဆေးဆိုင်တွင် ခံစားရ‌သော လက္ခဏာများပြောပြ၍ ဝယ်ယူသောက်သုံးရပါမည်။
🔸အန်ခြင်း ၊ ဝမ်းလျောခြင်းများ မသက်သာဘဲ ဆက်တိုက်ဖြစ်နေလျှင် ဆရာဝန်ထံတွင်ဆေးကုသမှု ခံယူသင့်ပါသည်။

အစာအဆိပ်သင့်ခြင်းသည် အသက်ဆုံးရှုံးသည်အထိဖြစ်တတ်သည့်အတွက် အသားစိမ်း ၊ ငါးစိမ်းများကို သေချာစွာဆေးကြောချက်ပြုတ်ခြင်း ၊ အသီးအရွက်များကို မစားခင် ရေ နှင့် ဆားဖြင့်ဆေးကြောခြင်း ၊ သန့်စင်သောလက်ဖြင့် အစားအစာများကိုချက်ပြုတ်ကိုင်တွယ်စား‌သောက်ခြင်း ၊ ပိုးသတ်ထားသော နို့များကိုသောက်သုံးခြင်း နှင့် ပင်လယ်စာနှင့်မှိုများစားသောအခါ ချင့်ချိန်ပြီး စားသင့်ကြောင်း သတိပေးလိုက်ပါရစေရှင့်..

လူတိုင်းကျန်းမာခြင်းဖြင့် အောင်မြင်မှုများရရှိနိုင်ပါစေရှင့် 🙏

-----မေဖြိုးကြိုင်(ဆေးဝါးတက္ကသိုလ်)------

27/03/2022

နွေရာသီမှာ ကျန်းမာရေးနှင့်အညီ ဘယ်လိုနေထိုင်ရမလဲ....❓❓❓
လူတိုင်းကျန်းမာရေးနှင့်အညီ နွေရာသီမှာနေထိုင်ရမည့်အချက်များကို မျှဝေလိုက်ပါတယ်ရှင့်

(1) ရေဓာတ်ပြည့်ဝအောင်နေပါ။
နွေရာသီ၏ပူပြင်းသောနေရောင် နှင့် ချွေးထွက်များခြင်းကြောင့် ခန္ဓာကိုယ်ရှိ ရေဓာတ်များဆုံးရှုံး လာတတ်သည့်အတွက် ရေ နှင့် ရေဓာတ်ပြည့်ဝသောဖျော်ရည်များကို တစ်နေ့တွင် အနည်းဆုံး ၃လီတာ မှ ၄လီတာထိသောက်သုံးသင့်ပါသည်။

(2) တစ်ကိုယ်ရေသန့်ရှင်းမှုပုံမှန်ပြုလုပ်ပါ။
နွေရာသီတွင်ပုံမှန်ထက် ချွေးထွက်များသည့်အတွက်ချွေးမှတစ်ဆင့် ဘက်တီးရီးယား နှင့် ဗားရပ်စ်ပိုးများခန္ဓာကိုယ်တွင်ပေါက်ပွားတတ်ပါသည်။ ရောဂါပိုးမွှားများ မပေါက်ပွားရလေအောင်နှင့် အရေပြားရောဂါ ၊ ဝက်သက် ၊ ‌ရေကျောက်ရောဂါ ၊ ပါးချိတ်ယောင်ခြင်းများမဖြစ်ပွားလေအောင် တစ်နေ့ကိုအနည်းဆုံး ရေ ၂ကြိမ်ချိုးခြင်း နှင့် တခြားလိုအပ်သောတစ်ကိုယ်ရည်သန့်ရှင်းစေသော ပစ္စည်း များကို ဝယ်ယူအသုံးပြုပေးခြင်းတို့ ပြုလုပ်သင့်ပါသည်။

