23/08/2026
လေဖြတ်ပြီးနောက် မလှုပ်ရှားနိုင်သော/အားနည်းသွားသော လက်ပြန်လည်ကောင်းမွန်လာနိုင်ခြေကို ဆေးပညာရှင်မဟုတ်သူတစ်ဦးအနေဖြင့် ဘယ်လိုသိနိုင်ပါမလဲ။
လေဖြတ်ပြီး ပထမရက်ပိုင်းနှင့် သီတင်းပတ်များအတွင်း ရိုးရှင်းသော လှုပ်ရှားမှုများကို ကြည့်ရှုခြင်းဖြင့် ခန့်မှန်းနည်း ကိုမျှဝေသွားပါမယ်။
**လက်ဖြန့်ခြင်းနှင့် လက်မောင်းမြှောက်ခြင်း" စစ်ဆေးနည်း**
လေဖြတ်ပြီး ၁ ရက်မှ ၃ ရက်အတွင်း လူနာအား အောက်ပါလှုပ်ရှားမှု ၂ မျိုးကို ပြုလုပ်ခိုင်းကြည့်ပါ -
* **လက်ချောင်းများ စစ်ဆေးခြင်း -** လူနာအား ၎င်း၏လက်ဖဝါးကို ဖြန့်စေပြီး စားပွဲ သို့မဟုတ် ပေါင်ပေါ်မှ လက်ချောင်းအားလုံးကို ဆန့်တန်းကာ အပေါ်သို့ ကြွခိုင်းပါ။
* **ပခုံး စစ်ဆေးခြင်း -** ပခုံးကို တွန့်ခိုင်းပြီး လက်မောင်းကို ခန္ဓာကိုယ်ဘေးဘက်သို့ ကားခိုင်းပါ။
**တွေ့ရှိချက်များကို အဓိပ္ပာယ်ဖွင့်ဆိုခြင်း**
ပထမ ၇၂ နာရီအတွင်း လက်ချောင်းများနှင့် ပခုံးတွင် သိသာမြင်သာသော လှုပ်ရှားမှုအနည်းငယ် စတင်ရှိလာခြင်းသည် အကောင်းဆုံး လက္ခဏာဖြစ်ပါသည်။ အကယ်၍ အနည်းငယ် တွန်းကန်ထားသည့်ကြားမှ လက်မောင်းကို မြှောက်နိုင်ပြီး လက်ကို ဖြန့်နိုင်ပါက ၃ လမှ ၆ လအတွင်း လက်ကို ပြန်လည်အသုံးပြုနိုင်ခြေ များပါသည်။
* **နောက်ကျမှ လှုပ်ရှားနိုင်ခြင်း (ရက်သတ္တပတ် ၁ မှ ၄ ပတ်အတွင်း) -** ပထမ ၃ ရက်အတွင်း လုံးဝမလှုပ်ရှားနိုင်ပါက နောက် ၂ ပတ်မှ ၄ ပတ်အတွင်း စောင့်ကြည့်ပါ။ အကယ်၍ ကြွက်သားလှုပ်ခြင်း သို့မဟုတ် လက်ကို ရင်ဘတ်ဆီသို့ ရွှေ့နိုင်ခြင်းကဲ့သို့သော အခြေခံလှုပ်ရှားမှုများ ပြန်လည်စတင်လာပါက ဦးနှောက်အာရုံကြောလမ်းကြောင်းများ အလုပ်လုပ်နေဆဲဖြစ်ကြောင်း ပြသနေပါသည်။ သို့သော် လက်မောင်း၏ အခြေခံလှုပ်ရှားမှုများ ပြန်လည်ကောင်းမွန်လာနိုင်သော်လည်း လက်ချောင်းများကို သေသေသပ်သပ် အသေးစိတ်လှုပ်ရှားနိုင်ရန် ပိုမိုခက်ခဲနိုင်ပါသည်။”
* **လုံးဝမလှုပ်ရှားနိုင်ခြင်း (၄ ပတ်မှ ၆ ပတ်ကျော်အထိ) -** ပထမတစ်လကျော်သည်အထိ လက်သည် လုံးဝပျော့ခွေနေပြီး မည်သည့်လှုပ်ရှားမှုမျှ မရှိသေးပါက လက်ချောင်းငယ်များဖြင့်ပြန်လည်အသုံးပြုနိုင်ခြေ နည်းပါးသွားနိုင်ပါသည်။ ထိုအခါ နာကျင်မှုကို ကာကွယ်ရန်၊ အကြောများတောင့်တင်းမသွားစေရန်နှင့် ကောင်းမွန်နေသော ကျန်လက်တစ်ဖက်ကို နေ့စဉ်လူမှုကိစ္စများအတွက် ထိရောက်စွာ အသုံးပြုနိုင်ရန် လေ့ကျင့်ပေးခြင်းဘက်သို့ အလေးထားလေ့ကျင့်ရမည်။
**အခြား သတိပြုဖွယ် အချက်များ**
* **အထိအတွေ့ အာရုံခံစားမှု -** လက်မောင်းကို လက်ချောင်း သို့မဟုတ် တစ်ရှူးစက္ကူဖြင့် ညင်သာစွာ ထိတွေ့ကြည့်ပါ။ ထိတွေ့မှုကို ခံစားသိရှိနိုင်ခြင်းသည် ထုံကျင်နေခြင်းထက် ပိုမိုကောင်းမွန်သော လက္ခဏာဖြစ်ပါသည်။
**လူနာသည် အားနည်းနေသော ထိုလက်ကို သတိထားမိခြင်း ရှိ၊ မရှိ စောင့်ကြည့်ပါ။ အကယ်၍ ထိုအားနည်းသောဘက်ကို အမြဲတစေ မေ့လျော့နေခြင်း သို့မဟုတ် လျစ်လျူရှုထားခြင်း (Visuospatial neglect) ရှိပါက ဦးနှောက်အနေဖြင့် ထိုလက်ကို နေ့စဉ်လှုပ်ရှားမှုများတွင် ပြန်လည်ထည့်သွင်းရန် ခက်ခဲသောကြောင့် ပြန်လည်ကောင်းမွန်ရန် အချိန်ပိုယူရနိုင်ပါသည်။
ဤသို့ရိုးရှင်းစွာ စစ်ဆေးခြင်းသည် ယေဘုယျလမ်းညွှန်ချက်သာဖြစ်ပြီး ပိုမိုတိကျ၍ လူနာနှင့်ကိုက်ညီသော ပြန်လည်သန်စွမ်းရေး အစီအစဉ်များအတွက် Physiotherapist/Occupational therapist များ၏ စနစ်တကျ စစ်ဆေးအကဲဖြတ်မှုများကို မဖြစ်မနေ ရယူသင့်ပါသည်။
လက်ရှိလေဖြတ်ထားသောလက် ရဲ့ အခြေအနေနဲ့ ပတ်သက်လို့ ဆွေးနွေးချင်ရင် comment တွင် yes လို့ ရေးခဲ့ပီး chat box တွင် လက်လှုပ်ရှားမှု အခြေအနေ ကို video ပို့ပေးပီးဆွေးနွေးနိုင်ပါသည်။