(3) အစားအစာများကို မစားခင်သေချာစွာစစ်ဆေးပါ။
ပူပြင်းသောရာသီရဲ့အပူချိန်ကြောင့်အစားအစာများသိုးလွယ်ခြင်း ၊ပုတ်လွယ်ခြင်းတို့ ဖြစ်တတ်သည့် အတွက် ချက်ပြုတ်ထားသောဟင်းလျာများ နှင့် အသီးအရွက်များကို မစားခင် သေချာစွာ စစ်ဆေးခြင်းဖြင့် အစာအဆိပ်ဖြစ်ခြင်း ၊ ဝမ်းပျက်ဝမ်းလျောရောဂါနှင့် တခြားအူလမ်းကြောင်းဆိုင်ရာရောဂါများမဖြစ်ပွားအောင်ကာကွယ်ရမည်ဖြစ်ပါသည်။

(4) နေရောင်နှင့်တိုက်ရိုက်ထိခြင်းကိုတတ်နိုင်သမျှရှောင်ပါ။
နေပူထဲတွင်နေတာကြာြခင်းကြောင့် အရေပြားရောဂါ၊ မျက်စိနာခြင်း ၊ နေလောင်ခြင်း ၊ အပူရှပ်ခြင်း ၊ ရှော့လ်ရခြင်းနှင့် ဖုန်မှုန့်များကြောင့် ပန်းနာရင်ကြပ်ရောဂါ များဖြစ်ပွားတတ်သည့်အတွက် မဖြစ်မနေ အပြင်သွားရသောအခါ ထီးဆောင်းခြင်း ၊ SPF 50ပါသော suncream လိမ်းခြင်း ၊ ပေါ့ပါးသောချည်ထည်အဝတ်အစားများ ဝတ်ဆင်ခြင်းတို့ ပြုလုပ်ရမည် ဖြစ်ပါသည်။

(5) ကိုယ်လက်လှုပ်ရှားအားကစားလုပ်သောအခါ ဂရုစိုက်ပါ။
ချွေးထွက်များသောအားကစားများလုပ်ခြင်းကြောင့် ခန္ဓာကိုယ်အပူချိန်တက်ခြင်း ၊ မောပန်းခြင်း ၊ နုံးချိခြင်း ၊ မူးဝေခြင်းများဖြစ်ပေါ်တတ်သည့်အတွက် ကိုယ်လက်လှုပ်ရှားလေ့ကျင့်ခန်းများကို ဂရုတစိုက် လုပ်ဆောင်သင့်ပါသည်။

🙏လူတိုင်းကျန်းမာခြင်းဖြင့် အောင်မြင်မှုများရရှိနိုင်ပါစေရှင့်🙏

-----မေဖြိုးကြိုင်(ဆေးဝါးတက္ကသိုလ်)------

20/03/2022

“သတ်မှတ်ထားတဲ့ထိန်းချုပ်ဆေးဝါးများ"

ဆေးဝါးများစွာအား လွယ်လင့်တကူ ဆေးဆိုင်များတွင် ဝယ်ယူလို့ရသော်ငြားလည်း ဆရာဝန်ဆေးစာနှင့် ဆေးကုသခွင့်လက်မှတ်ပါမှသာ ဝယ်လို့ရသော‌ထိန်းချုပ်ဆေးဝါးများလည်းရှိပါသည်။ ထိုထိန်းချုပ်ဆေးဝါးများမှာ ဘေးထွက်ဆိုးကျိုးများပြီး စနစ်တကျသောက်သုံးဖို့လိုသည့်အတွက် အစိုးရမှသေချာစွာ သတ်မှတ်ထားသော ဆေးများဖြစ်ပါသည်။ ထိန်းချုပ်ဆေးဝါးများကို ထိန်းချုပ်ဆေးဝါးရောင်းချခွင့်လိုင်စင်ရှိသော ဆေးရုံများတွင်သာ ရောင်းချခွင့်ပေးပြီး လုံခြုံသောဗီဒို (သို့) စိတ်ချရသောနေရာတွင် တာဝန်ရှိသူမှ သေချာစွာသီးသန့်ထိန်းသိမ်းထားရန်လိုအပ်ပါသည်။ ဆေးပေးသောအခါတွင်လည်း ဆရာဝန်၏ဆေးညွှန်းစာရွက်၊ ဆေးကုသခွင့်လက်မှတ်(ဆမနံပါတ်) ၊ ဆရာဝန်လက်မှတ်ပါရှိမှုကိုစစ်ဆေးရမည်ဖြစ်ပြီး ဆေးဝါးကျွမ်းကျင်သူ ဆေးဝါးပညာရှင် မှ ဆေးပမာဏ နှင့် သုံးစွဲရမည့်အချိန် ၊ အကြိမ်အရေအတွက်တို့ကို လူနာအားသေချာရှင်းပြပြီးမှသာ ဆေးပေးရမည်ဖြစ်ပါသည်။

ထိန်းချုပ်ကန့်သတ်ဆေးဝါးများမှာ
• စိတ်ငြိမ်ဆေးများ
• မေ့ဆေးအုပ်စုဝင်များ
• လူကိုထိုင်းမိုင်းမူးယစ်စေသော အကိုက်အခဲပျောက်ဆေးများ
• အိပ်ဆေးများ
• စိတ်ရောဂါကုသရသောဆေးဝါးအမျိုးမျိုး တို့ပါဝင်ပါသည်။
ထိုထိန်းချုပ်ကန့်သတ်ထားသော ဆေးများသည် ရေရှည်တွင်စွဲလမ်းတတ်သဖြင့် လူငယ်များ မှားယွင်းစွာ သုံးစွဲမှုမဖြစ်စေရန် အစိုးရမှ ကန့်သတ်ဆေးဝါးများအဖြစ် သတ်မှတ်ထားခြင်းဖြစ်ပါသည်။
ထိန်းချုပ်ဆေးဝါးများအတွက် ဆေးကုသခွင့်ရှိသောဆရာဝန် ၏ဆေးညွှန်းစာရွက် တွင် အောက်ပါအချက်များ ပါရှိရမည်။

(၁) လူနာအမည်၊ ကျား/မ၊ အသက်
(၂) လူနာ ၏ နိုင်ငံသားစိစစ်ရေးကတ်ပြားအမှတ်/ နိုင်ငံခြားသားမှတ်ပုံတင် အမှတ်၊
(၃) လူနာ ၏ နေရပ်လိပ်စာ (ဆေးရုံ၊ ဆေးကု ဂေဟာသို့ တက်ရောက်ကုသ နေပါက လူနာ၏ ဆေးရုံမှတ်ပုံတင်အမှတ်)၊
(၄) ရောဂါအမည်၊
(၅) ဆေးဝါးအမည် {Generic and Brand name (ရှိလျှင်)}၊
(၆) ဆေးဝါးအလေးချိန် (Strength / Weight) ၊
(၇) ဆေးချိန်ဆေးညွှန်း (Dosage) နှင့် ဆေးဝါးပမာဏ (Amount) ၊
(၈) ဆေးဝါးသုံးစွဲရမည့်ကာလ (Duration of use or treatment) ၊ (ရက်သတ္တနှစ်ပတ်စာထက်ပို၍ ဆေးဝါးကိုမပေးရ) ၊
(၉) ရက်စွဲ၊
(၁၀) ဆရာဝန်အမည်၊ ဆေးကုသခွင့်လိုင်စင် သို့မဟုတ် လက်မှတ်အမှတ်၊
(၁၁) ဆေးရုံ၊ ဆေးကုဂေဟာ၊ ဆေးခန်းအမည်နှင့် လိပ်စာ။

25/02/2022

ဘေဘီလေးရှိတဲ့အိမ်တိုင်းဆောင်ထားသင့်သောဆေးဝါးများ
~~~~~~~~~~~~~~~~~~~~~~~~~~~~~

ဘေဘီလေးတွေရှိတဲ့အိမ်တိုင်းဆောင်ထားသင့်သည့်ဆေးဝါးများကို အိမ်မှာမဆောင်ထားရသေးတဲ့ မေမေများနှင့် မေမေအသစ်များ ၊မေမေလောင်းလျာများအတွက်ရည်ရွယ်ပြီး မျှဝေပေးလိုက်ပါတယ်။ အရေးပေါ်လိုအပ်လာတဲ့အခါမျိုးတွင်လည်း အရမ်းအသုံးဝင်ပါတယ်နော်။
(၁) အဖျားကျဆေးရည်(Paracetamol ပါဝင်တဲ့ဆေးရည်ကိုယ်အဆင်‌ပြေရာတံဆိပ်ကိုဝယ်ယူနိုင်ပါတယ်)
(၂) အပူကျစေရန်ကပ်ရသောပလာစတာ
(၃) အဖျားကျစေသော ဒုံးကျည်တောင့်များ
(၄) Cetirizine ပါဝင်သော နှာစေးပျောက်ဆေး
(၅) နှာပိတ်ရင် အစက်ချရသော sterile saline solution
(၆) ကလေးဝမ်းပျော့ဆေးရည်
(၇) ကလေးများအတွက်သီးသန့်ထုတ်ထားသော ဓာတ်ဆား
(၈) ဝမ်းပျက်ဝမ်းလျော နှင့် ဝမ်းပုံမှန်မဟုတ်လျှင်သောက်သုံးရသော ကလေးများအတွက် ထုတ်လုပ်ထားသော ပရိုဘိုင်အိုတစ်အမှုန့်ထုတ်များ
(၉) ချောင်းဆိုးပျောက်ဆေး နှင့် ချွဲပျော်ဆေးများ
(၁၀) ခြင်ကိုက် ၊ အကောင်ကိုက် ၊ အနီဘုများ ၊ ယားနာဘုများအတွက် Calamineပါဝင်သောအရည်
(၁၁) ကလေးများအတွက်သီးသန့်ထုတ်ထားသော ဝမ်းချူဘောလုံး
(၁၂) Domperidone ပါဝင်သော အအန်ပျောက်ဆေးများ
(၁၂) နေ့စဥ်သောက်သုံးရန်လိုအပ်သော ဗီတာမင်အစုံပါဝင်သော အားဆေး
(၁၃) ကလေးရင်လူဆေးများ
(၁၄) နှာစေးပျောက်ရန် နှင့် ဝမ်းဗိုက်မအီမသာဖြစ်ခြင်းများအတွက် မုန့်ညှင်းဆီ

ပိုးသတ်ဆေးအမျိုးမျိုးကိုတော့ ဆရာဝန်၏ညွှန်ကြားချက်အတိုင်းလိုက်နာသောက်သုံးရမှာဖြစ်ပါတယ်။

နီးစပ်ရာဆေးဆိုင်များ နှင့် ကလေးပစ္စည်းအမျိုးမျိုးရောင်းသောဆိုင်များတွင်ဝယ်ယူရရှိနိုင်ပါတယ်။ အိမ်ကဆည်းလည်းလေးတွေကျန်းမာပြီးပျော်ရွှင်စေဖို့အတွက် ဆေးလေးတွေဆောင်ထားလိုက်တော့နော် မေမေတို့ရေ.....

-----မေဖြိုးကြိုင်(ဆေးဝါးတက္ကသိုလ်)-----

Easi-V

19/07/2022

12/07/2022

08/07/2022

14/05/2022

08/05/2022

13/04/2022

08/04/2022

27/03/2022

20/03/2022

25/02/2022

Address

Telephone

Website

Alerts

Contact The Practice

Shortcuts

Share

Category